СССР Министрлар Советининг «Совет ташкилотларининг чет эллардаги хўжалик фаолиятини ривожлантириш тўғрисида» 1989 йил 18 майдаги 412-сон қарорига ва Ўзбекистон ССР Министрлар Советининг «Ўзбекистон ССРнинг хорижий мамлакатлар билан иқтисодий алоқаларини янада такомиллаштириш ва ривожлантириш чора-тадбирлари тўғрисида» 1990 йил 15 январдаги 33-сон қарорига мувофиқ, ташқи савдо манфаатларини янада ривожлантириш, маркетинг хизматларини такомиллаштириш, ўзбек таомларини ва Ўзбекистон халқ усталари асарларини тарғиб қилиш, шунингдек республика истеъмол бозорини зарур товарлар билан тўлдириш мақсадида Вазирлар Маҳкамаси қарор қилади:

1. Ўзбекистон Республикаси Савдо вазирлигининг Ганновер шаҳрида (Германия, Қуйи Саксония ери) Ўзбекистон Республикаси Савдо вазирлиги, Тошкент шаҳар ижроия қўмитасининг Умумий овқатланиш бош бошқармаси ва «Усто» ишлаб чиқариш бирлашмаси муассислигида ташкил этилган «Ўзбекистон» кичик кўп тармоқли корхонасининг савдо марказини очиш тўғрисидаги таклифи қабул қилинсин.

2. «Ўзбекистон» кўп тармоқли кичик корхонасининг мустақил филиали бўлган савдо марказининг савдо белгиси тасдиқлансин.

3. «Ўзбекистон» кичик кўп тармоқли корхонасининг савдо марказига ўз фаолиятини Германия қонунчилигига мувофиқ ўзини ўзи қоплаш ва ўзини ўзи маблағ билан таъминлаш принциплари асосида фаолият кўрсатувчи ижара корхонаси сифатида қуришга рухсат этилсин.

4. Ўзбекистон Республикаси Савдо вазирлиги, «Ўзбекенгилсаноат» уюшмаси, Ўзбекистон Республикаси Маҳаллий саноат вазирлиги, «Ўзмевасабзавотузумсаноат» ва «Ўзозиқовқацаноат» концернлари «Ўзбекистон» кичик кўп тармоқли корхонасининг савдо марказини муваффақиятли ривожлантириш учун уни зарур товарлар, хомашё материаллари ва асбоб-ускуналар билан таъминлашда кўмаклашсинлар.

5. Ўзбекистон Республикаси Маданият вазирлиги, Республика бадиий жамғармаси Ўзбекистон Республикаси Савдо вазирлиги билан биргаликда 10 кун муддатда «Ўзбекистон» кичик кўп тармоқли корхонасининг савдо маркази орқали конвертация қилинадиган валютага сотиш учун санъат усталари ва халқ ҳунармандчилиги буюмлари рўйхатини тайёрласинлар.

6. Ўзбекистон Республикаси Ташқи ишлар вазирлиги, Молия вазирлиги ва «Ўзташқи иқтисодий банк» «Ўзбекистон» кичик кўп тармоқли корхонасига хориждаги ташкилий тадбирлар давомида пайдо бўладиган масалалар бўйича услубий ёрдам кўрсатсинлар.

7. Ўзбекистон Республикаси Савдо вазирлиги тушадиган валюта ҳисобига республикани кенг истеъмол моллари билан самарали таъминласин. Бунда энг зарур товарларни харид қилишга алоҳида эътибор қаратиш лозим.

8. Мазкур қарорнинг бажарилишини назорат қилиш Халқ истеъмол товарлари, савдо ва хизматлар комплекси зиммасига юклансин.