Ўзбекистон Республикаси Вазирлар Маҳкамаси томонидан тақдим этилган Ўзбекистон Республикаси Давлат бюджетининг 2009 йил тўққиз ойидаги ижроси якунлари тўғрисидаги ҳисоботни кўриб чиқиб, Ўзбекистон Республикаси Олий Мажлисининг Қонунчилик палатаси қарор қилади :

1. Ўзбекистон Республикаси Давлат бюджетининг 2009 йил тўққиз ойидаги ижроси якунлари тўғрисидаги ҳисобот тасдиқлансин.

Ҳисобот даврида Давлат бюджети ялпи ички маҳсулотга нисбатан 0,2 фоиз миқдорда профицит билан ижро этилганлиги маълумот учун қабул қилинсин.

2. Ўзбекистон Республикаси Вазирлар Маҳкамаси иқтисодиётнинг энг муҳим тармоқларида замонавий диверсификация қилинган иқтисодиётни шакллантиришга қаратилган тузилмавий ўзгаришлар, модернизациялаш, техник ва технологик жиҳатдан янгилаш амалга оширилишини таъминласин. Қатъий ва аниқ мақсадга йўналтирилган пул-кредит сиёсати ўтказилишини, солиқ тушуми механизми такомиллаштирилишини, Давлат бюджети харажатлари самарадорлиги оширилиши ва унинг ижтимоий йўналтирилганлиги кучайтирилишини давом эттирсин. Бунда «Қишлоқ тараққиёти ва фаровонлиги йили» Давлат дастурини амалга ошириш давом эттирилишига алоҳида эътибор қаратсин.

3. Қорақалпоғистон Республикаси Вазирлар Кенгашининг, вилоятлар ва Тошкент шаҳар ҳокимликларининг эътибори бюджет интизомига риоя этилиши устидан назоратни кучайтириш, бюджетга солиқлар ва бошқа мажбурий тўловларнинг тўлиқ тушишини, минтақаларнинг молиявий салоҳиятини кенгайтириш юзасидан таъсирчан чоралар кўриш ва шу асосда маҳаллий бюджетлар харажатларини молиялаштиришни таъминлаш зарурлигига қаратилсин.

4. Ушбу Қарор қабул қилинган кундан эътиборан кучга киради.