Oʻzbekiston Respublikasi va Polsha Respublikasi oʻrtasida moliya va investitsiya hamkorligini rivojlantirish toʻgʻrisida erishilgan ahdlashuvlarning amalga oshirilishini taʼminlash, jalb etilayotgan kreditlarni samarali oʻzlashtirish va oʻz vaqtida qaytarishni tashkil qilish maqsadida Vazirlar Mahkamasi qaror qiladi:

1. Oʻzbekiston Respublikasi Hukumati va Polsha Respublikasi Hukumati oʻrtasida quyidagi shartlarda jami 30 mln AQSH dollari miqdorida kreditlar berish toʻgʻrisida Bitimlar imzolanganligi maʼlumot uchun qabul qilinsin:

kasb-hunar taʼlimini rivojlantirish sohasidagi loyihalarni amalga oshirish yuzasidan kontraktlar qiymatining 90 foizini moliyalashtirish uchun 0,16 foiz yillik foiz stavkasi boʻyicha, ikki yillik imtiyozli davr bilan birga 17 yil muddatga 15 mln AQSH dollari miqdoridagi imtiyozli kredit;

turizm infratuzilmasini rivojlantirish hamda kichik va oʻrta biznesni qoʻllab-quvvatlash sohasidagi loyihalarni amalga oshirish yuzasidan kontraktlar qiymatining 85 foizini moliyalashtirish uchun LIBOR+1 foizli stavka boʻyicha, ikki yillik imtiyozli davr bilan birga 12 yil muddatga 15 mln AQSH dollari miqdoridagi tijorat krediti.

2. Quyidagilar:

Oʻzbekiston Respublikasi Moliya vazirligi — berilayotgan kreditlar boʻyicha Oʻzbekiston Respublikasi Hukumati nomidan qarz oluvchi etib;

“Bank Gospodarstva va Krayevogo” (Polsha Respublikasi) bilan imzolangan Bitimlar shartlariga muvofiq Oʻzbekiston Respublikasi Tashqi iqtisodiy faoliyat milliy banki — mazkur kreditlarga xizmat koʻrsatish boʻyicha moliyaviy agent etib;

avans toʻlovini toʻlash, asosiy qarzni uzish va imtiyozli kreditga xizmat koʻrsatish boʻyicha toʻlovlarni amalga oshirish boʻyicha — davlat budjeti mablagʻlari, tijorat krediti boʻyicha esa — subqarz oluvchilarning oʻz mablagʻlari toʻlov manbalari etib belgilansin.

3. Imtiyozli kredit mablagʻlari hisobiga oʻquv va texnologiya anjomlari yetkazib beruvchi korxonalarni Polsha Respublikasi vakolatli organlari bilan birgalikda tanlab olish boʻyicha idoralararo ishchi guruh tarkibi ilovaga* muvofiq tasdiqlansin.

4. Oʻzbekiston Respublikasi Moliya vazirligi ekspertiza natijalari boʻyicha va loyihalarning texnik-iqtisodiy asoslashlari tasdiqlangach tegishli subqarz oluvchilar bilan kredit bitimlarini belgilangan tartibda imzolasin.

5. Oʻzbekiston Respublikasi Iqtisodiyot vazirligi Polsha Respublikasi kredit liniyalari boʻyicha moliyalashtiriladigan loyihalarning Oʻzbekiston Respublikasi Investitsiya dasturiga belgilangan tartibda kiritilishini taʼminlasin.

6. Quyidagilar:

Polsha Respublikasi kredit liniyalari hisobiga moliyalashtiriladigan loyihalar doirasida import boʻyicha olib kelinayotgan tovarlar, ishlar (xizmatlar), loyihalarni amalga oshirish davrida bojxona toʻlovlaridan (bojxonada rasmiylashtirish yigʻimlaridan tashqari) ozod qilinsin;

“Bank Gospodarstva Krayevogo”ning (Polsha Respublikasi) Polsha Respublikasi kreditlarini berish toʻgʻrisidagi Bitim doirasida olingan daromadlari Oʻzbekiston Respublikasidagi toʻlov manbaida daromad (foyda) soligʻi toʻlashdan ozod qilinsin.

7. Oʻzbekiston Respublikasi Tashqi ishlar vazirligi Oʻrta maxsus, kasb-hunar taʼlimi markazi va “Oʻzbekturizm” milliy kompaniyasi buyurtmanomasiga koʻra Polsha Respublikasi kredit liniyalari boʻyicha moliyalashtiriladigan loyihalarni amalga oshirishda qatnashuvchi xorijiy mutaxassislarga kelish vizalari konsullik yigʻimlari undirilmasdan, belgilangan tartibda rasmiylashtirilishini taʼminlasin.

8. Oʻzbekiston Respublikasi Ichki ishlar vazirligi Oʻrta maxsus, kasb-hunar taʼlimi markazi va “Oʻzbekturizm” milliy kompaniyasi buyurtmanomasiga koʻra Polsha Respublikasi kredit liniyalari boʻyicha moliyalashtiriladigan loyihalarni amalga oshirishda qatnashuvchi xorijiy mutaxassislarga koʻp martalik vizalar berilishini va vizalarning muddati uzaytirilishini, shuningdek ularning Oʻzbekiston Respublikasida vaqtinchalik roʻyxatdan oʻtkazilishini va vaqtinchalik roʻyxatdan oʻtkazish muddati uzaytirilishini davlat boji toʻlashdan ozod qilgan holda taʼminlasin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari E.M. Gʻaniyev va R.S. Azimov zimmasiga yuklansin.