Vazirlar Mahkamasi qayd etadiki, “Qishloq xoʻjaligi korxonalarini sanatsiya qilish toʻgʻrisida”gi Oʻzbekiston Respublikasining Qonuniga muvofiq joriy yilda 104 ta past rentabelli va zarar koʻrib ishlayotgan qishloq xoʻjaligi korxonalarini sanatsiya qilish chora-tadbirlari amalga oshirildi.

Sanatsiya qilinayotgan xoʻjaliklar faoliyatini baholashning dastlabki natijalari shundan dalolat beradiki, ulardan koʻpchiligi gʻalla va paxta yetishtirish hamda davlatga sotish yuzasidan belgilangan topshiriqlarni muvaffaqiyatli bajarishdi, ularda ishlab chiqarishni boshqarish darajasi oshdi, hisobga olish tizimi tartibga solindi, qishloq xoʻjaligi korxonalarining moliyaviy ahvoli mustahkamlandi. Ularning koʻpchiligi qishloq xoʻjaligi yilini foyda bilan yakunlashdi. Qishloq xoʻjaligidan 41 mingga yaqin ortiqcha ishchi kuchi boʻshatildi.

Qishloq xoʻjaligi korxonalarini sanatsiya qilish borasida toʻplangan ijobiy tajribani hisobga olib, shuningdek Qishloq xoʻjaligida iqtisodiy islohotlarni chuqurlashtirish dasturini amalga oshirishni davom ettirish va xoʻjaliklarning zarar koʻrib ishlashini bartaraf etish hamda ularning moliyaviy barqarorligini taʼminlash maqsadida Vazirlar Mahkamasi qaror qiladi:

1. Qishloq xoʻjaligi korxonalarini sanatsiya qilish boʻyicha Hukumat komissiyasining ilovaga* muvofiq zarar koʻrib ishlayotgan qishloq xoʻjaligi korxonalarini 1999-yildan boshlab qoʻshimcha sanatsiya qilish toʻgʻrisidagi taklifiga rozilik berilsin.

2. Qoraqalpogʻiston Respublikasi Vazirlar Kengashi, viloyatlar va tumanlar hokimlari “Qishloq xoʻjaligi korxonalarini sanatsiya qilish toʻgʻrisida”gi Oʻzbekiston Respublikasi Qonunining 20-moddasiga muvofiq Qishloq xoʻjaligi korxonalarini sanatsiya qilish boʻyicha Hukumat komissiyasi bilan kelishgan holda ilovada koʻrsatilgan sanatsiya qilinadigan qishloq xoʻjaligi korxonalarining tashqi boshqaruvchilarini belgilangan tartibda ikki hafta muddatda tayinlasinlar.

3. Hududiy komissiyalarga quyidagilar yuzasidan masʼuliyat yuklansin:

a) sanatsiya qilinadigan xoʻjaliklarning munosib rahbarlari — tashqi boshqaruvchilarini Hukumat komissiyasi bilan kelishgan holda tanlash va tayinlash;

b) sanatsiya qilish rejasini ishlab chiqish va Hukumat komissiyasiga taqdim etish, unda:

ekin maydonlarini, tuzilgan shartnomalarni, tovar-moddiy boyliklar qoldiqlarini, mol-mulkni, qurilishi tugallanmagan ishlab chiqarishlarni xatlovdan oʻtkazish hamda ortiqcha asosiy fondlar va moddiy boyliklarni sotishni;

debitorlik qarzlarni undirish tadbirlarini;

sanatsiya davrida moliyaviy sogʻlomlashtirish rejasi (biznes-reja)ni nazarda tutsin.

Mahalliy mehnat organlari bilan birgalikda, mahsulot birligi yetishtirish yuzasidan xarajatlar normativlaridan kelib chiqqan holda, xodimlarning cheklangan sonini belgilasin hamda ikki oy muddatda normativdan ortiqcha xodimlarni boʻshatsin.

4. “Paxta-bank”, “Mevasabzavotbank”, “Gʻalla-bank” hamda boshqa tijorat banklari:

tashqi boshqarishni amalga oshirish uchun maxsus schyotlar ochsinlar hamda sanatsiya qilinadigan qishloq xoʻjaligi korxonalarining budjet va budjetdan tashqari tashkilotlar bilan, tovar-moddiy boyliklar, bajarilgan ishlar va koʻrsatilgan xizmatlar uchun hisob-kitoblarini faqat maxsus schyotdan toʻlov topshiriqnomalari boʻyicha mahsulot yetishtirish yuzasidan normativ xarajatlar doirasida amalga oshirsinlar;

debitorlik qarzlarni undirishda sanatsiya qilinadigan qishloq xoʻjaligi korxonalariga koʻmaklashsinlar.

5. Ilovada koʻrsatilgan sanatsiya qilinadigan qishloq xoʻjaligi korxonalarining 1999-yil 1-yanvardagi holatiga koʻra toʻlov manbalari bilan taʼminlanmagan kreditorlik qarzlari Oʻzbekiston Respublikasi Moliya vazirligining tegishli vazirliklar va idoralarga imtiyozli foizsiz kreditga qayta rasmiylashtirilsin, ushbu kredit sanatsiya qilinadigan qishloq xoʻjaligi korxonalari tomonidan 2004-yildan boshlab 3 yil davomida teng ulushlarda toʻlanadi.

Kreditorlik qarzlarni qayta rasmiylashtirish “Oʻzkimyosanoat” uyushmasi, “Oʻzagrokimyotaʼminot”, “Oʻzneftmahsulot” birlashmalari, “Oʻzqishloqxoʻjaliktaʼminottuzatish” davlat-kooperativ qoʻmitasi, “Oʻzqishloqxoʻjalikmash-xolding” kompaniyasi, “Oʻzbekneftgaz” milliy xolding kompaniyasi, “Oʻzdavpaxtasanoatsotish” uyushmasi, “Oʻzdonmahsulot” korporatsiyasi, “Oʻzmevasabzavotuzumsanoat-xolding” kompaniyasi, “Oʻzbek ipagi” uyushmasi, “Oʻzavtotrans” korporatsiyasi, “Oʻzagrosugʻurta” kompaniyasi, Energetika vazirligi, Kommunal xizmat koʻrsatish vazirligi korxonalari va tashkilotlarining budjetga muddatida toʻlanmagan toʻlovlar boʻyicha qarzlari sanatsiya qilinayotgan qishloq xoʻjaligi korxonalarining koʻrsatib oʻtilgan idoralardan 1999-yil 1-yanvardagi holatiga koʻra kreditorlik qarzi miqdoridagi kredit summasiga hisobdan chiqarilgan holda amalga oshirilsin.

6. Sanatsiya qilinadigan qishloq xoʻjaligi korxonalarining:

1999-yil 1-yanvardagi holatiga koʻra budjetga muddatida toʻlanmagan toʻlovlari, shu jumladan penya, 2001-yilgacha kechiktirilsin. Toʻlov muddati kechiktirilgan qarzlar bu korxonalar tomonidan 2001-yilda toʻlanadi;

Pensiya jamgʻarmasi, Ish bilan taʼminlashga koʻmaklashish jamgʻarmasi va Yoʻl jamgʻarmasidan penya qoʻshilmagan holdagi qarzlarini toʻlash 2001-yilgacha kechiktirilsin, keyinchalik ular 2002-yildan boshlab 3 yil davomida teng ulushlarda toʻlanadi.

Tijorat banklari sanatsiya qilinadigan korxonalar qarzlarini Oʻzbekiston Respublikasi Moliya vazirligi kreditiga qayta rasmiylashtirish operatsiyalari oʻtkazilishi va ularning qaytarilishi, Oʻzbekiston Respublikasi Moliya vazirligi, Pensiya jamgʻarmasi, Ish bilan taʼminlashga koʻmaklashish jamgʻarmasi, Ijtimoiy sugʻurta jamgʻarmasi va Yoʻl jamgʻarmasi bilan tuzilgan shartnomalar boʻyicha qarzlarning qaytarilishi va ularning muddati kechiktirilishi ustidan qattiq nazoratni taʼminlasinlar.

7. “Oʻzagrosugʻurta” davlat-aksiyadorlik sugʻurta kompaniyasi:

sanatsiya qilinadigan qishloq xoʻjaligi korxonalari oldida 1999-yil 1-yanvargacha vujudga kelgan sugʻurta toʻlovlari boʻyicha qarzlarni 1999-yil 1-aprelgacha toʻlasin;

sanatsiya qilinadigan qishloq xoʻjaligi korxonalarining 1999-yil 1-yanvardagi holatiga koʻra vujudga kelgan sugʻurta toʻlovlari boʻyicha qarzlarini hisobdan chiqarsin;

sanatsiya qilinadigan xoʻjaliklarga majburiy sugʻurta bilan bir qatorda xoʻjaliklarni ixtiyoriy sugʻurtalashni taʼminlashni tavsiya etsin.

8. Oʻzbekiston Respublikasi Qishloq va suv xoʻjaligi vazirligi sanatsiya qilinadigan xoʻjaliklar yonidan oʻtuvchi xoʻjaliklararo kollektor-drenaj tizimlari ahvolini bir oy muddatda tekshirib chiqsin hamda 1999-yilga ajratilgan mablagʻlar doirasida ularni tozalashni nazarda tutsin.

9. Oʻzbekiston Respublikasi Energetika va elektrlashtirish vazirligi, Kommunal xizmat koʻrsatish vazirligi hamda Qishloq va suv xoʻjaligi vazirligi aholi 1999-yil 1-yanvargacha foydalangan elektr energiyasi va gaz uchun bevosita xoʻjaliklar aholisi tomonidan ikki oy mobaynida haq toʻlanishini taʼminlasinlar.

10. “Oʻzdavpaxtasanoatsotish” uyushmasi sanatsiya qilinadigan qishloq xoʻjaligi korxonalarining 1998-yil hosilidan tayyorlangan paxta xomashyosini qayta ishlashni 1999-yil 1-martgacha tugallasin hamda xoʻjaliklar ixtiyorida qoladigan paxta xomashyosi va paxta tolasi uchun uzil-kesil hisob-kitob qilsin.

11. Qoraqalpogʻiston Respublikasi Vazirlar Kengashi va viloyatlar hokimliklari xususiylashtirilgan chorvachilik fermalarining, ijaraga berilgan bogʻlar, uzumzorlar, issiqxonalar va boshqa obyektlarning ahvolini oʻrganib chiqsinlar hamda sanatsiya qilinadigan xoʻjaliklarning iqtisodiy manfaatlariga zarar yetkazilgan hollarda shartnomalarni qayta koʻrib chiqish yuzasidan belgilangan tartibda tegishli qarorlar qabul qilsinlar.

12. Oʻzbekiston Respublikasi Mehnat vazirligi Qoraqalpogʻiston Respublikasi Vazirlar Kengashi, viloyatlar hokimliklari, manfaatdor vazirliklar, idoralar bilan birgalikda boʻshab qoladigan xodimlarni ishga joylashtirish dasturini ishlab chiqsin va tasdiqlasin, ushbu maqsadlar uchun korxonalar, aholi, Ish bilan taʼminlashga koʻmaklashish jamgʻarmasi va “Biznes-fond” mablagʻlarini jalb etsin.

13. Mazkur qaror bilan belgilangan qishloq xoʻjaligi korxonalarining sanatsiya qilinishi uchun shaxsiy javobgarlik Qoraqalpogʻiston Respublikasi Vazirlar Kengashi raisi, viloyatlar va tumanlar hokimlari zimmasiga yuklansin.

14. Korxonalar bankrotligi va sanatsiyasi masalalari boʻyicha Hukumat komissiyasi:

Qishloq va suv xoʻjaligi vazirligi bilan birgalikda 1999-yil 1-yanvargacha manfaatdor vazirliklar va idoralarning masʼul xodimlaridan ishchi guruhlar tashkil etsin va ularni tashkiliy-tushuntirish ishlarini oʻtkazish uchun sanatsiya qilinadigan qishloq xoʻjaligi korxonalariga yuborsin;

1999-yil birinchi choragidan boshlab har chorakda sanatsiya qilinadigan qishloq xoʻjaligi korxonalarini moliyaviy sogʻlomlashtirish dasturlarining bajarilishini tahlil qilsin hamda hisobot oyidan keyingi oyning 20 kunidan kechiktirmasdan Vazirlar Mahkamasiga axborot bersin.

15. “Oʻzteleradio” kompaniyasi, Oʻzbekiston Respublikasi Davlat matbuot qoʻmitasi Qishloq va suv xoʻjaligi vazirligi, boshqa manfaatdor vazirliklar va idoralar bilan birgalikda qishloq xoʻjaligi korxonalarini sanatsiya qilishni yoritishga doir maxsus eshittirishlar va ruknlar tashkil etsinlar.

16. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari, Qishloq xoʻjaligi korxonalarini sanatsiya qilish boʻyicha Hukumat komissiyasi raisi B.S. Hamidov zimmasiga yuklansin.