Замонавий усулларни, технологиялар ва асбоб-ускуналарни қўллаш ҳисобига геология-разведка ишлари самарадорлигини ошириш, тўғридан-тўғри хорижий инвестицияларни жалб этган ҳолда Ўзбекистон Республикаси ҳудудида углеводород хом ашёнинг разведка қилинган захиралари ҳажмини кўпайтириш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Ер қаъри участкаларидан фойдаланиш ҳуқуқи учун лицензиялар бериш тартибини такомиллаштириш чора-тадбирлари тўғрисида» 2007 йил 7 июндаги ПҚ-649-сон қарори билан тасдиқланган Ер қаъри участкаларидан фойдаланиш ҳуқуқини бериш тартиби ва шартлари тўғрисидаги низомнинг VIII бўлими 84-бандига мувофиқ Ўзбекистон Республикаси Давлат геология қўмитаси, Давлат табиатни муҳофаза қилиш қўмитаси, «Саноатконтехназорат» давлат инспекцияси ва «Ўзбекнефтгаз» миллий холдинг компанияси тимсолида экспертиза қилиш бўйича ваколатли органлар томонидан Шарқий Култак — Шимолий Нишон — Қамаши инвестиция блоки доирасида геология-разведка ишлари олиб бориш юзасидан йириклаштирилган техник-иқтисодий ҳисоб-китоб бўйича ижобий хулосалар берилганлиги маълумот учун қабул қилинсин.

2. «Ўзбекнефтгаз» миллий холдинг компанияси томонидан «ZEROMAX GmbH» компанияси (Швейцария) билан биргаликда ишлаб чиқилган, 2008—2012 йиллар даврини назарда тутадиган Шарқий Култак — Шимолий Нишон — Қамаши инвестиция блоки доирасида:

Айзават участкасида 2Д усули билан 800 погон км ҳажмида сейсморазведка ишлари олиб боришни ва Гирсан, Қирққулоч-Алядун, Гасанжа-Даликун, Нишон ва Бешкент-Қамаши участкаларида 3Д усули билан 2100 кв км ҳажмида сейсморазведка ишлари олиб боришни;

24 та янги истиқболли тузилмаларни кейинчалик қидирув бурғулашига киритган ҳолда тайёрлашни;

161,12 минг погон метр, шу жумладан 80440 погон метр қидириш ва 80680 погон метр разведкага оид бурғулаш ишларини амалга оширишни;

48 та қидириш-разведка қудуқлари қуришни;

углеводород захиралари 102,25 млн тонна шартли ёқилғи ҳажмида ўсишини таъминлашни;

238,7 млн. доллар, шу жумладан дастлабки уч йилда 164,8 млн. доллар миқдорида тўғридан-тўғри инвестициялар жалб этилишини назарда тутадиган геология-разведка ишлари олиб бориш юзасидан йириклаштирилган техник-иқтисодий ҳисоб-китоб маъқуллансин.

3. Ўзбекистон Республикаси Давлат геология ва минерал ресурслар қўмитаси Ўзбекистон Республикаси Президентининг «Ер қаъри участкаларидан фойдаланиш ҳуқуқи учун лицензиялар бериш тартибини такомиллаштириш чора-тадбирлари тўғрисида» 2007 йил 7 июндаги ПҚ-649-сон қарорига мувофиқ «ZEROMAX GmbH» компаниясига Шарқий Култак — Шимолий Нишон — Қамаши инвестиция блокини геологик жиҳатдан ўрганиш учун ер қаъри участкаларидан фойдаланиш ҳуқуқи учун лицензия берсин.

4. «ZEROMAX GmbH» компаниясига:

Шарқий Култак — Шимолий Нишон — Қамаши инвестиция блоки бурчак нуқталарининг тасдиқланган координатлари доирасида лицензиянинг амал қилиши даврида ўз таваккалчилиги остида геология-разведка ишлари кўрсаткичлари бажарилишини албатта таъминлаган ҳолда геология-разведка ишлари олиб боришга;

компаниянинг шуъба корхонаси — «Ўзгазойл» хорижий шуъба корхонасини берилаётган ер қаъри участкаларида геология-разведка ишларини олиб бориш бўйича оператор сифатида жалб этишга рухсат берилсин. Бунда инвестор операторнинг хатти-ҳаракатлари учун ўз хатти-ҳаракатлари сингари жавоб беради.

5. «Ўзбекнефтгаз» миллий холдинг компанияси «ZEROMAX GmbH» компанияси билан биргаликда Ўзбекистон Республикаси Бухоро-Хива минтақасининг Шарқий Култак — Шимолий Нишон — Қамаши инвестиция блоки доирасида нефть ва газ қидириш учун геология-разведка ишларини олиб бориш бўйича битимни амалга ошириш юзасидан, уни имзолаш ҳуқуқи билан, Ўзбекистон Республикасининг ваколатли органи этиб белгилансин.

«Ўзбекнефтгаз» миллий холдинг компанияси бошқаруви раиси (Н.А. Аҳмедов) Битимда назарда тутилган, инвестор томонидан қабул қилинган мажбуриятлар ўз вақтида амалга оширилиши устидан қонун ҳужжатларида белгиланган тартибда тизимли назоратни ва Вазирлар Маҳкамасига ҳар ойда лойиҳанинг амалга оширилиши тўғрисида холисона ахборот тақдим этилишини таъминласин.

7. Қашқадарё вилояти ҳокимлиги операторга Битимни амалга ошириш учун зарур бўлган ер участкасини белгиланган тартибда ажратсин.

8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Э.Р. Шоисматов зиммасига юклансин.