Ўзбекистон Республикаси Президентининг 2019 йил 8 октябрдаги ПФ-5847-сон «Ўзбекистон Республикаси олий таълим тизимини 2030 йилгача ривожлантириш концепциясини тасдиқлаш тўғрисида»ги ва 2025 йил 5 майдаги ПФ-78-сон «Истиқболли кадрларни мақсадли тайёрлаш ҳамда уларни давлат бошқаруви ва хизматига самарали жалб этиш тизимини янада такомиллаштириш чора-тадбирлари тўғрисида»ги фармонларига мувофиқ буюраман:

1. Ўзбекистон Республикаси олий ва ўрта махсус таълим вазирининг 2015 йил 30 октябрдаги 9-2015-сон буйруғи (рўйхат рақами 2734, 2015 йил 26 ноябрь) (Ўзбекистон Республикаси қонун ҳужжатлари тўплами, 2015 й., 47-сон, 604-модда) билан тасдиқланган Олий таълим ташкилотлари магистратура мутахассисликлари талабалари томонидан стажировкани ўташ тартиби тўғрисидаги низомга иловага мувофиқ ўзгартириш ва қўшимчалар киритилсин.

2. Мазкур буйруқ расмий эълон қилинган кундан эътиборан кучга киради.

1. Муқаддима қуйидаги таҳрирда баён этилсин:

«Мазкур Низом олий таълим ташкилотлари (бундан буён матнда ОТМ деб юритилади) магистратура мутахассисликлари талабалари (бундан буён матнда магистратура талабаси деб юритилади) томонидан стажировка ўташ тартибини белгилайди.».

2. 2-банднинг иккинчи хатбошисидаги «Давлат бошқаруви академияси» деган сўзлар «Давлат сиёсати ва бошқаруви академияси» деган сўзлар билан алмаштирилсин.

3. 35-банднинг иккинчи хатбошисидаги «ёзма равишда» деган сўзлар «ёзма ёки электрон равишда» деган сўзлар билан алмаштирилсин.

4. 44-банддаги «ёзма равишда» деган сўзлар «ёзма ёки электрон равишда» деган сўзлар билан алмаштирилсин.

5. 48-банддаги «ёзма равишда» деган сўзлар «ёзма ёки электрон равишда» деган сўзлар билан алмаштирилсин.

6. 58-бандда:

иккинчи хатбошидаги «қониқарсиз баҳо қўйилганда,» деган сўзлар «60 ва ундан кам балл тўплаган ҳолларда магистратура талабасининг билими «қониқарсиз» деб баҳоланади ҳамда» деган сўзлар билан алмаштирилсин;

учинчи хатбоши чиқариб ташлансин.

7. Қуйидаги мазмундаги 58¹ — 58⁸-бандлар билан тўлдирилсин:

«58¹. Магистратура талабасининг апелляция шикоятларини кўриб чиқиш учун ОТМ раҳбарининг қарори билан ушбу ташкилот тизимининг камида беш нафар мутахассисларидан иборат таркибда Апелляция комиссияси ташкил этилади.

Бунда, Апелляция комиссияси таркибига бошқа давлат органлари ва ташкилотларидан ҳам мутахассислар келишув асосида жалб этилиши мумкин.

Стажировка бўйича ҳисобот ҳимояси комиссия аъзосининг Апелляция комиссияси таркибига киритилишига йўл қўйилмайди.

58². Стажировка бўйича ҳисобот ҳимояси комиссияси қароридан норози бўлган магистратура талабаси натижалар эълон қилинган кундан бошлаб бир ой ичида Апелляция комиссиясига ёзма ёки электрон шаклда апелляция шикояти беришлари мумкин.

Бунда, Апелляция комиссияси апелляция шикояти билан мурожаат қилган магистратура талабасини шикоят кўриб чиқилишидан икки кун олдин уни кўриб чиқиш вақти ва жойи ҳақида огоҳлантиради.

58³. Апелляция комиссияси апелляция шикоятини, у келиб тушган кундан бошлаб беш кун муддат ичида кўриб чиқади. Бунда, апелляция шикояти билан мурожаат қилган магистратура талабаси мазкур шикоятни кўриб чиқишда иштирок этиш ҳуқуқига эга.

58⁴. Апелляция комиссияси унда аъзоларнинг камида учдан икки қисми иштирок этганда ваколатли ҳисобланади. Апелляция комиссиясининг қарори оддий кўпчилик овоз билан қабул қилинади ва мажлисда иштирок этган барча аъзолар томонидан тасдиқланадиган баённома билан расмийлаштирилади.

Берилган овозлар сони тенг бўлиб қолган тақдирда, Апелляция комиссияси раисининг овози ҳал қилувчи ҳисобланади.

58⁵. Апелляция комиссияси томонидан апелляция шикоятини кўриб чиқиш давомида магистратура талабасига уни қайта баҳолашга қаратилган саволлар берилишига йўл қўйилмайди.

58⁶. Шикоятни кўриб чиқиш натижалари бўйича Апелляция комиссияси томонидан қуйидаги қарорлардан бири қабул қилинади:

магистратура талабаси натижаларини ўзгаришсиз қолдириш;

магистратура талабаси натижаларига ўзгартириш киритиш ва уни стажировкадан ўтган деб топиш.

58⁷. Апелляция комиссияси апелляция шикояти билан мурожаат қилган магистратура талабасига ўз қарорини у қабул қилинган куннинг ўзида маълум қилиши керак.

58⁸. Апелляция комиссияси қарори устидан магистратура талабаси юқори турувчи органга ёки судга шикоят қилиши мумкин.».