O‘zbekiston Respublikasi Prezidentining “Qishloq xo‘jaligi tovar ishlab chiqaruvchilari uchun yagona yer solig‘ini joriy etish to‘g‘risida” 1998-yil 10-oktabrdagi PF-2086-son Farmonini bajarish yuzasidan Vazirlar Mahkamasi qaror qiladi:

2. Belgilansinki, yagona yer solig‘i:

o‘rmonchilik, baliq ovlash, ovchilik xo‘jaliklariga;

ular uchun soliq solishning amaldagi tartibi saqlanib qoladigan mustaqil yuridik shaxslar hisoblanmagan yordamchi qishloq xo‘jaliklariga;

“Dehqon xo‘jaligi to‘g‘risida”gi O‘zbekiston Respublikasi Qonuni bilan nazarda tutilgan soliq solish shartlari saqlanib qoladigan dehqon xo‘jaliklariga tatbiq etilmaydi.

3. Yagona yer solig‘i to‘lovchilar quyidagi tartibda budjetga bir yilda uch marta soliq to‘laydi:

hisobot yilining 1-iyuligacha — yillik soliq summasining kamida 20 foizini;

hisobot yilining 1-sentabrigacha — yillik soliq summasining kamida 30 foizini;

hisobot yilining 1-dekabrigacha — soliqning qolgan summasini to‘laydi.

4. Agar qishloq xo‘jaligi tovar ishlab chiqaruvchilari — yagona yer solig‘i to‘lovchilar qishloq xo‘jaligi mahsulotlari yetishtirish va o‘zi ishlab chiqargan qishloq xo‘jaligi mahsulotlarini qayta ishlash bilan birga faoliyatning boshqa turlari bilan shug‘ullansalar ular alohida hisob-kitob yuritishlari va faoliyatning boshqa turlari bo‘yicha soliq to‘lovchilarning mazkur toifasi uchun amaldagi qonun hujjatlarida nazarda tutilgan soliqlarni to‘lashlari shart.

Yer qishloq xo‘jaligi tovar ishlab chiqaruvchilari tomonidan ijaraga berilgan taqdirda ijaraga beruvchida ijaraga berilgan yer bo‘yicha yagona yer solig‘i to‘lash majburiyati saqlanib qoladi.

5. O‘zbekiston Respublikasi Moliya vazirligi va Davlat soliq qo‘mitasi bir hafta muddatda Yagona yer solig‘ini hisoblab chiqish va to‘lash tartibi to‘g‘risidagi yo‘riqnomani ishlab chiqsinlar va belgilangan tartibda tasdiqlasinlar.

6. O‘zbekiston Respublikasi Yer resurslari davlat qo‘mitasi sug‘oriladigan yerlarda tuproq kartalariga tuzatish kiritish, tuproq bonitirovkasini aniqlash va yerni qiymat jihatidan baholash bo‘yicha dala ishlarini 1999-yilda yakunlasin.

O‘zbekiston Respublikasi Moliya vazirligi tuproq kartalariga tuzatish kiritish, tuproq bonitirovkasini aniqlash va sug‘oriladigan yerlarni qiymat jihatidan baholash bo‘yicha ishlarni O‘zbekiston Respublikasi Yer resurslari davlat qo‘mitasining hisob-kitoblariga muvofiq mablag‘ bilan ta’minlasin.

7. Mazkur qarorning bajarilishini nazorat qilish Bosh vazirning o‘rinbosari B.S. Hamidov zimmasiga yuklansin.