Ilgʻor texnologiyalar va chet el investitsiyalarini jalb etish yoʻli bilan qimmatbaho metallar ishlab chiqarishni koʻpaytirish maqsadida Vazirlar Mahkamasi qaror qiladi:

1. Oʻzbekiston Respublikasi Davlat geologiya va mineral resurslar qoʻmitasi hamda Navoiy kon-metallurgiya kombinatining “Lonro Pablik Limited” kompaniyasi (Buyukbritaniya) va Xalqaro Moliya Korporatsiyasi (XMK) bilan birgalikda “Amantaytau Goldfilds” korxonasini (bundan keyin qoʻshma korxona deb ataladi) tashkil etish toʻgʻrisidagi taklifi qabul qilinsin.

2. Qoʻshma korxona ustav fondidagi ulushlar: Oʻzbekiston tomoniniki-57 foiz, xorijiy qatnashchilarniki-43 foiz (shu jumladan, “Lonro Pablik Limited” kompaniyasiniki 35 foiz, Xalqaro Moliya Korporatsiyasiniki 8 foiz) miqdorida taqsimlangan yopiq turdagi aksionerlik kompaniyasi shaklida tashkil etilishiga rozilik berilsin.

Maʼlumot uchun qabul qilinsinki, qoʻshma korxonani tashkil qilish qatnashchilarning badallari hamda qoʻshma korxona tomonidan banklardan qatnashchilarning badallari hamda qoʻshma korxona tomonidan banklardan olingan kreditlar hisobiga amalga oshiriladi. Bunda Oʻzbekiston tomonining ulushi foydali qazilmalar konlarini qidirish, razvedka qilishga ilgari sarflangan xarajatlar hamda ularni qazib chiqarish huquqini qoʻshma korxonaga berish tarzida qoʻshiladi.

3. Belgilab qoʻyilsinki, quyidagilar qoʻshma korxonaning asosiy vazifalari hisoblanadi:

Amantaytau va Daugiztau oltin konlarini oʻzlashtirishning tijorat va texnikaviy jihatdan maqsadga muvofiqligini tasdiqlash hamda ulardan tijorat maqsadlarida keng koʻlamda foydalanishga oid texnikaviy va moliyaviy talablarni belgilash uchun texnik-iqtisodiy asoslash ishlarini tugallash;

tomonlar texnik-iqtisodiy asoslashni maʼqullanganlaridan keyin mazkur konlardan oltin, kumush va ular bilan birgalikda olinadigan foydali qazilmalarni qazib olish va ishlab chiqarish.

4. “Amantaytau Goldfilds” qoʻshma korxonasiga uni tashkil etish toʻgʻrisida 1993-yil 24-noyabrdagi shartnomada nazarda tutilgan quyidagi huquqlar berilsin:

shartnomada belgilangan chegaralar doirasida va shartlarda tadqiqotlar hududida 30 yil mobaynida oltin konlarini tadqiq etish, razvedka qilish va qazib chiqarish boʻyicha mutlaq huquq;

oltin konlaridan foydalanishda olingan oltin, kumush va boshqa mahsulotlarni ham chet ellarda, ham Oʻzbekiston Respublikasida jahon narxlarida erkin muomaladagi valyutaga sotish;

belgilangan tartibda Oʻzbekiston Respublikasi va chet el banklarida har qanday valyutada schyotlar ochish, chet el bank schyotlaridan chet valyutasi olish, undan foydalanish;

Oʻzbekiston Respublikasi qonunchiligiga muvofiq erkin muomaladagi valyutada kreditlar olish va ularni toʻlash, mazkur kreditlarni qoʻshma korxona mulki bilan taʼminlash;

Oʻzbekiston Respublikasi tashkilotlarida, shuningdek, chet ellarda sugʻurtani amalga oshirish;

Ustav sarmoyani AQSh dollarida belgilash.

5. “Amantaytau Goldfilds” loyihasi quyidagi soliq imtiyozi va boshqa imtiyozlar berilgan holda Oʻzbekiston Respublikasining Investitsiya dasturiga kiritilsin:

qoʻshma korxona Moliya vazirligida davlat roʻyxatidan oʻtkazilgan sanadan boshlab dastlabki besh yilda daromaddan olinadigan soliqni toʻlashdan ozod qilish. Qoʻshma korxonaga koʻrsatib oʻtilgan davr tugagan qoʻshma korxona koʻrgan zararlarni soliq toʻlanadigan bazani tegishli ravishda kamaytirgan holda zarar koʻrilgan yildan keyingi besh yilning istalgan yili mobaynida keyingi yillarga koʻchirishga ruxsat berish;

boj poshlinalari, mulk soligʻi toʻlashdan ozod qilish;

qoʻshma korxonaning xorijiy aksionyerlari va kreditorlarini dividendlarga soliqlar hamda kreditlar boʻyicha toʻlovlardan (ushbu mablagʻlarni chet elga oʻtkazishda) ozod qilish;

qoʻshma korxonani asosiy fondlar amortizatsiyasi uchun ajratmalar va boshqa toʻlovlar toʻlashdan ozod qilish.

6. Maʼlumotlar uchun qabul qilinsinki, qoʻshma korxona Oʻzbekiston Respublikasi qonunchiligida nazarda tutilgan ajratmalar va toʻlovlardan tashqari, davlat budjetiga quyidagi ajratmalar va toʻlovlarni toʻlaydi:

korxona daromaddan olinadigan soliqdan ozod qilingan davr mobaynida qoʻshma korxona qazib chiqarilgan foydali qazilmalarni sotishdan olgan umumiy tushum summasining (affinaj va sotish joyiga yetkazish, sugʻurta hamda sotish boʻyicha agentga odatdagi komissiya toʻlovi bilan bogʻliq xarajatlarni chegirib tashlagan holda) 2,5-foizi, soliqdan ozod qilingan davr tugagandan keyin esa 6 foizi miqdorida yer ostidan foydalanganlik uchun toʻlov (royalti toʻlovi). Agar bunday toʻlovlar qoʻshma korxonaning sof ishlab chiqarish boʻyicha zarar koʻrishiga olib kelsa, ularning miqdori kamaytirilishi, ammo bu 2,5-foizdan kam boʻlmasligi kerak. Yer ostidan foydalanganlik uchun toʻlov (royalti) renta toʻlovlariga tenglashtiriladi.

agar korxona daromaddan olinadigan soliqdan ozod qilingan davr tugagandan keyin moliya yili yakuni boʻyicha qoʻshma korxonaning rentabellik darajasi 30 foizdan oshsa, u holda ushbu darajadan ortiqcha foydadan tomonlar kelishgan stavkalar boʻyicha qoʻshimcha ajratmalar toʻlanadi;

qoʻshma korxona faoliyat koʻrsatayotgan joydagi hududni ijtimoiy rivojlantirishga sof foydadan ikki foiz toʻlov.

Qoʻshma korxona daromaddan olinadigan soliqni, yer ostidan foydalanganlik uchun toʻlovi, foydadan ortiqcha mablagʻdan va hududni ijtimoiy rivojlantirishga ajratmalarni, shuningdek, muassislarning dividentlarini erkin muomaladagi valyutada toʻlaydi.

7. Nazarda tutilsinki, Oʻzbekiston Respublikasida yaqin 10 yil mobaynida soliq qonunchiligida “Amantaytau Goldfilds” qoʻshma korxonasining faoliyat koʻrsatish sharoitlarini yomonlashtiruvchi oʻzgarishlar boʻlgan taqdirda taʼsis hujjatlari imzolangan vaqtda amalda boʻlgan qonunchilik va boshqa normativ hujjatlar qoʻllaniladi.

8. Oʻzbekiston Respublikasi Moliya vazirligi “Amantaytau Goldfilds” qoʻshma korxonasini yopiq turdagi aksionerlik jamiyati sifatida, Oʻzbekiston Respublikasi Tashqi iqtisodiy aloqalar vazirligi esa—qoʻshma korxonani tashqi iqtisodiy faoliyat qatnashchisi sifatida belgilangan tartibda roʻyxatdan oʻtkazsinlar.

9. Navoiy viloyati hokimligi qoʻshma korxonaning ishlab chiqarish va ijtimoiy maqsadlardagi obyektlarini qurish uchun belgilangan tartibda yer uchastkalari ajratilishini taʼminlasin.

10. Oʻzbekiston Respublikasi Tashqi ishlar vazirligi qoʻshma korxonaning xorijiy xizmatchilarini koʻp martalik vizalar bilan taʼminlasin.

11. Mazkur qarorning bajarilishini nazorat qilish Bosh vazirning tegishli oʻrinbosarlari zimmasiga yuklansin.