Халқ истеъмоли молларининг, озиқ-овқат маҳсулотларининг, аҳолига хизмат кўрсатишнинг эркин ва бошқариладиган нархларига ўтилиши муносабати билан давлат бошқарув органлари, суд органларининг фаолияти самарадорлигини ошириш ва уларни юқори малакали мутахассислар билан таъминлаш мақсадида Вазирлар Маҳкамаси қарор қилади:

1. Ўзбекистон ССР Министрлар Советининг 1989 йил 28 октябрдаги 355-сон қарорига қисман ўзгартиш киритиб, 1992 йил 1 январдан бошлаб давлат бошқарув органлари аппарати, суд органлари ва нотариал идоралар ходимларининг лавозим маошлари 1,5 баравар оширилсин, бу маошларга чакана нархлар ўзгариши билан боғлиқ бўлган қўшимча харажатлар компенсацияси қўшилсин.

Ўзбекистон Республикаси вазирликлари, идоралари, Қорақалпоғистон Республикаси Вазирлар Кенгаши, вилоят ижроия қўмиталари ва Тошкент шаҳар ижроия қўмитаси марказий аппарати ходимлари айрим тоифаларининг лавозим маошлари 1, 2-иловаларга мувофиқ тасдиқлансин.

Белгилансинки, лавозим маошларининг кўпайтирилиши билан боғлиқ харажатларнинг 20 фоизи бошқарув органлари аппарати ходимлари сонини қисқартириш ҳисобига амалга оширилади. Ўзбекистон Республикаси Молия вазирлиги мазкур тартибга риоя этилишини назорат қилиб борсин.

2. Республика маҳалла қўмиталари раислари ва масъул котибларининг лавозим маошлари 50 фоиз оширилсин.

3. Ўзбекистон Республикасининг вазирликлари ва идоралари, Қорақалпоғистон Республикаси Вазирлар Кенгаши, вилоят ижроия қўмиталари ва Тошкент шаҳар ижроия қўмитаси меҳнатга ҳақ тўлашнинг янги шартларини жорий этаётганда республика, тармоқ ва маҳаллий бошқарув органларининг амалдаги структурасини таҳлил қилиб чиқсинлар ва бунда уларнинг ҳаракатчанлигини, иқтисодиётни ривожлантириш талаблари ва фуқароларнинг эҳтиёжлари билан боғлиқ бўлган муаммоларни ҳал этишни таъминлашга амалда қодирлигини ошириш назарда тутилсин.

4. Белгилансинки, Қорақалпоғистон Республикаси Вазирлар Кенгаши, халқ депутатлар Кенгашларининг ижроия қўмиталари лавозим маошларини кўпайтириш учун давлат бошқарув органларини сақлаш харажатларини камайтиришдан ҳосил қилинган тежамдан, шунингдек, Ўзбекистон Республикаси, Қорақалпоғистон Республикаси ва халқ депутатлари Кенгашларининг бюджет ҳуқуқлари ҳақидаги амалдаги қонунлар томонидан берилган ҳуқуқларга мувофиқ уларга биркитилган давлат даромадлари бўйича бюджетга тушган қўшимча тушум маблағларидан фойдаланишлари мумкин.

5. Белгилансинки, вилоятлар ва шаҳарлар ходимларини иш ҳақи тўлаш группасига киритиш Ўзбекистон Республикаси Президенти ҳузуридаги Вазирлар Маҳкамаси томонидан белгиланади.