Ўзбекистон Республикаси Солиқ кодексининг 429-моддаси, Ўзбекистон Республикаси Президентининг 2021 йил 8 июлдаги «Ер муносабатларида тенглик ва шаффофликни таъминлаш, ерга бўлган ҳуқуқларни ишончли ҳимоя қилиш ва уларни бозор активига айлантириш чора-тадбирлари тўғрисида»ги ПФ-6243-сонли Фармони ва Вазирлар Маҳкамасининг 2022 йил 14 февралдаги 71-сонли қарори билан тасдиқланган «Тадбиркорлик ва шаҳарсозлик фаолиятини амалга ошириш учун ер участкаларини мулк ҳуқуқи ва ижара ҳуқуқи асосида электрон онлайн-аукцион орқали бериш тартиби тўғрисида»ги низомга мувофиқ Кадастр агентлигининг Давлат кадастрлари палатаси вилоят бошқармасининг 2026 йил 4 февралдаги 01-1070-сонли хатини кўриб чиқиб, Ўзбекистон Республикаси «Маҳаллий давлат ҳокимияти тўғрисида»ги қонунининг 6 ва 21¹-моддаларига асосан қарор қиламан:

1. Вилоятда қишлоқ хўжалиги учун мўлжалланмаган ер участкасига (кейинги ўринларда — ер участкаси) ижара ҳуқуқининг минимал қиймати маҳаллалар кесимида 1-иловага мувофиқ тасдиқлансин.

2. Давлат активларини бошқариш агентлиги вилоят ҳудудий бошқармаси (А. Атаев), Давлат кадастрлари палатаси вилоят бошқармаси (Ҳ. Розметов), шаҳар (туман)лар ҳокимликлари:

электрон онлайн-аукцион орқали реализация қилишга мўлжалланган бўш ер участкаларининг рўйхатини шакллантирсин;

вилоятдаги ер участкасига ижара ҳуқуқининг минимал қиймати тасдиқланган санадан эътиборан икки иш куни ичида «ЕРЕЛЕКТРОН» ААТга киритилишини таъминласин;

ер участкалари бўйича келишилган ёки ижобий хулоса берилган кундан бошлаб беш иш куни ичида ер участкасига ижара ҳуқуқининг минимал қиймати асосида ер участкасининг бошланғич нархини белгиласин;

вилоятда тадбиркорлик ва шаҳарсозлик фаолиятини амалга ошириш учун бўш турган қишлоқ хўжалиги учун мўлжалланмаган ер участкаларини электрон онлайн-аукцион орқали ижарага бериш ишларини Ўзбекистон Республикаси Вазирлар Маҳкамасининг 2022 йил 14 февралдаги 71-сонли қарори билан тасдиқланган «Тадбиркорлик ва шаҳарсозлик фаолиятини амалга ошириш учун ер участкаларини мулк ҳуқуқи ва ижара ҳуқуқи асосида электрон онлайн-аукцион орқали бериш тартиби тўғрисида»ги низом талабларига асосан амалга оширсин.

3. Мазкур қарор қабул қилиниши муносабати билан Хоразм вилояти ҳокимининг 2023 йил 18 апрелдаги 126-12-0-Қ/23-сонли қарори ўз кучини йўқотган деб ҳисоблансин.

4. Ушбу қарор «Хоразм ҳақиқати» ва «Хорезмская правда» газеталарида расмий эълон қилингандан кейин кучга киради.

5. Мазкур қарорнинг ижросини назорат қилиш вилоят ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари А. Давлетов зиммасига юклансин.