Ғаллачилик ва пахтачилик соҳасида илмий-тадқиқот ишларини янада чуқурлаштириш, Қашқадарё вилояти илмий муассасаларининг моддий-техника базасини модернизация қилиш, қаттиқ ва юмшоқ буғдойнинг янги рақобатбардошли навларини, шунингдек минтақаларнинг табиий-иқлим шароитларига жавоб берадиган тезпишар, қурғоқчиликка чидамли ғўза навларини яратиш ишларини жадаллаштириш мақсадида Вазирлар Маҳкамаси қарор қилади:

1. Ўзбекистон Республикаси Қишлоқ ва сув хўжалиги вазирлиги ҳамда Қашқадарё вилояти ҳокимлигининг Ўзбекистон Қишлоқ хўжалиги илмий-ишлаб чиқариш маркази ҳузурида Қашқадарё бошоқли дон экинлари селекцияси ва уруғчилиги илмий-тадқиқот институтини ташкил этиш тўғрисидаги таклифи қабул қилинсин.

2. Қуйидагилар Қашқадарё бошоқли дон экинлари селекцияси ва уруғчилиги илмий-тадқиқот институтининг асосий вазифалари этиб белгилансин:

қаттиқ ва юмшоқ буғдойнинг юқори сифат кўрсаткичларига эга бўлган, касалликлар ва зараркунандаларга чидамли рақобатбардошли янги навларини яратиш;

минтақаларнинг табиий-иқлим шароитларига жавоб берадиган хорижий ва маҳаллий навларни танлаб олиш ва жойлаштириш бўйича таклифлар тайёрлаш;

яратилаётган бошоқли дон экинлари навларининг бошланғич уруғчилиги тизимини ташкил этиш;

сув билан етарли таъминланмаган ва қурғоқчилик шароитларида бошоқли дон экинларидан юқори ҳосил олиш бўйича илғор агротехнологияларни ишлаб чиқиш.

3. Қашқадарё бошоқли дон экинлари селекцияси ва уруғчилиги илмий-тадқиқот институтининг тузилмаси ҳамда ходимларининг 62 кишидан (хизмат кўрсатувчи ходимлардан ташқари) иборат бўлган чекланган сони 1-иловага мувофиқ тасдиқлансин.

Ўзбекистон Қишлоқ хўжалиги илмий-ишлаб чиқариш маркази бир ой муддатда институтни юқори малакали илмий кадрлар билан таъминласин.

4. Ўзбекистон Республикаси Қишлоқ ва сув хўжалиги вазирлиги бир ой муддатда Қашқадарё бошоқли дон экинлари селекцияси ва уруғчилиги илмий-тадқиқот институти уставини ишлаб чиқсин ва белгиланган тартибда тасдиқласин, шунингдек уни давлат рўйхатидан ўтказишни таъминласин.

5. Қашқадарё вилояти ҳокимлиги:

бир ҳафта муддатда — ташкил этилаётган институтга вилоятнинг учта зонасида 1000 гектар ишлов бериладиган, шу жумладан 300 гектар суғориладиган ва 700 гектар лалми ерлар ажратсин;

бир ой муддатда — институтни маъмурий ва ишлаб чиқариш бинолари, шунингдек алоқа воситалари билан таъминласин.

6. Ўзбекистон Республикаси Қишлоқ ва сув хўжалиги вазирлиги, Ўзбекистон Қишлоқ хўжалиги илмий-ишлаб чиқариш маркази ҳамда Қашқадарё вилояти ҳокимлигининг Ўзбекистон пахтачилик илмий-тадқиқот институтининг фаолият кўрсатаётган Қашқадарё филиалини таркибий бўлинмалар ташкил этиш, унинг илмий-ишлаб чиқариш базасини кенгайтириш ҳамда кадрлар таркибини етакчи олимлар ва мутахассислар билан мустаҳкамлаш асосида янада ривожлантириш тўғрисидаги таклифи қабул қилинсин.

7. Қуйидагилар Ўзбекистон пахтачилик илмий-тадқиқот институти Қашқадарё филиалининг асосий вазифалари этиб белгилансин:

селекция, уруғчилик, навларни янгилаш, толасининг сифати юқори бўлган тезпишар янги ғўза навларини яратиш ва уларни минтақанинг турли тупроқ-иқлим шароитларида оқилона жойлаштириш соҳасидаги ишларни такомиллаштириш ва жадаллаштириш;

сув билан етарли таъминланмаган ва қурғоқчилик шароитларида ғўза ўстиришнинг замонавий агротехнологияларини ишлаб чиқиш;

ғўзанинг янги ва истиқболли навлари бошланғич уруғчилиги тизимини ташкил этиш.

8. Ўзбекистон пахтачилик илмий-тадқиқот институти Қашқадарё филиалининг тузилмаси ва ходимларининг 38 кишидан (хизмат кўрсатувчи ходимлардан ташқари) иборат бўлган чекланган сони 2-иловага мувофиқ тасдиқлансин.

9. Қашқадарё вилояти ҳокимлиги ва «Ўзбекнефтгаз» миллий холдинг компаниясининг ташкил этилаётган Қашқадарё бошоқли дон экинлари селекцияси ва уруғчилиги илмий-тадқиқот институти ҳамда Ўзбекистон пахтачилик илмий-тадқиқот институтининг Қашқадарё филиали фаолиятини ташкил этиш учун 3-иловадаги жадвалга мувофиқ маблағларни босқичма-босқич ажратиш тўғрисидаги таклифига розилик берилсин.

10. Ўзбекистон Республикаси Вазирлар Маҳкамаси ҳузуридаги Фан ва технологияларни ривожлантиришни мувофиқлаштириш қўмитасига, Ўзбекистон қишлоқ хўжалиги илмий-ишлаб чиқариш марказига Қашқадарё бошоқли дон экинлари селекцияси ва уруғчилиги илмий-тадқиқот институти ҳамда Ўзбекистон пахтачилик илмий-тадқиқот институтининг Қашқадарё филиали томонидан ишлаб чиқиладиган илмий-амалий ва инновация ишларини 2009 — 2011 йилларда қишлоқ хўжалиги соҳасида илм-фанни ривожлантириш дастурлари бўйича бюджет маблағлари ҳисобига молиялаштириш юзасидан танловлар ўтказишга рухсат берилсин.

11. Ўзбекистон Республикаси Қишлоқ ва сув хўжалиги вазирлиги, Молия вазирлиги ҳамда Иқтисодиёт вазирлиги «Ўздонмаҳсулот» акциядорлик компанияси билан биргаликда бир ой муддатда бошоқли дон экинлари уруғи етиштирувчи хўжаликларни, шунингдек илмий муассасалар — навлар оригинаторларини, селекция ва уруғчилик соҳаси олимларини рағбатлантириш тўғрисидаги низомни ишлаб чиқсинлар ва белгиланган тартибда тасдиқласинлар.

12. Ўзбекистон Республикаси Олий ва ўрта махсус таълим вазирлиги Қишлоқ ва сув хўжалиги вазирлиги билан биргаликда 2009 — 2015 йилларда қишлоқ хўжалиги йўналишидаги олий таълим ва илмий муассасаларда Қашқадарё вилояти учун бакалаврлар, магистрлар, аспирантлар ва докторантлар тайёрлашни ташкил этсин, бунда келгусида уларни ташкил этилаётган қишлоқ хўжалиги соҳасидаги илмий муассасаларга юбориш ва улардан оқилона фойдаланишни назарда тутсин.

13. Ўзбекистон Республикаси Қишлоқ ва сув хўжалиги вазирлиги Адлия вазирлиги билан биргаликда қонун ҳужжатларига ушбу қарордан келиб чиқадиган ўзгартириш ва қўшимчалар тўғрисида бир ой муддатда Вазирлар Маҳкамасига таклифлар киритсин.

14. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Р.С. Қосимов ва Э.Р. Шоисматов зиммасига юклансин.