Ўзбекистон Республикасининг «Давлат бюджетининг ғазна ижроси тўғрисида»ги ва «Бюджет тизими тўғрисида»ги қонунлари ҳамда Ўзбекистон Республикаси Президентининг 2006 йил 18 декабрдаги «Ўзбекистон Республикасининг 2007 йилги асосий макроиқтисодий кўрсаткичларини прогнози ва Давлат бюджети параметрлари тўғрисида»ги ПҚ-532-сон қарорининг (Ўзбекистон Республикаси қонун ҳужжатлари тўплами, 2006 й., 51-52-сон, 507-модда) 26-бандига ва Ўзбекистон Республикаси Президентининг 2007 йил 28 февралдаги «Давлат бюджетининг ғазна ижроси тизимини янада ривожлантириш чора-тадбирлари тўғрисида»ги ПҚ-594-сон қарорига (Ўзбекистон Республикаси қонун ҳужжатлари тўплами, 2007 й., 9-10-сон, 82-модда) асосан буюраман:

1. Илова қилинаётган Мудофаа мажмуи ва ҳуқуқни муҳофаза қилиш органлари муассасалари ва ташкилотларининг бюджет харажатлари ва бошқа махфий характерга эга бўлган бюджет харажатларнинг ғазна ижроси тартиби ҳақидаги низом тасдиқлансин.

2. Мазкур буйруқ Ўзбекистон Республикаси Адлия вазирлигида давлат рўйхатидан ўтказилган кундан бошлаб ўн кун ўтгандан кейин кучга киради.

Мазкур Низом Ўзбекистон Республикасининг «Давлат бюджетининг ғазна ижроси тўғрисида»ги ва «Бюджет тизими тўғрисида»ги қонунлари, Ўзбекистон Республикаси Президентининг 2006 йил 18 декабрдаги «Ўзбекистон Республикасининг 2007 йилги асосий макроиқтисодий кўрсаткичлари прогнози ва Давлат бюджети параметрлари тўғрисида»ги ПҚ-532-сон қарорининг (Ўзбекистон Республикаси қонун ҳужжатлари тўплами, 2006 й., 51-52-сон, 507-модда) 26-бандига асосан ва Ўзбекистон Республикаси Президентининг 2007 йил 28 февралдаги «Давлат бюджетининг ғазна ижроси тизимини янада ривожлантириш чора-тадбирлари тўғрисида»ги ПҚ-594-сон қарорига (Ўзбекистон Республикаси қонун ҳужжатлари тўплами, 2007 й., 9-10-сон, 82-модда) мувофиқ Ўзбекистон Республикаси Мудофаа вазирлиги, Ички ишлар вазирлиги ва Фавқулодда вазиятлар вазирлиги, Ўзбекистон Республикаси Давлат божхона қўмитаси, Ўзбекистон Республикаси Вазирлар Маҳкамаси ҳузуридаги Давлат захираларини бошқариш қўмиталари корхоналари, ташкилотлари, муассасалари ва ҳарбий қисмлари (кейинги ўринларда — бюджетдан маблағ олувчилар) бюджет харажатларининг, шу жумладан махфий харажатларнинг ғазна ижроси, шунингдек республика ва ҳудудий ғазна ҳисобварақларни ишлатган ҳолда махфий характерга эга бўлган бюджет харажатларининг ижроси тартибини белгилайди.

1. Бюджетдан маблағ олувчиларнинг товар (иш, хизмат)лар етказиб берувчилар (кейинги ўринларда — мол етказиб берувчилар) билан шартномаларини рўйхатга олиш ва уларнинг харажатларини тўлаб бериш, шу жумладан махфий характерга эга бўлган бюджет харажатлари тўловларини амалга ошириш бўйича вазифа ва функцияларни бажариш Ўзбекистон Республикаси Молия вазирлиги Ғазначилиги ва унинг ҳудудий бўлинмалари (кейинги ўринларда — ғазначилик бўлинмалари) томонидан амалга оширилади.

2. Давлат бюджети харажатларининг ғазна ижроси билан қамраб олинадиган ғазначилик бўлинмалари ва бюджетдан маблағ олувчиларнинг рўйхати, зарур ҳолларда тегишли вазирлик ва идоралар билан келишилган ҳолда, Ўзбекистон Республикаси Молия вазирлиги томонидан белгиланади.

Бюджетдан маблағ олувчилар билан ишлаш учун, шунингдек, махфий характерга эга бўлган харажатлар, жумладан Ўзбекистон Республикаси Вазирлар Маҳкамасининг захира жамғармаси, Қорақалпоғистон Республикаси, вилоятлар ва Тошкент шаҳар бюджетлари маблағлари ҳисобидан амалга оширилган ҳолларда, ҳар бир ғазначилик бўлинмасида махфий маълумотлар билан ишлашга ўрнатилган тартибда рухсат олган алоҳида ходимлар аниқланади.

3. Юқорида кўрсатилган бюджетдан маблағ олувчилар билан ишлашда Ўзбекистон Республикаси Молия вазирлигининг Ахборот-ҳисоблаш маркази ва ғазначилик бўлинмалари томонидан маълумотлар хавфсизлиги режимини таъминлаш бўйича зарур чоралар кўрилади.

4. Ғазна ҳисобварақларини ишлатган ҳолда Давлат бюджетининг ғазна ижросига ўтилиши муносабати билан Давлат бюджети қарамоғидаги бюджетдан маблағ олувчиларнинг хизмат кўрсатувчи банклардаги бюджет маблағлари бўйича талаб қилиб олингунгача депозит ҳисобварақлари, шу жумладан капитал қурилиш буюртмачиларининг марказлаштирилган манбалар ҳисобидан капитал қўйилмалар харажатлари бўйича банк ҳисобварақларини, жумладан:

республика бюджети ҳисобидан молиялаштириладиган (23404, 23405 ва 23422 ҳисобварақ);

Қорақалпоғистон Республикаси бюджети ҳисобидан молиялаштириладиган (23432, 23424 ва 23433 ҳисобварақ);

вилоят бюджетлари ҳисобидан молиялаштириладиган (23430, 23431 ва 23424 ҳисобварақ);

Тошкент шаҳрининг шаҳар бюджети ҳисобидан молиялаштириладиган (23426, 23424 ва 23427 ҳисобварақ);

туман ёки шаҳар бюджетлари ҳисобидан молиялаштириладиган (23426 ва 23427 ҳисобварақ) ишлатилиши тўхтатилади.

Бунда, бюджет маблағлари бўйича талаб қилиб олингунгача асосий депозит ҳисобварақлари ёпилган, юридик шахс мақомига эга бўлган, бюджет ташкилотлари учун юқоридаги ҳисобварақларда операциялар тўхтатилганидан сўнг бюджетдан ташқари маблағлар бўйича талаб қилиб олингунгача депозит ҳисобварақ (21504, 21506, 20203 ва 20204) асосий ҳисобварақ ҳисобланади.

5. Бюджет маблағлари бўйича талаб қилиб олгунгача депозит ҳисоб рақамларни ёпишда Давлат бюджетидан молиялаштириладиган, бюджетдан маблағ олувчиларнинг бюджет маблағлари бўйича талаб қилиб олгунгача депозит ҳисоб рақамларидаги маблағлар қолдиқлари бюджетдан маблағ олувчиларнинг тўлов топшириқномалари асосида хизмат кўрсатувчи банклар томонидан 23404, 23405, 23422, 23424, 23426, 23427, 23430, 23431, 23432 ва 23433 ҳисобварақлардан тегишли республика ёки ҳудудий ғазна ҳисобварақларига (кейинги ўринларда — ғазна ҳисобварақлари) ўтказилади.

6. Бюджетдан маблағ олувчиларнинг ходимларига иш ҳақи тўлаш учун ғазначилик бўлинмалари томонидан уларга хизмат кўрсатувчи банкларда 23212 «Молия вазирлиги Ғазначилигининг маблағи» ва 23214 «Ҳудудий Ғазначилик бўлинмаларининг маблағи» ҳисобварақлари очилади.

7. Ўзбекистон Республикаси Вазирлар Маҳкамасининг 1999 йил 3 сентябрдаги 414-сонли «Бюджет ташкилотларини маблағ билан таъминлаш тартибини такомиллаштириш тўғрисида»ги қарорига (Ўзбекистон Республикаси Ҳукумати қарорлари тўплами, 1999 й., 9-сон, 51-модда) мувофиқ бюджетдан маблағ олувчиларнинг Давлат бюджети харажатлари иқтисодий таснифининг (кейинги ўринларда — харажатларнинг иқтисодий таснифи) 4 гуруҳ харажатлари бўйича Давлат бюджетидан маблағ билан таъминлаш белгиланган.

Бунда, республика ғазна ҳисобварағида, шунингдек, ҳудудий ғазна ҳисобварақларда биринчи ва иккинчи гуруҳ бўйича тўланмаган харажатлар суммасидан ортиқча миқдорда маблағ қолдиқлари мавжуд бўлган ҳолларда, ой давомида учинчи ва тўртинчи гуруҳ харажатлари бўйича ошган сумма миқдорида харажатларни амалга оширишга рухсат берилади.

8. Тегишли молия органларида ўрнатилган тартибда рўйхатга олинган бюджет маблағлари бўйича якка тартибдаги ва умумий харажатлар сметаси ҳамда уларга ўзгартиришлар бюджетдан маблағ олувчилар ёки молия органлари томонидан ғазначилик бўлинмаларига тақдим этилади.

9. Ғазначилик бўлинмалари томонидан юридик ва молиявий мажбуриятларни рўйхатга олиш ва касса харажатларини амалга ошириш фақат уларга бюджетдан маблағ олувчилар ёки молия органлари бюджет маблағлари бўйича харажатлар сметаларини тақдим қилгандан сўнг амалга оширилиши мумкин.

10. Йил бошида, бюджетдан маблағ олувчиларнинг рўйхатга олинган харажатлар сметалари мавжуд бўлмаганда, «Бюджет тизими тўғрисида»ги Ўзбекистон Республикаси Қонунининг 33-моддасига мувофиқ, молия органлари томонидан ўрнатилган тартибда рўйхатга олинган вақтинчалик чораклик харажатлар сметалари (кейинги ўринларда – вақтинчалик харажатлар сметалари) асосида бошланган молия йилида бюджетдан маблағ олувчиларнинг юридик ва молиявий мажбуриятлари рўйхатга олиниши ва харажатлари амалга оширилиши мумкин.

11. Капитал қурилиш объектлари бўйича капитал қурилиш буюртмачилари капитал қурилиш объектлари бўйича тегишли молия органлари билан келишилган, қурилишларнинг манзилли рўйхати (лойиҳа-тадқиқот ишларининг манзилли рўйхати) ва қурилишларнинг титул рўйхати асосида тузилган, харажатларнинг ойлик бўлинмасини (кейинги ўринларда — капитал қурилиш бўйича харажатлар сметаси) ғазначилик бўлинмаларига тақдим қилади.

Капитал қурилиш бўйича харажатлар сметасига аниқликлар қурилишларнинг аниқланган манзилли ва титул рўйхатлари асосида, конкурс савдоларининг ўтказилиши ва юқоридаги қурилишлар рўйхатларини ўрнатилган тартибда тасдиқланишига қараб киритилади.

12. Ғазначилик бўлинмалари бюджетдан маблағ олувчиларнинг мол етказиб берувчилар билан шартномалар тузиши ва улар томонидан харажатлар иқтисодий таснифининг тегишли моддалари бўйича кредиторлик қарзларни ҳисобга олган ҳолда, харажатларни бюджетдан ажратиладиган маблағлар бўйича харажатлар сметасида кўрсатилган лимитлар доирасида амалга оширилиши устидан назорат қилади.

13. Асосий харажатлар сметалари рўйхатга олингандан сўнг, бюджетдан маблағ олувчилар ва уларнинг мол етказиб берувчилар билан вақтинчалик харажатлар сметалари асосида олдин тузган шартномаларини рўйхатга олинган асосий харажатлар сметаларига мувофиқлаштириш мақсадида, зарур бўлган ҳолларда, ўзгартиришлар киритилиши мумкин.

14. Якка тартибдаги харажатлар сметаларини рўйхатга олишда вақтинчалик харажатлар сметасида тасдиқланган бюджет маблағларининг асосий харажатлар сметасида кўзда тутилган харажатлар иқтисодий таснифининг тегишли моддалари бўйича ажратилган бюджет маблағларидан ошишига йўл қўйилмайди.

15. Тегишли бюджетларнинг даромадлар ва харажатлар ёйилмасига, бюджетдан маблағ олувчиларнинг харажатлар сметаларига, капитал қурилишнинг смета харажатларига (қурилишларнинг манзилли ва титул рўйхатларига (лойиҳа-тадқиқот ишларининг манзилли рўйхатига) ўзгартиришлар киритиш, молия органлари томонидан бюджетдан маблағ олувчилар, буюртмачилар ҳамда киритилаётган ўзгартиришларни тегишли ғазначилик бўлинмалари билан мажбурий тартибда келишилган ҳолда амалга оширилади.

16. Қабул қилинган юридик ва молиявий мажбуриятларнинг бюджетдан ажратилган маблағлар суммасидан, шунингдек, касса харажатларининг аниқланган ажратилган бюджет маблағлари суммасидан ортиқча амалга оширилишига олиб келадиган миқдорда бюджет маблағларини камайтиришга йўл қўйилмайди.

Шу билан бирга, ажратиладиган бюджет маблағларининг камайтирилиши томонлар юридик мажбуриятини ўзаро камайтирган ҳолда амалга оширилиши мумкин.

Ажратилган бюджет маблағлари кўпайтирилгандан сўнг, бюджетдан маблағ олувчилар ва уларнинг мол етказиб берувчилари ўртасида тузилган хўжалик шартномаларига томонларнинг юридик мажбуриятлари айнан бир хилда кўпайтирилишини кўзда тутадиган ўзгартиришлар киритиш мумкин.

17. Бюджет ташкилотлари ташаббуси билан харажатлар сметаларига киритилаётган камайтиришларнинг ғазначилик бўлинмалари билан келишуви қуйидаги тартибда амалга оширилади:

1) бюджетдан маблағ олувчи тегишли хат билан хизмат кўрсатувчи ғазначилик бўлинмасига бюджет маблағлари бўйича харажатлар сметасига ўзгартириш сўровномасини (кейинги ўринларда — сўровнома) тақдим қилади;

2) ғазначилик бўлинмаси:

тузилган ва рўйхатга олинган шартномалар (касса харажатлари) суммаларини таклиф қилинаётган аниқликларни ҳисобга олган ҳолда аниқланган (таклиф қилинаётган) бюджетдан ажратилган маблағлар суммаларидан ошмаганлиги бўйича сўровномани текширади;

камайтириш режалаштирилаётган режали бюджет маблағлари бўйича бюджетдан маблағ олувчининг тегишли харажатлар моддалари бўйича мажбуриятларни рўйхатга олиш ва харажатлар тўловларини амалга оширишни ваколатли орган томонидан бюджетдан маблағ олувчининг харажатлар сметасига ўзгартиришлар киритиш тўғрисидаги тегишли қарори қабул қилингунга қадар (камайтириш кўзланаётган суммалар қисмида), тўхтатиб қўяди;

икки иш кунидан ошмаган муддатда сўровномага «КЕЛИШИЛДИ» штамп, имзо ва рўйхатга олинган сана қўйилган ҳолда бюджетдан маблағ олувчига қайтарилади.

3) ғазначилик бўлинмасига келишув учун тақдим қилинган ўзгартириш сўровномаси асосли сабабларга кўра қондирилиши мумкин бўлмаган ҳолларда, ғазначилик бўлинмаси уч кун муддатда қайтариш сабабларини кўрсатган ҳолда ёзма равишда қайтаради.

18. Бюджетдан маблағ олувчи келишилган сўровномани олгандан сўнг икки иш куни мобайнида уни ажратилган бюджет маблағларини бош тақсимловчиси орқали тегишли молия органига юборади.

Молия органи ўзгартириш киритишни рад қилган ҳолатда, бюджетдан маблағ олувчи мажбуриятлар олиш ва харажатларни амалга оширишни тўхтатиб қўйилишини бекор қилиш учун тегишли молия органининг хатини илова қилган ҳолда хизмат кўрсатувчи ғазначилик бўлинмасига хат юборади.

19. Агар марказлаштирилган бухгалтерия ёки бюджет ташкилоти бухгалтерияси томонидан юридик мақомга эга ва эга бўлмаган бир нечта бюджетдан маблағ олувчига хизмат кўрсатилса ва уларнинг харажатлари олдин битта бюджет банк ҳисобварағидан амалга оширилган бўлса, у ҳолда улар томонидан ғазначилик бўлинмаларига якка тартибдаги сметаларни илова қилган ҳолда битта умумий харажатлар сметаси тақдим этилади.

Бунда, ғазначилик бўлинмалари томонидан бундай ташкилотларнинг юридик ва молиявий мажбуриятларини қабул қилиш, шунингдек, харажатлар тўловларини амалга ошириш устидан назорат тақдим қилинган умумий харажатлар сметаси бўйича амалга оширилади.

20. Бюджетдан маблағ олувчиларнинг тасдиқланган бюджетдан ажратилган маблағларига камайтиришлар киритилиши зарур бўлганда, мазкур Низомнинг 17-бандида кўрсатилган ҳолатлардан ташқари, молия органлари бюджетдан маблағ олувчиларнинг бюджет маблағлари бўйича харажатлар сметаларига ўрнатилган тартибда ўзгартиришлар киритишга асос бўладиган ҳужжатлар лойиҳаси, ҳисоб-китоблар билан биргаликда тегишли ғазначилик бўлинмасига тақдим қилинади (тақдимнома, маълумотнома-билдиришнома ва бошқалар).

21. Юқоридаги ҳужжатлар лойиҳалари, ҳисоб-китоблар билан биргаликда молия органлари томонидан ғазначилик бўлинмаларига улар тузилган кундан сўнг икки иш кунидан кечикмаган муддатда келишиш учун тақдим қилинади.

22. Ғазначилик бўлинмалари мазкур Низомнинг 20-бандида кўрсатилган, таклиф қилинаётган ўзгартиришларни киритиш мумкинлиги юзасидан тегишли бюджетларда турувчи бюджетдан маблағ олувчилар бўйича тегишли бўлим, боб, параграфлар ва харажатлар моддалари бўйича амалга оширилган касса харажатлари, шунингдек, банд қилинмаган юридик ёки молиявий мажбуриятларни тасдиқланган бюджетдан ажратилган маблағлар билан солиштириш орқали кўриб чиқади.

Бунда, ҳудудларда жойлашган, республика бюджетидан маблағ олувчилар ўзгартириш бўйича юқорида кўрсатилган ҳужжатларни жойлардаги жойидаги тегишли ғазначилик бўлинмасига тақдим қилади.

23. Текширувлар ижобий натижалар берганда ва кўрсатилган харажатлар турлари бўйича ажратилган бюджет маблағларига таклиф қилинаётган ўзгартиришлар киритишнинг имкони мавжуд бўлганда, ғазначилик бўлинмалари:

Ғазначиликнинг дастурий мажмуида камайтирилиши кўзланаётган тегишли бюджет маблағларини тақсимловчилар (олувчилар)нинг шахсий ғазна ҳисобварақларидаги тегишли бўлим, боб, параграф ва харажатлар моддалари бўйича кейинги юридик ва молиявий мажбуриятларни рўйхатга олиш ва касса харажатларини амалга оширишни тўхтатиб қўяди;

ҳужжатлар тақдим қилинган куннинг кейинги кунидан кечикмаган муддатда, ижобий хулосани тақдим қилинган ҳужжатлар билан биргаликда тегишли молия органига йўллайди.

Бунда, ғазначилик бўлинмалари томонидан юридик ва молиявий мажбуриятларни қабул қилиш, шунингдек, бюджетдан маблағ олувчиларнинг кейинги касса харажатларини амалга оширишни тўхтатиб қўйишни бекор қилиш, молия органлари томонидан ғазначилик бўлинмаларига, ғазначилик бўлинмалари билан ўрнатилган тартибда келишилган асосда барча тасдиқланган ва рўйхатга олинган, бюджетдан маблағ олувчиларнинг тасдиқланган бюджетдан ажратилган маблағларига, тегишли якка тартибдаги сметаларига киритилган ўзгартиришлар рўйхати нусхалари тақдим қилингандан сўнг амалга оширилади.

24. Юридик ва молиявий мажбуриятлар билан банд бўлмаган ажратилган маблағлар мавжуд бўлмаганда ҳамда молия органларига тақдим қилинган ҳужжатларда таклиф қилинаётган ўзгартиришлар киритишнинг имкони бўлмаган ҳолларда, ғазначилик бўлинмалари уларни молия органлари томонидан ҳужжатлар ва ҳисоб-китоблар тақдим қилинган кундан бошлаб икки иш кунидан кечикмаган муддатда, таклиф қилинаётган ўзгартиришларни киритиш имкони йўқлиги сабабларини кўрсатган ҳолда ёзма хулоса тузади ва молия органига қайтаради.

25. Ҳужжатлар лойиҳаси ва ҳисоб-китоблар бўйича молия органи ғазначилик бўлинмасидан салбий хулоса олгандан сўнг, молия органи ўрнатилган тартибда ҳужжатларни қайта ишлаш ва бюджетдан маблағ олувчиларнинг тасдиқланган бюджетдан ажратилган маблағларига ўзгартиришлар киритишга тўсқинлик қилувчи сабабларни бартараф қилиш бўйича чоралар кўради.

26. Ғазначилик бўлинмалари томонидан Ғазначилик дастурий мажмуида шахсий ғазна ҳисобварақлар очишда бюджетдан маблағ олувчилар томонидан икки нусхада имзо намуналари ва муҳр изи карточкалари (кейинги ўринларда — карточка) тақдим қиладилар (карточка шакли Ўзбекистон Республикаси Молия вазирлиги томонидан белгиланади).

Бунда, карточкаларнинг бир нусхаси юридик мажбуриятларни рўйхатга олувчи мутахассисда, иккинчи нусхаси эса бюджетдан маблағ олувчиларнинг харажатлари тўловларини амалга оширувчи мутахассисда сақланади. Карточкалар мажбурий равишда юқори турувчи ташкилот (ёки нотариус) томонидан тасдиқланади, тасдиқлаш талаб қилинмайдиган давлат муассасаларининг имзо намуналари ва муҳр изи карточкалари бундан мустасно.

Карточкаларда бюджетдан маблағ олувчилар учун ғазначилик бўлинмаларида очилган шахсий ғазна ҳисобварақлар рақамлари мажбурий тартибда кўрсатилади.

27. Карточкага ташкилотнинг раҳбари, бош ҳисобчиси ва юрист маслаҳатчиси ёки раҳбар томонидан ваколат берилган шахснинг имзо намуналари қўйилади ва улар ташкилот муҳри билан тасдиқланади. Агар бюджетдан маблағ олувчида тасдиқланган штат жадвалига асосан юрист маслаҳатчи штати кўзда тутилмаган бўлса, унинг имзо намунаси карточкада бўлиши талаб қилинмайди.

28. Карточкадаги имзо намуналарига (биринчи ва иккинчи) имзо ҳуқуқига эга бўлган, тегишли ходимлар (кейинги ўринларда — мансабдор шахслар деб юритилади) ўз қўллари билан қўйиши шарт (факсимил орқали қўйилишига йўл қўйилмайди).

Биринчи имзо ҳуқуқи бош ҳисобчига ёки иккинчи имзо ҳуқуқига эга бошқа шахсларга берилиши мумкин эмас.

29. Вақтинчалик биринчи ёки иккинчи имзо ҳуқуқи берилганда, шунингдек, раҳбар томонидан ваколат берилган жавобгар шахслардан бири вақтинчалик алмаштирилганида янги карточка тўлдирилмайди, фақат вақтинча ваколатга эга бўлган шахснинг имзо намунаси бўлган қўшимча карточканинг амал қилиш муддати кўрсатилган ҳолда тақдим қилинади. Ушбу вақтинчалик карточкага раҳбарнинг имзоси қўйилади, муҳр изи билан тасдиқланади ҳамда нотариус ёки юқори турувчи ташкилот томонидан тасдиқланади.

30. Ташкилот муҳри ўзгарганда, карточкада акс эттирилган имзоларнинг бирортаси алмашганда ёки қўшимча киритилганда, ўрнатилган тартибда бюджетдан маблағ олувчи нотариус ёки юқори турувчи ташкилот томонидан тасдиқланган янги карточка тақдим қилади.

Имзо намуналари ва муҳр изи карточкалари ғазначилик бўлинмасида ўрнатилган тартибда ҳисоб юритиш ва сақлаш учун қолади.

Бундан ташқари, бюджетдан маблағ олувчи — ташкилот раҳбарининг буйруғи билан ғазначилик бўлинмалари билан ишлаш учун ходимлар рўйхати тасдиқланади.

31. Бюджетдан маблағ олувчиларнинг товар (иш, хизмат) етказиб берувчилар билан шартномалари, шунингдек, Давлат бюджети ҳисобидан капитал қурилиш буюртмачиларининг шартномалари ғазначилик бўлинмаларида мажбурий рўйхатга олинади.

Бунда, бюджетдан маблағ олувчиларнинг товар (иш, хизмат) етказиб берувчилар билан бюджет маблағлари ҳисобидан тузадиган шартномаларида қонун ҳужжатларида кўзда тутилган ҳолатлардан ташқари, белгиланган тартибда 15 фоиз миқдорида олдиндан тўлов амалга оширилиши кўзда тутилади.

32. Ғазначилик бўлинмалари бюджетдан маблағ олувчиларнинг иккинчи томон олдидаги юридик мажбуриятини белгиланган тартибда, улар ўртасида тузилган шартнома асосида рўйхатга олади.

33. Бюджетдан маблағ олувчилар томонидан юридик мажбуриятларнинг қабул қилиниши, уларнинг харажатлар сметаларида иқтисодий таснифнинг тегишли моддалари бўйича кўзда тутилган, ажратиладиган бюджет маблағлари ҳажми доирасида амалга оширилади.

34. Бюджетдан маблағ олувчилар томонидан фақат молиялаштириш манбаи ва ҳажми мавжудлиги тўғрисида тасдиқ мавжуд бўлган сотиб олиш ҳажмига шартнома тузилиши мумкин.

35. Харажатлар сметасида кўзда тутилган ажратиладиган бюджет маблағлари суммаси асосида аниқланган юридик мажбуриятлар ҳажми бюджет маблағлари ҳисобидан тўланиши лозим бўлган, молия йили бошига тегишли моддалар бўйича мавжуд кредиторлик қарзи суммасига камайтирилади.

36. Бюджетдан маблағ олувчилар молия йили бошига мавжуд кредиторлик қарзининг иқтисодий таснифнинг маълум моддаларига, функционал таснифнинг бўлими ва параграфига алоқадорлигини кўрсатган ҳолда, жорий молия йилида хўжалик операциялар бошлангунига қадар ғазначилик бўлинмаларига ёзма равишда маълумот тақдим қилади.

37. Бюджетдан маблағ олувчиларга тўлов манбаи сифатида ажратиладиган бюджет маблағларини белгилаган холда, молия йилидан ошадиган муддатга харид учун, шунингдек, лизинг ва (ёки) бошқа турдаги кредитга харид қилиш учун шартнома тузиш тақиқланади.

38. Бюджетдан маблағ олувчиларнинг харажатлари бир вақтнинг ўзида бир нечта параграф (шахсий ҳисобварақ) бўйича амалга оширилганда, шартномаларда ҳар бир ғазна шахсий ҳисобварағи (параграфи) бўйича суммалар алоҳида кўрсатилади.

39. Товар (иш, хизмат)лар тўлови бир нечта манбалар маблағи ҳисобидан амалга оширилиши кўзда тутилган ҳолларда, шартномаларда мажбурий равишда ушбу манбалар бўйича реквизитлар ва улар ҳисобидан тўланиши лозим бўлган суммалар алоҳида кўрсатилади.

40. Давлат бюджети маблағлари ҳисобидан капитал таъмирлашни амалга оширишда шартномаларга бюджетдан маблағ олувчилар томонидан ўрнатилган тартибда бино ва иншоотларни капитал таъмирлаш манзилли рўйхати, шунингдек:

мазкур Низомнинг 1-сонли иловасига мувофиқ шаклда тўлов жадвали;

дефект далолатномаси;

смета-лойиҳа ҳужжатлари (СЛҲ тайёрловчилар қонун ҳужжатларида белгиланган тартибда берилган тегишли лицензияга эга бўлишлари лозим);

конкурс танлови ўтказилганлиги тўғрисидаги баённома, агар шартнома суммаси 25 минг АҚШ доллари миқдоридан ошса, тендер савдолари ўтказилганлиги тўғрисидаги баённома;

бино ва иншоотларни капитал таъмирлашга лойиҳа-смета ҳужжатларининг экспертизадан ўтказилганлигини тасдиқловчи ҳужжатлар;

бино ва иншоотларни капитал таъмирлашга тендер ҳужжатларининг экспертизадан ўтказилганлигини тасдиқловчи ҳужжатлар (агар шартнома суммаси 25 минг АҚШ доллари миқдоридан ошса);

буюртмачининг ўрнатилган тартибда тузган конкурс савдолари натижалари тўғрисидаги ҳисоботи (архитектура ва қурилиш бўйича Давлат қўмитаси томонидан тасдиқланган) тақдим қилинади.

41. Давлат бюджети маблағлари ҳисобидан махсус асбоб-ускуна, ҳарбий техника, қурол-яроғ, хўжалик ва бошқа ҳарбий буюмларнинг капитал таъмирлашини амалга оширишга шартномалар билан бирга бюджетдан маблағ олувчилар томонидан қуйидагилар тақдим қилинади:

мазкур Низомнинг 1-сонли иловасига мувофиқ шаклда тўлов жадвали;

дефект далолатномаси;

конкурс танлови ўтказилганлиги тўғрисидаги баённома, агар шартнома суммаси 100 минг АҚШ доллари миқдоридан ошса, тендер савдолари ўтказилганлиги тўғрисидаги баённома;

капитал таъмирлашга тендер ҳужжатларининг экспертизадан ўтказилганлигини тасдиқловчи ҳужжатлар (агар шартнома суммаси 100 минг АҚШ доллари миқдоридан ошса).

42. Бюджетдан маблағ олувчилар шартномаларга қўшимча равишда, мол етказиб берувчилардан уларнинг тегишли органларда рўйхатга олинганлигини тасдиқловчи ҳужжатлар нусхаларини сўраб оладилар.

Бундан ташқари, бюджетдан маблағ олувчилар томонидан товар-моддий бойликлар сотиб олинаётганда, мол етказиб берувчиларнинг улгуржи савдо қилишга лицензияси ва рўйхатга олинганлиги тўғрисидаги гувоҳномасининг (хусусий тадбиркорлар учун) нотариал тасдиқланган нусхалари мол етказиб берувчилардан талаб қилинади.

Юқоридаги ҳужжатлар ғазначилик бўлинмаларига рўйхатга олиш учун тақдим қилинган шартномалар билан биргаликда тақдим қилинади.

43. Бюджетдан маблағ олувчиларнинг ички хўжалик юритувчи бўлинмалари томонидан товарлар етказиб бериш, ишлар бажариш ёки хизматлар кўрсатиш (Ўзбекистон Республикаси Қуролли кучлари бўлинмалари ва Ўзбекистон Республикаси ИИВ Жазони ижро этиш Бош бошқармасининг кир ювиш бўлинмалари, меҳмонхоналари, таъмирлаш-қурилиш гуруҳлари (бригадалари) ва қишлоқ хўжалиги маҳсулотларини етиштириш ва гўшт-сут маҳсулотларини ишлаб чиқариш билан шуғулланадиган ёрдамчи хўжаликлари) қонун ҳужжатларида белгиланган тартибга мувофиқ бюджет маблағлари ҳисобидан ички хўжалик шартномалари ва тўловларни амалга ошириш учун асос бўладиган, ички хўжалик шартномалари бўйича товар (иш, хизмат)лар етказиб берилганлигини тасдиқловчи ҳужжатлар асосида амалга оширилади.

Бунда, бюджетдан маблағ олувчилар томонидан тақдим қилинган ҳужжатлар асосида тўловларни ўтказиш ғазначилик бўлинмалари томонидан Ўзбекистон Республикаси Мудофаа вазирлигининг ва ИИВ Жазони ижро этиш Бош бошқармасининг, қоидага кўра, бюджетдан ташқари ҳисобварақларига кейинчалик уларни қонун ҳужжатларига мувофиқ кўзда тутилган мақсадларга ишлатиш билан амалга оширилади.

44. Шартномалар тузмасдан, фақат тақдим қилинган тўлов топшириқномалари асосида бюджет маблағлари қуйидагиларга:

суд қарорлари бўйича тўловлар, давлат божлари, йиғимлар тўлаганда, юридик мажбуриятлар қабул қилиниши бошқа тасдиқловчи ҳужжатлар (ҳисобварақлар, квитанциялар, Ҳукумат қарорлари ва бошқалар) асосида шартномалар тузмасдан амалга оширилиши мумкин;

ҳисобот чораги (йили) якуни бўйича бюджет маблағларининг иқтисод қилинган қисмида Бюджет ташкилотларининг ривожлантириш жамғармасига ўтказилади.

45. Бюджетдан маблағ олувчилар сўмдаги қийматига қайта ҳисобланган, чет эл валютасидаги импорт қилинаётган товар-моддий бойликлар учун шартномалар тузишда юзага келиши мумкин бўлган курс фарқини қоплаш учун етарли бюджетдан ажратилган маблағлар захирасини кўзда тутишлари шарт.

Юзага келиши мумкин бўлган курс фарқини қоплаш учун етарли бюджетдан ажратилган маблағларининг захираси ҳар бир шартнома бўйича якка тартибда бюджетдан маблағ олувчилар ва ғазначилик бўлинмалари томонидан, зарур бўлганда — тегишли молия органи иштирокида шартноманинг тузилган санаси, кўзда тутилаётган муддатлари ва валюта курсининг кутилаётган ўзгаришлари билан боғлиқ ҳолда аниқланади.

46. Суммаси чет эл валютасида кўрсатилган шартномалар ва ҳисобварақ-фактуралар асосида импорт қилинган товарлар (ишлар, хизматлар) бўйича юридик ва молиявий мажбуриятлар ғазначилик бўлинмалари томонидан охирги тўлов санасида ушбу вақтгача ҳосил бўлган касса харажатлари йиғиндисининг ўртача курси бўйича амалга оширилади.

47. Бюджетдан маблағ олувчиларнинг мол етказиб берувчилар билан тузган шартномалари Ўзбекистон Республикасининг «Хўжалик юритувчи субъектлар фаолиятининг шартномавий-ҳуқуқий базаси тўғрисида»ги Қонунига мувофиқ, томонларнинг юридик хизматлари (жалб қилинган адвокатлар) томонидан мажбурий тартибда қонун ҳужжатларига мувофиқлиги текширилиши шарт.

Бунда, агар шартноманинг суммаси Ўзбекистон Республикасида белгиланган энг кам иш ҳақининг 200 баравари миқдоридан ошмаса, шартномаларга юристлар визаси қўйилади. Шартноманинг суммаси, Ўзбекистон Республикасида белгиланган энг кам иш ҳақининг 200 баравари миқдоридан ошган ҳолларда, шартномаларга томонларнинг юридик хизмати ёки жалб қилинган адвокатларнинг хулосалари илова қилиниши лозим.

48. Шартномалар, шунингдек, уларга қўшимча келишувлар аниқ ва равшан, сиёҳ ёки шарикли ручка ёки (ёзув, ҳисоблаш) машинада ёзилган ҳолда тўлдирилиши лозим. Ҳеч қандай тузатишлар, ўчириб ёзишлар ёки тўғрилашларга олдиндан келишиб олинган бўлса ҳам йўл қўйилмайди.

49. Бюджетдан маблағ олувчилар ва мол етказиб берувчилар билан тузилган шартномалар қуйидаги талабларга риоя қилинган ҳолда ғазначилик бўлинмаларига тақдим қилинади:

100 минг АҚШ долларига тенг бўлган миқдоригача (тенг бўлганда ҳам), шартномаларни мол етказиб берувчини танлаш бўйича конкурс танлови ўтказилганлиги тўғрисидаги ҳужжатлари илова қилинган ҳолда тақдим қилиш. Бунда, конкурс танловини ўтказиш мол етказиб берувчини танлаш бўйича камида иккита конкурс таклифи бўлганда, қонун ҳужжатларида кўзда тутилган ҳоллардан ташқари, конкурс таклифларини кўриб чиқиш асосида Конкурс танлови баённомасини расмийлаштириш орқали амалга оширилади;

шартноманинг умумий суммаси 100 минг АҚШ долларининг сўмдаги қийматидан юқори бўлганда, қонунчиликка мувофиқ ўтказилган тендер савдолари тўғрисидаги ҳужжатларни шартномага илова қилинган ҳолда тақдим қилинади.

Юқоридаги талаблар коммунал хизмат кўрсатишга тузиладиган шартномаларга, монополист корхоналар билан капитал қурилишга пудрат ва биноларни (иншоотларни) капитал таъмирлаш шартномалари бўйича, шунингдек, шартномалар тузишнинг қонун ҳужжатларида кўзда тутилган айрим ҳолларига тегишли эмас.

50. Бюджетдан маблағ олувчилар ва мол етказиб берувчилар билан бюджет маблағлари ҳисоби қисмидан тузилган шартномалар, фақат уларнинг ғазначилик бўлинмаларида рўйхатга олинганидан сўнг кучга киради.

51. Бюджетдан маблағ олувчилар билан мол етказиб берувчилар ўртасида тузиладиган шартномалар тегишли ғазначилик бўлинмаларида уларга берилган тегишли рақам ва рўйхатга олинган сана кўрсатилган ҳолда мажбурий рўйхатга олиниши лозим.

Бюджетдан маблағ олувчилар, ғазначилик бўлинмаларига шартномаларни рўйхатга олиш учун улар тузилган кундан сўнг 10 иш кунидан кечикмаган муддатда тақдим қилади.

52. Бюджетдан маблағ олувчилар ғазначилик бўлинмаларига шартномани рўйхатга олиш учун шартноманинг икки асл нусхаси ва битта кўчирма нусхасини тақдим қилади. Шартномаларга мазкур Низомнинг 1-иловасига мувофиқ шаклда тўлов жадвали илова қилиниши лозим.

53. Ғазначилик бўлинмаси бюджетдан маблағ олувчи томонидан шартнома тақдим қилинган кундан бошлаб уч иш куни давомида шартномада кўрсатилган суммани бюджетдан маблағ олувчининг харажатлар сметасида кўзда тутилган тегишли режали ажратилган бюджет маблағларининг мавжудлигини текширади.

Агар тузилган шартномага мувофиқ тўланиши лозим бўлган пул маблағлари суммаси бюджетдан маблағ олувчининг харажатлар сметасида кўзда тутилган тегишли режали ажратилган бюджет маблағлари суммасидан ошса, ушбу шартнома бюджетдан маблағ олувчига уни ғазначилик бўлинмаси томонидан рўйхатга олинмасдан қайтарилади.

54. Шартномаларни рўйхатга олиш, шартноманинг асл ва кўчирма нусхаларининг барча варақларига «Рўйхатдан ўтказилди» штампини қўйиш ва рўйхатга олиш рақами ва санаси кўрсатилиши, ғазначилик бўлинмасининг мансабдор шахси ўзининг шахсий имзоси ва ғазначилик бўлинмасининг муҳр изи билан тасдиқлаши орқали амалга оширилади. Рўйхатга олингандан сўнг рўйхатга олинган шартноманинг кўчирма нусхаси ғазначилик бўлинмасида ҳисоб юритиш ва сақлаш учун қолдирилади.

55. Шартномалар ҳисоби Ғазначилик дастурий мажмуида электрон тарзда бюджетдан маблағ олувчи ва мол етказиб берувчининг номи ва реквизитлари, шунингдек, шартнома суммаси, унинг рақами ва тузилган санаси, ғазначилик бўлинмаси томонидан уни рўйхатга олиш рақами ва санаси кўрсатилган ҳолда бюджетдан маблағ олувчиларнинг товар (иш, хизмат)лар етказиб берувчилар билан тузган шартномаларини рўйхатга олиш Китобида мазкур Низомнинг 2-иловасига мувофиқ шакл бўйича амалга оширилади.

56. IV гуруҳ харажатларнинг махфий харажатлари бўйича юридик мажбуриятларни рўйхатга олиш учун бюджетдан маблағ олувчи томонидан ғазначилик бўлинмасига шартноманинг асл нусхаси, шунингдек, юридик мажбуриятларни рўйхатга олиш учун Сўровнома мазкур Низомнинг 3-иловасига мувофиқ (кейинги ўринларда — сўровнома) шакл бўйича уч нусхада тақдим қилинади.

57. Сўровнома бюджетдан маблағ олувчи томонидан тузилади ва шартнома тузилган кундан сўнг уч иш кунидан кечикмаган муддатда хизмат кўрсатувчи ғазначилик бўлинмасига тақдим қилинади. Сўровномага мазкур Низомнинг 1-иловасига мувофиқ шакл бўйича Тўлов жадвали илова қилиниши лозим.

Ғазначилик бўлинмасининг масъул ходими бюджетдан маблағ олувчининг ваколатли вакили иштирокида сўровномада кўрсатилган маълумотларни шартноманинг асл нусхасида кўрсатилган маълумотлар билан солиштиради.

Шартноманинг асл нусхаси билан солиштириш тугагандан сўнг бюджетдан маблағ олувчи ташкилотнинг ваколатли вакилига қайтарилади.

Ғазначилик бўлинмаси ходимлари томонидан тақдим қилинган шартноманинг асл нусхасидан нусха олиш қатъиян ман қилинади.

58. Тақдим қилинган сўровномада хато ва (ёки) камчиликлар мавжуд бўлмаган ҳолда сўровномада кўрсатилган шартномани рўйхатга олиш бўйича кейинги тадбирларни амалга ошириш учун сўровнома қабул қилинади.

Акс ҳолда, сўровнома бюджетдан маблағ олувчига мавжуд хато ва (ёки) камчиликларни бартараф қилиш учун қайтарилади.

59. Ғазначилик бўлинмаси бюджетдан маблағ олувчи томонидан сўровномани қабул қилган кундан бошлаб уч иш куни давомида шартномада кўрсатилган суммани бюджетдан маблағ олувчининг харажатлар сметасида кўзда тутилган тегишли режали ажратилган бюджет маблағларининг мавжудлигини текширади.

Агар сўровнома ва тузилган шартномага мувофиқ тўланиши лозим бўлган пул маблағлари суммаси бюджетдан маблағ олувчининг харажатлар сметасида кўзда тутилган тегишли режали ажратилган бюджет маблағлари суммасидан ошса, ушбу шартнома ғазначилик бўлинмасида рўйхатга олинмайди, тегишли сўровнома эса бюджетдан маблағ олувчига қайтарилади.

60. IV гуруҳ харажатларнинг махфий харажатлари бўйича шартномаларни рўйхатга олиш, сўровномалар асосида сўровномаларнинг олд томонига «Рўйхатдан ўтказилди» штампи қўйилган ва рўйхатга олинган рақам ва санаси кўрсатилган кундан бошлаб уч иш куни давомида ғазначилик бўлинмасининг мансабдор шахси ўзининг шахсий имзоси ва ғазначилик бўлинмасининг муҳр изи билан тасдиқлаш орқали амалга оширилади.

Рўйхатга олингандан сўнг сўровноманинг икки нусхаси бюджетдан маблағ олувчига қайтарилади, бир нусхаси эса ғазначилик бўлинмасида ҳисоб юритиш ва сақлаш учун қолдирилади.

61. Ўзбекистон Республикаси Вазирлар Маҳкамаси, Қорақалпоғистон Республикаси, вилоятлар ва Тошкент шаҳар бюджетларининг Захира жамғармалари ҳисобидан махфий характерга эга бўлган харажатлар тўловлари бюджетдан маблағ олувчиларнинг сўровномаси бўйича мазкур Низомда бюджетдан маблағ олувчиларнинг IV гуруҳ харажатларнинг махфий харажатлари амалга ошириш учун кўзда тутилган тартиб билан бир хилда амалга оширилади.

62. Ўзига хос махфийлик режими таъминланиши талаб қилинадиган махфий харажатларга тааллуқли қисми, бюджетдан маблағ олувчиларнинг харажатлар сметасида Давлат бюджети иқтисодий таснифининг «01-9-90» харажатлар моддасида акс эттирилади ва ушбу маблағлар фақат ғазначилик бўлинмаларига мазкур Низомнинг 3-иловасига мувофиқ шакл бўйича тақдим қилинган юридик мажбуриятларни рўйхатга олиш учун сўровнома ва тўлов топшириқномалари асосида бир вақтнинг ўзида тўлов топшириқномаларида кўрсатилган суммани юридик ва молиявий мажбуриятлар қабул қилинадиган суммасига олиб борилган ҳолда харажатлар амалга оширилади.

63. Бюджетдан маблағ олувчилар томонидан иккинчи тараф олдида молиявий мажбуриятлар уларга етказиб бериладиган товар (иш, хизмат)лар учун ўтказилиши лозимлигини тасдиқловчи ҳужжатлар, ҳисобланган иш ҳақи ва унга тенглаштирилган харажатлар бўйича қарздорлик асосида қабул қилинади.

64. Молиявий мажбуриятлар, олдин тузилган шартномалар — қабул қилинган юридик мажбуриятлар доирасида қабул қилинади, иш ҳақи ва унга тенглаштирилган харажатлар бўйича молиявий мажбуриятлар, шунингдек, давлат божи, йиғимлар, бадаллар, мажбурий тўловлар ва шунга ўхшаш молиявий мажбуриятлар бундан мустасно.

65. IV гуруҳ харажатларининг махфий харажатлари бўйича молиявий мажбуриятларни рўйхатга олиш учун, бюджетдан маблағ олувчилар томонидан ғазначилик бўлинмаларига ҳисобварақ-фактуралар ўрнига (уларни ўрнини босувчи бошқа ҳужжатлар) мазкур Низомнинг 4-иловасига мувофиқ шакл бўйича молиявий мажбуриятларни рўйхатга олиш учун сўровномалар тақдим қилинади.

66. Бюджетдан маблағ олувчилар томонидан молиявий мажбуриятларни рўйхатга олиш учун сўровнома тегишли ҳисобварақ-фактура олинган кундан сўнг уч иш кунидан кечикмаган муддатда тузилади ва хизмат кўрсатувчи ғазначилик бўлинмасига тақдим қилинади.

Бунда, молиявий мажбуриятларни рўйхатга олиш учун сўровнома билан биргаликда бюджетдан маблағ олувчи томонидан ҳисобварақ-фактуранинг асл нусхаси ғазначилик бўлинмасининг масъул ходимига кўриб чиқиш учун тақдим қилинади. Ғазначилик бўлинмасининг масъул ходими бюджетдан маблағ олувчининг ваколатли вакили иштирокида сўровномада кўрсатилган маълумотларни ҳисобварақ-фактуранинг асл нусхасида кўрсатилган маълумотлар билан солиштиради.

Солиштириш тугагандан сўнг ҳисобварақ-фактуранинг асл нусхаси ташкилот — бюджетдан маблағ олувчининг ваколатли вакилига қайтарилади.

Ғазначилик бўлинмаси ходимлари томонидан тақдим қилинган ҳисобварақ-фактуранинг асл нусхасидан нусха олиш қатъиян ман қилинади.

67. Мазкур Низомнинг 63-бандида кўрсатилган харажатлар фақат ғазначилик бўлинмаларига мазкур Низомнинг 3-иловасига мувофиқ шакл бўйича тақдим қилинган юридик мажбуриятларни рўйхатга олиш учун сўровнома ва тўлов топшириқномалари асосида уларнинг суммаларини тўлов топшириқномасида кўрсатилган банк ҳисобварақларига ғазначилик бўлинмалари шартномалар ва ҳисобварақ-фактураларни тақдим қилмасдан амалга оширилади.

Бунда, ўзига хос харажатлар бўйича тўлов топшириқномаларининг «Тўлов мақсади» устунида «Махсус мақсадли» ёзуви ёзилади.

68. Иш ҳақи ва унга тенглаштирилган харажатлар тўловлари бюджетдан маблағ олувчилар томонидан тақдим қилинган нақд пул маблағлари олиш учун сўровномалар асосида чеклардан фойдаланилган ҳолда амалга оширилади.

69. Нақд пул олиш учун чек дафтарча бланкаларини ғазначилик бўлинмаси хизмат кўрсатувчи банк филиалидан олади.

70. Чекларга ўчириб ёзиш, тузатиш, тўғрилашларга, факсимиле ишлатилишига йўл қўйилмайди. Чеклар ўн кун давомида ҳақиқий ҳисобланади, уларни ёзиб берилган кундан ташқари. Чек рақами карточкада рўйхатга олинган чек дафтарчаси рақами ва серияларига мувофиқ бўлиши лозим. Пул чеклари Ўзбекистон Республикаси Марказий банки меъёрий-ҳуқуқий ҳужжатларига мувофиқ расмийлаштирилади.

71. Ғазна ҳисобварақларидан нақд пул маблағларини олиш учун чекларга ғазначилик бўлинмасининг мансабдор шахслари томонидан имзо қўйилади ва ғазначилик бўлинмасининг муҳри билан тасдиқланади. Банклар томонидан чеклар бўйича нақд пул маблағлари бериш қатъий тартибда ғазначилик бўлинмасининг биринчи ва иккинчи имзо қўйиш ҳуқуқига эга бўлган ҳамда карточкада кўрсатилган, мансабдор шахснинг имзоси мавжуд бўлган ва ғазначилик бўлинмаси муҳри билан тасдиқланганда амалга оширилади.

Бунда, ғазначилик бўлинмаси бюджетдан маблағ олувчининг ишончли шахсига (кассирга) чек бланкаларини тўлдириш учун бериши мумкин. Берилган чеклар ҳисоби мазкур Низомнинг 5-иловасига мувофиқ шакл бўйича Берилган ва ишлатилган чеклар ҳисоби журналида юритилади. Бюджетдан маблағ олувчининг ишончли шахси Чек дафтарчасини олганлик тўғрисидаги Журналнинг тегишли сатрига имзо қўяди.

72. Молия йили давомида ишлатилган чек дафтарчасининг милклари чек дафтаридаги охирги чек бланкаси тўлдирилгандан сўнг, кейинги иш кунида бюджетдан маблағ олувчилар томонидан ғазначилик бўлинмаларига қайтарилиши шарт.

Бунда, бузилган (бекор қилинган) чеклар мавжуд бўлган ҳолларда бюджетдан маблағ олувчилар мажбурий тартибда уларни ишлатилган чек милкларига илова қилади.

Ғазначилик бўлинмасининг масъул ходими ишлатилган чек милкларини олгандан сўнг улардаги маълумотларни Ғазначиликнинг дастурий мажмуидаги олинган нақд пул маблағлари суммалари ва унда ишлатилган чеклар тўғрисидаги маълумотлар билан солиштиради.

Ишлатилган чеклар бўйича маълумотларда фарқлар мавжуд бўлган ҳолатда ғазначилик бўлинмаси томонидан фарқларнинг сабабларини аниқлаштириш ҳамда барча ишлатилган чек милкларини ва бузилган чекларни ғазначилик бўлинмасига қайтариш учун чек дафтарчалари рўйхати тузилади, унга етишмаётган чекларнинг рақамлари ва суммаларини кўрсатган ҳолда илова тузилади ва бюджетдан маблағ олувчига тақдим қилинади.

73. Бюджетдан маблағ олувчи иш ҳақи ва унга тенглаштирилган тўловлар, шунингдек, хизмат сафари харажатларини ва бошқа ўрнатилган тартибда рухсат этилган нақд пулдаги харажатларни тўлаш учун нақд пул маблағларини олишга ғазначилик бўлинмасига бюджетдан маблағ олувчининг раҳбари ва бош ҳисобчиси имзоси билан сўровнома, шунингдек, тегишли равишда тўлдирилган чекни, кейинчалик ғазначилик бўлимининг ваколатли ходими томонидан уларни текшириш ва имзо қўйиш учун тақдим қилади.

Бунда, бюджетдан маблағ олувчи иш ҳақи ва унга тенглаштирилган тўловлар, шунингдек, хизмат сафари харажатларини тўлаш учун сўровномага мувофиқ ўрнатилган тартибда нақд пул маблағлари суммалари кўрсатилган ҳолда, чекнинг орқа томонига имзо ва олд томонига муҳр қўймаган ҳолда тўлдиради.

74. Ғазначилик бўлинмаси сўровномани ва тўлдирилган чекни олиши билан, чек ва сўровномадаги суммаларнинг мувофиқлигини ўрнатилган тартибда текширади, имзо ва муҳр қўяди ва текширилгандан сўнг чекнинг назорат маркасини бюджетдан маблағ олувчининг ваколатли шахси (кассир)га беради. Кундалик равишда, иш ҳақи ва унга тенглаштирилган тўловлар, шунингдек, хизмат сафари харажатларини тўлаш учун нақд пул маблағлари олиш учун сўровномаларнинг келиб тушишига қараб, ёзиб берилган чекларга электрон кўринишда қоғоз манбага чиқарилиб (касса харажат журнали), уч нусхада реестр тузилади ва ғазначилик бўлинмасининг масъул шахси томонидан чеклар билан биргаликда банк филиалига юборилади.

Бюджетдан маблағ олувчи нақд пул маблағлари олиш учун ишончномани икки нусхада ғазначилик бўлинмасига тақдим қилади, улардан биттасини ғазначилик бўлинмаси ўзининг муҳр изи билан банкка тақдим қилади.

75. Бюджетдан маблағ олувчининг ишончли шахси банк кассасида чекнинг назорат маркаси бўйича нақд пул маблағларини олади.

Бюджетдан маблағ олувчининг ишончли шахси тегишли бюджетдан маблағ олувчининг бир қанча шахсий ҳисобварақлари бўйича нақд пул маблағларини олиш ҳуқуқига эга, агар булар ишончномада кўзда тутилган бўлса. Нақд пул маблағларини бериш банк филиали томонидан 23212 «Молия вазирлиги Ғазначилигининг маблағи» ва 23214 «Ҳудудий Ғазначилик бўлинмаларининг маблағи» ҳисобварақларидан амалга оширилади.

76. Нақд пул маблағлари берилгандан сўнг реестрнинг иккинчи нусхаси (касса харажати журнали) банк томонидан нақд пул маблағлари берилганлиги тўғрисидаги банк белгиси қўйилган ҳолда кўчирма билан биргаликда ғазначилик бўлинмасига қайтарилади. Ғазначилик бўлинмаси кўчирма, реестр ва чек милки асосида тегишли шахсий ҳисобварақда белги қўяди ва бюджетдан маблағ олувчига шахсий ҳисобварақдан кўчирма беради, шунингдек, бюджетдан маблағ олувчига чек милки нусхасини бюджетдан маблағ олувчи томонидан бюджет маблағлари бўйича харажатлар сметалари ижросининг бухгалтерия ҳисобини юритиш ва ҳисоботини тузиш учун тақдим қилади.

77. Бюджетдан маблағ олувчининг ишончли шахси томонидан чекнинг назорат маркаси йўқотилганда, тегишли ғазначилик бўлинмасига чекнинг назорат маркаси йўқолган куннинг ўзидаёқ бюджетдан маблағ олувчининг раҳбари ва бош ҳисобчиси имзоси қўйилган хат-билдиришномани йўллайди. Хат-билдиришнома асосида ғазначилик бўлинмаси банкка тўланмаган чекни қайтариш тўғрисида илтимос хатини йўллайди. Чеклар реестрида банк томонидан чақирилган чеклар тўғрисида белги қўйилади.

78. Ғазначилик бўлинмаси бюджетдан маблағ олувчиларнинг тўлов топшириқномалари асосида ғазна ҳисобварақларидан IV гуруҳ харажатлари бўйича харажатлар тўловини бюджетдан маблағ олувчиларнинг харажатлар сметаларининг тегишли моддаларида кўзда тутилган, ажратилган бюджет маблағлари лимитлари доирасида амалга оширади.

79. Бюджетдан маблағ олувчиларнинг харажатлари тўлови тўлов топшириқномалари билан қуйидаги талабларга риоя қилинган ҳолда амалга оширилади:

бюджетдан маблағ олувчиларнинг тегишли моддалари бўйича бюджет маблағлари қолдиқлари суммалари доирасида;

агар тўлов топшириқномасида кўрсатилган сумма ғазначилик бўлинмасида рўйхатга олинган шартномага мувофиқ тўланиши лозим бўлган пул маблағлари суммасидан ошмаса;

ҳисобварақ-фактура ёки товар (иш, хизмат)лар етказиб берилганлигини тасдиқловчи бошқа ҳужжатлар мавжуд бўлганда ва бюджетдан маблағ олувчининг мол етказиб берувчи олдидаги қарздорлигини, шунингдек, бюджетдан маблағ олувчининг мол етказиб берувчига аванс тўловлари ўтказишини мажбурловчи ҳужжатлар мавжуд бўлганида;

тўлов топшириқномасида кўрсатилган мол етказиб берувчининг, шунингдек, бюджетдан маблағ олувчиларнинг номи ва реквизитлари шартнома ва ҳисобварақ-фактураларда ёки товар (иш, хизмат)лар етказиб берганлигини тасдиқловчи бошқа ҳужжатларда мол етказиб берувчининг, шунингдек, бюджетдан маблағ олувчиларнинг номи ва реквизитлари мувофиқ бўлганида.

80. Етказиб берилган товар (иш, хизмат)лар учун харажатлар тўловлари, шунингдек аванс тўловларини амалга ошириш учун бюджетдан маблағ олувчилар ғазначилик бўлинмасига ўрнатилган тартибда расмийлаштирилган тўлов топшириқномаларини тақдим қилади, бунда «Тўловчи» сатрида ғазначилик бўлинмаси номи, «Тўловчининг ҳисобварағи» сатрида — Ғазна ҳисобварағи, «Тўлов мақсади» — бюджетдан маблағ олувчининг шахсий ҳисобварағи рақами ва номи, тегишли бюджет таснифининг кодлари, тўлов амалга ошириш учун асос бўладиган ҳужжат, шунингдек, тўловнинг мақсади кўрсатилади:

а) беш нусхада, агар ғазначилик бўлинмаси ва мол етказиб берувчига битта банк филиалида хизмат кўрсатилса. Бюджетдан маблағ олувчининг мансабдор шахслари томонидан имзо қўйилган ва муҳр изи билан тасдиқланган тўлов топшириқномасининг биринчи нусхаси, бюджетдан маблағ олувчининг ғазначилик бўлинмасига бюджетдан маблағ олувчининг шахсий ҳисобварағидан касса харажатларини амалга ошириш сўровномаси бўлиб хизмат қилади. Тўлов топшириқномасининг иккинчи нусхаси ғазначилик бўлинмасининг масъул шахслари томонидан имзоланади, ғазначилик бўлинмасининг муҳр изи билан тасдиқланади ва банк филиали учун ғазна ҳисобварағидан харажатлар тўлови учун асос бўлади. Банк филиалининг тўланганлик тўғрисидаги белгиси билан тўлов топшириқномасининг учинчи нусхаси товар (иш, хизмат)лар етказиб берувчига етказилади. Банк филиалининг тўланганлик тўғрисидаги белгиси билан тўлов топшириқномасининг тўртинчи нусхаси ғазна ҳисобварағидан кўчирмага илова қилинади ва ғазначилик бўлинмасига бюджетдан маблағ олувчининг шахсий ҳисобварағида касса харажатларини акс эттириш учун асос бўлади. Ғазначилик бўлинмасининг «ТЎЛАНГАН» белгиси билан ва тўланган сана қўйилган тўлов топшириқномасининг бешинчи нусхаси бюджетдан маблағ олувчининг шахсий ҳисобварағидан кўчирма билан биргаликда бюджетдан маблағ олувчининг ваколатли ходимига берилади;

б) тўрт нусхада, агар ғазначилик бўлинмаси ва мол етказиб берувчига ҳар хил банк филиалларида хизмат кўрсатилса. Бюджетдан маблағ олувчининг мансабдор шахслар томонидан имзо қўйилган ва муҳр изи билан тасдиқланган тўлов топшириқномасининг биринчи нусхаси, ғазначилик бўлинмасига бюджетдан маблағ олувчининг шахсий ҳисобварағидан касса харажатларини амалга ошириш сўровномаси бўлиб хизмат қилади. Тўлов топшириқномасининг иккинчи нусхаси ғазначилик бўлинмасининг масъул шахслари томонидан имзоланади, ғазначилик бўлинмасининг муҳр изи билан тасдиқланади ва банк филиали учун ғазна ҳисобварағидан харажатлар тўлови учун асос бўлади. Банк филиалининг тўланганлик тўғрисидаги белгиси билан тўлов топшириқномасининг учинчи нусхаси ғазна ҳисобварағидан кўчирмага илова қилинади ва ғазначилик бўлинмасига бюджетдан маблағ олувчининг шахсий ҳисобварағида касса харажатларини акс эттириш учун асос бўлади. Ғазначилик бўлинмасининг «ТЎЛАНГАН» белгиси билан ва тўланган санаси қўйилган тўлов топшириқномасининг тўртинчи нусхаси бюджетдан маблағ олувчининг шахсий ҳисобварағидан кўчирма билан биргаликда бюджетдан маблағ олувчининг ваколатли ходимига берилади.

Бунда, етказиб берилган товар (иш, хизмат)лар учун харажатлар тўловлар, шунингдек, аванс тўловлари махфий харажатлар бўйича амалга оширилган ҳолларда тўлов топшириқномасининг «Тўлов мақсади» сатрида — фақат шахсий ҳисобварақ рақами, қабул қилинган юридик ёки молиявий мажбуриятнинг рўйхатга олинган рақами кўрсатилади ва «Махсус мақсадли» ёзуви ёзилади.

81. Бюджетдан маблағ олувчи томонидан тақдим қилинган ҳужжатлар мазкур Низом талабларига мувофиқ бўлганда ғазначилик бўлинмасининг ваколатли ходими «ТЕКШИРИЛДИ» белгисини, тўлов топшириқномаси биринчи нусхасининг орқа томонига тўлов топшириқномаси қабул қилинган сана ва ўзининг имзосини қўяди. Тўлов топшириқномасининг иккинчи нусхасини ғазначилик бўлинмаси бошлиғи ва масъул шахсининг имзолари ва ғазначилик бўлинмасининг муҳр изи билан расмийлаштириш текширувлар тугаганидан сўнг амалга оширилади.

Ғазначилик бўлинмасига ғазначилик бўлинмасидаги мавжуд имзо ва муҳр изи намуналаридаги белгилар билан бюджетдан маблағ олувчи томонидан тақдим қилинган, ижро учун банкка тақдим қилинадиган ҳужжатлардаги белгиларни солиштириш мажбурияти юклатилади.

82. Тўлов топшириқномалари бўйича ғазна ҳисобварағидан тўловлар амалга ошириш учун ғазначилик бўлинмаси банкка тўлов топшириқномаларининг иккинчи ва учинчи (ғазначилик бўлинмаси ва мол етказиб берувчига битта банк филиалида хизмат кўрсатилган ҳолда, тўртинчи) нусхаларини тақдим қилади.

83. Хизмат кўрсатувчи банк томонидан тўлов ўтказилгандан сўнг тўлов топшириқномасининг иккинчи (ғазначилик бўлинмаси ва мол етказиб берувчига битта банк филиалида хизмат кўрсатилган ҳолда, учинчи) нусхаси банкда қолади, учинчи (ғазначилик бўлинмаси ва мол етказиб берувчига битта банк филиалида хизмат кўрсатилган ҳолда, тўртинчи) нусхаси банкнинг штампи ва масъул ходимининг имзоси билан ва ғазна ҳисобварағидан кўчирма билан биргаликда ғазначилик бўлинмасига берилади.

84. Ғазначилик бўлинмасининг тегишли ходими бюджетдан маблағ олувчиларнинг тегишли шахсий ҳисобварақларига белги қўйгандан сўнг, бюджетдан маблағ олувчининг шахсий ҳисобварағидан кўчирма ва тўлов топшириқномасининг тўртинчи (ғазначилик бўлинмаси ва мол етказиб берувчига битта банк филиалида хизмат кўрсатилган ҳолда, бешинчи) нусхаси ғазначилик бўлинмаси масъул ходимининг белгиси билан бюджетдан маблағ олувчига қайтарилади.

85. Ҳисобварақ-фактуралар ёки товар (иш, хизмат)лар етказиб берилганлигини ва бюджетдан маблағ олувчининг товар (иш, хизмат)лар етказиб берувчи олдидаги қарздорлиги мавжудлигини тасдиқловчи бошқа ҳужжатлар ғазначилик бўлинмасига уларни мол етказиб берувчилардан олингандан сўнг уч иш кунидан кечикмаган ҳолда тақдим қилинади.

86. Бюджетдан маблағ олувчиларнинг раҳбарлари ва бош ҳисобчилари мол етказиб берувчилар билан тузилган шартномаларнинг тўғри расмийлаштириши, уларнинг асосланганлиги ва амалдаги қонун ҳужжатларига мувофиқлиги, нарх қарорининг амалдаги қонун ҳужжатларига мувофиқлиги, бирламчи ҳужжатлар ва товар (иш, хизмат)лар етказиб берилганлигини тасдиқловчи бошқа ҳужжатларнинг ҳаққонийлиги, жумладан Бюджет ташкилотларининг ривожлантириш жамғармасига ўтказиладиган, иқтисод қилинган маблағларнинг ва мол етказиб берувчилар олдидаги қарздорликнинг тўғри аниқланганлигига жавобгардир.

Чек дафтарлари ва чек назорат маркаларининг йўқотилиши ёки ўғирланиши, шунингдек, чек дафтарларини ва чек назорат маркаларини олишга ваколатли шахслар томонидан суиистеъмол қилиш натижасида юзага келган зарар учун бюджетдан маблағ олувчиларнинг масъул шахслари жавобгардир.

87. Ғазначилик бўлинмалари қонунчиликка мувофиқ зарур махфийлик режимига риоя қилиш, мазкур Низом талабларига мувофиқ рўйхатга олинган шартномаларнинг бюджетдан маблағ олувчилар харажатлари сметасида кўзда тутилган режали бюджетдан ажратиладиган маблағларга мувофиқлиги ва бюджетдан маблағ олувчилар харажатлари тўлови устидан назоратнинг тўғри амалга оширилиши учун жавобгардирлар.

88. Мазкур Низом Ўзбекистон Республикаси Марказий банки билан келишилган.