Халқ депутатлари Зарбдор тумани Кенгашининг 2026 йил 5 мартдаги VII-23-33-3-49-К/26-сонли қарори билан туманда 2026 йил учун алкоголь маҳсулотларини реализация қилиш ҳуқуқи ҳамда умумий овқатланиш корхоналари томонидан алкоголь маҳсулотларини реализация қилиш учун йиғимларнинг чекланган ставкаларини 20 фоизга ошириш белгиланган бўлиб, бу орқали тадбиркорлар зиммасига янги мажбурият юклатилган.

Ўзбекистон Республикасининг «Норматив-ҳуқуқий ҳужжатлар тўғрисида»ги Қонуни 40-моддаси 2-қисмига мувофиқ тадбиркорлик фаолиятини амалга ошириш тартиб-таомили мураккаблаштирилишини ва тадбиркорлик фаолияти субъектлари зиммасига янги мажбуриятлар юклатилишини назарда тутадиган, шунингдек уларнинг жавобгарлигига оид янги чораларни белгилайдиган норматив-ҳуқуқий ҳужжатлар расмий эълон қилинган кундан эътиборан камида уч ойдан кейин кучга киради.

Юқоридагилардан келиб чиқиб, «Маҳаллий давлат ҳокимияти тўғрисида»ги Ўзбекистон Республикаси Қонунининг 6- ва 24-моддаларига асосан халқ депутатлари Зарбдор тумани Кенгаши қарор қилади:

1. Ўзбекистон Республикаси Олий Мажлиси Сенатининг Маҳаллий ҳокимият вакиллик органлари фаолиятини кучайтиришга кўмаклашувчи комиссиясининг 2026 йил 6 апрелдаги 22-06/1371-сонли хати ҳамда март ойи мониторинг натижалари маълумот ва ижро учун қабул қилинсин.

2. Халқ депутатлари Зарбдор туман Кенгашининг 2026 йил 5 мартдаги VII-23-33-3-49-K/26-сонли қарорининг 5-банди қуйидаги таҳрирда баён этилсин:

«5. Ушбу қарор расмий эълон қилинган кундан эътиборан уч ойдан кейин кучга киради.»

3. Ушбу қарор бажарилишини назорат қилиш халқ депутатлари туман Кенгашининг Маҳаллий бюджет, тадбиркорликни ривожлантириш ва иқтисодий ислоҳотлар масалалари бўйича доимий комиссияси (Т. Қодиров) зиммасига юклатилсин.