Ўзбекистон Республикаси «Маҳаллий давлат ҳокимияти тўғрисида»ги Қонуннинг 6-, 24-моддалари, Ўзбекистон Республикаси Президентининг 2024 йил 4 январдаги «Чиқиндиларни бошқариш тизимини такомиллаштириш ва уларнинг экологик вазиятга салбий таъсирини камайтириш бўйича чора-тадбирлар тўғрисида» ПФ-5-сон Фармони, Ўзбекистон Республикаси Вазирлар Маҳкамасининг 2019 йил 6 февралдаги «Чиқиндилар билан боғлиқ ишларни амалга ошириш соҳасидаги норматив-ҳуқуқий ҳужжатларни тасдиқлаш тўғрисида» 95-сон қарори ижросини таъминлаш, шунингдек, чиқиндилар билан боғлиқ ишларни амалга ошириш соҳасида хизмат кўрсатишга ихтисослашган ташкилотлар фаолияти самарадорлигини ошириш ҳамда маиший чиқиндиларни тўплаш ва олиб чиқиб кетиш бўйича хизматлар кўрсатиш тизимини такомиллаштириш мақсадида, қаттиқ ва суюқ маиший чиқиндиларни тўплаш ҳамда олиб чиқиб кетиш хизматлари тарифларини ўзгартириш тўғрисидаги «Тоза ҳудуд» ДМ директори Э.Бегимқулов ҳамда Термиз шаҳар «BIO TEXNO EKO» масъуляти чекланган жамияти директори И.Расуловларнинг маърузалари тингланиб, депутатлар томонидан билдирилган таклиф фикр-мулоҳазаларни инобатга олиб, халқ депутатлари вилоят Кенгаши қарор қилади:

1. Қаттиқ ва суюқ маиший чиқиндиларни тўплаш ва олиб чиқиб кетиш хизматлари тарифларини ўзгартириш тўғрисида «Тоза ҳудуд» давлат муассаси директори Э.Бегимқулов ҳамда Термиз шаҳар «BIO TEXNO EKO» масъуляти чекланган жамияти директори И.Расуловларнинг маърузалари маълумот учун қабул қилинсин.

2. Вилоят Иқтисодиёт ва молия бош бошқармасининг 2025 йил 9 декабрдаги 22-10-10/3836-сон хати билан берган хулосаси ҳамда вилоят ҳокимлигининг 2025 йил 18 декабрдаги 03-03/12432-сонли хатлари инобатга олинсин.

3. Вилоят ҳудудида қаттиқ ва суюқ маиший чиқиндиларни тўплаш ва олиб чиқиб кетиш хизмати учун тўловлар тарифлари иловага мувофиқ тасдиқлансин.

4. Қуйидагилар:

барча жисмоний ва юридик шахслар мазкур қарор билан белгиланган тарифлар асосида чиқиндиларни тўплаш ва олиб чиқиб кетиш хизмати учун тўловларни белгиланган тартибда шартнома асосида ойнинг ўнинчи санасидан кечиктирмай амалга ошириш;

қаттиқ ва суюқ маиший чиқиндиларни тўплаш ва олиб чиқиб кетиш хизматлари учун юридик шахслар ва якка тартибдаги тадбиркорлар томонидан тўлов истеъмолчилар ва хизмат кўрсатувчи ташкилотлар ўртасида тузиладиган қонунда белгиланган тартибда шартномаларга мувофиқ бевосита хизмат кўрсатувчи ташкилотларга 100 (юз) фоиз тўлаш асосида амалга оширилиши қайд этилсин.

5. Вилоятдаги барча хизмат кўрсатувчи ташкилотлар:

аҳоли пунктларида жойлашган чиқинди тўплаш шохобчалари ва контейнерларни замонавий талаблар асосида ўргансин;

қаттиқ ва суюқ маиший чиқиндиларни олиб чиқиб кетиш бўйича кўрсатиладиган хизматларнинг сифатли, ўз вақтида ва санитария қоидаларига риоя қилган ҳолда амалга оширилишини таъминласин;

юридик ва жисмоний шахслар билан қонунда белгиланган тартибда шартномалар имзоласин;

давлат-хусусий шериклик тўғрисидаги битимлар ва шартномалардаги мажбуриятларга тўлиқ риоя этиш учун жавобгар эканлиги белгилаб қўйилсин.

6. Барча туман (шаҳар) ҳокимликларига:

вилоят Экология, атроф-муҳитни муҳофаза қилиш ва иқлим ўзгариши бошқармасига қаттиқ ва суюқ маиший чиқиндиларни тўплаш ва олиб чиқиб кетиш хизматлари учун мажбурий тўловларни тўловчи жисмоний ва юридик шахсларнинг ҳаққоний ҳисобини юритишга кўмаклашиш;

Термиз шаҳар ва туманлар ҳудудидаги хизмат кўрсатувчи ташкилотларга ҳудуддаги жисмоний ва юридик шахслар билан қонунда белгиланган тартибда шартномалар тузишда амалий ёрдам кўрсатиш;

аҳоли пунктлари ҳудудидан чиқинди ташишнинг режа-графигини тасдиқлаш ҳамда тасдиқланган режа-график асосида чиқиндиларни ташиш хизматлари амалга оширилишини қатъий назоратга олиш вазифалари юклатилсин.

7. Вилоят Экология, атроф-муҳитни муҳофаза қилиш ва иқлим ўзгариши бошқармаси (Б.Уринов):

туман (шаҳар) ҳокимликлари ва фуқароларнинг ўзини ўзи бошқариш органлари билан ҳамкорликда қаттиқ маиший чиқиндиларни тўплаш ва олиб чиқиб кетиш хизматлари учун мажбурий тўловларни тўловчи жисмоний ва юридик шахсларнинг ҳаққоний ҳисоби юритилишини таъминласин;

қаттиқ маиший чиқиндиларни тўплаш ва олиб чиқиб кетиш хизматлари учун мажбурий тўловларни тўлаш ва ҳисобини юритишнинг ягона электрон тизими фаолияти узлуксизлигини таъминласин;

жисмоний ва юридик шахслар томонидан қаттиқ ва суюқ маиший чиқиндиларни тўплаш ҳамда шартномада белгиланган тартиб асосида олиб чиқиб кетиш хизматлари учун мажбурий тўловлар 3 (уч) ой давомида тўланмаган тақдирда, қарздорликни ундириш бўйича қонунда белгиланган тартиблар асосида судларга даъво аризалари киритилишини таъминласин;

қаттиқ маиший чиқиндиларни тўплаш ва олиб чиқиш хизматларини кўрсатиш ҳақидаги шартномалар бўйича мажбуриятлар хизмат кўрсатувчи ташкилотлар томонидан бажарилиши устидан назоратни амалга оширисин;

жисмоний ва юридик шахслар томонидан хизмат кўрсатувчи ташкилотлар фаолияти бўйича келиб тушган маълумотларни таҳлил қилиб, вилоят ҳокимлигига ҳар чоракда ахборот киритиш ҳамда халқ депутатлари вилоят Кенгашига ҳар ярим йиллик якунида ёзма ахборот киритиш вазифалари юклатилсин.

8. Халқ депутатлари Сурхондарё вилояти Кенгашининг 2025 йил 29 январдаги «Вилоят ҳудудида маиший чиқиндиларни тўплаш ҳамда олиб чиқиб кетиш бўйича хизмат кўрсатиш учун мажбурий тўлов тарифларини қайта кўриб чиқиш ва маъқуллаш тўғрисида» VII-3-11-8-0-К/25-сонли қарори ўз кучини йўқотган деб ҳисоблансин.

9. Вилоят телерадиокомпанияси (Б.Мингбоев), «Сурхон тонги» ва «Заря Сурхана» газеталари таҳририяти (С.Норқобилов)га соҳада амалга оширилаётган ишларни оммавий ахборот воситалари ва интернет тармоқларида кенг ёритиб бориш тавсия этилсин.

10. Ушбу қарорнинг ижросини назорат қилиш халқ депутатлари Сурхондарё вилояти Кенгашининг Маҳаллий бюджет, тадбиркорликни ривожлантириш ва иқтисодий ислоҳотлар масалалари бўйича доимий комиссияси (И.Ёқубов) зиммасига юклатилсин.

11. Мазкур қарор оммавий ахборот воситаларида эълон қилингандан кейин ўн беш кун ўтгач кучга киради.