Ўзбекистон Республикаси Президентининг «Қимматли қоғозлар бозорини янада ривожлантириш чора-тадбирлари тўғрисида» 2006 йил 27 сентябрдаги ПҚ-475-сон қарорига мувофиқ Вазирлар Маҳкамаси қарор қилади:

Ўзбекистон Республикаси Ҳукуматининг иловага мувофиқ айрим қарорларига ўзгартиришлар киритилсин.

1. Вазирлар Маҳкамасининг 1993 йил 21 январдаги 45-сон қарори билан тасдиқланган Ўзбекистон Республикаси Ташқи иқтисодий фаолият миллий банкининг уставида:

а) 17-банднинг олтинчи хатбошида «облигациялар ва бошқа қийматли қоғозлар» сўзлари «қимматли қоғозлар (облигациялардан ташқари)» сўзлари билан алмаштирилсин;

б) 18-бандда:

учинчи хатбошидан «облигациялар» сўзлари чиқариб ташлансин;

ўн бешинчи хатбошида: «(чеклар, аккредитивлар, векселлар, акциялар, облигациялар ва бошқа шу кабилар)» сўзлари «(облигациялардан ташқари)» сўзлари билан алмаштирилсин.

2. Вазирлар Маҳкамасининг «Тошкент республика фонд биржасининг самарали фаолият кўрсатишини таъминлаш ва қийматли қоғозлар бозори инфраструктурасини ривожлантириш чора-тадбирлари тўғрисида» 1994 йил 8 июндаги 285-сон қарори билан тасдиқланган Ўзбекистон Республикаси ҳудудида қийматли қоғозлар билан битишувлар тузиш ва уларни рўйхатдан ўтказиш тартиби тўғрисидаги низомнинг 2-банди иккинчи хатбошида «акционерлик жамиятлари ва бошқа корхоналар томонидан чиқариладиган облигациялар» сўзлари «очиқ акциядорлик жамиятлари томонидан чиқариладиган облигациялар» сўзлари билан алмаштирилсин.

3. Вазирлар Маҳкамасининг «Хусусийлаштирилган корхоналарни корпоратив бошқаришни такомиллаштириш чора-тадбирлари тўғрисида» 2003 йил 19 апрелдаги 189-сон қарори (Ўзбекистон Республикаси ҚТ., 2003 й., 4-сон, 32-модда) Акциядорлик жамиятининг Кузатувчи кенгаши тўғрисидаги Намунавий низомнинг 4-банди қуйидаги мазмундаги ўн тўртинчи ва ўн бешинчи хатбошилар билан тўлдирилсин:

«агар жамиятнинг устав фондида жамиятнинг йиллик бизнес-режасини тасдиқлаш кузатувчи кенгашнинг ваколатига киритилмаган ёки акциядорларнинг умумий йиғилиши билан унга топширилмаган бўлса, жамиятнинг йиллик бизнес-режасини маъқуллаш. Бунда, навбатдаги йилга жамиятнинг бизнес-режаси жорий йилнинг 1 декабридан кечикмай кузатувчи кенгаш мажлисида маъқулланиши керак;

ички аудит хизматини ташкил ва унинг ходимларини тайинлаш»;

ўн тўртинчи—йигирма еттинчи хатбошилар тегишли равишда ўн олтинчи—йигирма тўққизинчи хатбошилар деб ҳисоблансин.