Ўзбекистон Республикаси Олий Мажлисининг Қонунчилик палатаси томонидан 2026 йил 6 август куни қабул қилинган «Ўзбекистон Республикаси Президенти Администрацияси тўғрисида»ги Ўзбекистон Республикаси Конституциявий Қонунини кўриб чиқиб, Ўзбекистон Республикаси Конституциясининг 93-моддасига мувофиқ Ўзбекистон Республикаси Олий Мажлисининг Сенати қарор қилади:

1. «Ўзбекистон Республикаси Президенти Администрацияси тўғрисида»ги Ўзбекистон Республикаси Конституциявий Қонуни маъқуллансин.

2. Ўзбекистон Республикаси Вазирлар Маҳкамаси ушбу Конституциявий Қонун расмий эълон қилинган кундан эътиборан икки ой муддатда:

ҳукумат қарорларининг ушбу Конституциявий Қонунга мувофиқлаштирилишини;

республика ижро этувчи ҳокимият органлари ушбу Конституциявий Қонунга мувофиқ ўз норматив-ҳуқуқий ҳужжатларини қайта кўриб чиқишлари ва бекор қилишларини таъминласин;

амалга оширилган ишлар тўғрисида Ўзбекистон Республикаси Олий Мажлисининг Сенатига ахборот киритсин.

3. Ўзбекистон Республикаси Олий Мажлиси Сенатининг Суд-ҳуқуқ масалалари ва коррупцияга қарши курашиш қўмитаси мазкур Қарор ижроси бўйича Ўзбекистон Республикаси Вазирлар Маҳкамасининг ахборотини кўриб чиқиб, натижалари юзасидан икки ҳафта муддатда Ўзбекистон Республикаси Олий Мажлиси Сенатининг Кенгашига ахборот киритсин.

4. Ушбу Қарор қабул қилинган кундан эътиборан кучга киради.