Газни қайта ишлаш заводи қурилишини жадаллаштириш ва ўз вақтида фойдаланишга топшириш ҳамда конларнинг Кондим гуруҳини комплекс жиҳозлаш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикаси билан «ЛУКОЙЛ» нефть компанияси» очиқ акциядорлик жамияти ва «Ўзбекнефтгаз» миллий холдинг компаниясидан иборат таркибдаги инвесторлар консорциуми ўртасида 2004 йил 16 июнда тузилган конларнинг Кондим гуруҳи участкаси, Хаузак ва Шоди участкалари, шунингдек Қўнғирот участкасига нисбатан Маҳсулот тақсимотига оид битимни амалга ошириш доирасида Бухоро вилоятидаги Хаузак участкасининг газ кони ўз вақтида фойдаланишга топширилганлиги ва табиий газ қазиб олиш бошланганлиги;

табиий газни қазиб олиш ва қайта ишлаш ҳажмининг ўртача йиллик прогноз даражаси 8 млрд куб м, тозаланган товар газ бўйича 6 519,5 минг тонна, стабил конденсат — 213,6 минг тонна, суюлтирилган газ — 17,5 минг тонна ва олтингугурт — 191,1 минг тонна ишлаб чиқариш қувватига эга бўлган «Газни қайта ишлаш заводи комплексини қуриш ва конларнинг Кондим гуруҳини жиҳозлаш» инвестиция лойиҳасининг дастлабки техник-иқтисодий асослаши ваколатли органлар томонидан экспертизадан ўтказилганлиги ва белгиланган тартибда тасдиқланганлиги;

Маҳсулот тақсимотига оид битимга мувофиқ конларнинг Кондим гуруҳи участкасининг биринчи ишга тушириш комплексини фойдаланишга топшириш муддати 2011 йилнинг декабрь ойига мўлжалланганлиги маълумот учун қабул қилинсин.

2. «ЛУКОЙЛ Ўзбекистон Оперейтинг Компани» масъулияти чекланган жамиятга шунга ўхшаш объектларни лойиҳалаштиришнинг норматив муддати доирасида «Конларнинг Кондим гуруҳини комплекс жиҳозлаш» лойиҳасининг техник-иқтисодий асослашини белгиланган тартибда ишлаб чиқиш билан бир вақтнинг ўзида иш ҳужжатларини ишлаб чиқишга ва ишлаб чиқариш инфратузилмаси объектларини параллел равишда қуришга рухсат берилсин.

Ўзбекистон Республикаси Давлат архитектура ва қурилиш қўмитаси белгиланган тартибда лойиҳа ҳужжатлари эксперт жиҳатдан кузатиб борилишини ҳамда бажариладиган лойиҳа ва қурилиш-монтаж ишларининг сифати устидан назоратни таъминласин.

3. Белгилансинки, «ЛУКОЙЛ Ўзбекистон Оперейтинг Компани» масъулияти чекланган жамият «Конларнинг Кондим гуруҳини комплекс жиҳозлаш» лойиҳасини амалга ошириш ва уни техник-иқтисодий асослаш параметрларини аниқлаш доирасида қонун ҳужжатларида белгиланган тартибда:

техник-иқтисодий асослашни, иш ҳужжатларини ишлаб чиқиш юзасидан танлов савдолари ўтказилишини ва контракт тузилишини ҳамда қурилиш устидан муаллифлик назорати амалга оширилишини;

лойиҳанинг техник-иқтисодий асослашини тайёрлаш жараёнида ишлаб чиқилган буюртма бериладиган рўйхат бўйича асбоб-ускуналар ва материаллар етказиб бериш юзасидан танлов савдолари ўтказилишини ва контрактлар тузилишини;

объектларни қуриш учун пудрат ташкилотларини танлаш бўйича танлов савдолари ўтказилишини таъминлайди.

4. «Ўзбекнефтгаз» миллий холдинг компанияси «ЛУКОЙЛ Оверсиз Ўзбекистон Лтд.» компанияси билан биргаликда танлов савдолари натижаларини ва тузилган контрактларни ҳисобга олган ҳолда «ЛУКОЙЛ Ўзбекистон Оперейтинг Компани» масъулияти чекланган жамият томонидан «Конларнинг Кондим гуруҳини комплекс жиҳозлаш» лойиҳасининг техник-иқтисодий асослаши сифатли ишлаб чиқилиши ва белгиланган тартибда тасдиқлаш учун 2009 йил 31 декабргача бўлган муддатда Ўзбекистон Республикаси Вазирлар Маҳкамасига киритилиши устидан қатъий назорат ўрнатсин.

5. Мазкур қарорнинг бажарилишини назорат қилиш Бош вазир ўринбосарлари Э.Р. Шаисматов ва Н.М. Ханов зиммасига юклансин.