Ўзбекистон Республикасининг «Ўзбекистон Республикасининг Давлат бюджети тўғрисида»ги Қонунининг 12-моддаси, «Маҳаллий давлат ҳокимияти тўғрисида»ги Қонунининг 6-, 24-моддаларига мувофиқ Сурхондарё вилоятида 2026 йилда жисмоний шахсларнинг мол-мулкини ижарага беришдан олинадиган даромад солиғи ставкаларини тасдиқлаш юзасидан депутатлар томонидан билдирилган таклифлар ҳамда фикр-мулоҳазаларни инобатга олиб, халқ депутатлари Сурхондарё вилояти Кенгаши қарор қилади:

1. Вилоят Солиқ бошқармасининг 2025 йил 16 декабрдаги 20-107308-сонли хати маълумот учун қабул қилинсин.

2. Вилоят Иқтисодиёт ва молия бош бошқармаси (Ш.Абдуллаев), вилоят Солиқ бошқармаси (Э.Нарманов)га:

жисмоний шахслар мол-мулкини ижарага беришдан олинадиган даромад солиғи ставкалари турар жойлар учун 5,9-14,5 минг сўмгача 2 коэффициентгача, нотурар жойлар учун 11,8-28,4 минг сўмгача, 2 коэффициентгача индексация қилинишини қўллаган ҳолда ижара ставкаларини белгилаши мумкинлиги юзасидан телевидение билан ҳамкорликда пресс клублар ва чиқишларни амалга ошириш ҳамда телевидение орқали оммага тақдим этиш;

шаҳар ва туманлар халқ депутатлари Кенгашлари томонидан жисмоний шахсларнинг мол-мулкини ижарага беришдан олинадиган даромад солиғи кейинги солиқ даврига тасдиқланган солиқ ставкаларини 5 (беш) кун ичида солиқ тўловчиларга маълумот учун етказилишини таъминлаш;

ҳар чорак якунида жисмоний шахсларнинг мол-мулкини ижарага беришдан олинадиган даромад солиғи ва ундирилган солиқлар тўғрисида халқ депутатлари вилоят Кенгашига ахборот бериб бориш вазифалари юклансин.

3. Ўзбекистон Республикаси Солиқ кодекси билан белгиланадиган солиқ ставкалари асосида жисмоний шахсларнинг мол-мулкини ижарага беришдан олинадиган даромад солиғи учун шаҳар ва туманлар кесимида, уларнинг иқтисодий ривожланишига қараб, камайтирувчи ва оширувчи коэффициентлар иловага мувофиқ тасдиқлансин.

4. Вилоят телерадиокомпанияси (Б.Мингбоев), «Сурхон тонги» ва «Зара Сурхана» газеталари таҳририяти (С.Норқобилов)га мазкур лойиҳани амалга оширишдан мақсад ва унинг вилоят, шаҳар ва туманлар иқтисодиётини юксалтиришдаги афзалликлари тўғрисида телевидение, радио, расмий саҳифалар орқали оммавий ахборот воситалари ва интернет тармоқларида кенг ёритиб бориш тавсия этилсин.

5. Ушбу қарорнинг ижросини назорат қилиш халқ депутатлари Сурхондарё вилояти Кенгашининг Маҳаллий бюджет, тадбиркорликни ривожлантириш ва иқтисодий ислоҳотлар масалалари бўйича доимий комиссияси (И.Ёқубов) зиммасига юклатилсин.

6. Мазкур қарор расмий эълон қилинган кундан кучга киради.