Ўзбекистон Республикаси Президентининг 2024 йил 5 январдаги «Қуйи бўғинда сув ресурсларини бошқариш тизимини такомиллаштириш ҳамда сув ресурсларидан фойдаланиш сармарадорлигини ошириш чора-тадбирлари тўғрисида»ги ПҚ-5-сонли қарори ҳамда 2025 йил суғориш мавсуми учун сув олиш лимитларини қайта тасдиқлаш ҳақида белгиланган вазифалар ижросини таъминлаш мақсадида тумандаги бир қатор фермер хўжаликлари томонидан суғориш мавсумида лимитга нисбатан ортиқча сув ҳажмларидан фойдаланилган.

Туман «Сув етказиб бериш хизмати» давлат муассасаси томонидан 2151 та истеъмолчиларнинг 30,4 минг гектар суғориладиган ер майдонларига жами 156,8 млн м³ сув етказиб берилган бўлиб, шундан 127 та сувдан фойдаланувчиларга суғориш мавсумида 34,6 млн м³ лимит белгиланган бўлсада, амалда 59,0 млн м³ сув фойдаланилиши натижасида белгиланган лимитдан жами 24,5 млн м³ сув ошиқча сарфланган.

Туман «Сув етказиб бериш хизмати» давлат муассасаси томонидан 2025 йил вегетация даврида суғориш ишлари учун жами 171,8 млн м³ сув лимити ажратилган бўлиб, шундан Жанубий Мирзачўл Магистрал канали ва марказий чап тармоғидан 87,86 млн м³, ЛР-12 каналидан 49,38 млн м³, ПР-12-4-каналидан 31,55 млн м³, зовур сувларидан 3,0 млн м³ сув лимитларини ажратилиб, суғориш учун сув олиш лимитларини ҳудудлар бўйича тасдиқланган лимит доирасида ишлаб чиқилган.

Ўзбекистон Республикаси «Маҳаллий давлат ҳокимияти тўғрисида»ги қонунининг 6 ва 24-моддаларига мувофиқ халқ депутатлари туман Кенгаши қарор қилади:

1. Ўзбекистон Республикаси Президентининг 2024 йил 5 январдаги «Қуйи бўғинда сув ресурсларини бошқариш тизимини такомиллаштириш ҳамда сув ресурсларидан фойдаланиш самарадорлигини ошириш чора-тадбирлари тўғрисида»ги ПҚ-5-сонли қарори ижро учун қабул қилинсин.

2. 2025 йилда тумандаги бир қатор фермер хўжаликлари томонидан суғориш мавсумида лимитга нисбатан ортиқча сув ҳажмларидан фойдаланилганлиги сабабли халқ депутатлари туман Кенгашининг 2025 йил 1 майдаги «Арнасой тумани бўйича 2025 йил вегетация даврида суғориш ишлари учун ажратилган сув лимитини тасдиқлаш тўғрисида»ги VII-7-85-3-43-K/25-сонли қарорининг иловасига ўзгартириш киритиш бўйича «Сув етказиб бериш хизмати» давлат муассасаси раҳбари Х. Эшонқуловнинг таклифи маъқуллансин ва иловага мувофиқ тасдиқлансин.

3. «Сув етказиб бериш хизмати» давлат муассасаси (Х. Эшонқулов)га:

Ўзбекистон Республикаси Президентининг 2024 йил 5 январдаги ПҚ-5-сонли қарори асосида ишларни ташкил этиш;

белгиланган лимитлар асосида истеъмолчиларга сув етказиб бериш;

ўзига бириктирилган ҳудудда сувнинг ҳисоби ва ҳисоботини юритиш;

суғориш тармоқлари ва улардаги гидротехник иншоотларни соз ҳолатда сақлаш, таъмирлаш-тиклаш тадбирларини амалга ошириш;

сув олиш жойларини сувни бошқариш ва ҳисобга олиш воситалари билан жиҳозлаш, сув мониторинги, ҳисоби ва ҳисоботи юритилишини рақамлаштириш;

истеъмолчилар кесимида истеъмол қилинган сув ҳажми тўғрисидаги маълумотларни солиқ органларига тақдим этиб бориш;

сув истеъмолчиларининг буюртманомаси асосида бошқа сув хўжалиги хизматларини кўрсатиш;

амалга оширилган ишлар юзасидан халқ депутатлари туман Кенгашига ҳисоботларни ўз вақтида бериб бориш вазифалари юклатилсин.

4. Қарор расмий нашрларда эълон қилинган кундан бошлаб кучга киради.

5. Мазкур қарор «Арнасой тонги» газетасида расман эълон қилинсин ҳамда туман ҳокимлигининг расмий веб-сайтига жойлаштирилсин.

6. Ушбу қарорнинг ижросини назорат қилиш туман Кенгашининг аграр, сув хўжалиги, экология ҳамда саноат, қурилиш, коммунал соҳа ва аҳолига хизмат кўрсатиш масалалари бўйича доимий комиссияси ва туман ҳокимининг қишлоқ ва сув хўжалиги масалалари бўйича ўринбосари Х. Суяров зиммасига юклансин.