Ўзбекистон Республикаси Рақамли технологиялар вазирлиги ва Сербия Республикаси Ахборот ва телекоммуникациялар вазирлиги, кейинги ўринларда «Иштирокчилар» деб аталувчилар,

ахборот-коммуникация технологиялари соҳасида ўзаро манфаатли ҳамкорликни ўрнатиш, ривожлантириш ва чуқурлаштириш истагидан келиб чиқиб,

Ўзбекистон Республикаси ва Сербия Республикаси ўртасидаги тарихий ва дўстона муносабатларни инобатга олиб,

ахборот-коммуникация технологияларини ривожлантириш учун ўзаро манфаатли ва янгиланган ҳамкорлик зарурлигини эътироф этиб,

ривожланишдаги тараққиётнинг муҳимлигини ҳамда ахборот-коммуникация технологиялари соҳасида техник салоҳият ва имкониятлардан оқилона фойдаланиш зарурлигини тан олиб,

бундай ҳамкорлик умумий манфаатларга хизмат қилиши ва ҳар икки мамлакатда тегишли соҳаларнинг ривожланишига ҳисса қўшишига ишониб,

ҳамкорлик борасида қуйидаги англашувга эришдилар:

1. Мазкур Англашув Меморандуми тенглик, ўзаро жавобгарлик ва ўзаро манфаатдорлик тамойиллари асосида Иштирокчилар ўртасида ахборот-коммуникация технологиялари соҳасидаги ҳамкорлик учун асос яратишга қаратилган.

2. Иштирокчилар ҳар икки мамлакатдаги илмий-тадқиқот муассасалари ўртасидаги ҳамкорликни рағбатлантириш ва Иштирокчиларнинг мамлакатларидаги коммуникация ва ахборот соҳаларининг ривожланишига ҳисса қўшиш ниятини билдирадилар.

1. Иштирокчилар ҳамкорликни кенгайтиришга кўмаклашадилар, ҳар икки мамлакат ахборот-коммуникация технологиялари соҳасида фаолият юритувчи компаниялар, илмий ва таълим муассасалари, давлат идоралари ҳамда бошқа ташкилотлар ўртасида билим, тажриба ва экспертлар алмашинувини рағбатлантирадилар. Улар мутахассислар тайёрлашни яхшилашга ҳисса қўшувчи материаллар алмашадилар, ўз меъёрий ҳужжатларини таҳлил қиладилар ва таққослайдилар ҳамда қуйидаги тегишли йўналишларда тадқиқотлар олиб борадилар:

a) телекоммуникацияда, шу жумладан, 5Г тармоқларида инновацион ечимларни ишлаб чиқиш;

b) қишлоқ ҳудудларида телекоммуникацияни ривожлантириш;

c) рақамли кўникмаларни ривожлантириш;

d) киберхавфсизлик;

e) электрон имзолар (э-имзо) ва ишонч хизматлари;

f) Иштирокчилар тарафидан ўзаро келишилган ва АКТ соҳасида юзага келадиган устуворликларга асосланган бошқа ҳамкорлик йўналишлари.

2. Иштирокчилар замонавий технологияларга асосланган ахборот-коммуникация технологияларини йўлга қўйиш ва уларни мақбул тарзда интеграция қилишни рағбатлантириш ниятини билдирадилар.

3. Халқаро лойиҳалар бўйича ҳамкорлик жалб этилган субъектлар тарафидан имзоланадиган алоҳида ёзма амалга ошириш битимлари асосида амалга оширилиши мумкин.

4. Иштирокчилар ўзларининг миллий манфаатларидан келиб чиқиб, Халқаро электр алоқаси иттифоқи, Бутунжаҳон почта иттифоқи ҳамда бошқа халқаро ва минтақавий ташкилотлар доирасида ҳамкорлик қиладилар.

1. Мазкур Англашув Меморандумида белгиланган ҳамкорлик олдиндан келишилган турли шакллар орқали, шу жумладан, бироқ улар билан чекланмаган ҳолда, ўқитиш, тадқиқот, техник маслаҳатлашувлар ҳамда зарур соҳаларда экспертлар, материаллар ва тажриба алмашинуви орқали амалга оширилади, хусусан:

a) икки мамлакат ўртасида илғор тажрибалар, амалиётлар ва экспертлар алмашинуви;

b) ўқув машғулотлари, техник маслаҳатлашувлар ташкил этиш ва инсон ресурсларини ривожлантириш;

c) ташкилотлар, илмий-тадқиқот муассасалари ва университетлар ўртасидаги алмашинув ва ҳамкорликни рағбатлантириш;

d) АКТ соҳасида қўшма тадқиқотлар;

e) ҳамкорликнинг ҳар бир йилидаги аниқ эҳтиёжлардан келиб чиқиб, Иштирокчилар томонидан белгиланадиган бошқа ҳамкорлик шакллари.

2. Ҳар бир Иштирокчи мазкур Англашув Меморандуми доирасидаги фаолият билан боғлиқ ўз харажатларини мустақил равишда қоплайди.

3. Ҳар бир Иштирокчи мазкур Англашув Меморандуми шартларига мувофиқ фаолиятни мувофиқлаштириш ва тегишли тартиб-таомилларни осонлаштириш учун бир ёки бир нечта вакил тайинлайди.

4. Мазкур Англашув Меморандуми ҳеч бир Иштирокчи учун ҳуқуқий жиҳатдан мажбурий эмас ва миллий ёки халқаро ҳуқуққа мувофиқ ҳуқуқий мажбуриятлар юзага келтиришни кўзда тутмайди.

1. Ҳар қайси Иштирокчи тарафидан мазкур Англашув Меморандуми ва унга мувофиқ тузилган ҳар қандай ёзма битимлар доирасида амалга ошириладиган барча фаолият, шу жумладан, қўшимча ижро битимларини тузиш, Иштирокчиларнинг тегишли қонун ва меъёрий ҳужжатларига ҳамда тегишли молиялаштириш мавжудлиги ва бюджет имкониятларига боғлиқ бўлади.

2. Ҳамкорлик йўналишларидаги барча фаолият Иштирокчиларда молиялаштириш ва бошқа ресурслар мавжудлигига қараб амалга оширилади.

3. Қўшимча молиялаштириш зарурати юзага келган тақдирда, Иштирокчилар халқаро ташкилотлар ёки давлат-хусусий шериклик каби ташқи манбаларни жалб қилишлари мумкин.

1. Мазкур Англашув Меморандуми доирасидаги ҳамкорлик натижасида юзага келадиган ҳар қандай махфий ахборот Иштирокчиларнинг мамлакатларида амалдаги ҳуқуқий ва меъёрий талабларга мувофиқ алмашилади.

2. Ҳеч бир Иштирокчи бошқа Иштирокчининг олдиндан ёзма розилигисиз мазкур Англашув Меморандуми доирасидаги фаолиятни амалга ошириш жараёнида узатилган махфий ахборотни, уни тугатгандан кейин, ахборот хавфсизлиги қоидалари ва маълумотлар айланиши усулларига риоя этишга алоҳида эътибор қаратган ҳолда, ошкор қилмайди ёки тарқатмайди.

1. Мазкур Англашув Меморандумини амалга ошириш жараёнида ёки натижасида яратилган ҳар қандай интеллектуал мулк ҳуқуқларини тақсимлашга оид масалалар мазкур Англашув Меморандуми доирасидаги ҳар бир аниқ ҳамкорлик йўналиши учун тузиладиган алоҳида шартномалар билан тартибга солинади.

2. Ҳар бир Иштирокчи қўшма фаолият бошланишидан олдин ёки мазкур Англашув Меморандумидан мустақил равишда ўзи яратган ҳар қандай интеллектуал мулк ҳуқуқларига эгалик ҳуқуқини сақлаб қолади.

1. Мазкур Англашув Меморандумига Иштирокчиларнинг ўзаро розилиги билан, қўшимча баённомаларда расмий равишда келишилган ўзгартиришлар орқали ўзгартиришлар киритилиши мумкин.

2. Бундай ўзгартиришлар мазкур Англашув Меморандумининг ажралмас қисмига айланади ва Иштирокчилар тарафидан келишилган шартларга мувофиқ амал қила бошлайди.

Мазкур Англашув Меморандуми имзоланган санадан бошлаб амал қила бошлайди ва уч (3) йил давомида амалда бўлади, сўнгра, башарти Иштирокчилардан бири жорий муддат тугашига камида олти (6) ой қолганда бошқа Иштирокчини мазкур Англашув Меморандумидаги иштирокини тўхтатиш нияти тўғрисида ёзма равишда хабардор қилмаса, у ўз-ўзидан навбатдаги тенг муддатларга узайтирилади.

Мазкур Англашув Меморандуми қоидаларини амалга ошириш ёки талқин қилишдан келиб чиқадиган ҳар қандай низолар миллий ёки халқаро судга ёхуд учинчи томонга мурожаат қилмасдан, Иштирокчилар ўртасида дипломатик каналлар орқали маслаҳатлашувлар ва музокаралар йўли билан дўстона тарзда ҳал этилади.

Белград шаҳрида, 2026 йил 8 сентябрь куни, икки асл нусхада, ўзбек, серб ва инглиз тилларида имзоланди, бунда барча матнлар аутентикдир. Талқин қилишда келишмовчиликлар юзага келган тақдирда, инглиз тилидаги матндан фойдаланилади.