LexUZ шарҳи
Мазкур қарор Ўзбекистон Республикаси Вазирлар Маҳкамасининг 2016 йил 26 апрелдаги 122-сонли «Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш, шунингдек баъзиларини ўз кучини йўқотган деб ҳисоблаш тўғрисида (Ўзбекистон Республикасининг «Ўзбекистон Республикасининг Бюджет кодексини тасдиқлаш тўғрисида» 2013 йил 26 декабрдаги ЎРҚ-360-сон ҳамда «Солиқ ва бюджет сиёсатининг 2016 йилга мўлжалланган асосий йўналишлари қабул қилинганлиги муносабати билан Ўзбекистон Республикасининг Солиқ кодексига ўзгартиш ва қўшимчалар киритиш тўғрисида» 2015 йил 31 декабрдаги ЎРҚ-398-сон қонунлари)»ги қарорига асосан ўз кучини йўқотган.
Давлат бюджети ҳисобидан маблағ билан таъминланадиган муассасалар ва ташкилотлар фаолиятини тартибга солиш, бюджетдан ажратилаётган маблағлардан оқилона ва самарали фойдаланишни таъминлаш мақсадида Вазирлар Маҳкамаси қарор қилади:
1. Молия вазирлиги, маҳаллий молия органлари, бюджет ҳисобидан маблағ билан таъминланадиган муассасалар ва ташкилотларга эга бўлган вазирликлар ва идоралар Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда бюджетдан маблағ билан таъминланадиган барча муассасалар ва ташкилотларни 1997 йил 15 ноябргача ялпи рўйхатдан ўтказсинлар ҳамда улар бундан буён юридик шахс сифатида фаолият кўрсатишининг мақсадга мувофиқлигини аниқласинлар.
2. Вазирликлар ва идоралар Молия вазирлиги билан келишган ҳолда ўзларига қарашли бюджетдан маблағ билан таъминланадиган муассасалар ва ташкилотларнинг, раҳбарлар ва тоифалар бўйича мутахассислар сонининг нисбатини назарда тутган ҳолда, намунавий штатлар жадвалини икки ой муддатда ишлаб чиқсинлар ва тасдиқласинлар.
3. 1998 йилдан бошлаб, бюджетдан маблағ билан таъминланадиган муассасалар ва ташкилотларнинг штатлар жадвали ва харажатлар сметалари: республика бюджетидан маблағ билан таъминланадиганлариники — Молия вазирлигида, маҳаллий бюджетлардан маблағ билан таъминланадиганлариники — тегишли молия органларида мажбурий равишда рўйхатдан ўтказилиши белгилаб қўйилсин.
Бюджетдан маблағ билан таъминланадиган муассасалар, ташкилотлар раҳбарларига штат жадваллари молия органларида рўйхатдан ўтказилгунга қадар янги штат жадвалларини амалга киритиш, шунингдек амалдаги штат жадвалларига ўзгартиришлар киритиш тақиқлаб қўйилсин.
4. Банк муассасалари 1998 йил 1 январдан бошлаб бюджетдан маблағ билан таъминланадиган муассасалар ва ташкилотларнинг штатлар жадваллари ва харажатлар сметалари Молия вазирлигида ёки тегишли молия органларида рўйхатдан ўтказилган тақдирдагина ходимларга иш ҳақи тўлаш учун маблағлар берсинлар.
5. Молия вазирлиги ва республика молия органлари белгиланган штатларга, лавозим маошларига ва харажатлар сметасига риоя қилмаган бюджетдан маблағ билан таъминланадиган муассасалар ва ташкилотларнинг харажатларини маблағ билан таъминлашни тўхтатиб қўйсинлар.