Хонжиза ва Учқулоч конлари полиметалл рудалари минерал-хомашё базасидан самарали, оқилона ва комплекс фойдаланишни таъминлаш ва шу асосда «Олмалиқ КМК» ОАЖнинг ишлаб чиқариш қувватларидан тўлароқ фойдаланиш, рангли ва қимматбаҳо металлар ишлаб чиқаришни ошириш мақсадида:

1. Ўзбекистон Республикаси Иқтисодиёт вазирлиги, Молия вазирлиги ва «Олмалиқ КМК» ОАЖнинг Хонжиза ва Учқулоч конлари полиметалл рудалари захираси негизида тегишли равишда йилига 650 ва 500 минг тонна руда қазиб чиқариш қувватига эга кон бойитиш мажмуасини қуриш ва 2009 йилнинг иккинчи ярим йиллигида саноат кўламида ишлаб чиқаришни ташкил этиш тўғрисидаги таклифи қабул қилинсин.

2. Ўзбекистон Республикаси Давлат геология ва минерал ресурслар қўмитаси ўн кун муддатда Хонжиза кони фойдали қазилмалар захирасини белгиланган тартибда «Олмалиқ КМК» ОАЖнинг балансига топширсин.

3. «Олмалиқ КМК» ОАЖ Ўзбекистон Республикаси Иқтисодиёт вазирлигининг «Ўзоғирнефтгазкимёлойиҳа» институти Давлат Геология ва минерал ресурслар қўмитаси билан биргаликда икки ой муддатда «Хонжиза ва Учқулоч конлари полиметалл рудаларини биргаликда тўлиқ қайта ишлаш» лойиҳасининг дастлабки техник-иқтисодий асосини ишлаб чиқсин ва белгиланган тартибда Вазирлар Маҳкамасига киритсин. Унда:

металлар энг кам чиқиндига чиқарилган ҳолда конлар захираларини тўлиқ қайта ишлаш йўли билан қимматбаҳо компонентларни максимал ажратиб олиш;

Хонжиза конидаги таркибида металл кўп бўлган полиметалл рудаларни Учқулоч кони рудалари билан қўшиб қайта ишлаш назарда тутилсин.

4. Белгилансинки, импорт қилинадиган зарур технологик ускуналарни харид қилишга Ўзбекистон Республикаси Тикланиш ва тараққиёт жамғармаси маблағларини жалб этган ҳолда «Олмалиқ КМК» ОАЖнинг махсус ҳисоб варағида мис сотишдан тушадиган ортиқча фойдадан жамланадиган маблағлар мазкур лойиҳани амалга оширишни молиялаштиришнинг асосий манбаи ҳисобланади.

5. Ўзбекистон Республикаси Ташқи иқтисодий алоқалар, инвестициялар ва савдо вазирлиги, «Давархитектқурилиш» қўмитаси ҳамда «Олмалиқ КМК» ОАЖ лойиҳанинг дастлабки техник-иқтисодий асоси тасдиқланганидан сўнг икки ой муддатда асосий технологик ускуналарни етказиб беришга танлов ҳужжатларини ишлаб чиқсин ва тендер ўтказсин.

Ўзбекистон Республикаси Тикланиш ва тараққиёт жамғармаси танлов савдолари натижаларига кўра, харид қилинадиган импорт технологик ускуналар қийматининг 35 фоизидан ортиқ бўлмаган ҳажмда мазкур лойиҳани амалга оширишни 2007 йилдан бошлаб биргаликда молиялаштиришни таъминласин.

6. Ўзбекистон Республикаси Иқтисодиёт вазирлиги, Молия вазирлиги «Хонжиза ва Учқулоч конлари полиметалл рудаларини биргаликда тўлиқ қайта ишлаш» лойиҳасини белгиланган тартибда Ўзбекистон Республикасининг 2006 йилги ва кейинги йиллардаги Инвестиция дастурига киритсин.

7. «Олмалиқ КМК» ОАЖга зарур ҳолларда мазкур лойиҳани амалга оширишга Россия Федерациясининг «Механобр-инжиниринг» ЁАЖ, «РИВС» ЁАЖ (Санкт-Петербург шаҳри) ва «Гипроцветмет» ФГУП (Москва шаҳри) каби базавий институтлари ва бошқа юқори малакали хорижий мутахассисларни контракт асосида жалб этишга рухсат берилсин.

8. «Олмалиқ КМК» ОАЖ мазкур лойиҳани амалга ошириш даврида Вазирлар Маҳкамаси томонидан тасдиқланадиган рўйхат бўйича, Хонжиза ва Учқулоч конлари полиметалл рудаларини саноат кўламида қазиб олиш ва қайта ишлашни таъминлаш учун «Олмалиқ КМК» ОАЖ томонидан импорт қилинадиган материаллар, ускуналар ва улар учун Ўзбекистонда ишлаб чиқарилмайдиган эҳтиёт қисмлар, олиб келинадиган техник ҳужжатлар божхона тўловлари тўлашдан (божхона расмийлаштируви йиғимларидан ташқари) озод этилсин.

9. Қуйидагилар:

Вазирлар Маҳкамасининг «Хонжиза полиметалл конини очиш тўғрисида» 2002 йил 17 октябрдаги 359-сонли қарори;

Ўзбекистон Республикаси Президентининг «Ўзбекистон Республикасининг 2006 йилги Инвестиция дастури тўғрисида» 2005 йил 8 ноябрдаги ПҚ-216-сонли қарорига 6-илованинг 42-банди;

10. Мазкур қарорнинг ижросини назорат қилиш Ўзбекистон Республикаси Бош вазирининг ўринбосарлари Р.С. Азимов ва Э.Р. Шоисматов зиммаларига юклансин.