Oʻzbekiston Respublikasi Prezidentining “Oʻzbekiston Respublikasi Prezidentining “Oʻzbekiston Respublikasi Vazirlar Mahkamasi huzurida Oʻzbekiston Qishloq xoʻjaligi ilmiy-ishlab chiqarish markazini tashkil etish toʻgʻrisida” 1997-yil 6-yanvardagi PF-1693-son Farmoniga oʻzgartirish kiritish haqida 1997-yil 3-noyabrdagi PF-1879-son Farmonini bajarish yuzasidan va Oʻzbekiston Respublikasi Qishloq va suv xoʻjaligi vazirligi markaziy apparati tuzilmasini iqtisodiy islohotlarning zamonaviy bosqichlariga muvofiqlashtirish maqsadida Vazirlar Mahkamasi qaror qiladi:

1. Qishloq va suv xoʻjaligi vazirligi markaziy apparatining Yangi tuzilmasi ilovaga muvofiq tasdiqlansin.

2. Vazirlar Mahkamasining 1996-yil 26-noyabrdagi 419-son qarorining 11-bandini oʻzgartirilib, belgilansinki, Qishloq va suv xoʻjaligi vazirligida 6 nafar vazir oʻrinbosari, shu jumladan 3 nafar birinchi oʻrinbosar lavozimi joriy etiladi.

Vazirning iqtisodiyot va qishloq xoʻjaligida islohotlar masalalariga mutasaddi boʻlgan birinchi oʻrinbosariga qoʻshimcha ravishda qishloq xoʻjaligi mahsulot ishlab chiqaruvchilarining “Oʻzagrosugʻurta” davlat-aksiyadorlik sugʻurta kompaniyasi bilan mustahkam oʻzaro hamkorligini taʼminlash va ularning samarali ishlashini tashkil etish uchun javobgarlik yuklanadi.

3. Belgilansinki, Qishloq va suv xoʻjaligi vazirligi ixtiyoriga berilgan Oʻzbekiston Qishloq xoʻjaligi ilmiy-ishlab chiqarish markaziga (keyingi oʻrinlarda Markaz deb ataladi) ayni vaqtda vazirning qishloq xoʻjaligidagi ilmiy-texnika taraqqiyoti va texnologiya siyosati masalalariga mutasaddi boʻlgan oʻrinbosari hisoblangan bosh direktor boshchilik qiladi.

Markazda Vazirlar Mahkamasi bilan kelishgan holda Qishloq va suv xoʻjaligi vaziri tomonidan tayinlanadigan bosh direktorning birinchi oʻrinbosari va oʻrinbosari lavozimlari joriy etiladi.

4. Markazda ilmiy-texnika kengashi tashkil etiladi. Qishloq va suv xoʻjaligi vaziri uning raisi, Markazning bosh direktori Rais oʻrinbosari hisoblanadi. Kengash tarkibiga lavozimiga koʻra bosh direktor oʻrinbosarlari va Markazning bosh ilmiy kotibi, Fan va texnika davlat qoʻmitasi raisi, Fanlar akademiyasi Prezidenti, Oʻzbekiston Respublikasi Bosh vaziri oʻrinbosari – agrosanoat kompleksi rahbari kotibiyatining mudiri, Oliy va oʻrta maxsus taʼlim vaziri, Davlat oʻrmon qoʻmitasi raisi, Gidrometeorologiya bosh boshqarmasi boshligʻi, shuningdek yetakchi olimlar va mutaxassislar kiradi. Ilmiy-texnika kengashi aʼzolarining shaxsiy tarkibi (tarkibga lavozimga koʻra kiruvchi shaxslardan tashqari) Vazirlar Mahkamasi tomonidan tasdiqlanadi.

5. Vazirlar Mahkamasining 1997-yil 12-martdagi 136-son qarorining 2-bandi, shuningdek qarorga uchinchi ilovaning 12 va 23-bandlari oʻz kuchini yoʻqotgan deb hisoblansin.