Tovarlar va xizmatlar haqi sifatida aholidan tushadigan naqd pul mablagʻlarini qabul qilish hamda hisobga olishni tartibga solish, pul muomalasini mustahkamlash, isteʼmolchilarning huquqlarini himoya qilishni taʼminlash maqsadida Vazirlar Mahkamasi qaror qiladi:

1. 1995-yilning 1-yanvaridan boshlab Oʻzbekiston Respublikasi hududida aholi bilan pul hisob-kitoblarini amalga oshirishda mulkchilikning barcha shakllaridagi korxonalar, muassasalar va tashkilotlar tomonidan nazorat-kassa mashinalarini majburiy qoʻllash joriy etilsin.

Belgilab qoʻyilsinki, 1995-yilning 1-iyulgacha nazorat-kassa mashinalari oʻrnatmagan mulkchilikning barcha shakllaridagi savdo korxonalari, muassasalari va tashkilotlarining faoliyatlari toʻxtatiladi.

Mazkur qoidalar Oʻzbekiston Respublikasi Moliya vazirligi, Davlat soliq qoʻmitasi, Markaziy bank va Adliya vazirligi tomonidan tasdiqlangan roʻyxatga koʻra savdo korxonalari, tashkilotlari, muassasalarining ayrim toifalariga joriy etilmaydi. Bular oʻz faoliyatlari xususiyatiga qarab aholi bilan hisob-kitobni nazorat-kassa mashinalarisiz amalga oshirishlari mumkin.

Belgilansinki, turgʻun savdo tarmoqlari orqali savdo qiluvchi jismoniy shaxslar nazorat-kassa apparatlaridan foydalanishga majburdir.

2. Oʻzbekiston Respublikasi Moliya vazirligi, Davlat soliq qoʻmitasi, Markaziy bank, Adliya vazirligi oʻn kun muddatda:

aholi bilan pul hisob-kitoblarini amalga oshirishda nazorat-kassa mashinalarini majburiy qoʻllash tartibi toʻgʻrisidagi Nizomni ishlab chiqsinlar;

oʻz faoliyati xususiyatiga koʻra aholi bilan hisob-kitoblarini nazorat-kassa mashinalarini qoʻllamasdan amalga oshirishi mumkin boʻlgan savdo korxonalari, tashkilotlari va muassasalarining alohida toifalari roʻyxatini aniqlasinlar.

3. Nazorat-kassa mashinalari joriy etish boʻyicha Davlat idoralararo komissiyasi tarkibi hamda “Nazorat-kassa mashinalarini joriy etish boʻyicha Davlat idoralararo komissiyasi toʻgʻrisida Nizom” 1* va 2-ilovalarga muvofiq tasdiqlansin.

4. Belgilab qoʻyilsinki, Oʻzbekiston Respublikasi hududida foydalanishga yoʻl qoʻyiladigan nazorat-kassa mashinalarining modeli Nazorat-kassa mashinalari boʻyicha Davlat idoralararo komissiyasi tomonidan belgilanadi va Oʻzbekiston Respublikasi hududida foydalanishga ruxsat etilgan nazorat-kassa mashinalarining Davlat reyestriga kiritiladi, soʻngra matbuotda eʼlon qilinadi.

5. “Oʻzeltexsanoat” uyushmasining nazorat-kassa mashinalarining 1995-yildan boshlab “Foton” ishlab chiqarish birlashmasi tomonidan bosqichma-bosqich ishlab chiqarish toʻgʻrisidagi taklifi qabul qilinsin.

Oʻzbekiston Respublikasi Tashqi iqtisodiy faoliyat milliy banki butlovchi, texnologiya va nazorat-sinash asbob-uskunalarini xorijiy firmalardan sotib olish uchun “Oʻzeltexsanoat” uyushmasi tomonidan taqdim etilgan texnik-iqtisodiy asoslashlar boʻyicha belgilangan tartibda kredit ajratish imkoniyatini koʻrib chiqsin.

6. “Oʻzeltexsanoat” uyushmasi, “Oʻzbeksavdo” davlat uyushmasi, “Oʻzmaishiyxizmat” uyushmasi, Oʻzbekbirlashuv nazorat-kassa mashinalariga texnika xizmati koʻrsatish boʻyicha mintaqaviy markazlar va shoxobchalar barpo etishni, ushbu shoxobchalarning tashkil qilinish va faoliyat koʻrsatishini tartibga soluvchi normativ hujjatlarni ishlab chiqish va chiqarishni 1995-yilning 1-fevraligacha boʻlgan muddatda taʼminlasinlar.

7. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari:

joylarda nazorat-kassa mashinalariga texnika xizmati koʻrsatuvchi mintaqaviy markazlar va punktlarni barpo etishda yordam koʻrsatsinlar;

Oʻzbekiston Respublikasi hududida foydalanishga ruxsat etilgan nazorat-kassa mashinalarining Davlat reyestriga kiritilmagan nazorat-kassa mashinalaridan foydalanish hollariga yoʻl qoʻyilmasligi ustidan qattiq nazorat oʻrnatilsin

8. Savdo qilishda va xizmatlar koʻrsatishda nazorat-kassa mashinalarini qoʻllamasdan aholi bilan pul hisob-kitoblarini amalga oshirayotgan yuridik shaxslar hisob-kitob schyotidan eng kam oylik ish haqining 100 baravari miqdorida jarima chorasi qoʻllanilgandan keyin bir yil mobaynida huquq buzish takroran sodir etilganda esa eng kam oylik ish haqining 200 baravari miqdorida, undan undirilgan summa budjet daromadiga oʻtkazilgan holda jarima undiriladi.

Savdo-sotiqda va xizmatlar koʻrsatishda aholi bilan pul hisob-kitoblarini Oʻzbekiston Respublikasi Moliya vazirligi tomonidan tasdiqlangan shakllar boʻyicha qatʼiy hisobot beriluvchi hujjat hisoblanuvchi kvitansiyalar yozmasdan, talonlar, chiptalar yoki ularga tenglashtirilgan boshqa cheklar bermasdan (bunday hujjatlarni yozish yoki berish majburiy boʻlgan taqdirda) amalga oshiruvchi yuridik shaxslardan belgilangan eng kam oylik ish haqining 100 baravari miqdorida, jarima choralari qoʻllangandan soʻng yil mobaynida qonunni buzish takroran sodir etilganda esa — 200 baravari miqdorida jarima undiriladi, u belgilangan tartibda budjetga oʻtkaziladi.

Buzuq nazorat-kassa mashinasi tuzatishda boʻlgan davrda savdo-sotiq faoliyatini turgʻun savdo shoxobchalari orqali amalga oshiruvchi yuridik va jismoniy shaxslar savdo-sotiqda va xizmatlar koʻrsatishda aholi bilan pul hisob-kitoblarini Oʻzbekiston Respublikasi Moliya vazirligi tomonidan tasdiqlangan shakllar boʻyicha qatʼiy hisobot beriluvchi hujjat hisoblanuvchi kvitansiyalar yozish, talonlar, chiptalar yoki ularga tenglashtirilgan boshqa cheklar berish yoʻli bilan amalga oshirishga majburdirlar.

9. Oʻzbekiston Respublikasi Vazirlar Mahkamasining 1994-yil 11-apreldagi 195-son qarori 15 bandining uchinchi xatboshi oʻz kuchini yoʻqotgan deb hisoblansin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari B. S. Hamidov, Y. F. Paygin va M. Z. Usmonov zimmasiga yuklansin.

1. Oʻzbekiston Respublikasida nazorat-kassa mashinalarini joriy etish boʻyicha davlat idoralararo komissiyasi Oʻzbekiston Respublikasi qonunlari asosida ishlaydi hamda Oʻzbekiston Respublikasi Konstitutsiyasiga, Vazirlar Mahkamasi qarorlariga, Oʻzbekiston Respublikasi Prezidenti farmoyishlari va farmonlariga hamda ushbu Nizomga amal qiladi.

2. Quyidagilar Davlat idoralararo komissiyasining asosiy vazifalari hisoblanadi:

Oʻzbekiston Respublikasidan qoʻllashga ruxsat etilgan nazorat-kassa mashinalariga nisbatan texnikaviy talablarni ishlab chiqish va tasdiqlash;

respublikada qoʻllashga ruxsat etilgan nazorat-kassa mashinalari modellarini Davlat reyestri tarzida belgilash;

respublikada qoʻllashga ruxsat etilgan nazorat-kassa mashinalari Davlat reyestrini shakllantirish, joriy etish va unga doimo tuzatishlar kiritib borish;

respublikani nazorat-kassa mashinalari bilan taʼminlash, nazorat-kassa mashinalaridan foydalangan holda aholi bilan pul hisob-kitoblari tizimining faoliyat koʻrsatishini taʼminlash boʻyicha tadbirlar rejasini va innovatsiya dasturini ishlab chiqish hamda ushbu tadbirlarni amalga oshirish;

nazorat-kassa mashinalarini respublikadagi korxonalar tomonidan ishlab chiqarilishi uchun ularning modellarini tasdiqlash;

xizmatlar koʻrsatish sohasini nazorat-kassa mashinalari bilan taʼminlash va ulardan foydalanishga doir idoralararo masalalarni hal etish.

3. Davlat idoralararo komissiyasi oʻziga yuklatilgan vazifalarga muvofiq:

savdo va xizmatlar koʻrsatish sohasi korxonalarining nazorat-kassa mashinalarini qoʻllagan holda aholi bilan hisob-kitoblarni amalga oshirish, joriy etish va faoliyat koʻrsatishini taʼminlash boʻyicha vazirliklar va idoralararo, hokimliklar va korxonalar ishini muvofiqlashtiradi hamda nazorat qiladi;

nazorat-kassa mashinalariga nisbatan respublikada amalda boʻlgan texnikaviy talablarga muvofiq ularni sinab koʻrishni va ekspertizadan oʻtkazishni tashkil qiladi;

nazorat-kassa mashinalarining yangi modellarini Davlat reyestriga kiritish toʻgʻrisida talabnomalarni koʻrib chiqadi va qaror qabul qiladi hamda maʼnaviy eskirgan va talablarga nomuvofiq boʻlgan nazorat-kassa mashinalari uchun mumkin boʻlgan foydalanish muddatlarini belgilaydi;

turli idoralarning nazorat-kassa mashinalarini joriy etish, ularning ishlash imkoniyatini qoʻllab-quvvatlash va ulardan foydalanish masalalari boʻyicha oʻzaro hamkorlik qilishiga taalluqli boʻlgan hujjatlarni koʻrib chiqadi va tasdiqlaydi;

savdo va xizmatlar koʻrsatish sohasi korxonalarida nazorat-kassa mashinalaridan foydalanish ustidan nazoratni tashkil qiladi;

savdo va xizmatlar koʻrsatish sohasi korxonalarida nazorat-kassa mashinalarini joriy qilishga va ulardan foydalanishga doir barcha zarur axborotlarni respublika Hukumatiga taqdim etadi.

4. Davlat idoralararo komissiyasiga quyidagi huquqlar beriladi:

vazirliklar, idoralar va korxonalardan Davlat idoralararo komissiyasining huquq doirasiga kiruvchi masalalar boʻyicha axborotni talab qilish va olish;

vazirliklar, idoralar, tashkilotlar va korxonalar rahbarlarining nazorat-kassa mashinalarini joriy etish hamda ishlatish masalalari boʻyicha hisobotlarini eshitish;

respublikada nazorat-kassa mashinalari bilan taʼminlash, ularni joriy etish va ishlatish masalalari boʻyicha respublika vazirliklari, idoralari, hokimliklari va korxonalari tomonidan bajarilishi majburiy boʻlgan qarorlar qabul qilish;

zarurat boʻlganda ishchi guruhlar, vaqtinchalik mehnat jamoalari tuzish va ularning ishida qatnashish uchun vazirliklar, idoralar, shuningdek, mulkchilik shakllaridan qatʼi nazar, korxonalar, mutaxassislarini belgilangan tartibda jalb etish.

5. Davlat idoralararo komissiyasi tarkibiga:

Moliya vazirligi;

Adliya vazirligi;

Davlat soliq qoʻmitasi;

“Oʻzbeksavdo” uyushmasi;

Oʻzbekbirlashuv;

“Oʻzmaishiyxizmat uyushmasi;

“Oʻzeltexsanoat” uyushmasi;

Markaziy bank vakillari kiradi.

6. Davlat idoralararo komissiyasining shaxsiy tarkibi Vazirlar Mahkamasining qarori bilan tasdiqlanadi.

7. Davlat idoralararo komissiyasi raisi:

komissiya ishlarini tashkil etadi va uning zimmasiga yuklatilgan vazifalarning bajarilishi uchun javob beradi;

komissiya faoliyat hamda respublikada nazorat-kassa mashinalari bilan taʼminlash, ularni joriy etish va ishlatishga doir ishlarning ahvoli toʻgʻrisida Vazirlar Mahkamasiga hisob beradi.

8. Davlat idoralararo komissiyasi oʻz ishlarini uning raisi tomonidan tasdiqlangan rejalarga muvofiq tashkil qiladi.

9. Davlat idoralararo komissiyasi majlisini uning raisi, u boʻlmagan vaqtda esa oʻrinbosari oʻtkazadi.

Davlat idoralararo komissiyasining majlisi bayonnoma tarzida rasmiylashtiriladi. Davlat idoralararo komissiyasining majlis bayonnomalari va uning faoliyatiga oid boshqa axborotlar majlis oʻtkazilgandan keyin 5 kun mobaynida, materiallarni joʻnatish yoʻli bilan, komissiya aʼzolariga hamda boshqa manfaatdor tashkilotlar va shaxslarga maʼlum qilinadi.