1.1. Ushbu Tartib Oʻzbekiston Respublikasining “Valyutani tartibga solish toʻgʻrisida”gi Qonunining 7-moddasiga muvofiq ishlab chiqilgan boʻlib, unda rezidentlar tomonidan Oʻzbekiston Respublikasi hududidan tashqarida chet el valyutasida hisobvaraqlar ochilishining shartlari belgilab qoʻyilgan.

1.2. Yuridik va jismoniy shaxslar — rezidentlar chet elda Oʻzbekiston Respublikasi Markaziy banki ruxsatnomasiga asosan hisobvaraqlar ochadilar.

2.1. Rezident — yuridik shaxslarga, taʼsis hujjatlari, bitimlar, kontrakt yoki shartnomalarga muvofiq ularning faoliyat koʻrsatish davri mobaynida chet elda hisobvaraqlar ochishga ruxsat beriladi.

2.2. Rezident — yuridik shaxslar chet elda hisobvaraqlar ochishga ruxsatnomalarni olish uchun Oʻzbekiston Respublikasi Markaziy bankiga quyidagilarni taqdim etishlari lozim:

2.2.1. Quyidagilar koʻrsatilgan iltimosnomalar:

a) hisobvaraqlarni ochishdan koʻzda tutilgan maqsad;

b) hisobvaraqlarning turlari va ular boʻyicha amalga oshirilishi moʻljallanayotgan operatsiyalar;

v) hisobvaraqlarni ochish koʻzda tutilgan chet el bank muassasalari;

g) respublikamiz vakolatli banklaridagi oʻz valyuta hisobvaraqlarining holati toʻgʻrisidagi maʼlumotlar;

d) ochilishi moʻljallanayotgan hisobvaraqqa mablagʻlarning kelib tushish manbalari;

e) hisobvaraqlarning amal qilish muddati.

2.2.2. Taʼsis hujjatlarining nusxalari;

2.2.4. Vakolatli banklarning chet elda hisobvaraqlarni ochishning maqsadga muvofiqligi va ularga xizmat koʻrsatishga roziligi toʻgʻrisidagi (Oʻzbekiston Respublikasi bilan bogʻliq operatsiyalar boʻyicha) maʼlumotnoma;

2.2.5. Tashqi iqtisodiy aloqalar agentligining Oʻzbekiston Respublikasi rezidentlari hisoblanadigan filiallar va vakolatxonalarni barpo etishga roziligi koʻchirma nusxasi (xorijda hisobvaraqlar ochilishi ularni barpo etilishi bilan shartlangan hollarda).

3.1. Rezident — jismoniy shaxslar tomonidan Oʻzbekiston Respublikasidan tashqarida chet el valyutasidagi hisobvaraqlar va omonatlarning ochilishi, ularning chet elda vaqtinchalik boʻlgan davrida hisobvaraqlar ochishini istisno qilgan holda, Oʻzbekiston Respublikasi Markaziy banki ruxsatnomasi asosida amalga oshiriladi. Rezident — jismoniy shaxslarning chet elda boʻlishi muddati tugagandan soʻng, ular xorijiy banklardagi hisobvaraqlari va omonatlarini yopishlari va ulardagi mablagʻlarning qoldiqlarini Oʻzbekiston Respublikasining vakolatli banklariga oʻtkazishlari yoki chet elda olingan valyuta qimmatliklarini bojxona qoidalariga rioya qilgan holda respublika hududiga olib kirishlari shart.

3.2. Rezident — jismoniy shaxslar chet elda hisobvaraqlar ochishga ruxsatnomalar olish uchun quyidagilarni koʻrsatgan holda tegishli iltimosnomalarni taqdim etadilar:

a) hisobvaraqlarni ochishdan koʻzda tutilgan maqsad va ularda amalga oshirilishi moʻljallanayotgan operatsiyalar;

b) hisobvaraqlarni ochish moʻljallangan xorijiy davlatlar va bank muassasalarining nomi hamda xorijiy valyutalarning turlari;

v) chet eldagi hisobvaraqlarda saqlanishi koʻzda tutilayotgan valyuta mablagʻlarining manbalari;

g) hisobvaraqlarning amal qilish muddati;

d) arizachining pasport maʼlumotlari.

e) ariza beruvchining pasport maʼlumotlari.

4.1. Oʻzbekiston Respublikasi Markaziy banki chet elda hisobvaraqlarni ochishga ruxsat berish toʻgʻrisidagi qarorni qabul qilish uchun arizachidan qoʻshimcha hujjatlar va maʼlumotlarni talab qilish, shuningdek, majburiy tartibda respublika Tashqi iqtisodiy aloqalar agentligi va Davlat soliq qoʻmitasidan tegishli xulosalarni soʻrash huquqiga ega.

Rezidentlar tomonidan chet elda hisobvaraqlar ochishga ruxsat berish toʻgʻrisidagi masala ijobiy hal etilganda Oʻzbekiston Respublikasi Markaziy banki amal qilish muddati koʻrsatilgan yozma ruxsatnoma beradi.

4.2. Arizachilarning Oʻzbekiston Respublikasi vakolatli banklaridagi hisobvaraqlarida saqlanayotgan valyuta mablagʻlarining chet eldagi hisobvaraqlarga oʻtkazilishi amaldagi qonunchilik bilan belgilangan tartibda amalga oshiriladi.

4.3. Chet elda hisobvaraqlar ochish uchun ruxsat olgan rezidentlar — yuridik va jismoniy shaxslar vakolatli banklarga ushbu hisobvaraqlardagi mablagʻlar harakati toʻgʻrisida har oyda axborot beradilar.

Vakolatli banklar, har oyda yuridik va jismoniy shaxslarning chet elda ochilgan hisobvaraqlaridagi mablagʻlarning harakati toʻgʻrisidagi maʼlumotlarni hisobot oyidan keyingi oyning 5-sanasidan kechiktirmay, Oʻzbekiston Respublikasi Markaziy bankiga (ushbu Tartibga ilova qilingan shakl boʻyicha) taqdim etadilar.

Vakolatli banklar soliq idoralarining soʻrovlari oʻz mijozlari boʻlgan korxonalarning soliq toʻlovlarini toʻlaligicha va toʻgʻri toʻlanishi ustidan nazorat qilish maqsadida ular tomonidan amalga oshirilayotgan operatsiyalar boʻyicha maʼlumotnomalarni taqdim etadilar.

4.4. Oʻzbekiston Respublikasining “Valyutani tartibga solish toʻgʻrisida”gi Qonuni va boshqa qonunchilik hujjatlariga muvofiq vakolatli banklar oʻz mijozlarining chet elda ochilgan hisobvaraqlari boʻyicha operatsiyalarning amalga oshirilishi va ushbu hisobvaraqlardagi mablagʻlarning harakati toʻgʻrisidagi maʼlumotlarni oʻz vaqtida taqdim etilishini nazorat qiladilar.

Ushbu maʼlumotlar mijozlardan talab qilib olinadigan hisobvaraqlar koʻchirmalari va rezident — yuridik shaxslarning chet eldagi hisobvaraqlariga xizmat koʻrsatuvchi xorijiy banklarning boshqa tasdiqlovchi hujjatlari asosida vakolatli banklar tomonidan tekshirib koʻriladi. Bunda berilgan ruxsatnoma shartlariga muvofiq chet el valyutasidagi mablagʻlardan foydalanish tartibi va ularni hisobvaraqqa hisoblab yozilishi va oʻchirilishining asosliligi, shuningdek, amaldagi qonunchilikka muvofiq chet el valyutasida olingan tushumning bir qismi majburiy tartibda sotilganligiga alohida eʼtibor beriladi.

4.5. Yuridik va jismoniy shaxslar tomonidan chet el banklarida ochilgan hisobvaraqlarga Oʻzbekiston Respublikasi Markaziy banki ruxsatisiz mablagʻlarning hisoblab yozilishi ularni yashirish deb hisoblanadi.

4.6. Yuridik va jismoniy shaxslar chet el valyutasidagi tushumni yashirgan hollarda Oʻzbekiston Respublikasi Markaziy banki, Tashqi iqtisodiy aloqalar agentligi, moliya va soliq organlari tomonidan oʻz vakolatlari doirasida quyidagi jazo choralari qoʻllaniladi:

— barcha operatsiyalarni chet el valyutasida amalga oshirishga ruxsat beruvchi litsenziyalarni qaytarib olish;

— Oʻzbekiston Respublikasi qonunchiligiga binoan belgilangan miqdorda moliyaviy jazo choralarini qoʻllash va maʼmuriy jarima solish;

— tartibbuzarliklarga yoʻl qoʻygan yoki valyuta nazorati va tartibga solish meʼyorlariga rioya qilinishi uchun tegishli chora-tadbirlarni qoʻllamagan mansabdor shaxslarni amaldagi qonunchilikka muvofiq javobgarlikka tortish.

4.7. Oʻzbekiston Respublikasi Markaziy banki arizachilar tomonidan amaldagi qonunchilikni buzish hollariga yoʻl qoʻyilganligi aniqlanganda va chet eldagi hisobvaraqlar boʻyicha mablagʻlarning harakati toʻgʻrisidagi maʼlumotlar oʻz vaqtida taqdim etilmaganda Tashqi iqtisodiy aloqalar agentligi, Moliya vazirligi va Davlat soliq qoʻmitasi bilan kelishgan holda berilgan ruxsatnomani bekor qilish huquqiga ega.