Respublika huquqni muhofaza qiluvchi idoralari tomonidan oʻtkazilgan tekshirishlar joylardagi hokimliklar va bozor rahbarlarining loqaydligi tufayli Respublika Prezidentining “Bozorlarning faoliyatini tashkil etishni va aholiga xizmat koʻrsatish sifatini yaxshilashga doir qoʻshimcha chora-tadbirlar toʻgʻrisida” 1996-yil 5-martdagi Farmoni, Vazirlar Mahkamasining “Bozorlarning faoliyatini va ularni boshqarishni tartibga solish chora-tadbirlari toʻgʻrisida” 1996-yil 5-martdagi 82-son qarori hamda “Bozorlardan foydalanishdan tushadigan daromadlarni shakllantirish, taqsimlash va ulardan foydalanish tartibi toʻgʻrisida nizom” ijrolari qoniqarsiz tashkil qilinganligini koʻrsatmoqda.

Ilgaridek, Toshkent shahri, Qoraqalpogʻiston Respublikasi va viloyatlar bozorlarida dehqon va fermyerlarga yetishtirilgan mahsulotlarini sotish uchun zarur sharoitlar yaratilmagan. Olibsotarlar, turli jinoiy tizimlar hamda bozorlar maʼmuriyati xodimlari va rahbarlarining oʻzlari tomonidan tovlamachilik, qonunsiz yigʻimlar, tazyiq oʻtkazish holatlari oʻrin olib kelmoqda.

Mahsulot yetkazib beruvchilar bilan bevosita shartnomalarni tuzish, qishloq xoʻjaligi mahsulotlarini bozorlarga olib kelish, saqlash va qoʻriqlash masalalari tashkil qilinmagan.

Qoraqalpogʻiston Respublikasi Vazirlar Kengashi va viloyatlar hokimliklari tomonidan bozor rahbarlari lavozimlariga halol, sof vijdonli odamlarni tanlash masalalari oʻz holiga tashlab qoʻyilgan. Koʻpincha bu lavozimlarda oʻz mansabiga tekin boylik va daromad orttirish vositasi sifatida qarovchi tasodifiy odamlar qolmoqda.

Bozorlar faoliyatidan tushadigan mablagʻ va daromadlar nazoratsiz tasarruf etilmoqda va oʻzlashtirilmoqda.

Buxoro, Andijon viloyatlari, Toshkent shahri bozorlarini aksiyadorlik jamiyatlariga aylantirish hamon paysalga solinib, chiqarilgan aksiyalarning koʻp qismi sotilmay qolmoqda.

Qoraqalpogʻiston Respublikasi, Fargʻona, Andijon viloyatlaridagi bozorlar rahbarlarining masʼuliyatsizligi oqibatida xoʻjaliklar, fermyerlar va aholi bilan fyuchers shartnomalarini tuzish va ularning ijrosini taʼminlash sust amalga oshirilayotir.

Dehqon bozorlarida qishloq xoʻjaligi mahsulotlarini olib-sotish, valyutafurushlik, spirtli ichimlik va tamaki mahsulotlarini gʻayriqonuniy sotish, firibgarlik va boshqa jinoyatlarning kamayishiga hanuzgacha erishilmagan.

Yuqorida koʻrsatib oʻtilgan jiddiy kamchiliklarni bartaraf etish maqsadida Vazirlar Mahkamasi qaror qiladi:

1. Qoraqalpogʻiston Respublikasi Vazirlar Kengashi raisi, viloyatlar hokimliklari va Toshkent shahar hokimi hamda Respublika Prokuraturasi, Ichki ishlar vazirligi, Davlat soliq qoʻmitasi va ularning joylardagi idoralarining yuqorida qayd etilgan Oʻzbekiston Respublikasi Prezidentining Farmoni va Vazirlar Mahkamasining qarorini bajarish, respublika bozorlarida zarur tartib oʻrnatish borasidagi ishlari qoniqarsiz deb hisoblansin. Ular ishning ushbu sohasi uchun shaxsan masʼul ekanliklari haqida ogohlantirilsin.

2. Qoraqalpogʻiston Respublikasi Vazirlar Kengashi raisi, viloyatlar, Toshkent shahri hokimlari zimmasiga:

bozorlar faoliyatini tashkil qilishda masʼuliyatsizlikka yoʻl qoʻygan tuman, shahar hokimlarini intizomiy javobgarlikka tortish;

ikki hafta muddatda dehqon bozorlari rahbarlarini attestatsiyadan oʻtkazish yuzasidan komissiya tuzish;

bozorlarning layoqatsiz, nopok rahbarlarini oʻz vazifalaridan ozod qilish, ularning bozor maʼmuriyatlaridagi boshqa lavozimlarda qolishiga yoʻl qoʻymaslik;

bozorlarni obodonlashtirish yuzasidan qoʻshimcha chora-tadbirlarni amalga oshirish;

aholini qishloq xoʻjaligi, chorvachilik mahsulotlari va boshqa keng isteʼmol tovarlari bilan taʼminlash, bozor maʼmuriyatlari xodimlari oʻrtasida intizomni mustahkamlash yuzasidan qatʼiy choralar koʻrish yuklansin.

3. Koʻrilgan choralar haqida bir oy muddatda Oʻzbekiston Respublikasi Vazirlar Mahkamasiga axborot berilsin.

4. Oʻzbekiston Respublikasi Prokuraturasi (B. Mustafoyev), Ichki ishlar vazirligi (Z. Almatov) va Davlat soliq qoʻmitasi (V. Beganov)ga bozorlar faoliyatini tashkil qilish ustidan nazoratni yanada kuchaytirish, aniqlangan qonunbuzarliklar yuzasidan aybdor mansabdor shaxslarga nisbatan jinoiy javobgarlikkacha boʻlgan qattiq choralar koʻrish topshirilsin.

5. Oʻzbekiston Respublikasi Adliya vazirligi (S. Mirsafoyev), Oliy xoʻjalik sudi (M. Abdusalomov) bozor maʼmuriyatlari tomonidan mahsulot yetkazib berish haqida tuziladigan shartnomalarning sifati va samaradorligini oshirish yuzasidan amaliy tadbirlar koʻrsinlar.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I. Joʻrabekov zimmasiga yuklansin.