Ўзбекистон Республикаси Ҳукумати ва Бразилия Федератив Республикаси Ҳукумати (бундан кейин «Томонлар» деб аталувчилар),

иккала мамлакат ўртасида дўстлик ришталарини ва ўзаро ҳамкорликни кучайтириш мақсадида,

туризмнинг нафақат мамлакатлар ўртасидаги иқтисодий ҳамкорликнинг ривожланишида, балки ўзаро англашув ва ҳар икки мамлакат фуқаролари ўртасидаги биродарликни кучайтиришда муҳим омил эканлигини инобатга олган ҳолда,

иккала мамлакат ўртасида туризм соҳасидаги ҳамкорликни янада ривожлантириш заруриятини англаган ҳолда,

1. Томонлар икки мамлакат ўртасида ўзаро сайёҳлар алмашинувини яхшилаш мақсадида керакли чора-тадбирларни амалга оширадилар.

2. Томонлар ўз давлатларининг миллий қонунчилигига мувофиқ, ўзаро манфаатдорлик тамойиллари асосида, туризм саноатининг жадал ривожлантириш мақсадида амалга ошириладиган саъй-ҳаракатларни ўзаро мувофиқлаштирадилар.

Томонлар ўз давлатларининг миллий қонунчилигига мувофиқ, туризм соҳасидаги ваколатли органлари ва тегишли ташкилотлари ўртасида ҳамкорлик алоқаларини ривожлантирадилар. Бундай ҳамкорликни қуйидаги йўналишларда амалга оширадилар:

(а) маълумот ва статистика алмашадилар;

(б) биргаликда фаолиятнинг чора-тадбирларини кўрадилар;

(в) икки мамлакат туризм соҳасида тажриба ва профессионаллик даражасини ошириш мақсадида туризмни яхшилаш ҳамда ривожлантириш фаолияти билан машғул бўлган мутахассислар ва техникларнинг ўзаро ташрифларини алмашадилар;

(г) Жаҳон Туризм Ташкилоти (ЖТТ) ва бошқа туризм соҳасига оид халқаро ташкилотлар доирасида ягона ёндашувга эришиш учун ҳаракат қиладилар.

1. Томонлар туризм соҳасининг ваколатли органлари ўртасида икки мамлакатдаги миллий қонунчилик, маданий ва табиий бойликларни сақлаш ҳамда ҳимоялашга доир тартиб ва қоидалар, туристларнинг жойлаштирилиши, туристик агентликлар, маҳаллий ярмаркалар, фестиваллар ва кўргазмалар, келишувлар, конгресслар ва бошқа тадбирларга оид маълумотлар билан ўзаро алмашадилар.

2. Томонлар ўз мамлакатлари миллий қонунчилиги доирасида туризмни тарғибот қилишга доир ҳужжатлар ва материаллар билан ўзаро алмашиш имкониятларини кўриб чиқадилар.

1. Томонлар туризм инфратузилмасини ривожлантириш мақсадида ўз мамлакатлари хусусий секторлари ўртасида ҳамкорликни рағбатлантирадилар.

2. Томонлар туризм соҳасига ўзаро инвестициялар жалб қиладилар ва хорижий инвесторларга бериладиган инвестициявий имтиёзлар юзасидан маълумот алмашадилар.

1. Ушбу Англашув Меморандумини амалга ошириш бўйича ваколатли органлар сифатида қуйидагилар ҳисобланади:

(а) Ўзбекистон Республикаси номидан — «Ўзбектуризм» Миллий компанияси;

(б) Бразилия Федератив Республикаси номидан — Туризм вазирлиги.

2. Ушбу Англашув Меморандумида белгиланган вазифаларни бажариш мақсадида Томонлар ўз мамлакатларининг ваколатли органлари вакиллари иштирокида дипломатик каналлар орқали зарур ҳолларда юзага келадиган масалаларни ҳал қилиш мақсадида учрашувлар ташкил қиладилар.

1. Ушбу Англашув Меморандуми имзоланган санадан бошлаб кучга киради ва муддати чекланмаган ҳолда амал қилади.

2. Томонларнинг ҳар бири исталган вақтда дипломатик каналлар орқали ёзма равишда ушбу Англашув Меморандумининг фаолиятини тўхтатиш тўғрисида хабарнома тақдим этиши мумкин. Бунда хабарнома олинган санадан тўқсон (90) кун ўтгандан сўнг ушбу Англашув Меморандумининг амали тўхтатилган деб ҳисобланади.

3. Томонларнинг ўзаро келишувига кўра, ушбу Англашув Меморандумига дипломатик каналлар орқали ёзма равишда қўшимча ёки ўзгартишлар киритилиши мумкин.

4. Ушбу Англашув Меморандумини талқин қилишда ёки амалга татбиқ этишда юзага келадиган барча низо ва келишмовчиликлар Томонлар ўртасида дипломатик каналлар орқали музокаралар ўтказиш йўли билан ҳал қилинади.

Бразилиа шаҳрида 2009 йил 28 май куни икки асл нусхада ҳар бири ўзбек, португал ва инглиз тилларида тузилди, бунда барча матнлар бир хил кучга эга. Талқин этишда келишмовчиликлар юзага келган ҳолда, инглиз тилидаги матн устувор ҳисобланади.