Бундан кейин «Томонлар» деб аталувчи, Ўзбекистон Республикаси Ҳукумати билан Туркманистон Ҳукумати,

Ўзбекистон Республикаси ва Туркманистон ўртасида дўстона муносабатларни ва ҳар томонлама ҳамкорликни янада мустаҳкамлаш тўғрисида 2007 йил 18 октябрда (Гарашсизлик) имзоланган Шартномага, Ўзбекистон Республикаси билан Туркманистон ўртасида сув хўжалиги масалалари бўйича ҳамкорлик тўғрисида 1996 йил 16 январда (Туркменбаши) имзоланган Битимга, ва шунингдек Ўзбекистон Республикаси Ҳукумати билан Туркманистон Ҳукумати ўртасида чегарабўйи вилоятлари ҳудудида жойлашган хўжалик объектларида хизмат қилувчи шахслар томонидан ўзбек-туркман чегарасини кесиб ўтишлари тўғрисида 2004 йил 19 ноябрда (Санджар) имзоланган Битимга амал қилиб,

Томонлар давлатларининг чегарабўйи ҳудудларида жойлашган хўжалик объектларидан фойдаланиш масалаларини тартибга солиш икки давлат ўртасидаги ўзаро ҳамфикрликни кучайтириш ва ҳамкорликни янада мустаҳкамлашга хизмат қилишини ҳисобга олиб,

Томонлар ўзаро фойда ва манфаатларни ҳурмат қилиш зарурлигини англаган ҳолда, ўз ваколатлари ва миллий давлат қонунчиликлари доирасида бир Томоннинг бошқа Томон давлатининг чегарабўйи ҳудудларида жойлашган хўжалик объектларида таъмирлаш-тиклаш ишларининг бажарилиши бўйича ҳамкорликни ривожлантиришга кўмаклашадилар.

Бир Томоннинг бошқа Томон давлатининг чегарабўйи ҳудудларида жойлашган хўжалик объектларини ишлатиш, таъмирлаш-тиклаш ишларини ўтказиш вақтидан самарали фойдаланиш мақсадида Томонлар Давлат чегарасидаги ўтказиш пунктларининг иш графигига риоя этилиши бўйича, ва шунингдек юборувчи Томон хизмат кўрсатиш персонали ходимларининг ушбу пунктлар орқали ўтиш тартибини имкони борича соддалаштириш бўйича зарур чоралар кўрадилар.

Томонлар хизмат кўрсатиш персонали ходимлари, шунингдек келгуси йил мобайнида хўжалик объектларидан нормал фойдаланиш учун эксплуатация режимига мувофиқ зарур бўлган автотранспорт, механизмлар, асбоб-ускуналар ва махсус техниканинг сонини олдиндан келишиб олиш мақсадида ҳар йилнинг октябрь (Гарашсизлик)-ноябрь (Санджар) ойларида Томонлар ваколатли ташкилотларининг маслаҳатлашувларини ўтказиш тўғрисида келишиб оладилар.

Томонларнинг ваколатли ташкилотлари хизмат кўрсатиш персонали ходимлари, шунингдек автотранспорт, механизмлар, асбоб-ускуналар ва махсус техниканинг келишиб олинган рўйхатларини кейинчалик ўз Томонларининг ваколатли органлари билан уларни Томонларнинг Давлат чегарасидан ўтказишга рухсат бериш масаласини келишиб олиш мақсадида бевосита айирбошлайдилар.

Бир Томоннинг бошқа Томон давлати чегарабўйи ҳудудларида жойлашган хўжалик объектларида авария ҳолатлари юз берган тақдирда Томонларнинг ваколатли органлари авария ҳолатларига барҳам бериш учун зарур бўлган хизмат кўрсатиш персонали ходимлари, автотранспорт, механизмлар ва махсус техникани фавқулодда, шу жумладан тунда, Давлат чегарасидан ўтказишга рухсат берадилар.

Томонларнинг ваколатли ташкилотлари хўжалик объектларининг нормал ишлаши учун зарур бўлган ва капитал таъмирга муҳтож бўлган автотранспорт, механизмлар, асбоб-ускуналар ва махсус техникани олиб кириш ва олиб чиқиш учун зарур рухсатномалар олиш билан боғлиқ масалаларни бевосита ҳал этишади.

Бир Томон давлатининг бошқа Томон хўжалик объектларида шартнома бўйича хизмат кўрсатиш персонали ходимлари сифатида ишлаётган фуқароларига иш ҳақи ва уларга тенглаштирилган бошқа тўловларни тўлашга мўлжалланган миллий ёки хорижий валютани ўзбек-туркман Давлат чегарасидаги ўтказиш пунктлари орқали олиб кириш ёки олиб чиқиш ҳудудига мазкур валюталар олиб кирилаётган Томон давлатининг миллий қонунчилигида белгиланган тартибда амалга оширилади.

Томонлар халқаро молия институтларининг инвестициялари ва молиявий маблағларини (грантлар, кредитлар ва қарзлар) жалб этиш орқали сув хўжалиги объектларини қуриш ва реконструкция қилиш бўйича лойиҳаларнинг амалга оширилишига кўмаклашадилар.

Томонлар давлатлари ҳудудларида инвестициявий лойиҳалар амалга ошириладиган тақдирда, Томонлар лойиҳаларнинг амалга оширилишида иштирок этадиган хорижий мутахассис ва экспертларнинг кириш визаларини расмийлаштиришга кўмаклашадилар.

Томонлар трансчегаравий сув ўзанларидаги сув хўжалик объектларини қуриш ва реконструкция қилиш шартларини ўз вақтида маълум қиладилар ва келишиб оладилар, бунда трансчегаравий сув ўзанларидан фойдаланишда қўшни давлатларга зарар етказмаслик принципига амал қилишади.

Томонларнинг хизмат кўрсатиш персоналлари ва бошқа мутахассислари ўртасида ҳамкорликни янада ривожлантириш ва ҳамфикрликни янада мустаҳкамлаш мақсадида, Томонлар сув ресурсларидан оқилона фойдаланиш, сув хўжалиги объектларини ишлатиш соҳасида тажриба ва ахборот айирбошлаш, шунингдек иккала Томонни ўзаро қизиқтириши мумкин бўлган сув хўжалиги ҳодисаларига нисбатан Томонларнинг муносабати ва позицияларини биргаликда изҳор қилиш учун мунтазам равишда иккала Томоннинг хизмат кўрсатиш персоналлари ва бошқа мутахассислари иштирокида семинар ва конференцияларни ташкил этадилар.

Ушбу Битим қоидаларини бажариш ёки қўллаш давомида юзага келадиган ҳар қандай келишмовчилик ёхуд баҳсли масалалар Томонлар ўртасида музокаралар ва маслаҳатлашувлар орқали ҳал қилинади.

Томонларнинг ўзаро келишувига мувофиқ ушбу Битимга унинг ажралмас қисми ҳисобланадиган алоҳида баённомалар билан расмийлаштириладиган ҳамда ушбу Битимнинг 11-моддасида белгиланган тартибга мувофиқ кучга кирадиган ўзгартириш ёки қўшимчалар киритилиши мумкин.

Ушбу Битим доирасида ҳамкорлик ҳар бир Томон давлатининг қонунчилигига мувофиқ амалга оширилиши лозим.

Ушбу Битим беш йил муддатга тузилади ва имзоланган кундан бошлаб кучга киради.

Томонлардан ҳар бири ушбу Битимнинг амал қилишини тўхтатиш нияти тўғрисида бошқа Томонга дипломатик каналлар орқали ёзма хабарнома юбориб, унинг амал қилишини тўхтатиши мумкин. Бу ҳолда ушбу Битимнинг амал қилиши мазкур хабарнома олинган санадан бошлаб олти ой ўтгач амал қилишдан тўхтайди.

2008 йил 10 мартда (Новруз) икки асл нусхада, ҳар бири ўзбек, туркман ва рус тилларида тузилди, бунда барча матнлар бир хил кучга эга.

Ушбу Битим қоидаларини талқин қилиш мақсадида рус тилидаги матндан фойдаланилади.