Ўзбекистон Республикаси Президентининг 2020 йил 29 сентябрдаги «Маиший ва қурилиш чиқиндилари билан боғлиқ ишларни бошқариш тизимини янада такомиллаштириш чора-тадбирлари тўғрисида»ги 4845-сон қарорига мувофиқ ҳамда Чиқиндиларни бошқариш ва циркуляр иқтисодиётни ривожлантириш агентлиги Қашқадарё вилояти бошқармасининг 2026 йил 10 январдаги 01-4/109-сонли, Қашқадарё вилояти иқтисодиёт ва молия бош бошқармасининг 2025 йил 19 декабрдаги 01-20-10/05-38/3322-сонли ва Ўзбекистон Республикаси Рақобатни ривожлантириш ва истеъмолчилар ҳуқуқларини ҳимоя қилиш қўмитасининг Қашқадарё вилояти ҳудудий бошқармасининг 2025 йил 24 декабрдаги 02/02-13076-сонли хатларини инобатга олиб, Ўзбекистон Республикаси «Маҳаллий давлат ҳокимияти тўғрисида»ги Қонунининг 6 ва 24-моддаларига асосан халқ депутатлари вилоят Кенгаши қарор қилади:

1. Чиқиндиларни бошқариш ва циркуляр иқтисодиётни ривожлантириш агентлиги Қашқадарё вилояти бошқармаси бошлиғи в.в.б. Д.Сафаровнинг ҳисоботи маълумот учун қабул қилинсин.

2. Қашқадарё вилоятининг (Қарши шаҳридан ташқари) туман (шаҳар)ларида қаттиқ маиший чиқиндиларни тўплаш ва олиб чиқиб кетиш, жойлаштириш хизматлари кўрсатиш бўйича нархлар (тарифлар) иловага мувофиқ маъқуллансин.

3. Чиқиндиларни бошқариш ва циркуляр иқтисодиётни ривожлантириш агентлиги Қашқадарё вилояти ҳудудий бошқармасига қаттиқ маиший чиқиндиларни тўплаш ҳамда олиб чиқиб кетиш хизматлари учун янги тарифлар белгиланганлигини оммавий ахборот воситалари орқали аҳоли ва хўжалик юритувчи субъектлар эътиборига етказиш вазифаси топширилсин.

4. Халқ депутатлари Қашқадарё вилояти Кенгашининг 2024 йил 13 июндаги VI-74-71-4-0-K/24-сонли қарори ўз кучини йўқотган деб ҳисоблансин.

5. Мазкур қарор ижросини назорат қилиш халқ депутатлари вилоят Кенгашининг Маҳаллий бюджет, тадбиркорликни ривожлантириш ва иқтисодий ислоҳотлар масалалари бўйича доимий комиссияси раиси О. Равшанов ва вилоят ҳокимининг ўринбосари М. Азизов зиммасига юклатилсин.

6. Мазкур қарор расман қабул қилинган кундан эътиборан ўн беш кун ўтгач кучга киради.

7. Ушбу қарор расмий веб-сайт ва оммавий ахборот воситаларида эълон қилинсин.