Respublika korxonalarida tayyorlanayotgan teri, moʻyna xomashyosi va qorakoʻlni yanada toʻliq qayta ishlash maqsadida va Oʻzbekiston Respublikasi Prezidentining “Teri, moʻyna xomashyosi va qorakoʻl eksportini tartibga solish toʻgʻrisida”gi Farmoniga muvofiq Vazirlar Mahkamasi qaror qiladi:

1. Belgilab qoʻyilsinki, respublika boj chegarasi orqali teri (TIF TN boʻyicha kodlar 41044109) olib chiqib ketish Vazirlar Mahkamasining ruxsati bilan amalga oshiriladi.

2. Oʻzbekiston Respublikasi Markaziy banki “Oʻzbekyengilsanoat” davlat uyushmasi va “Oʻzbek qorakoʻli” kompaniyasi bilan birgalikda aholining teri, qorakoʻl va moʻyna xomashyosini tuman savdo-tayyorlov kooperativlariga (shirkatlarga) topshirishini ragʻbatlantirish maqsadida aholidan sotib olinadigan teri, qorakoʻl va moʻyna xomashyosi uchun shirkatlarning muassislari boʻlgan jismoniy shaxslar tomonidan ularning ustav jamgʻarmalariga qoʻyilgan naqd pul doirasida oʻz naqd pullari bilan hisob-kitob qilishi tartibini bir oy muddatda ishlab chiqsin.

3. Tayyorlanayotgan xomashyoni raqobatbardosh mahsulot qilib yanada chuqurroq qayta ishlash uchun shart-sharoitlar yaratish maqsadida “Oʻzbekyengilsanoat” davlat uyushmasi, Oʻzbekiston Respublikasi Qishloq va suv xoʻjaligi vazirligi, Oʻzbekbirlashuv, “Mahalliy sanoat” hududiy aksiyadorlik kompaniyalari Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda ikki oy muddatda koʻrsatib oʻtilgan xomashyoni qayta ishlovchi mavjud ishlab chiqarish quvvatlarini qayta roʻyxatdan oʻtkazsinlar, ulardan samarali foydalanish, ularni texnika bilan qayta jihozlash, shu jumladan xorijiy investitsiyalarni jalb etgan holda qayta jihozlash chora-tadbirlarini belgilasinlar.

4. Oʻzbekiston Respublikasi Davlat bojxona qoʻmitasi qoʻshni davlatlar bilan boj chegarasida nazoratni kuchaytirsin va xomashyoning koʻrsatib oʻtilgan turlari Oʻzbekiston Respublikasi Prezidentining “Teri, moʻyna xomashyosi va qorakoʻl eksportini tartibga solish toʻgʻrisida”gi Farmoniga va mazkur qarorning 1-bandiga qatʼiy muvofiq holda respublika tashqarisiga olib chiqib ketilishiga yoʻl qoʻysin.

5. Oʻzbekiston Respublikasi Vazirlar Mahkamasining “Oʻzbekiston tovar-xomashyo birjasida savdoni yanada rivojlantirish chora-tadbirlari toʻgʻrisida” 1996-yil 20-sentabrdagi 329-son qaroriga 1-ilovadan 5-band chiqarib tashlansin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I. H. Joʻrabekov va Oʻzbekiston Respublikasi Bosh vazirining oʻrinbosari M .Z. Usmonov zimmasiga yuklansin.