Суд ҳокимияти мустақиллигини мустаҳкамлаш ва суд ҳимоясининг самарадорлигини оширишга қаратилган мамлакат суд-ҳуқуқ тизимини ислоҳ қилишнинг асосий вазифалари бўлиб, суд қарорларини ижро этишнинг самарали тизимини яратиш, судларни ҳар томонлама моддий-техника жиҳатидан таъминлаш ва молиялаштириш ҳисобланади.

Мазкур вазифаларни амалга оширишда Ўзбекистон Республикаси Адлия вазирлиги ҳузуридаги Суд қарорларини ижро этиш, судлар фаолиятини моддий-техника жиҳатидан ва молиявий таъминлаш департаменти (кейинги ўринларда — Суд департаменти) алоҳида ўрин эгаллайди.

Суд департаменти томонидан суд қарорларини мажбурий ижро этиш ишларининг самарадорлигини ошириш юзасидан муайян ишлар олиб борилмоқда. Охирги 4 йил мобайнида ижро этилган суд қарорларининг сони 3 бараварга ошди. 2005 йил якунларига кўра, суд ижрочилари томонидан 2002 йилга нисбатан 17 баравар кўп, яъни 716,8 млрд. сўм маблағ амалда ундирилди.

Судларнинг моддий-техник таъминоти сезиларли яхшиланди. Ушбу мақсадларга ажратилаётган пул маблағлари ҳажми кейинги тўрт йилда 2,7 бараварга кўпайди. Фақатгина 2005 йилда 1,3 млрд. сўм маблағлар эвазига 60 та суд бинолари қурилди ва капитал таъмирланди, 14 та янги бинолар сотиб олинди.

Айни пайтда махсус ўтказилган текширишлар шуни кўрсатдики, лозим даражада иш ташкил этилмаганлиги оқибатида Суд департаменти фаолиятида жиддий хато ва камчиликлар мавжуд бўлиб, улар суд қарорларини мажбурий ижро этиш тизими самарадорлигига салбий таъсир кўрсатмоқда. Масъул мансабдор шахслар томонидан мажбурий ундирувлар бўйича юклатилган мажбуриятлар мунтазам равишда бузиб келинаётганлиги оқибатида, суд ижрочилари иш юритувига келиб тушган ижро ҳужжатларидаги ижроси таъминланмаган ҳужжатлар қолдиғи йилдан йилга кўпайиб бормоқда ва 2005 йил якунларига кўра 26 фоизни ташкил этган. Улар бўйича ундирилмай қолган маблағлар эса 445,5 млрд. сўмни ташкил этган.

Кадрларни танлаш ва жой-жойига қўйиш, уларнинг малакасини ошириш масалаларига етарлича эътибор берилмаган. Суд департаментида қонунийликни ҳамда ходимлар ўртасида интизомни мустаҳкамлаш бўйича ишлар сусайтириб юборилган. Текшириш мобайнида етарли иш тажрибасига, маълумотга эга бўлмаган ёхуд ҳуқуқни муҳофаза қилиш идораларидаги аввалги хизмати давомида ўз шаънига иснод келтирган шахсларни масъул лавозимларга тайинлаш ҳолатлари аниқланди.

Ташкилий ва кадрлар билан ишлаш масалалари бўшаштириб юборилганлиги оқибатида Суд департаменти тизимида мансабдорлик жиноятлари охирги 3 йил давомида деярли 14 бараварга ортган.

Суд департаменти раҳбарлари ва ходимлари томонидан қарздорларнинг мол-мулкини сотишда суиистеъмолликлар, ижро ишини юритишда сансалорлик ва муддат бузилишлар, кўчмас мулк объектлари ва автотранспорт воситалари нархини қасддан камайтириш, шунингдек порахўрлик ҳолатлари учрамоқда. Ижро ҳужжатларини рўйхатга олмасдан яшириш ҳолатлари мавжуд.

Тизимда усулубий-таҳлилий ишлар лозим даражада ташкил этилмаган. Cудьялар, суд процесслари ва уларнинг иштирокчилари хавфсизлигини таъминлаш даражаси бугунги кун талабларига жавоб бермайди. Бу соҳада зарур ташкилий-ҳуқуқий механизмлар ишлаб чиқилмаган.

Соҳадаги бундай аҳвол, авваламбор, Суд департаментида ишларнинг қониқарсиз даражада ташкил этилганлиги, раҳбар кадрларнинг малакасизлиги ва улар томонидан қонунийликни бузиб келиниши натижаси бўлиб, ўз навбатида мамлакатда суд тизими обрўсига путур етказмоқда ҳамда суд-ҳуқуқ соҳасида амалга оширилаётган ислоҳотларга салбий таъсир кўрсатмоқда.

Мавжуд салбий ҳолатнинг юзага келишига охирги йилларда Суд департаментига суд қарорларини ижро этиш бўйича бир қатор қўшимча вазифаларнинг юкланиши сезиларли таъсирини ўтказди. Жумладан, бюджет олдидаги боқиманда қарзларни қарздорнинг мол-мулки ҳисобидан мажбурий ундириш, давлат даромадига ўтказилган мол-мулкни йўқ қилиб ташлаш ёки сотиш, молиявий жарималарни тадбиркорлик субъектларидан суд тартибида ундириш каби вазифаларнинг юклатилиши эвазига суд ижрочиларининг иш ҳажми кескин ошиб кетди. Суд ижрочисининг ўртача иш ҳажми 2001 йилга нисбатан уч баравардан ортиқ, айрим ҳудудларда эса 6-7 бараварга ошди. Шу билан бирга, Суд департаменти бўлинмаларининг моддий-техника базасини мустаҳкамлаш, суд ижрочилари фаолиятини ташкил этишнинг шакл ва усулларини, ахборот-коммуникация ва бошқа замонавий технологиялардан фойдаланган ҳолда такомиллаштириш чора-тадбирлари кўрилмади.

Суд қарорларининг сўзсиз ижро этилишини таъминлаш тизимини янада такомиллаштириш, Суд департаментининг унга юклатилган вазифаларни амалга ошириши юзасидан фаолияти самарадорлигини кўтариш мақсадида:

1. Ўзбекистон Республикаси Адлия вазирлигининг Суд департаменти фаолиятига раҳбарлик қилиш, суд қарорларини мажбурий ижро этиш тизимини такомиллаштириш бўйича ишлари қониқарсиз деб топилсин.

Ишдаги жиддий қонунбузилишлар, камчиликлар ва йўл қўйилган суиистеъмолликлар учун Суд департаменти директори, айрим таркибий бўлинмаларнинг раҳбарлари ва ходимлари эгаллаб турган лавозимларидан озод этилганлиги, текшириш материаллари қонун асосида кўриб чиқиш учун ҳуқуқни муҳофаза қилувчи органларга юборилганлиги маълумот учун қабул қилинсин.

2. Ўзбекистон Республикаси Адлия вазирлиги раҳбарияти (Б. Мустафоев):

кадрлар таркибини ҳалол, виждонли, малакали мутахассислар билан мустаҳкамлаш, Суд департаменти бўлинмаларини касбий тайёргарлиги ва маънавий савиясига кўра эгаллаб турган лавозимига номуносиб ходимлардан тозалашни назарда тутган ҳолда 2006 йил 1 ноябрга қадар Суд департаменти ходимларини аттестациядан ўтказсин;

мутахассисларни танлаб олишда холислик ва очиқ-ойдинликни таъминлаган ҳолда суд ижрочиси лавозимига тайинлаш учун кадрларни танлов асосида саралаб олиш тартибини амалиётга жорий қилсин.

Белгилансинки, Суд департаменти директори ўринбосарлари, бошқарма ва бўлим бошлиқларини лавозимларига тайинлаш Ўзбекистон Республикаси Адлия вазирининг буйруғи билан амалга оширилади.

3. Суд департаменти тузилмасида бошқарув ходимлари сони 22 кишидан, шу жумладан марказий аппаратда 5 кишидан иборат таркибда Ички хавфсизлик инспекцияси ташкил этилсин.

Белгилансинки, Ички хавфсизлик инспекцияси ва унинг жойлардаги бўлинмалари юклатилган вазифаларни амалга оширишда бевосита Суд департаменти директорига бўйсунадилар.

4. Ўзбекистон Республикаси Адлия вазирлиги ҳузуридаги Суд қарорларини ижро этиш, судлар фаолиятини моддий-техника жиҳатидан ва молиявий таъминлаш департаменти Низоми, ташкилий-штат тузилмаси, Суд департаменти ҳудудий бошқармалари ва туман (шаҳар) суд ижрочилари бўлимларининг намунавий ташкилий-штат тузилмаси 1 — 6-иловаларга мувофиқ тасдиқлансин.

Қўшимча юклатилган вазифаларни ҳисобга олган ҳолда Суд департаменти ходимлари сони 540 нафарга кўпайтирилсин ҳамда Суд департаменти ходимларининг чекланган сони, хизмат кўрсатувчи ходимлардан ташқари 1270 нафар, шу жумладан марказий аппарат ходимлари сони 46 нафар этиб белгилансин.

Ўзбекистон Республикаси Адлия вазирига Департаментнинг ташкилий-штат тузилмасига ходимларнинг белгиланган умумий сони доирасида ўзгартиришлар киритиш ҳуқуқи берилсин.

5. Ўзбекистон Республикаси Молия вазирлиги (Р. Азимов):

Департаментнинг штат жадвали ва харажатлар сметасига мазкур қарордан келиб чиққан ҳолда тегишли ўзгартиришлар киритсин;

Адлия вазирлиги билан биргаликда икки ой муддатда суд ижрочилари бўлимларининг моддий-техника базасини мустаҳкамлаш, ундирган пул маблағлари миқдори ҳамда ишининг якуний натижаларидан келиб чиққан ҳолда уларни рағбатлантиришга қаратилган таклифларни Вазирлар Маҳкамасига киритсин.

6. Белгилансинки, 2006 йил 1 октябрдан бошлаб суд қарорлари ва бошқа органлар ҳужжатлари асосида автотранспорт воситалари ва кўчмас мулкни сотиш фақатгина биржалар томонидан махсус савдо майдонларида ўтказиладиган очиқ аукционлар орқали амалга оширилади.

Суд ҳужжатлари ва бошқа органлар ҳужжатларини ижро этиш жараёнида автомототранспорт воситалари ва кўчмас мулкни сотиш тартиби тўғрисидаги низом 7-иловага мувофиқ тасдиқлансин.

7. Ўзбекистон Республикаси Давлат мулки қўмитаси, Адлия вазирлиги икки ой муддатда:

баҳоловчиларни танлов асосида танлаб олиш механизмини жорий этишни, шунингдек мол-мулк баҳосини қасддан пасайтирилиши ва бошқа қонунбузилишларни олдини олишни назарда тутган ҳолда Ижро ҳаракатларини амалга ошириш жараёнида суд ижрочилари томонидан хатланган мол-мулкни баҳолаш тартиби тўғрисидаги низомни;

мол-мулкни сотадиган савдо ташкилотини танлов асосида танлаб олишни назарда тутган ҳолда манфаатдор вазирликлар ва идоралар билан биргаликда Ижро ҳужжатлари асосида мол-мулкни (автомототранспорт воситалари ва кўчмас мулк бундан мустасно) сотиш тартиби тўғрисидаги низомни тасдиқласин.

8. Ўзбекистон Республикаси Адлия вазирлиги:

Олий ва ўрта махсус таълим вазирлиги (Р. Қосимов) билан биргаликда 2006/2007 ўқув йилидан бошлаб юридик йўналишдаги олий таълим муассасалари ўқув дастурларига ижро иши юритуви бўйича фанлар киритсин, шунингдек мутахассисларни даврий равишда (ҳар беш йилда) Адлия вазирлиги ҳузуридаги Юристлар малакасини ошириш марказида мажбурий ижро масалалари бўйича қайта тайёрлашни назарда тутган ҳолда замонавий талаблар ва стандартлар асосида суд ижрочиларини тайёрлаш махсус ўқув дастурини ишлаб чиқилиши ва татбиқ этилишини таъминласин;

Ўзбекистон алоқа ва ахборотлаштириш агентлиги (А. Арипов) билан биргаликда икки ой муддатда Суд департаментида ижро ҳужжатларининг маълумотлар базасини ташкил этиш ва юритиш, шунингдек суд ижрочилари томонидан ундирилган маблағларни назорат қилишга мўлжалланган ягона ахборот-компьютер тармоғини ташкил этиш бўйича Вазирлар Маҳкамасига таклифлар киритсин;

Олий суд, Олий хўжалик суди, Бош прокуратура, Ички ишлар вазирлиги, Марказий банк билан биргаликда Вазирлар Маҳкамасига суд ижрочиларининг суд, ҳуқуқни муҳофаза қилувчи, рўйхатга олувчи идоралар ва молия-кредит ташкилотлари билан яқиндан ҳамкорлик қилишини таъминлашга қаратилган ижро иш юритуви тўғрисидаги қонунчиликни такомиллаштириш бўйича таклифлар киритсин;

Ички ишлар вазирлиги (Б. Матлюбов) билан биргаликда икки ой муддатда: судлар, суд процесслари ва уларнинг иштирокчиларининг хавфсизлигини таъминлаш тартиби тўғрисидаги; судларнинг алоҳида топшириқларини ижро этиш, шу жумладан судга келишдан бўйин товлаган шахсларни мажбурий келтириш тартиби тўғрисидаги; шунингдек, ижро ҳаракатлари амалга оширилаётган жойларда жамоат тартибини сақлашни таъминлаш бўйича йўриқномаларни ишлаб чиқсин ва тасдиқласин, уларда суд ижрочиларининг ички ишлар идоралари билан яқиндан ҳамкорлик қилишини ва ўзаро ҳаракатларини мувофиқлаштириб туриш назарда тутилсин;

манфаатдор вазирликлар ва идоралар билан биргаликда бир ой муддатда қонун ҳужжатларига ушбу қарордан келиб чиқувчи ўзгартиришлар ва қўшимчалар юзасидан Вазирлар Маҳкамасига таклифлар киритсин, шунингдек вазирликлар ва идоралар томонидан ўз норматив ҳужжатларини мазкур қарорга мувофиқлаштирилишини таъминласин.

9. Қуйидагилар ўз кучини йўқотган деб топилсин:

Ўзбекистон Республикаси Вазирлар Маҳкамасининг «Ўзбекистон Республикаси судлари фаолиятини янада такомиллаштириш чора-тадбирлари тўғрисида» 2001 йил 22 сентябрдаги 383-сон қарорининг 9-банди биринчи хатбошиси ва унга 1—4-иловалар (Ўзбекистон Республикаси ҚТ, 2001 й., 9-сон, 55-модда).

Ўзбекистон Республикаси Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш тўғрисида» 2003 йил 30 апрелдаги 197-сон қарорининг 13-банди учинчи хатбошиси (Ўзбекистон Республикаси ҚТ, 2003 й., 4-сон, 34-модда).

10. Мазкур қарорнинг бажарилишини назорат қилиш Ўзбекистон Республикаси Бош вазири Ш. Мирзиёев ва Ўзбекистон Республикаси Президентининг Давлат маслаҳатчиси А. Набиев зиммасига юклансин.

1. Мазкур Низом Ўзбекистон Республикаси Адлия вазирлиги ҳузуридаги Суд қарорларини ижро этиш, судлар фаолиятини моддий-техника жиҳатидан ва молиявий таъминлаш департаментининг (кейинги ўринларда — Суд департаменти) асосий вазифалари ва ваколатларини белгилаб беради.

Суд департаменти Адлия вазирлигининг идоравий бўйсунувида бўлиб, ўз фаолиятида Ўзбекистон Республикаси Адлия вазирига ҳисобот беради.

2. Суд департаменти суд ҳужжатлари ва бошқа органлар ҳужжатларини ижро этиш, судлар фаолиятини моддий-техника жиҳатидан ва молиявий таъминлаш бўйича махсус ваколатли орган ҳисобланади.

Суд департаменти тизимига жойлардаги (Қорақалпоғистон Республикаси, вилоятлар ва Тошкент шаҳар) ҳудудий бошқармалар ҳамда суд ижрочилари туман (шаҳар) бўлимлари киради.

3. Суд департаменти ўз фаолиятида Ўзбекистон Республикаси Конституциясига ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Вазирлар Маҳкамасининг қарорларига, бошқа қонун ҳужжатларига, шунингдек мазкур Низомга амал қилади.

4. Суд департаменти юридик шахс ҳисобланади, Давлат герби тасвирланган ва ўз номи ёзилган муҳрга ҳамда қонун ҳужжатларига мувофиқ очиладиган банк ҳисоб рақамларига эга.

5. Суд департаменти ўз фаолиятини бевосита ва ҳудудий бўлинмалар орқали амалга оширади.

Суд департаменти ўз фаолиятини судлар, ҳуқуқни муҳофаза қилувчи ва бошқа давлат идоралари ҳамда ташкилотлари билан ҳамкорликда амалга оширади.

Суд департаменти одил судловни амалга ошириш жараёнига аралашишга ҳақли эмас.

6. Судларни молиялаштириш республика бюджети ҳамда Судлар ва адлия органларини ривожлантириш жамғармаси маблағлари ҳисобига амалга оширилади. Давлат бюджетидан судлар таъминотига ажратиладиган маблағлар алоҳида сатрда кўрсатилади.

Суд департаменти Судлар ва адлия органларини ривожлантириш жамғармаси ҳисобидан ходимлар умумий сонининг 10 фоизигача бўлган доирада қўшимча штат бирликларини таъминлашга ҳақли.

7. Қуйидагилар Суд департаментининг асосий вазифалари ҳисобланади:

суд ҳужжатлари ва бошқа органлар ҳужжатларининг сўзсиз ижро этилишини таъминлаш;

судлар фаолиятини моддий-техника жиҳатидан ва молиявий таъминлаш ҳамда уни такомиллаштириш юзасидан таклифлар тайёрлаш;

суд ижрочилари кадрларини танлаш ва жой-жойига қўйиш ҳамда уларнинг малакасини ошириш;

суд ижрочиларининг самарали фаолият кўрсатишини ташкил этиш;

судлар биноларини қуриш ва таъмирлаш учун ажратилган капитал маблағларни самарали ўзлаштириш ҳамда судлар фаолияти учун зарур шарт-шароитлар яратиш чора-тадбирларини кўриш;

судьялар ва судлар аппарати ходимларининг меҳнат шарт-шароитлари, моддий ва ижтимоий таъминотини яхшилаш юзасидан таклифлар ишлаб чиқиш ва уларни тегишли органларга киритиш;

судьялар ва суд процессларининг хавфсизлигини таъминлаш ишларини ташкил этиш.

8. Суд департаменти унга юклатилган вазифаларига мувофиқ қуйидаги функцияларни амалга оширади:

суд ҳужжатлари ва бошқа органлар ҳужжатларининг мажбурий ижро этилишини таъминлайди, мажбурий ижро этиш қонун билан бошқа давлат бошқаруви органларига юклатилган ҳужжатлар бундан мустасно;

ваколатли органларнинг мол-мулкни, шу жумладан ҳуқуқбузарлик буюмлари ва қуроллари ҳамда ашёвий далилларни давлат даромадига ўтказиш ёки йўқ қилиб ташлашни назарда тутувчи қарорларини қонун ҳужжатларида белгиланган тартибда ижро қилади;

Қорақалпоғистон Республикаси судлари, вилоятлар ва Тошкент шаҳар фуқаролик ва жиноят ишлари бўйича судлари эҳтиёжларини ҳисобга олган ҳолда уларни навбатдаги молия йилида маблағ билан таъминлаш бўйича таклифлар ишлаб чиқади ҳамда уларни белгиланган тартибда Ўзбекистон Республикаси Молия вазирлигига тақдим этади;

бюджетдан ажратиладиган молиявий маблағларни Ўзбекистон Республикаси Молия вазирлиги томонидан белгиланадиган тартибда тегишли банк муассасалари орқали судларга етказади;

судлар фаолиятини зарур даражада таъминлаш масалалари бўйича ҳуқуқни муҳофаза қилувчи органлар ва бошқа органлар билан ўзаро ҳамкорлик қилади;

судьялар ва суд процессларининг хавфсизлигини таъминлаш бўйича чора-тадбирларнинг амалга оширилишини таъминлайди, бунинг учун ички ишлар идоралари, бошқа ҳуқуқни муҳофаза қилувчи органлар ва ташкилотларнинг куч ва воситаларини белгиланган тартибда жалб қилади;

хатланган ва олиб қўйилган мол-мулкларнинг баҳоланиши, сақланиши ва сотилишини ташкил қилади;

суд ижрочилари туман (шаҳар) бўлимларида ижро иши, ҳужжат айлануви ва статистика ишларининг юритилишини ташкил этади, суд ижрочилари ишини ташкил этишнинг самарали усулларини ишлаб чиқади ва татбиқ этади;

суд ҳужжатлари ва бошқа органлар ҳужжатларини ижро этиш соҳасидаги қонун ҳужжатларининг қўлланилиши амалиётини таҳлил қилади ва умумлаштиради ҳамда уни такомиллаштириш бўйича Ўзбекистон Республикаси Адлия вазирлигига таклифлар киритади;

Суд департаменти ва унинг органлари фаолияти натижалари тўғрисида статистик ва таҳлилий маълумотларни шакллантиради ва юритади, ижро ишлари ва ундирилган маблағлар бўйича маълумотлар банкини белгиланган тартибда юритади;

ҳудудий бўлинмалар фаолиятини бошқаради ва назорат қилади;

марказий аппарат, ҳудудий бошқармалар кадрларини, суд ижрочиларини танлаш ва жой-жойига қўйишни амалга оширади, уларни тайёрлаш, қайта тайёрлаш ва малакасини оширишни ташкил қилади;

Ўзбекистон Республикаси Адлия вазири томонидан белгиланган тартибда кадрлар устидан ички назоратни олиб боради;

ўз ваколатлари доирасида фуқароларнинг шикоятлари, аризалари ва таклифларини кўриб чиқади;

Суд департаментининг ваколатига тааллуқли масалалар бўйича хорижий давлатларнинг давлат ҳокимияти органлари ва халқаро ташкилотлари билан белгиланган тартибда ўзаро ҳамкорлик қилади;

қонун ҳужжатларида назарда тутилган бошқа функцияларни амалга оширади.

9. Суд департаменти ўз ваколатлари доирасида қуйидагиларга ҳақли:

давлат органлари ва бошқа органлардан, корхоналар, муассасалар, ташкилотлар ва мансабдор шахслардан зарур ҳужжатлар ва ахборотни сўраб олиш;

давлат органлари, бошқа юридик шахслар ва уларнинг мансабдор шахслари ҳамда фуқароларга бажарилиши мажбурий бўлган кўрсатмалар бериш;

ўзига юклатилган вазифаларни бажариш учун илмий ва бошқа ташкилотлар, олимлар ва мутахассисларни белгиланган тартибда жалб қилиш;

қонун ҳужжатларига мувофиқ, судлар ва Суд департаментининг идораларини моддий-техник таъминлаш бўйича буюртмачи сифатида иштирок этиш;

фуқаролик-ҳуқуқий битимларни тузиш.

10. Суд ҳужжатлари ва бошқа органлар ҳужжатларининг мажбурий ижросини амалга ошириш жараёнида Суд департаментининг мансабдор шахслари қуйидаги ҳуқуқларга эга:

зарур ахборот, тушунтириш ва маълумотномалар олиш;

корхоналар, муассасалар ва ташкилотларда ишлаётган қарздорларга нисбатан суд ҳужжатлари ва бошқа органлар ҳужжатларининг ижро этилишини ва молиявий ҳужжатларнинг юритилишини ижро иши юритувига мувофиқлиги юзасидан текшириш;

ижро ишини юритишда иштирок этаётган жисмоний ва юридик шахсларга муайян ижро ҳаракатларини амалга ошириш масалалари юзасидан топшириқлар бериш;

қарздорлар эгаллаб турган ёки уларга қарашли бўлган бинолар ва омборларга кириш, мазкур бинолар ва омборларни кўздан кечириш, зарурат бўлганда уларни очиш, шунингдек суд ажрими асосида бундай ҳаракатларни бошқа шахслар эгаллаб турган ёки уларга қарашли бўлган бинолар ва омборларда амалга ошириш;

қонунга мувофиқ мол-мулкни хатлаш, хатланган мол-мулкни олиб қўйиш, сақлашга топшириш ва реализация қилиш;

қарздорнинг банклардаги ва бошқа кредит ташкилотларидаги ҳисобварақларида, омонатларида турган ёки сақлаш учун қўйилган пул маблағлари ҳамда бошқа қимматликларини қонун ҳужжатларига мувофиқ хатлаш;

олиб қўйилган мол-мулкни вақтинча сақлаш учун давлат мулкидаги яшаш учун мўлжалланмаган жойлардан, мулкдорнинг розилиги билан эса, хусусий мулкдаги жойлардан фойдаланиш, бундай мол-мулкни сақлаш мажбуриятини тегишли шахслар зиммасига юклаш, ундирувчининг ёки қарздорнинг транспорт воситасидан мол-мулкни ташиш учун сарф-харажатларни қарздорнинг ҳисобига киритган ҳолда фойдаланиш;

ижро ҳаракатлари амалга оширилаётганда асос бўлган ижро ҳужжатидаги талабларда ноаниқлик бўлган тақдирда, ижро ҳужжатини берган суд ёки бошқа органдан уни ижро этиш тартибини тушунтириб беришни сўраш;

қарздорга, унинг мол-мулкига ёки болага нисбатан қидирув эълон қилиш;

қонун ҳужжатларига мувофиқ бошқа ҳаракатларни амалга ошириш.

11. Суд департаментининг мансабдор шахслари ўзига берилган ҳуқуқлардан қонунга мувофиқ фойдаланиши ҳамда ўз фаолиятида давлат, юридик ва жисмоний шахсларнинг ҳуқуқлари ҳамда қонуний манфаатлари камситилишига йўл қўймаслиги, шунингдек қонун ҳужжатларида белгиланган бошқа мажбуриятларни бажариши шарт.

12. Суд департаментига Ўзбекистон Республикаси Президенти томонидан лавозимга тайинланадиган ва лавозимдан озод қилинадиган Адлия вазирининг ўринбосари — Департамент директори бошчилик қилади.

13. Суд департаментининг директори Ўзбекистон Республикаси Адлия вазири томонидан лавозимга тайинланадиган ва лавозимдан озод қилинадиган ўринбосарларга эга бўлади.

14. Суд департаментининг Ички хавфсизлик инспекцияси ўз фаолиятини тезкорлик, холислик ва мустақиллик тамойиллари асосида амалга оширади. Ички хавфсизлик инспекциясининг ходимлари, шу жумладан ҳудудий бошқармаларда фаолият юритувчи ходимлари бевосита Суд департаментининг директорига бўйсунадилар.

Ички хавфсизлик инспекцияси:

Суд департаменти ходимлари томонидан ҳуқуққа хилоф ҳаракатлар содир этилишини олдини олиш бўйича иш олиб боради;

ходимлар томонидан қонун ҳужжатлари талаблари, ижро интизоми ва хизмат этикаси бузилганлиги бўйича ҳар бир ҳолатни ҳар томонлама ва холисона ўрганиб чиқади, хизмат текширувларини ўтказади, шу жумладан молиявий-хўжалик соҳасидаги қонунбузарликларни ўрганиш учун иқтисодиёт ва молия соҳасидаги мутахассисларни жалб этади;

ходимларни лавозимдан озод этишгача бўлган интизомий жавобгарликка тортиш тўғрисида Суд департаменти директорига таклифлар киритади;

Суд департаменти органларини пок, виждонли ва касбий тайёрланган кадрлар билан таъминлаш учун номзодларни ўрганади;

Суд департаменти ходимларини улар фаолиятига ноқонуний аралашувлардан, уларнинг ва оила аъзоларининг шахсий ҳаёти, соғлиғи ва мол-мулкига тажовузлардан ҳимоя қилиш чора-тадбирларини кўради;

Ички хавфсизлик инспекцияси тўғрисидаги низом Ўзбекистон Республикаси Адлия вазири томонидан тасдиқланади.

15. Суд департаментининг ҳудудий бошқармалари суд ҳужжатлари ва бошқа органлар ҳужжатлари ижро этилиши ишларини ташкил этадилар, судлар фаолиятини моддий-техника жиҳатидан ва молиявий таъминлаш ишларини амалга оширадилар.

Суд департаментининг ҳудудий бошқармалари юридик шахс ҳисобланади, бевосита Суд департаменти томонидан шакллантирилади ва маблағ билан таъминланади ҳамда ўз фаолияти тўғрисида Суд департаменти директорига ҳисоб беради.

Суд ижрочилари туман (шаҳар) бўлимларига катта суд ижрочиси раҳбарлик қилади. Ижро ишини юритиш ва суд ижрочилари фаолиятини ташкил этиш Ўзбекистон Республикаси Адлия вазири томонидан белгиланган тартибда амалга оширилади.

16. Суд департаментининг марказий аппарати бошқармалари ва бўлимлари бошлиқлари, ички хавфсизлик инспекцияси ходимлари, ҳудудий бошқармалар бошлиқлари ва бошлиқ ўринбосарлари Суд департаменти директорининг тақдимномасига кўра Ўзбекистон Республикаси Адлия вазири томонидан белгиланган тартибда лавозимига тайинланади ва лавозимидан озод қилинади. Марказий аппаратнинг бошқа ходимлари Суд департаменти директори томонидан лавозимига тайинланади ва лавозимидан озод қилинади.

Ҳудудий бошқармаларнинг ходимлари (техник ва хизмат кўрсатувчи ходимлардан ташқари) ҳудудий бошқарма бошлиғининг тақдимномасига кўра Суд департаментининг директори томонидан белгиланган тартибда лавозимига тайинланади ва лавозимидан озод қилинади.

Катта суд ижрочилари ва суд ижрочилари ҳудудий бошқарма бошлиғи томонидан Суд департаменти директори билан келишилган ҳолда лавозимига тайинланади ва лавозимидан озод қилинади.

Суд ижрочиси лавозимига тайинлаш учун кадрларни танлаш танлов асосида Ўзбекистон Республикаси Адлия вазири томонидан белгиланган тартибда амалга оширилади.

17. Суд департаменти директори:

1) Суд департаменти, унинг ҳудудий бошқармалари, шунингдек суд ижрочилари туман (шаҳар) бўлимлари фаолиятига раҳбарлик қилади;

2) Суд департаменти ходимларини белгиланган тартибда лавозимига тайинлайди ва лавозимидан озод қилади;

3) Суд департаменти ҳудудий бошқармалари бошлиқларининг ҳисоботларини тинглайди;

4) Ўзбекистон Республикаси Адлия вазирига қуйидагиларни киритади (тақдим қилади):

Суд департаменти ҳудудий бошқармалари ва суд ижрочилари туман (шаҳар) бўлимлари тўғрисидаги низомлар лойиҳаларини;

Суд департаменти ваколатига тааллуқли масалалар бўйича норматив-ҳуқуқий ҳужжатлар ва бошқа ҳужжатлар лойиҳаларини;

Суд департаменти ва унинг ҳудудий бўлинмалари тузилмасига ўзгартиришлар киритиш тўғрисидаги таклифларни;

Суд департаменти марказий аппарати бошқарма ва бўлим бошлиқлари, ички хавфсизлик инспекцияси ходимлари ҳамда ҳудудий бошқармалар бошлиқлари ва бошлиқ ўринбосарларини лавозимга тайинлаш ва лавозимидан озод қилиш тўғрисида тақдимномаларни;

Суд департаменти ходимларига мартаба даражаси бериш тўғрисида таклифларни;

Суд департаменти ходимларини Ўзбекистон Республикасининг давлат мукофотларига тавсия этиш тўғрисидаги таклифларни;

Суд департаменти фаолияти натижалари тўғрисидаги маърузани (ҳисоботларни);

5) белгиланган тартибда қуйидагиларни тасдиқлайди:

Суд департаменти, унинг ҳудудий бошқармалари ва суд ижрочилари туман (шаҳар) бўлимларининг штат жадвалини;

Суд департаменти марказий аппаратининг бошқарма ва бўлимлари тўғрисидаги низомларни, ички хавфсизлик инспекцияси бундан мустасно;

6) ўз ваколати доирасида Суд департаменти фаолиятини ташкил этиш масалалари бўйича барча ходимлар томонидан бажарилиши мажбурий бўлган буйруқлар, кўрсатмалар ва фармойишлар чиқаради;

7) ажратилган маблағлар доирасида Суд департаменти ходимларига устама ҳақи, мукофотлар ва бошқа рағбатлантиришлар тўлаш тартиби ва шартларини қонун ҳужжатларига мувофиқ белгилайди;

8) қонун ҳужжатларига мувофиқ бошқа ваколатларни амалга оширади.

Суд департаментининг директори Суд департаментига юкланган вазифаларнинг бажарилиши учун шахсан жавоб беради.

18. Суд департаментининг директори жойида бўлмаган тақдирда унинг ваколатларини ўринбосарлардан бири амалга оширади.

19. Суд департаменти директорининг ўринбосарлари, бошқарма бошлиқлари, бўлим бошлиқлари ва бошқа ходимлари ўз фаолиятини Суд департаменти директори томонидан тасдиқланадиган функционал вазифаларга мувофиқ амалга оширадилар.

20. Суд департаменти ходимларига эгаллаб турган лавозимига ва иш стажига мувофиқ махсус даражали унвонлар ҳамда мартаба даражалари берилади ва белгиланган хизмат муддати учун устама ҳақи тўлаб борилади.

21. Суд департаменти оператив бошқарув ҳуқуқи асосида республика мулки ҳисобланадиган алоҳида мулкка эга.

22. Суд департаментини тугатиш ёки қайта ташкил этиш (қўшиб юбориш, қўшиб олиш, бўлиш, ажратиб чиқариш, ўзгартириш) Ўзбекистон Республикаси Президенти қарорига кўра амалга оширилади.

Суд департаменти тугатилган ёки қайта ташкил этилган тақдирда ишдан бўшатилаётган ходимларнинг ҳуқуқлари ва қонуний манфаатларига риоя этилиши Ўзбекистон Республикаси қонун ҳужжатларига мувофиқ кафолатланади.

1. Мазкур Низом Ўзбекистон Республикасининг Фуқаролик кодекси, «Суд ҳужжатлари ва бошқа органлар ҳужжатларини ижро этиш тўғрисида»ги Ўзбекистон Республикаси Қонуни, Ўзбекистон Республикаси Вазирлар Маҳкамасининг 2004 йил 25 мартдаги 140-сон қарорига мувофиқ, суд ҳужжатлари ва бошқа органлар ҳужжатларини (кейинги ўринларда — ижро ҳужжатлари) ижро этиш юзасидан автомототранспорт воситалари ва кўчмас мулкни сотиш, шу жумладан уларни давлат даромадига ўтказиш тўғрисидаги ижро ҳужжатлари бўйича сотиш тартибини белгилайди.

2. Ижро ҳужжатлари бўйича автомототранспорт воситалари ва кўчмас мулк фақатгина биржалар томонидан махсус ажратилган савдо майдонларида ўтказиладиган аукцион савдоларида сотилади.

Автомототранспорт воситалари ва кўчмас мулкни сотиш бўйича ўтказиладиган аукцион савдоларида ҳар қандай юридик ёки жисмоний шахс бевосита ёхуд вакил орқали иштирок этишга ҳақли.

3. Қорақалпоғистон Республикаси, вилоятлар ва Тошкент шаҳрида ижро ҳужжатлари бўйича автомототранспорт воситалари ва кўчмас мулкни сотувчи биржалар Ўзбекистон Республикаси Адлия вазирлиги томонидан танлов асосида белгиланади.

Зарурат бўлганда, ижро ҳужжатлари бўйича сотилаётган автомототранспорт воситалари ва кўчмас мулк ҳажмини ҳисобга олган ҳолда ҳар бир ҳудудда танлов асосида бир нечта биржалар белгиланиши мумкин, ушбу биржалар тегишли суд ижрочилари туман (шаҳар) бўлимларига бириктирилади.

4. Биржани танлаб олишда унинг тажрибаси ва ишчанлик обрўси, савдо майдонлари, сақлаш жойлари, малакали мутахассисларининг мавжудлиги, ташкилот молиявий аҳволининг қониқарлилиги, қарздорлиги, шу жумладан бюджет олдидаги қарздорлиги йўқлиги, кўрсатиладиган хизматларнинг қиймати ва бошқа мезонлар ҳисобга олинади.

Биржа ва Ўзбекистон Республикаси Адлия вазирлиги ҳузуридаги Суд қарорларини ижро этиш, судлар фаолиятини моддий-техника жиҳатидан ва молиявий таъминлаш департаментининг (кейинги ўринларда — Суд департаменти) ҳудудий бошқармаси ўртасида муддатини узайтириш ҳуқуқи билан бир йил муддатга шартнома тузилади.

Шартноманинг амал қилиш муддатини узайтиришда биржа томонидан ушбу шартнома шартларига амал қилинганлиги ҳамда у томонидан аукционни ташкил этиш ва ўтказиш тартибини бузиш ҳолатларига йўл қўйилмаганлиги инобатга олинади.

Танловни ўтказиш тартиби, шу жумладан биржаларни танлаб олиш мезонлари Ўзбекистон Республикаси Адлия вазирлиги томонидан Ўзбекистон Республикаси Давлат мулки қўмитаси ва Молия вазирлиги билан биргаликда белгиланади.

5. Автомототранспорт воситалари ва кўчмас мулк аукцион савдоларига қўйилгунга қадар кўздан кечирилиши ва баҳоланиши лозим.

Давлат даромадига ўтказилган автомототранспорт воситалари ва кўчмас мулкни кўздан кечириш ва баҳолаш Вазирлар Маҳкамасининг 2004 йил 25 мартдаги 140-сон қарорига мувофиқ уларни олиб қўйган ваколатли органнинг мансабдор шахслари томонидан ташкил этилади.

Ундирувни қарздорнинг мол-мулкига қаратишни назарда тутувчи бошқа ижро ҳужжатлари бўйича автомототранспорт воситалари ва кўчмас мулкни кўздан кечириш ҳамда баҳолаш суд ижрочилари томонидан ташкил этилади.

6. Автомототранспорт воситасининг техник ҳолатини кўрикдан ўтказиш Ички ишлар вазирлиги Давлат йўл ҳаракати хавфсизлиги хизмати (кейинги ўринларда — ДЙҲХХ) мутахассисининг, давлат даромадига ўтказишни назарда тутувчи ижро ҳужжатлари бўйича эса — шунингдек ҳудудий молия идораси вакилининг иштирокида ўтказилади.

Кўчмас мулк ҳолатини кўздан кечириш Ергеодезкадастр давлат қўмитасининг ҳудудий органи мутахассисининг, давлат даромадига ўтказишни назарда тутувчи ижро ҳужжатлари бўйича эса — шунингдек ҳудудий молия идораси вакилининг иштирокида ўтказилади.

Автомототранспорт воситаси ва кўчмас мулкни кўздан кечириш натижалари бўйича суд ижрочиси (давлат даромадига ўтказилган автомототранспорт воситалари ва кўчмас мулк бўйича — уларни олиб қўйган органнинг мансабдор шахси) ҳамда кўздан кечиришда иштирок этган шахслар томонидан имзоланадиган кўздан кечириш далолатномаси тузилади.

7. Автомототранспорт воситаси ва кўчмас мулкни баҳолаш ушбу фаолиятни амалга ошириш учун лицензияга эга бўлган шахс томонидан амалга оширилади.

Божхона ҳақидаги қонун ҳужжатларини бузганлик учун давлат даромадига ўтказилган автомототранспорт воситасини баҳолашда, унинг баҳоси божхона қийматидан келиб чиқиб, бироқ «эркин муомалага чиқариш» божхона режимида божхона чегараси орқали ўтказишда тўланиши лозим бўлган божхона тўловларидан кам бўлмаган қийматда белгиланади.

8. Кўздан кечириш ҳамда баҳолаш автомототранспорт воситаси ва кўчмас мулк хатланган кундан бошлаб кўпи билан 3 кун ичида ўтказилади.

Автомототранспорт воситалари ва кўчмас мулкни баҳолаш, қоида тариқасида, уларни кўздан кечириш билан бир вақтда ўтказилади.

9. Суд ижрочиси ваколатли органдан давлат даромадига ўтказилган автомототранспорт воситалари ва кўчмас мулкни қабул қилишда барча ҳужжатларни, шу жумладан уларнинг кўздан кечирилганлиги ва баҳоланганлигини тасдиқловчи ҳужжатларнинг мавжудлигини текширади. Зарур ҳужжатлар бўлмаган, улар белгиланган талабларга мувофиқ келмаган тақдирда, ижро ҳужжати уч кунлик муддат ичида уни юборган судга қайтарилади, уларнинг мазмуни аниқ бўлмаган ҳолатларда эса — ушбу ҳолатларни ёки ижро этиш усули ва тартибини тушунтириб бериш тўғрисида мурожаат қилинади.

10. Автомототранспорт воситалари ва кўчмас мулкни сотиш суд ижрочиси томонидан бериладиган буюртмалар асосида амалга оширилади.

11. Суд ижрочиси автомототранспорт воситаси ва кўчмас мулкни сотиш учун қуйидаги муддатларда биржага ушбу Низомнинг 1-иловасига мувофиқ шаклдаги буюртмани юборади:

давлат даромадига ўтказилган автомототранспорт воситаси ва кўчмас мулкни белгиланган тартибда расмийлаштирилган ҳужжатлар билан биргаликда ваколатли органдан олинган куннинг эртасидан кечиктирмай;

бошқа ижро ҳужжатлари бўйича ундирувни қарздорнинг мол-мулкига қаратишда — баҳоловчидан автомототранспорт воситаси ва кўчмас мулкни баҳолаш тўғрисидаги хулоса олинган куннинг эртасидан кечиктирмай.

12. Автомототранспорт воситаси ва кўчмас мулкни сотиш тўғрисидаги буюртмага қуйидагилар илова қилинади:

ижро ҳужжатининг нусхаси;

мол-мулкни хатлаш далолатномасининг нусхаси;

автомототранспорт воситаси ёки кўчмас мулкни тавсифловчи ҳужжатлар, шу жумладан уларни кўздан кечириш далолатномаси ҳамда баҳолаш тўғрисидаги хулоса нусхалари;

автомототранспорт воситаси ёки кўчмас мулкдан фойдаланиш ёки уларга эгалик қилиш ҳуқуқини тасдиқловчи ҳужжатларнинг нусхалари.

Қурилиши тугалланмаган объектни сотишда юқоридаги ҳужжатларга қўшимча равишда ер участкаси ажратиб бериш тўғрисидаги қарор, тегишли давлат органининг қурилиш учун рухсатномаси ҳамда қурилиш бўйича буюртмачининг таъсис ҳужжатлари нусхалари илова қилинади.

13. Автомототранспорт воситалари аукцион ўтказилгунга қадар суд ижрочиси томонидан белгиланган ва уларни сақлашнинг тегишли шароитлари таъминланган махсус ажратилган жойларда (ваколатли органлар, ДЙҲХХ органлари ва бошқа ташкилотларнинг сақлаш жойлари, омборлари, жарима майдончаларида) сақланади.

Бунда, суд ижрочиси автомототранспорт воситасидан ўзга шахслар томонидан фойдаланилишига ва бошқача тарзда унга тегилишига чекловни таъминлаши (муҳрлаши) шарт.

14. Биржанинг автомототранспорт воситаларининг сақланишини таъминлаш учун зарур шароитларга эга сақлаш жойи мавжуд бўлган ҳолларда, суд ижрочиси автомототранспорт воситасини сақланиш жойини ўзгартиришга ва уни биржага тегишли жойларда сақлаш учун беришга ҳақли. Бунда, қабул қилиш-топшириш далолатномаси тузилиб, суд ижрочиси, мулкни сақлаш учун масъул шахс, шунингдек мулкни сақлаш учун масъул сифатида янгидан тайинланган шахс томонидан имзоланади.

15. Биржа буюртмани қабул қилган кундан бошлаб 3 кундан кечиктирмай оммавий ахборот воситаларида аукцион ўтказилиши тўғрисида хабарнома беради.

Хабарнома камида иккита (республика ва вилоят миқёсидаги) оммавий ахборот воситасида берилади. Такроран хабарнома бериш фақатгина илгари эълон қилинган оммавий ахборот воситалари орқали амалга оширилиши мумкин.

Аукцион ўтказилиши тўғрисида хабарнома эълон қилинадиган оммавий ахборот воситалари рўйхати Суд департаменти томонидан белгиланади.

16. Хабарномада қуйидаги маълумотлар кўрсатилиши лозим:

аукцион ўтказиш санаси, вақти ва жойи;

аукцион ўтказиш шакли;

аукцион объекти, шу жумладан кўчмас мулк жойлашган ва автомототранспорт воситаси сақланаётган жой тўғрисидаги маълумот;

аукцион объектининг дастлабки (бошланғич) нархи;

аукцион иштирокчиларига аукцион объектларини олдиндан бевосита кўрсатиш тартиби;

аукционда иштирок этиш учун аризалар ва бошқа ҳужжатларни қабул қилишнинг охирги муддати;

ижро ҳужжатининг санаси ва рақамини кўрсатган ҳолда ҳар бир аукцион объекти бўйича бошланғич нархга нисбатан фоизларда (камида 10 фоиз) ифодаланган закалат пули миқдори ҳамда уни ўтказиш лозим бўлган биржанинг банкдаги ҳисоб рақами реквизитлари;

биржанинг реквизитлари, шу жумладан алоқа (иш) телефони рақами.

17. Аукцион ўтказиш тўғрисидаги хабарнома оммавий ахборот воситаларида уни ўтказишдан камида ўттиз кун олдин берилади.

Автомототранспорт воситаси ёки кўчмас мулк аукцион ўтказиш шартлари ўзгартирилмаган ҳолда такроран кимошди савдога қўйилганда, аукцион ўтказиш тўғрисидаги хабарнома уни ўтказишдан камида 15 кун олдин берилиши лозим.

18. Биржа хабарнома эълон қилинган пайтдан бошлаб аукционга қўйилган автомототранспорт воситалари ва кўчмас мулк билан олдиндан белгиланган сана ва вақтда бевосита танишиш имкониятини яратади.

Аукцион иштирокчиларига автомототранспорт воситаси билан олдиндан бевосита танишиш учун шароит яратиш мақсадида, уни сақлаш жойи тегишли суд ижрочиси билан биргаликда ушбу Низомнинг 14-бандида белгиланган тартибда ўзгартирилиши мумкин.

19. Кимошди савдоларида сотиб олувчи сифатида қатнашиш ҳуқуқига эга бўлган, аукционда иштирок этиш учун ўз вақтида ариза берган, зарур ҳужжатларни тақдим қилган ва белгиланган тартибда закалат пулини тўлаган юридик ва жисмоний шахслар аукционда қатнашиши мумкин.

Аризаларни қабул қилиш аукцион ўтказилишига бир кун қолганда тўхтатилади.

20. Аукционда иштирок этиш учун биржага қуйидаги ҳужжатлар тақдим қилинади:

аукционда иштирок этиш тўғрисидаги ариза;

биржанинг банкдаги ҳисоб рақамига закалат пули тўланганлигини тасдиқловчи ҳамда аукцион ўтказиш тўғрисидаги хабарномада назарда тутилган ижро ҳужжатининг тартиб рақами ва санаси кўрсатилган тўлов ҳужжатининг (квитанциянинг) нусхаси. Бунда, бир нечта аукцион объектлари бўйича закалат пули уларнинг ҳар бири учун алоҳида тўлов топшириқномалари (квитанциялар) билан тўланиши керак;

белгиланган тартибда тасдиқланган ишончнома (вакиллар учун).

Чет эл юридик ва жисмоний шахслари сўмдаги маблағларнинг келиб чиқиши қонунийлигини тасдиқлайдиган маълумотларни қўшимча равишда тақдим этадилар.

21. Аукционда иштирок этишга қўйилган шахсларга аукцион иштирокчисининг карточкаси берилади, унда:

сотиб олувчининг аукционда қатнашадиган тартиб рақами;

аукционда сотувга қўйилаётган кимошди савдоси объектининг номи;

ижро ҳужжатининг тартиб рақами ва санаси кўрсатилади.

22. Суд ижрочилари, Суд департаменти ва унинг ҳудудий бошқармалари, солиқ, молия, божхона, суд, прокуратура, ички ишлар, Миллий хавфсизлик хизмати идораларининг ходимлари, сотилаётган автомототранспорт воситаси ва кўчмас мулкни кўздан кечирган ҳамда баҳолаган мутахассисларнинг аукционда иштирок этиши таъқиқланади.

23. Аукцион биржанинг аукцион ўтказувчиси томонидан қуйидаги тартибда нархнинг ошиб бориши тамойили бўйича ўтказилади:

а) аукционнинг бошланишида аукцион ўтказувчи объектнинг қисқача тавсифи ва бошланғич нархини, аукцион ўтказишнинг асосий шартлари, шу жумладан аукцион қадами ва аукцион натижалари тўғрисидаги баённома имзоланган кундан бошлаб 5 банк кунидан кўп бўлмаган муддатда сотиб олинган мулкнинг ҳақи тўланишини эълон қилади.

Баҳоловчи томонидан ўрнатилган тартибда белгиланган нарх аукцион объектининг бошланғич нархи бўлиб ҳисобланади.

Аукцион қадами кимошди савдоларини ўтказиш жараёнида объектларнинг ликвидлилигига қараб шаклланадиган нархнинг 1 фоизидан 10 фоизигача миқдорда белгиланади. Аукцион қадами тўғрисидаги қарор аукцион ўтказувчи томонидан аукционнинг ҳар бир объекти бўйича алоҳида қабул қилинади. Зарур ҳолларда, аукцион ўтказувчи аукцион жараёнида талаб ва таклифдан келиб чиқиб қадамни ўзгартириши мумкин.

Шундан сўнг, аукцион ўтказувчи тегишли объект бўйича аукционда иштирок этиш учун рўйхатга олинган иштирокчиларнинг рўйхат рақамларини эълон қилади. Аукцион ўтказувчи томонидан тартиб рақами айтилган иштирокчи аукционда қатнашаётганлигини тасдиқлаб рақам белгисини кўтариши лозим.

б) биринчи қадамни ҳисобга олган ҳолда бошланғич нарх эълон қилингандан кейин аукцион ўтказувчи, ўз фикрича биринчи бўлиб тартиб рақамини кўтарган иштирокчини кўрсатади. Бошқа иштирокчилар томонидан қизиқиш билдирилганда аукцион ўтказувчи аукцион қадамини ҳисобга олиб кейинги нархни эълон қилади.

Аукцион кимошди савдоси объекти учун энг юқори нархни таклиф қилган иштирокчилардан бири аниқлангунга қадар давом этади.

Эришилган нарх уч марта эълон қилингандан кейин ҳам ушбу нарх учун бошқа иштирокчилар ўз тартиб рақамларини кўтармаган тақдирда аукцион якунланади. Аукцион ўтказувчи томонидан тартиб рақами охирги эълон қилинган иштирокчи аукцион ғолиби деб топилади.

в) кимошди савдолари якунланиши билан аукцион ўтказувчи савдога қўйилган автомототранспорт воситаси ёки кўчмас мулк сотилганлигини эълон қилади, унинг сотилган нархи ва аукцион ғолибининг тартиб рақамини айтади.

24. Аукцион ғолиби кимошди савдоси ўтказилган куни аукцион натижалари тўғрисидаги баённомани имзолаши лозим.

Баённома уч нусхада сотиб олувчи ёки унинг вакили ва биржа томонидан имзоланади. Баённомада қуйидаги маълумотлар кўрсатилади:

автомототранспорт воситаси ёки кўчмас мулкни аукционга қўйиш учун асос бўлган ижро иш юритуви тўғрисида;

аукцион ғолиби ва бошқа иштирокчилари тўғрисида;

автомототранспорт воситаси ёки кўчмас мулк ҳамда унинг сотилган нархи тўғрисида;

аукцион ғолибининг автомототранспорт воситаси ёки кўчмас мулкнинг қийматини тўлаш мажбурияти тўғрисида.

Аукцион натижалари тўғрисидаги баённоманинг бир нусхаси аукцион ғолибига берилади. Иккинчи нусхаси биржада қолади, учинчи нусхаси эса сотиб олувчи томонидан сотилган мулкнинг баҳоси тўлиқ тўлангандан кейин тегишли тўлов ҳужжатининг нусхасини илова қилган ҳолда суд ижрочисига юборилади.

Туман (шаҳар) суд ижрочилари бўлимининг катта суд ижрочиси пул маблағлари келиб тушганлигини текширгандан сўнг аукцион ғолибига берилган баённома нусхасида тегишли белги қўйиб, муҳр билан тасдиқлайди.

25. Аукцион натижалари тўғрисидаги баённома ва тўлов ҳужжати суд ижрочисига автомототранспорт воситаси ва кўчмас мулкни банд солишдан ечиш, шунингдек уни аукцион ғолибига бериш учун асос бўлиб ҳисобланади.

Мулкни бериш суд ижрочиси ва аукцион ғолиби ёки унинг вакили томонидан имзоланадиган далолатнома билан расмийлаштирилади.

26. Аукцион қуйидаги ҳолларда ўтказилмаган деб топилади:

а) аукционга иккитадан кам харидор келса;

б) аукцион иштирокчиларидан ҳеч қайси бири аукцион қадамидан қатъи назар, автомототранспорт воситаси ёки кўчмас мулкни аукцион ўтказувчи эълон қилган бошланғич нархда сотиб олиш истагини билдирмаса;

в) аукцион ғолиби аукцион натижалари тўғрисидаги баённомани имзолашдан бош тортса ёки белгиланган муддатда сотилган автомототранспорт воситаси ёки кўчмас мулк қийматини тўлиқ тўламаса.

27. Аукцион ўтказилмаган деб топилса, биржа такрорий аукцион ташкил қилади ва ўтказади. Такрорий аукционлар ушбу Низомда белгиланган тартибда ўтказилади.

28. Автомототранспорт воситаси ёки кўчмас мулк икки ой давомида, шу жумладан такрорий аукционларда сотилмаган тақдирда, биржа автомототранспорт воситаси ва кўчмас мулкнинг нархини арзонлаштириш ёки уларни қайтариш масаласини ҳал қилиш учун суд ижрочисига хабарнома юборади.

29. Суд ижрочиси хабарномани олгандан кейин уч кундан кечиктирмай автомототранспорт воситаси ёки кўчмас мулкнинг нархини арзонлаштириш ёхуд уларни қайтариш масаласини ҳал қилади.

Бунда, давлат даромадига ўтказиш тўғрисидаги ижро ҳужжатлари асосида, шунингдек давлат даромадига ундирувни назарда тутувчи (шу жумладан, солиқлар ва мажбурий тўловлар бўйича бюджетга ҳамда давлат мақсадли жамғармаларига қарзлар бўйича ундирувни қарздорнинг мол-мулкига қаратиш тўғрисидаги) бошқа ижро ҳужжатлари асосида сотиладиган автомототранспорт воситаси ва кўчмас мулкнинг нархини арзонлаштириш суд ижрочиси томонидан молия ва солиқ органлари вакиллари иштирокида амалга оширилади.

Бошқа ижро ҳужжатлари асосида сотиладиган автомототранспорт воситалари ва кўчмас мулк арзонлаштирилмайди ва «Суд ҳужжатлари ва бошқа органлар ҳужжатларини ижро этиш тўғрисида»ги Ўзбекистон Республикаси Қонуни талабларига мувофиқ кейинги ижро ҳаракатларини амалга ошириш учун қайтарилади.

30. Арзонлаштириш автомототранспорт воситаси ва кўчмас мулк қийматининг 20 фоизидан ортиқ бўлмаган миқдорда амалга оширилади.

Арзонлаштириш тўғрисида далолатнома тузилиб, суд ижрочиси ҳамда молия ва солиқ органлари вакиллари томонидан имзоланади.

Давлат даромадига ўтказиш тўғрисидаги ижро ҳужжатларига асосан сотилиши лозим бўлган автомототранспорт воситаси ва кўчмас мулкни арзонлаштириш тўғрисидаги далолатноманинг бир нусхаси уларни олиб қўйган ваколатли органга юборилади.

31. Арзонлаштирилган автомототранспорт воситаси ва кўчмас мулк бўйича аукцион ушбу Низомда белгиланган тартибда такрорий кимошди савдоси сифатида ўтказилади.

Бунда, арзонлаштирилган автомототранспорт воситалари ва кўчмас мулк бўйича такрорий кимошди савдоси ўтказилиши тўғрисидаги хабарнома уни ўтказишдан камида 15 кун олдин оммавий ахборот воситаларида эълон қилинади.

32. Ижро ҳужжати беришга асос бўлган қарор бекор қилинган ёхуд ижро ҳужжатининг ижроси қонунда белгиланган тартибда тўхтатилган тақдирда, аукцион уни ташкил этиш ёки ўтказишнинг ҳар қандай босқичида тўхтатиб қўйилиши мумкин. Бу ҳақда суд ижрочиси зудлик билан биржага ёзма хабар бериши лозим.

Биржа аукцион тўхтатиб қўйилганлиги тўғрисида аукцион ўтказиш ҳақида илгари хабарнома эълон қилинган оммавий ахборот воситаларида хабар бериши лозим. Биржа, шунингдек суд ижрочисининг тегишли ёзма хабари келиб тушган кундан бошлаб 5 банк кунидан кечиктирмасдан аукционда қатнашиш истагини билдирган шахслар томонидан ўтказилган закалат пули қайтарилишини таъминлайди.

33. Аукцион ғолиби аукцион натижалари тўғрисидаги баённома имзоланган кундан бошлаб 5 банк кунидан кечиктирмасдан аукционда сотиб олинган автомототранспорт воситаси ёки кўчмас мулк ҳақини тўлаши лозим. Бунда, закалат пули тўлов суммасига қўшиб ҳисобланади.

Аукционнинг қолган барча иштирокчиларига аукцион натижалари тўғрисидаги баённома имзоланган кундан бошлаб 5 банк кунидан кечиктирмай улар ўтказган закалат пули белгиланган тартибда қайтариб берилади. Ушбу закалат пули иштирокчининг ёзма аризасига кўра такрорий кимошди савдосида иштирок этиш ёхуд бошқа автомототранспорт воситалари ёки кўчмас мулк савдосида иштирок этиш учун биржанинг банк ҳисоб рақамида қолдирилиши мумкин. Бунда, закалат пули ўтказилганлиги тўғрисидаги тўлов топшириқномасига (квитанциясида) биржа томонидан ижро ҳужжатининг тартиб рақами ва санаси кўрсатилган ҳолда тегишли ёзув киритилади.

34. Биржа аукционда сотилган автомототранспорт воситаси ёки кўчмас мулк учун тўлов миқдори тўлиқ келиб тушган кундан бошлаб 2 банк кунидан кечиктирмасдан ушбу пул маблағларини хизмат ҳақини ушлаб қолган ҳолда суд ижрочиларининг туман (шаҳар) бўлими депозит ҳисобварағига, давлат даромадига ўтказилган автомототранспорт воситаси ёки кўчмас мулкни сотишдан келиб тушган маблағларни эса — махсус ҳисобварағига ўтказиб беради.

Кўрсатиб ўтилган маблағлар ўз вақтида ўтказиб берилмаган тақдирда суд ижрочисининг қарорига мувофиқ биржадан кечиктирилган ҳар бир кун учун ўтказиб берилмаган пул маблағининг 0,07 фоизи миқдорида пеня ундирилади.

35. Суд ижрочилари бўлимининг депозит ҳисобварағига (махсус ҳисобварағига) автомототранспорт воситалари ва кўчмас мулкни сотишдан келиб тушган маблағларни тақсимлаш қонун ҳужжатларида белгиланган тартибда амалга оширилади.

36. Аукцион ўтказиш бўйича хизматлар кўрсатганлиги учун ҳақ миқдори биржа ва Суд департаментининг ҳудудий бошқармаси ўртасида тузилган шартномага мувофиқ белгиланади ҳамда автомототранспорт воситаси ёки кўчмас мулкни сотишдан келиб тушган пул маблағининг 1 фоизидан ошмаслиги лозим.

37. Аукцион ғолиби 5 банк куни давомида автомототранспорт воситаси ёки кўчмас мулкни сотиб олмаган тақдирда, аукцион натижалари тўғрисидаги баённома бекор қилинади, қўйилган закалат пули эса қайтариб берилмайди. Бу ҳолда, шунингдек ғолиб аукцион натижалари тўғрисидаги баённомани имзолашдан бош тортган тақдирда, ғолиб томонидан тўланган закалат пули аукцион ўтказилган кундан бошлаб 10 банк кунидан кечиктирмай тўлалигича суд ижрочилари туман (шаҳар) бўлимининг депозит ҳисобварағига ўтказиб берилади.

Аукционни ташкил этиш ва ўтказиш бўйича биржанинг харажатлари суд ижрочиси томонидан ушбу маблағлардан биржа томонидан тақдим этилган тасдиқловчи ҳужжатлар асосида қоплаб берилади.

38. Аукцион натижалари тўғрисидаги баённома автомототранспорт воситаси ёки кўчмас мулк сотиб олинганлигини тасдиқловчи шартнома кучига эга бўлади ҳамда нотариал тасдиқлаш талаб этилмайди.

Автомототранспорт воситаси ва кўчмас мулкка бўлган ҳуқуқ тегишлича ДЙҲХХ ва Ергеодезкадастр давлат қўмитаси томонидан аукцион натижалари тўғрисидаги баённоманинг туман (шаҳар) суд ижрочилари бўлимининг катта суд ижрочиси томонидан тасдиқланган асл нусхасига асосланиб рўйхатга олинади.

39. Суд департаменти ва унинг ҳудудий бошқармалари биржалар томонидан ижро ҳужжатлари бўйича аукцион савдоларининг ташкил этилиши ва ўтказилиши устидан доимий назорат олиб борадилар.

40. Мазкур Низомнинг бузилиши қонун ҳужжатларида белгиланган жавобгарликни келтириб чиқаради.

41. Ушбу Низомни қўллаш бўйича келиб чиқадиган низолар суд тартибда ҳал этилади.