Angren kaolinlari negizida respublikaning eksport imkoniyatlarini kengaytirish va yuqori sifatli xalq isteʼmol tovarlari hamda binokorlik materiallari ishlab chiqarishni koʻpaytirish maqsadida Vazirlar Mahkamasi qaror qiladi:

1. Koʻmir qazib olish va sotish aksionerlik birlashmasi (“Koʻmir” aksionerlik birlashmasi)ning yiliga 0,4 mln tonna boyitilgan kaolin ishlab chiqarish quvvatiga ega boʻlgan kaolin boyitish fabrikasi qurish, uni 1996-yilda, shu jumladan uning birinchi navbatini 1995-yil oxirigacha ishga tushirish toʻgʻrisidagi taklifi qabul qilinsin.

2. “Koʻmir” aksionerlik birlashmasi:

bir oy muddatda investitsiya loyihasini ishlab chiqsin va uni Oʻzbekiston Respublikasi Tashqi iqtisodiy aloqalar vazirligi va Tashqi iqtisodiy faoliyat milliy bankiga ekspertiza uchun taqdim etsin;

investitsiya loyihasi ekspertizasi olingandan keyin ikki hafta muddatda fabrikaning boyitish boʻlinmasi uchun asbob-uskunalar va texnologiya yetkazib berish toʻgʻrisida Shveysariyaning “Mabeteks” firmasi bilan kontrakt tuzsin.

3. “Koʻmir” aksionerlik birlashmasining birlashma:

kaolin boyitish fabrikasi qurilishini mablagʻ bilan taʼminlashni 10 foiz miqdorida oʻz mablagʻlari hisobidan va 90 foizini kreditlar hisobiga amalga oshirishi;

“Mabeteks” firmasi kreditini va foizlar toʻlashni kaolinni xorijiy sheriklarga eksport qilishdan olingan tushum hisobidan taʼminlashi toʻgʻrisidagi taklifiga rozilik berilsin.

4. Pul-kredit siyosati boʻyicha komissiya fabrika qurilishi, Maydalash-elash boʻlinmasi uchun asbob-uskunalar va materiallar sotib olish uchun kredit ajratilishini nazarda tutsin.

5. “Koʻmir” aksionerlik birlashmasiga kreditlar va ular boʻyicha foizlar toʻlangunga qadar boyitilgan kaolinni 100 foizgacha eksportga sotish huquqi berilsin.

6. “Oʻzistiqbolstat” davlat qoʻmitasi kaolin boyitish fabrikasi qurilishini 1995-yildan boshlab Oʻzbekiston Respublikasi Investitsiya Dasturiga kiritsin.

7. “Oʻzulgurjibirjasavdo” uyushmasi, “Oʻzqurilishmateriallari” konserni, “Oʻzmetkombinat” aksionerlik ishlab chiqarish birlashmasi fabrika qurilishi uchun “Koʻmir” aksionerlik birlashmasiga moddiy-texnika resurslari hamda MDH mamlakatlaridan asbob-uskunalar va maxsus materiallar yetkazib berishni shartnoma asosida amalga oshirsinlar.

8. Oʻzbekiston Respublikasi Moliya vazirligi “Mabeteks” firmasiga firma tomonidan kaolin boyitish fabrikasi qurilishi uchun ajratiladigan kredit hajmida Oʻzbekiston Respublikasi Hukumatining kafolatini bersin.

9. Bosh loyihalashtiruvchi funksiyasi – “Oʻzqurilishmateriallari” davlat konsernining “Qurilish-loyihalashtirish ilmiy-tadqiqot instituti;

bosh pudratchi funksiyasi – “Koʻmir” aksionerlik birlashmasining “Angrenkoʻmirqurilish” boshqarmasi;

ixtisoslashtirilgan montaj ishlari boʻyicha pudratchi funksiyasi “Oʻzmontajmaxsusqurilish” uyushmasi zimmasiga yuklansin.

10. “Oʻzbekiston havo yoʻllari” milliy aviakompaniyasi “Oʻzbekiston temir yoʻllari” davlat-aksionerlik kompaniyasi “Koʻmir” aksionerlik birlashmasi buyurtmanomalari boʻyicha yuklar mutaxassislar tashilishini muntazam taʼminlasinlar.

11. Oʻzbekiston Respublikasi Ichki ishlar vazirligi va Tashqi ishlar vazirligi:

“Koʻmir” aksionerlik birlashmasi va xorijiy firmalarning boyitish fabrikasi qurilishida band boʻlgan mutaxassislari uchun hujjatlari tezkorlik bilan rasmiylashtirilishini taʼminlasinlar;

xorijiy mutaxassislar va firmalar vakillarining mehmonxona va “Koʻmir” aksionerlik birlashmasining yotoqxonalarda joylashtirilishiga ruxsat bersinlar.

12. Oʻzbekiston Respublikasi Sogʻliqni saqlash vazirligi, Aloqa vazirligi, “Oʻzbeksavdo” uyushmasi, Toshkent viloyati, Toshkent va Angren shaharlari hokimliklari fabrika qurilishi qatnashchilarini shartnoma asosida tibbiy xizmat koʻrsatish, qoʻshimcha telefon va teleks aloqasi, oziq-ovqat va sanoat tovarlari bilan taʼminlash masalalarini hal etsinlar.

13. Mazkur qarorning bajarilishini nazorat qilish Bosh vazirning oʻrinbosarlari Q.J.Haqqulov, B.O.Hamidov, Oʻ.T.Sultonov zimmasiga yuklansin.