Ўзбекистон Республикаси Ҳукумати билан Покистон Ислом Республикаси Ҳукумати, бундан кейин «Томонлар» деб аталувчилар,

икки томонлама муносабатлар битимлари, шу жумладан Ўзбекистон Республикаси билан Покистон Ислом Республикаси ўртасида Давлатлараро муносабатлар ва ҳамкорлик принциплари тўғрисида 1992 йил 27 июнда имзоланган Шартномага амал қилиб,

кичик ва хусусий тадбиркорлик субъектларини қўллаб-қувватлаш ҳамда ривожлантириш орқали келгусида иқтисодий ҳамкорликни мустаҳкамлаш ва ривожлантиришга интилиб,

тенглик ва ўзаро манфаат принципларини эътироф этиб,

ушбу ҳамкорлик ҳам саноат ривожланиши ҳамда Ўзбекистон Республикаси билан Покистон Ислом Республикаси ўртасидаги алоқаларни кучайтириш соҳасида кенг имкониятлар яратишига ишониб,

кичик бизнес корхоналарининг икки мамлакатнинг иқтисодиётида ижтимоий ва иқтисодий ролининг муҳимлигини англаб,

икки мамлакатда корхоналарни ташкил этиш ва қўллаб-қувватлаш мисолларига асосланган кичик ҳамда хусусий тадбиркорлик субъектларини ривожлантириш соҳасида ҳамкорликни йўлга қўйишда ўзаро манфаатдорликни тасдиқлаб,

саноат ҳамкорликнинг истиқболли доираларини ривожлантириш ва кичик бизнес корхоналарини ташкил этиш, мустаҳкамлаш ҳамда инновациялардан фойдаланиш воситасида хусусий тармоқни ривожлантириш мақсадларини кўзлаб,

Ушбу Битим доирасида ҳамкорликни амалга оширишда Томонлар қуйидаги принципларга амал қиладилар:

— Томонлар давлатларининг миллий қонун ҳужжатларини ўзаро ҳурмат қилиш;

— кичик ва хусусий тадбиркорлик субъектларини қўллаб-қувватлаш ва ривожлантиришга қаратилган сиёсатни амалга оширишда Томонлардан ҳар бирининг тўлиқ мустақиллиги;

— тенглик, шерикчилик ва ўзаро манфаатли принципларига асосланган саноат, иқтисодиёт, соғлиқни сақлаш ва фармацевтика, ахборот-коммуникацион технологиялар, фан, инвестициялар, савдо ва бошқа соҳаларда ўзаро ҳамкорлик шаклларига эришиш.

Томонлар ўзаро ҳамкорликнинг қуйидаги мақсадларини белгилаб олдилар:

— кичик ва хусусий тадбиркорлик борасидаги сиёсатни ривожлантириш мақсадида илғор тажрибаларни ўзаро алмашиш учун Томонлар ўртасидаги алоқалар ва ҳамкорликни кучайтириш;

— Томонларнинг кичик ва хусусий тадбиркорликни ҳар томонлама қўллаб-қувватловчи ташкилотлари ўртасида ҳамкорликни мустаҳкамлаш;

— янги корхоналар ташкил этиш, шунингдек амал қилаётган корхоналар учун механизм ҳамда услублар дастурини белгилаш;

— кичик ва хусусий тадбиркорлик субъектлари томонидан халқаро стандартлар асосида технологик ҳамда ташкилий инновацияларни яхшилашга йўналтириш учун мумкин бўлган хатти-ҳаракатлар ва чораларни белгилаш;

— кичик ва хусусий тадбиркорлик субъектларини ривожлантириш, хусусан, қўшма таълим тизимлари, бизнес-инкубаторлар ва технопарклар орқали махсус лойиҳаларни тузиш;

— кичик ва хусусий тадбиркорлик кадрларини тайёрлаш ва қайта тайёрлаш, ушбу соҳадаги мутахассисларнинг малакасини ошириш;

— кичик бизнес корхоналарини ривожлантиришга қаратилган бевосита инвестициялар, шу жумладан имтиёзли кредитлар, займларни жалб қилишга кўмаклашиш.

Қуйидагилар ушбу Битимни амалга оширишда Томонларнинг ваколатли органлари ҳисобланадилар:

Ўзбекистон томонидан:

Монополиядан чиқариш, рақобат ва тадбиркорликни қўллаб-қувватлаш давлат қўмитаси.

Покистон томонидан:

Саноат, ишлаб чиқариш ва махсус ташаббуслар вазирлиги.

Томонлар Ўзбекистон Республикаси Ҳукумати билан Покистон Ислом Республикаси Ҳукумати ўртасида Иқтисодий-савдо ҳамкорлик тўғрисида 1992 йил 27 июнда имзоланган Битимга мувофиқ тузилган Ўзбек-Покистон савдо-иқтисодий ва илмий-техникавий ҳамкорлик бўйича ҳукуматлараро қўшма комиссия доирасида кичик ва хусусий тадбиркорлик соҳасида ҳамкорлик бўйича Кичик комиссия (бундан кейин «Кичик комиссия» деб аталади) ташкил этадилар.

Кичик комиссия мажлислари, қоидага кўра, Ўзбекистон Республикаси Ҳукумати билан Покистон Ислом Республикаси Ҳукумати ўртасида савдо-иқтисодий ва илмий-техникавий ҳамкорлик бўйича Ўзбек-Покистон ҳукуматлараро қўшма комиссия мажлислари доирасида ўтказилади.

Мажлис давомида Кичик комиссия Томонларга ҳисобот ва келгуси давр учун ишчи дастурни тақдим этиши лозим. Биринчи ҳисобот Кичик комиссия тузилган даврдан бошлаб олти ой давомида тақдим этилади.

Кичик комиссияга ҳамкорликда раҳбарлик қилиш ҳар бир Томоннинг, ушбу Битимни амалга оширишга масъул бўлган ваколатли органидан битта вакил томонидан амалга оширилади. Кичик комиссия аъзолари ва сони аниқ заруриятлардан келиб чиқиб, Ҳамраислар томонидан белгиланади. Зарур бўлганда, Томонларнинг розилиги билан Кичик комиссия таркибида ўзига хос масалаларга жавоб берадиган ички гуруҳлар ҳам ташкил этилиши мумкин.

Кичик комиссиянинг асосий вазифалари қуйидагилардан иборат:

1. Ушбу Битим мақсадларини амалга ошириш доирасида Ўзбекистон Республикаси Ҳукумати билан Покистон Ислом Республикаси Ҳукумати ўртасида савдо-иқтисодий ва илмий-техникавий ҳамкорлик бўйича Ўзбек-Покистон ҳукуматлараро қўшма комиссия мажлисларини тайёрлаш ва ўтказишда иштирок этиш.

2. Иқтисодий ва ҳуқуқий ҳолатни, амалдаги дастурларни таҳлил қилиш, ривожланиш истиқболларини белгилаш, икки мамлакатнинг жамоатчилиги ва хусусий ташкилотлари иштирокида томонлар билан учрашувлар ва семинарлар ўтказиш.

3. Устувор лойиҳалар бўйича кичик ва хусусий тадбиркорликнинг ривожланиши йўналишларини белгилаш.

4. Икки мамлакат тадбиркорларининг тегишли процедуралар ўтказилгач, ишбилармонлар ҳамкорлиги юзасидан маҳаллий шерикларнинг тавсиялари.

5. Ўқув дастурлари, семинарлар, кўргазмалар, тажриба алмашишларни ташкил этиш ва ўтказиш.

6. Кичик ва хусусий тадбиркорлик субъектларини ташкил этиш, ривожлантириш ва мустаҳкамлаш бўйича маҳаллий лойиҳаларни биргаликда аниқлаш мақсадида «фокус гуруҳлари»ни тузиш.

7. Қуйидаги мақсадларга йўналтирилган тажриба лойиҳаларини амалга ошириш:

• кичик ва хусусий тадбиркорлик субъектларини қўллаб-қувватлаш бўйича аниқ йўналтирилган дастурларни ривожлантириш ва амалга ошириш;

• кичик бизнес корхоналарини техник жиҳозлаш бўйича тадбирларни амалга ошириш;

• икки мамлакат инвесторлари иштирокида қўшма корхоналар ташкил этиш;

• икки мамлакатнинг кичик ва хусусий тадбиркорлик субъектлари ўртасида устувор йўналишлар бўйича бевосита алоқаларни ўрнатишга кўмаклашиш.

Тажриба лойиҳалари қуйидаги босқичларда амалга оширилади:

• лойиҳаларнинг техник, иқтисодий ва молиявий асосларини тайёрлаш;

• лойиҳаларни ахборот ва маслаҳат йўли билан қўллаб-қувватлаш;

• лойиҳаларни амалга оширишнинг молиявий манбаларини аниқлаш;

• лойиҳаларни амалга ошириш;

• лойиҳаларнинг амалга ошириш жараёнини кузатиш (кўмаклашиш);

• лойиҳаларнинг бажарилиши устидан мониторинг олиб бориш.

8. Амалдаги фаолиятни, эришилган натижаларни баҳолаш ҳамда келгусидаги ҳаракатларни белгилаш.

9. Натижаларни якунлаш.

Томонлар давлатлари миллий қонун ҳужжатлари талабларини инобатга олган ҳолда, кичик ва хусусий тадбиркорлик субъектлари вакиллари ҳисобланган Томонлар давлатлари фуқаролари учун визаларни расмийлаштириш процедураларини енгиллаштиришга интиладилар.

Ушбу Битим қоидаларини қўллаш ва талқин қилиш билан боғлиқ юзага келадиган баҳс ва келишмовчиликлар Томонлар ўртасида музокара ва маслаҳатлашувлар орқали тартибга солинади.

Томонларнинг ўзаро келишувига кўра, ушбу Битимга унинг ажралмас қисми ҳисобланадиган алоҳида баённомалар билан расмийлаштириладиган ўзгартиш ва қўшимчалар киритилиши мумкин.

Ушбу Битим Томонлар унинг кучга кириши учун зарур бўлган давлат ички процедураларини бажарганликлари тўғрисида дипломатик каналлар орқали охирги ёзма хабарнома олинган санадан бошлаб кучга киради.

Ушбу Битим беш йил давомида амал қилади ва Томонлардан бири унинг амал қилишини тўхтатиш нияти тўғрисида навбатдаги муддат тугашидан камида олти ой илгари дипломатик каналлар орқали ёзма равишда хабардор қилмаса, у кейинги бир йиллик муддатларга ўз-ўзидан узаяверади.

Исломобод шаҳрида 2006 йил 2 майда икки нусхада, ҳар бири ўзбек ва инглиз тилларида тузилди, бунда барча матнлар бир хил кучга эга.

Ушбу Битим қоидаларини талқин қилишда келишмовчиликлар юзага келганда, инглиз тилидаги матн асос сифатида қабул қилинади.