Ўзбекистон Республикасининг «Қимматли қоғозлар бозори тўғрисида»ги (Ўзбекистон Республикаси қонун ҳужжатлари тўплами, 2008 й., 29-30-сон, 278-модда), «Акциядорлик жамиятлари ва акциядорларнинг ҳуқуқларини ҳимоя қилиш тўғрисида»ги (Ўзбекистон Республикаси Олий Мажлисининг Ахборотномаси, 1996 йил, № 5-6, 61-модда) қонунларига ва Ўзбекистон Республикаси Вазирлар Маҳкамасининг 1996 йил 30 мартдаги 126-сонли қарори билан тасдиқланган Ўзбекистон Республикаси Давлат рақобат қўмитаси ҳузуридаги Қимматли қоғозлар бозорини мувофиқлаштириш ва ривожлантириш маркази тўғрисидаги низомга (Ўзбекистон Республикаси Ҳукуматининг қарорлари тўплами, 1996 й., 3-сон, 11-модда) мувофиқ буюраман:

1. Акциялар эгалари реестри ва корпоратив облигациялар эгалари реестри тўғрисидаги низом иловага мувофиқ тасдиқлансин.

2. Мазкур буйруқ Ўзбекистон Республикаси Адлия вазирлигида давлат рўйхатидан ўтказилган кундан бошлаб ўн кун ўтгандан кейин кучга киритилсин.

Мазкур Низом Ўзбекистон Республикасининг «Қимматли қоғозлар бозори тўғрисида»ги, «Акциядорлик жамиятлари ва акциядорларнинг ҳуқуқларини ҳимоя қилиш тўғрисида»ги қонунлари ва бошқа қонун ҳужжатларига мувофиқ акциялар эгалари реестри ва корпоратив облигациялар эгалари реестрини шакллантириш тартибини ўрнатади.

Мазкур Низом талаблари акциялар эгалари реестри ва корпоратив облигациялар эгалари реестрини шакллантириш тартибига татбиқ қилинади.

1. Мазкур Низомда қуйидаги асосий тушунчалар қўлланилади:

анкета маълумотлари — рўйхатга олинган қимматли қоғозлар эгасини идентификациялаш имконини берадиган маълумотлар;

қимматли қоғозларни номинал сақловчи — қимматли қоғозлар эгаларининг реестрида рўйхатдан ўтказилган, қимматли қоғозларнинг эгаси бўлмаган ҳолда бошқа шахснинг (қимматли қоғозлар эгасининг ёки у вакил қилган шахснинг) топшириғига биноан қимматли қоғозларни сақлаш, ҳисобга олиш ва уларга бўлган ҳуқуқларни тасдиқлашни амалга оширувчи депозитарий;

қимматли қоғозлар эгалари реестри (кейинги ўринларда — реестр) — рўйхатдан ўтказилган қимматли қоғозлар эгаларининг белгиланган санадаги ҳолатга кўра шакллантирилган, уларга қарашли эгасининг номи ёзилган қимматли қоғозларнинг номи, миқдори, номинал қиймати ва тоифаси, шунингдек реестрда рўйхатдан ўтказилган шахсларга ахборотни юбориш имкониятини берадиган маълумотлар кўрсатилган рўйхати;

реестрни шакллантириш тўғрисида топшириқнома — белгиланган санага қимматли қоғозлар эгалари реестрини шакллантириш ва бериш тўғрисида Қимматли қоғозлар марказий депозитарийсига берилган кўрсатмани ўз ичига олувчи эмитентнинг ёки қимматли қоғозлар бозорини тартибга солиш бўйича ваколатли давлат органининг топшириғи ёхуд қонун ҳужжатларига мувофиқ акциядорларнинг ёзма мурожаати;

Қимматли қоғозлар марказий депозитарийсининг сўровномаси (кейинги ўринларда — сўровнома) — реестрни шакллантириш тўғрисидаги топшириқномада кўрсатилган санага қимматли қоғозлар эгалари ва уларга тегишли қимматли қоғозлар ҳақидаги маълумотларни ошкор қилиш тўғрисида номинал сақловчига берилган кўрсатмани ўз ичига олувчи ҳужжат;

қимматли қоғозлар эгаларининг рўйхати — қимматли қоғозлар эгаларининг анкета маълумотларини, эгасига тегишли бўлган қимматли қоғозларнинг тури, типи ва сонини, шунингдек қимматли қоғозларга юклатишлар фактларига доир маълумотларни ўз ичига оладиган, белгиланган санага шакллантирилган ҳужжат;

қимматли қоғозлар эгаси — қимматли қоғозлар ўзига мулк ҳуқуқи ёки бошқа ашёвий ҳуқуқ асосида тегишли бўлган юридик ёки жисмоний шахс;

депозитарийнинг операция куни — депозитарий Регламентида белгиланган депозитарийнинг иш кунидаги депозитар операцияларни бажариш вақти;

фонд бозорида электрон ҳужжат айланиши тизими (кейинги ўринларда — ЭҲА тизими) — бозор иштирокчилари ўртасида электрон ҳужжатларни шакллантириш, жўнатиш ва қабул қилиш, қайта ишлаш ва сақлаш имконини берувчи, электрон ҳужжатларни (ахборотни) алмашиш учун қўлланиладиган ҳар бир қимматли қоғозлар бозори иштирокчисининг дастурий-техник воситалари мажмуи;

трансфер-агент — қимматли қоғозларга бўлган ҳуқуқларни ҳисобга олиш тизимига тааллуқли ҳужжатларни қабул қилиш, уларга ишлов бериш ва уларни топшириш бўйича эмитентга хизматлар кўрсатувчи юридик шахс;

қимматли қоғозлар бозорини тартибга солиш бўйича ваколатли давлат органи — Ўзбекистон Республикаси Давлат рақобат қўмитаси ҳузуридаги Қимматли қоғозлар бозорини мувофиқлаштириш ва ривожлантириш маркази.

2. Реестр юритиш тизими марказий рўйхатга олувчи функциясини бажарувчи Қимматли қоғозлар марказий депозитарийси (кейинги ўринларда — Марказий депозитарий) ва номинал сақловчи ҳисобланган депозитарийларнинг ҳисобга олиш регистрларидаги ёзувлар йиғиндисидир.

3. Реестр юритиш тизимида қимматли қоғозларга бўлган ҳуқуқларнинг олувчига ўтиши қимматли қоғозлар эгаларининг Марказий депозитарий ва депозитарийлардаги депо ҳисобварақлари бўйича депозитар операцияларни ўтказиш йўли билан депозитар операциялар стандартларига мувофиқ амалга оширилади. Қимматли қоғозга бўлган ҳуқуқлар олувчига унинг депо ҳисобварағига тегишли кирим ёзуви белгиланган тартибда киритилган пайтдан эътиборан ўтади ва қонун ҳужжатларида белгиланган тартибда депозитарий томонидан бериладиган депо ҳисобварағидан кўчирма билан тасдиқланади. Қимматли қоғоз билан тасдиқланадиган ҳуқуқлар ушбу қимматли қоғозга бўлган ҳуқуқлар ўтган пайтдан эътиборан олувчига ўтади.

4. Реестрни шакллантириш Марказий депозитарий ва номинал сақловчиларнинг ҳисоб регистрларидан:

эмитент ва у томонидан чиқарилган қимматли қоғозлар;

қимматли қоғозлар эгаларининг анкета маълумотлари, уларга тегишли бўлган қимматли қоғозларнинг сони, номинал қиймати, тури, шунингдек қимматли қоғозларга мажбуриятлар юклатилганлиги фактлари тўғрисидаги ахборотларни йиғиш ва ишлов бериш йўли билан Марказий депозитарий томонидан амалга оширилади.

5. Реестр эмитентнинг қимматли қоғозларга бўлган ҳуқуқларни ҳисобини амалга оширувчи депозитарийларнинг операция куни якунида қимматли қоғозлар эгаларининг депо ҳисобварақлари ҳолати бўйича реестрни шакллантириш тўғрисидаги топшириқномада кўрсатилган санага шакллантирилади.

6. Реестрда қуйидагилар кўрсатилиши керак:

а) эмитент тўғрисидаги ахборот:

эмитентнинг тўлиқ ва қисқартирилган номи, унинг жойлашган ери (почта манзили), телефон рақами, электрон почта манзили, эмитентнинг расмий веб-сайти (улар мавжуд бўлган тақдирда);

эмитентнинг ташкилий-ҳуқуқий шакли, давлат рўйхатидан ўтказиш рақами, санаси ва органи, хизмат кўрсатувчи банк номи, МФО коди, талаб қилиб олинадиган депозит ҳисобварағининг рақами (миллий валютадаги), солиқ тўловчининг идентификация рақами, КТУТ коди;

мансабдор шахсларнинг Ф.И.Ш. ва уларнинг телефонлари;

устав капитали, чиқарилган қимматли қоғозларнинг умумий сони, қимматли қоғозларнинг номинал қиймати чиқарилишларни жойлаштирилган қисмининг ҳажмини;

б) Марказий депозитарий тўғрисидаги ахборот:

тўлиқ ва қисқартирилган номи, унинг жойлашган ери (почта манзили), телефон, факс;

давлат рўйхатидан ўтказиш рақами, санаси ва органи, хизмат кўрсатувчи банк номи, миллий ва чет эл валюталаридаги талаб қилиб олинадиган депозит ҳисобварақлари рақами, МФО коди, солиқ тўловчининг идентификация рақами, КТУТ коди;

мансабдор шахсларнинг Ф.И.Ш. ва уларнинг телефонлари;

в) эмитентнинг қимматли қоғозлари чиқарилишлари тўғрисидаги ахборот:

Чиқарилиш(лар)нинг давлат рўйхатидан ўтказилган рақами ва санаси, рўйхатдан ўтказиш органи, чиқарилиш(лар)нинг тартиб рақами, қимматли қоғозларнинг тури ва типи, Марказий депозитарийнинг кодификацияси бўйича қимматли қоғоз коди, жойлаштириш тугаган санаси, чиқарилишдаги умумий сон;

г) эмитентнинг қимматли қоғозлари тўғрисидаги ахборот:

Марказий депозитарийнинг кодификацияси бўйича қимматли қоғоз коди, қимматли қоғозларнинг тури ва типи, қимматли қоғозлар ҳар бир тури ва типининг умумий сони, жойлаштирилган қимматли қоғозлар сони, эмиссия ҳисобварағидаги жойлаштирилмаган ва қимматли қоғозлар эмитентининг ихтиёрига келиб тушган қимматли қоғозлар қолдиғи;

д) қимматли қоғозлар эгаси тўғрисидаги ахборот:

Депонентларнинг ягона базасидаги эгасининг коди, қимматли қоғозлар эгасининг анкета маълумотлари, қимматли қоғозларнинг (типи бўйича тақсимланган ҳолдаги) сони, қимматли қоғозларга мажбуриятлар юклатилганлиги фактлари;

жойлаштирилган қисмининг фоизи ва овозлар сони (акциялар учун).

7. Қимматли қоғозлар эгасининг анкета маълумотлари қуйидагиларни ўз ичига олиши керак:

жисмоний шахслар учун — фамилияси, исми, шарифи (охиргиси мавжуд бўлган тақдирда), шахсини тасдиқловчи ҳужжат тури, серияси, рақами, берилган санаси ва берган орган, рўйхатдан ўтган яшаш манзили ва турар манзили, шунингдек телефон рақами, электрон почта манзили, СТИР коди ва банк реквизитлари (улар мавжуд бўлган тақдирда);

юридик шахслар учун — юридик шахснинг тўлиқ номи, давлат рўйхатидан ўтказиш рақами ва санаси, рўйхатга олишни амалга оширган орган номи, солиқ тўловчининг идентификация рақами ва КТУТ коди (резидент учун), унинг жойлашган ери (почта манзили), банк реквизитлари, шунингдек телефон рақами ва электрон почта манзили (улар мавжуд бўлган тақдирда).

8. Реестрда қимматли қоғозларнинг эгалари тўғрисидаги ахборот:

юридик шахслар;

жисмоний шахслар;

инвестиция активларини ишончли бошқарувчилар гуруҳларига ажратилган бўлиши керак;

9. Қимматли қоғозлар эгаси ёки номинал сақловчининг реестрни юритиш тизимидаги рўйхатга олиш рақами унинг Депонентлар ягона базасидаги коди ҳисобланади.

10. «Олтин акция»ни жорий этиш тўғрисидаги қарор қабул қилинган акциядорлик жамиятининг реестрига давлат вакили ҳам киритилади.

11. Эмитент тўғрисидаги, эмитент қимматли қоғозларининг чиқарилишлари, Марказий депозитарий ва қимматли қоғозлар эгаларининг анкета маълумотлари тўғрисидаги ахборотлар (қимматли қоғозлар эгаларининг манзиллари ва банк реквизитларидан ташқари) реестрга Марказий депозитарийнинг ҳисоб регистрларидан киритилади.

12. Эгаларига тегишли бўлган қимматли қоғозларнинг сони, тури, типи ва қимматли қоғозларга мажбуриятлар юклатилганлиги фактлари, шунингдек қимматли қоғозлар эгаларининг манзиллари ва банк реквизитлари тўғрисидаги ахборотлар реестрга ушбу қимматли қоғозларга бўлган ҳуқуқларни ҳисобга олишни амалга оширувчи депозитарийларнинг (Марказий депозитарий ва номинал сақловчиларнинг) ҳисоб регистрларидан киритилади.

13. Реестрни юритиш тизимининг ҳужжатлари:

реестрни шакллантириш тўғрисидаги топшириқнома;

Марказий депозитарийнинг сўрови;

қимматли қоғозлар эгаларининг рўйхатлари;

реестр;

қабул қилинган топшириқномалар ва сўровлар, шунингдек берилган реестрларнинг ҳисоби қайд этилувчи журналлар.

14. Эмитент, трансфер-агент, Марказий депозитарий ва номинал сақловчиларнинг ўзаро ҳамкорлиги депозитар шартнома ва қонун ҳужжатларига мувофиқ амалга оширилади.

15. Марказий депозитарий ва номинал сақловчиларнинг қимматли қоғозларнинг эгаси билан ўзаро ҳамкорлиги депозитар шартномага мувофиқ амалга оширилади.

16. Реестрни шакллантириш тўғрисидаги топшириқнома Марказий депозитарийга эмитентнинг ижроия органи томонидан юборилади, мазкур Низомда белгиланган ҳоллар бундан мустасно.

17. Қимматли қоғозлар бозорини тартибга солиш бўйича ваколатли давлат органининг сўровномаси бўйича реестрни шакллантириш сўровномада кўрсатилган муддатларда, топшириқнома тузилмасдан амалга оширилади. Қимматли қоғозлар бозорини тартибга солиш бўйича ваколатли давлат органининг сўровномаси бўйича реестрни шакллантириш ва тақдим этишнинг рад этилишига йўл қўйилмайди.

18. Реестрни шакллантириш тўғрисидаги топшириқнома топшириқномани юборган ташкилотнинг асосий муҳри билан тасдиқланган бўлиши керак.

19. Эмитентнинг ижроия органи номидан реестрни шакллантириш тўғрисидаги топшириқномани ваколатли шахслар имзолари намуналари билан эмитентнинг эмиссия ҳисобварағининг карточкаси мавжуд бўлган тақдирда Марказий депозитарий текшириш ва бажариш учун қабул қилади.

20. Акциядорларнинг умумий йиғилишини ўтказиш учун акциялар эгаларининг реестрларини шакллантириш тўғрисидаги топшириқнома Марказий депозитарийга акциядорларнинг умумий йиғилишини ўтказиш тўғрисидаги қарор қабул қилинган санадан уч иш кунидан кечиктирилмасдан тақдим этилади (юборилади) ва ўз ичига қуйидагиларни олиши лозим:

эмитентнинг номи;

акциядорларнинг умумий йиғилишини ўтказиш санаси;

умумий йиғилишнинг йиллик ёки навбатдан ташқари эканлиги тўғрисидаги кўрсатма;

акциядорлар умумий йиғилишини ўтказиш тўғрисида хабардор қилиш учун жамият акциядорлари реестрини шакллантириш санаси;

акциядорлар умумий йиғилишида қатнашиш ҳуқуқига эга жамият акциядорларининг реестрини шакллантириш санаси.

20¹. Агар акциядорларнинг навбатдан ташқари умумий йиғилиши жамият овоз берувчи акцияларининг камида беш фоизига эгалик қилувчи акциядор (акциядорлар) томонидан чақирилаётган бўлса, жамият акциялари эгаларининг реестрини шакллантириш тўғрисидаги топшириқнома бевосита акциядор (акциядорлар) томонидан Марказий депозитарийда расмийлаштирилади. Бунда Марказий депозитарийга қуйидаги ҳужжатлар тақдим этилади:

ушбу Низомнинг 20-бандида кўрсатилган маълумотларни ўз ичига олган акциядор (акциядорлар) томонидан имзоланган топшириқнома;

акциядорларнинг навбатдан ташқари умумий йиғилишини чақириш тўғрисида жамиятга ёзма талабнома тақдим этилган сана ҳолатига акциядорнинг (акциядорларнинг) жамият овоз берувчи акцияларининг камида беш фоизига эгалик қилишини тасдиқловчи акциядор (акциядорлар) депо ҳисобварағидан кўчирма;

акциядор (акциядорлар) — жисмоний шахснинг паспорт нусхаси, унинг вакили мурожаат қилган тақдирда вакилнинг паспорт нусхаси, нотариал тасдиқланган ишончномани ёки вакилликни тасдиқловчи бошқа ҳужжатни илова қилган ҳолда;

акциядор (акциядорлар) — юридик шахс вакилининг паспорт нусхаси, мазкур юридик шахс томонидан берилган ва унинг муҳри билан тасдиқланган ишончномани, раҳбарга нисбатан эса — лавозимга тайинлаш тўғрисидаги қарорни илова қилган ҳолда;

кузатув кенгашига (ёки жамият уставида акциядорлар умумий йиғилишини ўтказиш масаласини ҳал этиш ваколати берилган муайян шахс ёки жамиятнинг бошқарув органига) юборилган акциядорларнинг навбатдан ташқари умумий йиғилишини чақириш тўғрисидаги ёзма талабноманинг нусхаси, унинг қабул қилиб олинганлигини тасдиқловчи белги билан;

акциядорларнинг навбатдан ташқари умумий йиғилишини чақиришни рад этиш тўғрисидаги кузатув кенгаши (ёки жамият уставида акциядорлар умумий йиғилишини ўтказиш масаласини ҳал этиш ваколати берилган муайян шахс ёки жамиятнинг бошқарув органи) қарори ёхуд хати нусхаси, агар мавжуд бўлса.

Агар реестрни шакллантириш тўғрисидаги топшириқнома акциядорларнинг навбатдан ташқари умумий йиғилишини чақираётган икки ва ундан ортиқ акциядор томонидан имзоланса, топшириқномада шакллантирилган реестр бериладиган акциядорнинг ёки уни вакилининг фамилияси, исми, отасининг исми тўлиқ кўрсатилади.

21. Қонун ҳужжатларида назарда тутилган бошқа корпоратив ҳаракатларни амалга ошириш мақсадида акциялар эгалари реестрини шакллантириш тўғрисидаги топшириқнома эмитент томонидан Марказий депозитарийга реестр шакллантирилиши керак бўлган санагача беш иш кунидан кечиктирмасдан тақдим этилади ва ўз ичига қуйидагиларни олиши лозим:

эмитентнинг номи;

ўтказилаётган корпоратив ҳаракат тури;

реестрни шакллантириш санаси.

22. Корпоратив облигациялар реестрини шакллантириш тўғрисидаги топшириқнома эмитент томонидан Марказий депозитарийга реестр шакллантирилиши керак бўлган санагача беш иш кунидан кечиктирмасдан тақдим этилади ва ўз ичига қуйидагиларни олиши лозим:

эмитентнинг номи;

облигацияларнинг типи ва чиқарилишнинг тартиб рақами;

реестрни шакллантириш санаси.

23. Мазкур Низомнинг 20—22-бандларида назарда тутилмаган ҳолатларда реестрни шакллантириш тўғрисидаги топшириқнома эмитент томонидан Марказий депозитарийга реестр шакллантирилиши керак бўлган санагача беш иш кунидан кечиктирмасдан тақдим этилади ва ўз ичига қуйидагиларни олиши лозим:

эмитентнинг номи;

реестрни шакллантириш санаси.

24. Реестрни шакллантириш тўғрисидаги топшириқномани қабул қилганидан сўнг, Марказий депозитарий қуйидагиларга текширишни амалга оширади:

топшириқномани имзолаган шахснинг имзосини карточкада кўрсатилган эмитентнинг ваколатли шахсларининг имзолари намуналари билан мувофиқлиги;

топшириқномада мазкур Низомнинг 20—23-бандларига мувофиқ зарурий ахборотнинг мавжудлиги.

24¹. Овоз берувчи акцияларнинг камида беш фоизига эгалик қилувчи акциядор (акциядорлар) томонидан реестрни шакллантириш тўғрисидаги топшириқномага илова қилинган ҳужжатлар мазкур Низомнинг 20¹–бандига мувофиқлигини, шунингдек акциядорда (акциядорларда) керакли миқдорда овоз берувчи акциялар мавжудлигини Марказий депозитарий текширади.

25. Қуйидаги ҳолатларда Марказий депозитарий реестрни шакллантиришни рад этади:

топшириқномани имзолаган шахснинг имзосини карточкада кўрсатилган эмитентнинг ваколатли шахсларининг имзолари намуналари билан мувофиқ келмаган тақдирда;

тақдим этилган топшириқномада мазкур Низомнинг 20—23-бандларига мувофиқ барча зарурий ахборотлар мавжуд бўлмаган тақдирда;

мазкур Низомнинг 20¹-бандида кўрсатилган ҳужжатлар тақдим этилмаганда, шунингдек навбатдан ташқари умумий йиғилишни чақираётган акциядор (акциядорлар) эмитент овоз берувчи акцияларининг камида беш фоизига эгалик қилмаганда;

қонун ҳужжатларига мувофиқ бошқа ҳолатларда.

Марказий депозитарий бошқа сабабларга асосан реестрни шакллантиришни рад этишига йўл қўйилмайди.

26. Марказий депозитарийнинг реестрни шакллантириш тўғрисидаги топшириқномани бажаришни рад этиши реестрни шакллантириш тўғрисидаги топшириқнома келиб тушган санадан бошлаб беш кундан кечиктирмасдан юборилади. Топшириқномани бажаришни рад этиш асосланган, ёзма шаклда тузилган, Марказий депозитарийнинг ваколатли шахси томонидан имзоланган бўлиши керак.

27. Реестрни шакллантириш тўғрисидаги топшириқномани бажаришни асосланмаган ҳолда рад этиш Ўзбекистон Республикаси қонун ҳужжатларида белгиланган тартибда ҳал этилади.

28. Реестр қуйидаги ҳолларда шакллантирилади:

акциядорларнинг умумий йиғилиши ўтказилиши тўғрисида акциядорларни хабардор қилиш мақсадида акциядорлар умумий йиғилишини чақириш тўғрисида қарор қабул қилинган санага, йиғилиш акциядор (акциядорлар) томонидан чақирилган ҳолларда Марказий депозитарийга реестрни шакллантириш тўғрисидаги топшириқнома тақдим этилган санага;

акциядорларнинг умумий йиғилишида иштирок этиш ҳуқуқини беришга акциядорлар умумий йиғилишини ўтказиш санасидан уч иш куни олдин;

корпоратив ҳаракатларни ўтказиш учун;

корпоратив облигациялар бўйича даромадларни ҳисоблаш ёки тўлаш учун;

қимматли қоғозлар бозорини тартибга солиш бўйича ваколатли давлат органининг сўровномаси бўйича;

қонун ҳужжатларига мувофиқ ваколатли давлат органларининг сўровномалари бўйича реестрдан ахборотни ошкор қилиниши учун.

29. Мазкур Низомнинг 28-бандида кўрсатилмаган бошқа ҳолатларда реестр эмитент ижроия органининг топшириқномасига асосан, кузатув кенгашининг қарори мавжуд бўлган кузатув кенгашининг баённомасидан кўчирма илова қилинган ҳолда, шакллантирилади.

30. Мазкур Низомда белгиланган тартибда тақдим этиладиган реестрни шакллантириш тўғрисидаги топшириқнома ёки ваколатли давлат органининг сўровномаси реестрни шакллантиришга асос бўлади.

31. Акциядорларнинг умумий йиғилиши ўтказилиши тўғрисида акциядорларни хабардор қилиш мақсадида Марказий депозитарий топшириқнома келиб тушган санадан кейинги иш куни соат 12 дан кечиктирмасдан ахборотни ошкор қилиш тўғрисидаги сўровномани шакллантиради ва тегишли номинал сақловчиларга юборади.

32. Акциядорларнинг умумий йиғилишида иштирок этиш ҳуқуқини беришга реестрни шакллантириш учун Марказий депозитарий ахборотни ошкор қилиш тўғрисидаги сўровномани шакллантиради ва тегишли номинал сақловчиларга реестрни шакллантириш санасидан кейинги иш куни соат 12 дан кечиктирмасдан юборади.

33. Бошқа ҳолатларда Марказий депозитарий ахборотларни ошкор қилиш тўғрисидаги сўровномани шакллантиради ва тегишли номинал сақловчиларига:

агар реестрни шакллантириш санаси келгуси санага тўғри келса — топшириқномада кўрсатилган реестрни шакллантириш санасидан кейинги иш куни соат 12 дан кечиктирмасдан;

агар реестрни шакллантириш санаси ўтган санага тўғри келса — эмитентнинг топшириқномаси келиб тушган санадан кейинги иш куни соат 12 дан кечиктирмасдан юборади.

34. Номинал сақловчилар томонидан ахборотни ошкор қилиш тўғрисидаги сўровнома қуйидагиларни ўз ичига олиши лозим:

Марказий депозитарий сўровномасининг тартиб рақами;

номинал сақловчининг номи;

эмитентнинг номи;

Марказий депозитарий кодификацияси бўйича қимматли қоғозларнинг номи, типи ва коди;

реестр шакллантириладиган сана;

ахборотни тақдим этиш муддати.

35. Марказий депозитарийнинг сўровномаси номинал сақловчига қимматли қоғозлар эгалари рўйхатини тақдим этишга асос бўлади.

36. Номинал сақловчи қимматли қоғозлар эгалари рўйхатини Марказий депозитарий томонидан белгиланган формат ва таркиб бўйича электрон ҳужжат кўринишида тақдим этади.

37. Марказий депозитарий томонидан реестрни шакллантириш фақатгина эмитентнинг барча номинал сақловчиларидан мазкур эмитент қимматли қоғозлари эгаларининг рўйхатлари қабул қилинганидан сўнг амалга оширилади.

38. Инвестиция воситачиси мижозларининг унга битимлар тузиш учун берилган қимматли қоғозлари, шунингдек у томонидан шартномалар асосида мижозлар билан тузилган битимлар бўйича олинган қимматли қоғозлар инвестиция воситачисининг ҳар бир мижозининг идентификация маълумотлари, унинг қимматли қоғозлар сони, тури ва типи кўрсатилган ҳолда Марказий депозитарийда алоҳида ҳисобварақларда сақланади.

39. Реестрни шакллантириш қуйидаги тартибда амалга оширилади:

ҳужжатсиз ва Марказий депозитарийда ҳаракатсизлантирилган ҳужжатли қимматли қоғозлар бўйича топшириқномада кўрсатилган санага Марказий депозитарий ва номинал сақловчилар ҳисоб регистрларидан қимматли қоғозлар эгалари депо ҳисобварақларидаги қимматли қоғозлар қолдиқлари тўғрисидаги маълумотларни йиғиш ва қайта ишлаш орқали;

реестрни шакллантириш санасига Марказий депозитарийда ҳаракатсизлантирилмаган эгаси ёзилган ҳужжатли қимматли қоғозлар бўйича 2008 йил 22 июль ҳолатига шакллантирилган ва эмитент томонидан Марказий депозитарийга тақдим этилган реестр маълумотларига асосан;

реестрни шакллантириш санасига Марказий депозитарийда ҳаракатсизлантирилмаган эгаси ёзилмаган ҳужжатли қимматли қоғозлар, шунингдек илгари ҳужжатсиз шаклга конвертацияланган қимматли қоғозлар эмитентнинг махсус депо ҳисобварағида умумлаштирилган ҳолда акс эттирилади. Реестрда эмитентнинг махсус депо ҳисобварағида умумлаштирилган ҳолда акс эттирилган акциялар жойлаштирилган акциялар деб ҳисобланади.

40. Номинал сақловчи томонидан қимматли қоғозлар эгалари рўйхатини сўровномада кўрсатилган муддатда тақдим этилмаган тақдирда Марказий депозитарий шу ҳақда бир иш кунидан кечиктирмасдан эмитент ва қимматли қоғозлар бозорини тартибга солиш бўйича ваколатли давлат органини огоҳлантириши шарт.

41. Реестрни шакллантиришда Марказий депозитарийнинг номинал сақловчилар билан ўзаро муносабатлари маълумотларни қабул қилиш, топшириш ва қайта ишлаш орқали амалга оширилади.

42. Марказий депозитарий томонидан шакллантирилган ва ундан олинган реестрга ўзгартиришлар киритишга йўл қўйилмайди.

43. Акциядорлар умумий йиғилишида қатнашиш ҳуқуқига эга бўлган шакллантирилган жамият акциядорларининг реестрига ўзгартиришлар фақат мазкур реестр тузилган санада унга киритилмай қолган шахсларнинг ҳуқуқлари тикланган ёки реестрни тузишда йўл қўйилган хатоларни тузатиш ҳолатлардагина қонун ҳужжатларида белгиланган тартибда киритилиши мумкин.

44. Қимматли қоғозлар эгаларининг бузилган ҳуқуқларини тиклаш ва хатоларни тузатиш қонун ҳужжатларида белгиланган тартибда унга хизмат кўрсатувчи депозитарийда эгасининг депо ҳисобварағи бўйича қимматли қоғозлар билан зарурий операцияларни ўтказиш қонунийлигини тасдиқловчи ҳужжатлар асосида амалга оширилади.

45. Номинал сақловчи Марказий депозитарийга қимматли қоғозлар эгаларининг рўйхатини қуйидагича тақдим этади:

Марказий депозитарийнинг акциядорларнинг умумий йиғилишида иштирок этиш ҳуқуқини берувчи реестрни шакллантириш тўғрисидаги сўровномаси эрталаб соат 10 гача келиб тушган тақдирда — ахборотни шу куннинг соат 13 га қадар тақдим этади;

Марказий депозитарийнинг акциядорларнинг умумий йиғилишида иштирок этиш ҳуқуқини берувчи реестрни шакллантириш тўғрисидаги сўровномаси эрталаб соат 10 дан кейин келиб тушган тақдирда — ахборотни кейинги куннинг соат 13 га қадар тақдим этади;

бошқа ҳолатларда — ахборотни Марказий депозитарийнинг сўровномаси келиб тушганидан сўнг бир иш куни давомида тақдим этади.

45¹. Реестрни шакллантириш тўғрисидаги топшириқнома Марказий депозитарий томонидан эмитентнинг барча қимматли қоғозлар номинал сақловчиларидан мазкур эмитент қимматли қоғозлари эгаларининг рўйхатлари қабул қилинганидан сўнг бир иш куни давомида бажарилади.

46. Акциядорларнинг умумий йиғилиши ўтказилиши тўғрисида акциядорларни хабардор қилиш учун реестр мазкур Низомнинг 1-иловасига мувофиқ электрон ҳужжат кўринишида шакллантирилади.

47. Акциядорларнинг умумий йиғилишида иштирок этиш ва корпоратив облигациялар бўйича даромадларни тўлаш учун реестр реестрни шакллантириш тўғрисидаги топшириқномадан келиб чиққан ҳолда мазкур Низомнинг 1 ва 2-иловаларига мувофиқ электрон ёки қоғоз ҳужжат кўринишида тегишлича шакллантирилади.

48. Электрон ҳужжат кўринишидаги реестр электрон ҳужжатлар айланмаси ЭҲА тизими ёки ахборотни электрон ташиш мосламаси орқали берилади.

Қоғоз ҳужжат кўринишидаги реестр ваколатли шахснинг ёзма сўровномасига асосан берилади.

49. Қоғоз ҳужжат ёки ахборотни электрон ташиш мосламадаги электрон ҳужжат кўринишдаги реестр эмитентга ёки унинг трансфер-агентига ишончнома асосида берилади, ёки почта орқали юборилади.

50. Акциядорларнинг умумий йиғилиши ўтказилиши тўғрисида акциядорларни хабардор қилиш ва унда иштирок этиш учун реестрлар Марказий депозитарий томонидан қуйидагича берилади:

электрон почта орқали электрон ҳужжат кўринишида реестрни шакллантириш тўғрисидаги топшириқномани бажариш санасидан сўнг бир иш кунидан кечиктирмасдан;

электрон ташувчи қурилмада электрон ҳужжат кўринишида реестрни шакллантириш тўғрисидаги топшириқномани бажариш санасидан сўнг икки иш кунидан кечиктирмасдан;

қоғоз ҳужжат кўринишида реестрни шакллантириш тўғрисидаги топшириқномани бажариш санасидан сўнг икки иш кунидан кечиктирмасдан.

52. Бошқа ҳолатларда реестр Марказий депозитарий томонидан қуйидагича берилади:

электрон ҳужжат кўринишида реестрни шакллантириш тўғрисидаги топшириқномани бажариш санасидан сўнг беш иш кунидан кечиктирмасдан;

қоғоз ҳужжат кўринишида реестрни шакллантириш тўғрисидаги топшириқномани бажариш санасидан сўнг етти иш кунидан кечиктирмасдан.

53. Реестрни бериш Марказий депозитарий ва эмитент ўртасида тузилган эмиссиявий шартномада кўрсатилган усул билан амалга оширилади.

55. Реестрни бериш санаси, реестрни бериш усули реестрни шакллантириш тўғрисидаги топшириқномаларни қабул қилиш ва реестрни бериш журналида қайд этилади. Журнал хронологик тартибда юритилади. Марказий депозитарий журнални қоғоз ҳам, электрон кўринишларда ҳам юритиши мумкин.

56. Марказий депозитарийнинг реестрни шакллантирган жавобгар шахсининг электрон рақамли имзоси билан имзоланган электрон ҳужжат кўринишидаги реестр электрон почта ёки ахборотни электрон ташиш мосламаси орқали берилади.

57. Акциядорлик жамияти бўлган эмитент қонун ҳужжатларида белгиланган тартибда бир ойдан кечиктирмасдан Марказий депозитарий билан шартнома тузиши ва у билан ҳамкорликни таъминлаши шарт:

мазкур Низом кучга киргунга қадар ташкил этилган акциядорлик жамиятлари учун — мазкур Низом кучга кирган санадан бошлаб;

мазкур Низом кучга кирганидан сўнг ташкил этилган акциядорлик жамиятлари учун — юридик шахс сифатида давлат рўйхатидан ўтказилган кундан бошлаб.

58. Эмитент ўз вақтида Марказий депозитарийга:

ўзининг жойлашган ери (почта манзили)нинг ўзгарганлиги тўғрисида ёзма равишда ахборот бериши шарт.

59. Эмитент Марказий депозитарийдан олинган реестрни қонун ҳужжатларида белгиланган тартиб ва муддатларда сақлаши шарт.

60. Акциядорлар умумий йиғилиши тўғрисида хабардор қилиш учун реестр шакллантирилганидан сўнг, шунингдек унда қатнашиш учун йигирма кун давомида эмитент реестр билан танишганлигини тасдиқловчи ўзининг асосий муҳри босилган реестрнинг қоғоз шаклидаги бир нусхасини қимматли қоғозлар бозорини тартибга солиш бўйича ваколатли давлат органига тақдим этади.

61. Эмитент:

топшириқномада кўрсатилган реестрни шакллантириш санасини тўғри белгиланганлигига;

реестрни шакллантириш тўғрисидаги топшириқномани ўз вақтида тақдим этилишига;

62. Марказий депозитарий:

номинал сақловчилардан қимматли қоғозлар эгалари рўйхатларини, шунингдек акциядорларнинг навбатдан ташқари умумий йиғилишини чақираётган акциядорнинг (акциядорларнинг) етарли миқдорда овоз берувчи акцияларга эгалик қилиш тасдиғини талаб этиш ва олишга;

номинал сақловчилардан қимматли қоғозлар эгалари ҳисобварақлари бўйича ўтказилган операциялар тўғрисидаги ахборотни ва уларни ўтказиш учун асос бўлган ҳужжатлар нусхаларини талаб этиш ҳамда олишга;

номинал сақловчилардан қимматли қоғозлар эгаларининг анкета маълумотларига ўзгартиришлар киритилганлигини тасдиқловчи ҳужжатлар нусхаларини талаб этиш ҳамда олишга ҳақли.

63. Марказий депозитарий:

ҳар ҳафта, ҳафтанинг ҳар биринчи иш кунида қимматли қоғозлар бозорини тартибга солиш бўйича ваколатли давлат органига берилган реестрлар тўғрисидаги ахборотни тақдим этишга;

мазкур Низомда белгиланган тартибда реестрни шакллантиришни таъминлашга;

у томонидан шакллантирилган реестрларни электрон ҳужжат кўринишида доимий сақлашга;

реестрлардаги мавжуд ахборотнинг махфийлигини таъминлашга мажбур, қонун ҳужжатларида белгиланган ҳоллар бундан мустасно.

64. Реестрни шакллантириш давомида Марказий депозитарий мазкур Низом меъёрлари ва номинал сақловчилар билан ўзаро ҳамкорлик тартибига риоя этилишига жавобгардир.

65. Марказий депозитарий реестрлардаги ахборотни монополияга қарши давлат органига, давлат солиқ хизмати органларига, Ўзбекистон Республикаси Адлия вазирлиги ҳузуридаги Суд қарорларини ижро этиш, судлар фаолиятини моддий-техника жиҳатидан ва молиявий таъминлаш департаментига, судларга, агар бу уларнинг ваколати доирасида бўлса, қўзғатилган жиноят иши бўлган тақдирда эса тергов ва суриштирув органларига уларнинг ёзма фармойиши асосида ошкор қилади.

66. Марказий депозитарий:

эмитент томонидан реестрни шакллантириш тўғрисидаги топшириқнома ўз вақтида тақдим этилмаганлиги муносабати билан реестрни шакллантириш ва беришнинг кечиктирилганлигига;

номинал сақловчи томонидан тақдим этилган ахборотнинг тўғрилигига жавобгар бўлмайди.

67. Номинал сақловчи:

Марказий депозитарийнинг сўровномасига биноан қимматли қоғозлар эгалари рўйхатини тақдим этишга;

Марказий депозитарийдан олинган билдиришномалар асосида унда ҳисобда турган қимматли қоғозлар ва уларнинг эмитентлари реквизитларига ўзгартиришлар киритишга;

кейинчалик муомалада бўлиши ва зарурий ҳужжатларни тақдим этилгунга қадар қимматли қоғозлар эгасининг ҳисобварағидаги ҳаракатни тўхтатиш билан, Марказий депозитарийдан олинган билдиришномалар асосида қимматли қоғозлар эгасининг анкета маълумотларига ўзгартиришлар киритишга мажбур.

68. Номинал сақловчи:

69. Номинал сақловчи томонидан реестрни шакллантириш учун зарур бўлган қимматли қоғозлар эгалари рўйхатини тақдим этишни асоссиз рад этиш қонун ҳужжатларини қўпол равишда бузилиши ҳисобланади ва қонун ҳужжатларида белгиланган тартибда унга берилган лицензиянинг амал қилишини тўхтатилишига сабаб бўлади.

70. Агар қимматли қоғозлар эгаси ўзининг анкета маълумотларини ўзгарганлиги тўғрисида ва бу ҳақда ўз вақтида тасдиқловчи ҳужжатларни тақдим этмаган бўлса, унинг реестрдаги анкета маълумотлари аниқлигига номинал сақловчи жавобгар бўлмайди.

71. Марказий депозитарийга қимматли қоғозлар эгалари рўйхатини тақдим этиш бўйича номинал сақловчи харажатларининг қопланиши улар ўртасидаги қонун ҳужжатларида белгиланган тартибда тузилган шартномага мувофиқ амалга оширилади.

72. Мазкур Низом талабларининг бузилишига айбдор шахслар қонун ҳужжатларига мувофиқ жавобгар бўлади.

73. Эмитент, трансфер-агент, Марказий депозитарий ва номинал сақловчилар жамият акциядорлари реестридаги маълумотларнинг тўлиқлиги ва ишончлилиги учун солидар жавобгар бўлади ҳамда ўзининг ҳаракатлари (ҳаракатсизлиги) туфайли акциядорга етказилган зарарнинг ўрнини қоплаши шарт.

Эмитент, трансфер-агент, Марказий депозитарий ва номинал сақловчи ўртасидаги низолар қонун ҳужжатларида белгиланган тартибда ҳал этилади.

74. Ушбу Низом талабларига амал қилиниши бўйича назоратни қимматли қоғозлар бозорини тартибга солиш бўйича ваколатли давлат органи амалга оширади.

75. Мазкур Низом Ўзбекистон Республикаси Монополиядан чиқариш, рақобат ва тадбиркорликни қўллаб-қувватлаш давлат қўмитаси билан келишилган.