Qishloq xoʻjaligida iqtisodiy islohotlarni chuqurlashtirish boʻyicha tashkiliy huquqiy shart-sharoitlar yaratish, Yer kodeksi, “Qishloq xoʻjaligi kooperativi (shirkat xoʻjaligi) toʻgʻrisida”, “Fermer xoʻjaligi toʻgʻrisida”, “Dehqon xoʻjaligi toʻgʻrisida” Oʻzbekiston Respublikasi qonunlarini hamda Qishloq xoʻjaligi sohasidagi boshqa qonun hujjatlarini amalda roʻyobga chiqarish ustidan nazoratni kuchaytirish maqsadida Vazirlar Mahkamasi qaror qiladi:

1. Maʼlumot uchun qabul qilinsinki, Yer kodeksini, “Qishloq xoʻjaligi kooperativi (shirkat xoʻjaligi) toʻgʻrisida”, “Fermer xoʻjaligi toʻgʻrisida”, “Dehqon xoʻjaligi toʻgʻrisida” Oʻzbekiston Respublikasi qonunlarini hayotga tatbiq etish bilan bogʻliq normativ-huquqiy hujjatlarini tayyorlash boʻyicha Respublika komissiyasi tomonidan mulkiy paylarni joriy etish va Qishloq xoʻjaligi kooperativlarini tashkil qilish, mulkiy paylarni shakllantirish hamda ular boʻyicha dividentlar toʻlash mexanizmini yaratish, oilaviy (jamoa) pudratni keng joriy etish, fermer va dehqon xoʻjaliklarini yanada rivojlantirish asosida qishloq xoʻjaligi korxonalarini qayta oʻzgartirish shart-sharoitlarini va tartibini belgilab beruvchi hukumat normativ hujjatlari ishlab chiqilgan va qabul qilingan.

Oʻzbekiston Respublikasi Qishloq va suv xoʻjaligi vazirligi, “Oʻzmevasabzavotuzumsanoat xoldingi” kompaniyasi, “Oʻzgoʻshtsutsanoat” davlat uyushmasi, Qoraqalpogʻiston Respublikasi Vazirlar Kengashi, viloyatlar va tumanlar hokimliklari, qishloq xoʻjaligi korxonalari va tashkilotlari rahbarlari qishloq xoʻjaligida iqtisodiy islohotlarni chuqurlashtirishga doir qabul qilingan qonunlar va boshqa normativ hujjatlarning ogʻishmay amalga oshirilishini taʼminlasinlar.

Oʻzbekiston Respublikasi Qishloq va suv xoʻjaligi vazirligi, Adliya vazirligi va Davlat matbuot qoʻmitasi qishloq xoʻjaligida islohotlarni chuqurlashtirishga doir barcha qonun hujjatlari hamda nizomlar toʻplamini koʻplab nusxada nashr qilsinlar va uni barcha xoʻjaliklarga yetkazsinlar.

2. Qishloq xoʻjaligini isloh qilish sohasida qabul qilingan qonunlar va boshqa normativ hujjatlarning amalda roʻyobga chiqarilishini nazorat qilish hamda tashkiliy-uslubiy yordam koʻrsatish uchun qishloq xoʻjaligida iqtisodiy islohotlarni chuqurlashtirish Respublika komissiyasi 1-ilovaga* muvofiq tarkibda tuzilsin.

Respublika komissiyasi huzurida Oʻzbekiston Respublikasi Vazirlar Mahkamasi, Qishloq va suv xoʻjaligi vazirligi, Makroiqtisodiyot va statistika vazirligi, Davlat mulki qoʻmitasi va “Oʻzmevasabzavotuzumsanoat xoldingi” kompaniyasi xodimlaridan 5 kishidan iborat doimiy ishlovchi ishchi guruhi tuzilsin.

Oʻzbekiston Respublikasi Vazirlar Mahkamasining agrosanoat kompleksi, Qishloq va suv xoʻjaligi vazirligi, davlat mulki qoʻmitasi, “Oʻzmevasabzavotuzumsanoat xoldingi” kompaniyasi bir hafta muddatda ishchi guruhini tasdiqlangan shtatlar jadvali doirasida, guruh faoliyati koʻrsatadigan davrda ularning joriy xarajatlarini taʼminlagan holda yuqori malakali mutaxassislar bilan butlasin.

3. Qoraqalpogʻiston Respublikasi Vazirlar Kengashi va viloyatlar hokimliklari tegishli ravishda Qoraqalpogʻiston Respublikasi Vazirlar Kengashi raisining, viloyatlar hokimliklarining agrosanoat kompleksini rivojlantirish masalalari bilan shugʻullanuvchi birinchi oʻrinbosarlari raisligida qishloq xoʻjaligini isloh qilish boʻyicha hududiy komissiyalarni tuzsinlar.

4. Qishloq xoʻjaligida iqtisodiy islohotlarni chuqurlashtirish respublika komissiyasi toʻgʻrisida nizom 2-ilovaga muvofiq tasdiqlansin.

5. Respublika komissiyasi Qoraqalpogʻiston Respublikasi Vazirlar Kengashi, viloyatlar hokimliklari, Oʻzbekiston Respublikasi Qishloq va suv xoʻjaligi vazirligi va boshqa manfaatdor tashkilotlar bilan birgalikda 1998-yilda qishloq xoʻjaligi kooperativlari (shirkat xoʻjaliklari)ga aylantiriladigan jamoa xoʻjaliklarining aniq roʻyxati bir oy muddatda belgilansin.

6. Oʻzbekiston Respublikasi Vazirlar Mahkamasining 1998-yil 15-maydagi 212-son qarorining 1-bandi oʻz kuchini yoʻqotgan deb hisoblansin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari I. H. Joʻrabekov zimmasiga yuklansin.

1. Mazkur Nizom qishloq xoʻjaligida iqtisodiy islohotlarni chuqurlashtirish respublika komissiyasining funksiyalarini va faoliyat koʻrsatish tartibini belgilab beradi.

2. Qishloq xoʻjaligida iqtisodiy islohotlarni chuqurlashtirish respublika komissiyasi (keyingi oʻrinlarda Komissiya deb ataladi) oʻz faoliyatini Oʻzbekiston Respublikasi Yer kodeksiga, qishloqda agrar va iqtisodiy munosabatlarni isloh qilish sohasidagi qonunlar va boshqa meʼyoriy hujjatlarga soʻzsiz rioya etilishini nazorat qilish, qishloq xoʻjaligida iqtisodiy islohotlarni yanada chuqurlashtirish boʻyicha tashabbus koʻrsatish va takliflar tayyorlash maqsadida amalga oshiradi.

3. Komissiya oʻz faoliyatida Yer kodeksi, “Qishloq xoʻjaligi kooperativi (shirkat xoʻjaligi) toʻgʻrisida”, “Fermer xoʻjaligi toʻgʻrisida”, “Dehqon xoʻjaligi toʻgʻrisida”gi Oʻzbekiston Respublikasi qonunlariga, boshqa qonun hujjatlariga, Hukumat qarorlariga va mazkur Nizomga amal qiladi.

4. Komissiya oʻz vakolatlari doirasida qabul qilgan qarorlari davlat boshqaruvi organlari va mulkchilik shakllaridan qatʼi nazar, xoʻjalik yurituvchi subyektlar tomonidan bajarilishi majburiydir.

5. Quyidagilar Komissiyaning asosiy vazifalari hisoblanadi:

Yer kodeksi, “Qishloq xoʻjaligi kooperativi (shirkat xoʻjaligi) toʻgʻrisida”, “Fermer xoʻjaligi toʻgʻrisida”, “Dehqon xoʻjaligi toʻgʻrisida”gi Oʻzbekiston Respublikasi qonunlarining va ular asosida qabul qilingan qishloqda agrar va iqtisodiy munosabatlarni isloh qilishga, qishloq xoʻjaligi korxonalarini mulkiy paylar va oilaviy (jamoa) pudratni joriy etish asosida qayta oʻzgartirishga, fermer va dehqon xoʻjaliklarini rivojlantirishga yoʻnaltirilgan meʼyoriy hujjatlarni amalga oshirilishini taʼminlash boʻyicha ishlarni tashkil etish;

qishloqda agrar va iqtisodiy munosabatlarni isloh qilish sohasida yagona davlat siyosatini oʻtkazishni, qishloq xoʻjaligida iqtisodiy islohotlarni chuqurlashtirish boʻyicha hududiy komissiyalar faoliyatini muvofiqlashtirishni taʼminlash;

vazirliklar idoralar va hududiy komissiyalar bilan birgalikda qishloqda iqtisodiy islohotlarni amalga oshirish boʻyicha aniq chora-tadbirlarni ishlab chiqish, xoʻjaliklarni tayyorgarligini va zarur tayyorgarchilik ishlarini oʻtkazishni hisobga olgan holda, mulkiy paylarni joriy etish asosida qishloq xoʻjaligi korxonalarini qayta tashkil qilish bosqichlari va muddatlarini belgilash;

qishloqda iqtisodiy islohotlarni doimiy uslubiy va huquqiy taʼminlashni, agrobiznes sohasida xoʻjalik yuritishning zamonaviy uslublarini egallagan kadrlarni tayyorlash va ularning malakasini oshirish ishlarini tashkil etish;

qishloq xoʻjaligi isloh qilish sohasidagi qonunlar va boshqa meʼyoriy hujjatlarga rioya etilishini, faoliyat koʻrsatayotgan jamoa korxonalarini (jamoa xoʻjaliklarini) qishloq xoʻjaligi kooperativlar (shirkat xoʻjaliklari)ga aylantirish va qishloqda haqiqiy mulkdorlar sinfini shakllantirish boʻyicha oʻtkaziladigan ishlarni nazorat qilish;

joylarda qishloq xoʻjaligini isloh qilish, oʻz vakolatlari doirasida agrosanoat kompleksini yuqori malakali mutaxassislar bilan mustahkamlashga yoʻnaltirilgan chora-tadbirlar koʻrish uchun masʼul boʻlgan mansabdor shaxslarning oʻz lavozimiga munosibligini va amaliy faoliyati natijalarini baholash;

oʻz vakolatlari doirasida qishloqda iqtisodiy islohotlarni oʻtkazish bilan bogʻliq meʼyoriy hujjatlarni ishlab chiqish;

qishloqda iqtisodiy islohotlarni amalga oshirishning borishini tahlil qilish, qishloqda mulkdorlar sinfini shakllantirish boʻyicha ilgʻor tajribalarni umumlashtirish va ommalashtirish;

qishloq xoʻjaligini isloh qilishning huquqiy bazasini va qishloq xoʻjaligi ishlab chiqarishini, fermer va dehqon xoʻjaliklarini tashkil etish tizimini yanada takomillashtirish, shuningdek ichki xoʻjalik munosabatlarini rivojlantirish, qishloq tovar ishlab chiqaruvchilarning tayyorlovchilar va qayta ishlash korxonalari bilan shartnoma-huquqiy munosabatlarini mustahkamlash, qishloq xoʻjaligi korxonalarini moliyaviy barqarorligini oshirish va qishloqni isloh qilishning boshqa masalalari boʻyicha takliflarni tayyorlashni tashkil etish.

6. Komissiya quyidagi huquqlarga ega:

vazirliklar, idoralar, tashkilotlar rahbar xodimlarning, shuningdek hududiy komissiyalarning qishloq xoʻjaligida iqtisodiy islohotlarni chuqurlashtirish yuzasidan ular tomonidan amalga oshirilayotgan ishlar boʻyicha hisobotlarni eshitish;

Yer kodeksi, “Qishloq xoʻjaligi kooperativi (shirkat xoʻjaligi) toʻgʻrisida”, “Fermer xoʻjaligi toʻgʻrisida”, “Dehqon xoʻjaligi toʻgʻrisida”gi qonunlar va qishloq xoʻjaligi sohasidagi boshqa qonun hujjatlari qoidalari talablarini roʻyobga chiqarishga yoʻnaltirilgan meʼyoriy hujjatlarni takomillashtirish yuzasidan Oʻzbekiston Respublikasi Vazirlar Mahkamasiga takliflar kiritish;

xoʻjaligi korxonalari rahbarlarini ularning qishloq xoʻjaligini isloh qilishning iqtisodiy va huquqiy asoslarini egallaganliklari boʻyicha attestatsiyadan oʻtkazish, imtihon qilish;

joylardagi agrosanoat komplekslarining, qishloq xoʻjaligi korxonalari va tashkilotlarining oʻz lavozimiga nomunosib rahbarlarini egallab turgan vazifalaridan ozod etish toʻgʻrisida belgilangan tartibda takliflar kiritish;

vazirliklar, idoralar va uyushmalardan Komissiyaga yuklangan vazifalarning bajarilishini taʼminlash uchun zarur boʻlgan axborotlarni belgilangan tartibda olish;

attestatsiya materiallarini tayyorlash va uni oʻtkazish uchun, idoraviy mansubligidan qatʼi nazar, vazirliklar va idoralardan mutaxassislarni, oliy oʻquv yurtlari olimlari va oʻqituvchilarini jalb etish.

7. Komissiya majlislari ish rejasiga muvofiq, biroq har oyda kamida bir marta oʻtkaziladi.

8. Komissiya har chorakda Oʻzbekiston Respublikasi Vazirlar Mahkamasiga qilingan ishlar toʻgʻrisida axborot beradi.

9. Komissiya raisi:

Komissiya ishlarini tashkil etadi va ularga rahbarlik qiladi;

Komissiya nomidan majlislar bayonnomalarini, bayonnomalardan koʻchirmalarni va Komissiya kotibi tashkil etadi.

10. Komissiya majlisini tayyorlashga doir ishlarni Komissiya kotibi tashkil etadi.

11. Oʻzbekiston Respublikasi Vazirlar Mahkamasi, Qishloq va suv xoʻjaligi vazirligi, Makroiqtisodiyot va statistika vazirligi, Davlat mulki qoʻmitasi hamda “Oʻzmevasabzavotuzumsanoat xoldingi” kompaniyasining yuqori malakali mutaxassislaridan 5 kishidan iborat doimiy ishlovchi ishchi guruhi Komissiyaning ishchi organi hisoblanadi.