Ўзбекистон Республикаси «Маҳаллий давлат ҳокимияти тўғрисида»ги Қонунининг 6, 24-моддалари, Бюджет кодексининг 27, 99-моддалари, «2026 йил учун Ўзбекистон Республикасининг Давлат бюджети тўғрисида»ги 2025 йил 25 декабрдаги ЎРҚ-1105-сон Қонунига ва Қорақалпоғистон Республикаси Жўқорғи Кенгесининг 2025 йил 29 декабрдаги 88/IX-сонли қарорига мувофиқ, халқ депутатлари Тўрткўл тумани Кенгаши қарор қилади:

1. Ўзбекистон Республикасининг «2026 йил учун Ўзбекистон Республикасининг Давлат бюджети тўғрисида»ги Қонуни ҳамда Қорақалпоғистон Республикаси Жўқорғи Кенгесининг 2025 йил 29 декабрдаги 88/IX-сон қарори (кейинги ўринларда қарор деб юритилади) раҳбарлик ва ижро учун қабул қилинсин.

2. Қарорга мувофиқ, Тўрткўл тумани бюджетининг 2026 йилги даромадлари 137 542,6 млн.сўм ва харажатлари эса 137 542,6 млн сўмга маълумот учун қабул қилинганлиги, шунингдек Тўрткўл тумани бюджетининг шахсий ғазна ҳисобварағида турган бюджет маблағларининг йўл қўйиладиган энг кам миқдори 828,0 млн сўм этиб белгиланганлиги инобатга олинсин.

3. Туман бюджети даромадларининг 2026 йил учун асосий прогноз кўрсаткичлари 1-иловага мувофиқ ҳамда туман бюджетидан 2026 йилда ҳудудий бюджет маблағларини тақсимловчиларга ажратиладиган харажатларнинг чекланган миқдорлари 2-иловага мувофиқ, шунингдек Тўрткўл тумани маҳаллий бюджетига умумдавлат солиқлари ва бошқа солиқсиз тушумлардан ажратмалар меъёрлари 3-иловага мувофиқ тасдиқлансин.

4. Туман бюджети захира жамғармаси ҳажми 2026 йил учун 2 509,6 млн сўм миқдорида 4-иловага мувофиқ белгилансин.

Бунда, захира жамғармаси маблағларини амалдаги бюджет қонунчилигига мувофиқ, бюджет тизими бюджетлари шакллантирилаётганда олдиндан назарда тутиб бўлмайдиган харажатларни, шунингдек ижтимоий-иқтисодий беқарорлик юзага келган вазиятларда амалга оширилиши зарур бўлган тадбирларни молиялаштириш учун йўналтирилиши таъминлансин.

5. Тўрткўл тумани маҳаллий бюджетининг 2025 йил учун йўл қўйиладиган энг кам маблағлар миқдори 5-иловага мувофиқ, Тўрткўл тумани маҳаллий бюджетининг 2026 йилги даромадлари ва харажатлари маблағларининг миқдори 6-иловага мувофиқ тасдиқлансин.

6. Тумандаги қишлоқ хўжалигига мўлжалланмаган ерлар учун юридик шахслар бўйича энг кам миқдори 1 гектар учун белгиланган базавий солиқ ставкаси киритилиши тўғрисидаги камайтирувчи ва оширувчи коэффитсиэнтлари 7-иловага мувофиқ ҳамда тумандаги жисмоний шахслар бўйича (деҳқон хўжалиги юритиш учун берилган қишлоқ хўжалигига мўлжалланган ерлардан ташқари) энг кам миқдори 1 кв.метр учун белгиланган базавий солиқ ставкаси киритилиши тўғрисидаги камайтирувчи ва оширувчи коэффитсиэнтлари 8-иловага, белгиланган лимит доирасида ер усти ва ер ости манбаларидан олинадиган сув ресурслари учун солиқ ставкалари мутлоқ миқдорда бир куб метр учун белгиланган базавий солиқ ставкаларига нисбатан киритилаётган камайтирувчи ва оширувчи коэффитсиэнтлари 9-иловага, 2026 йилда қазиб олинган 1м3 норуда қурилиш материаллари (цемент ишлаб чиқариш учун мўлжалланган оҳактошдан ташқари) учун қатъий белгиланган солиқ ставкаларига киритилаётган оширувчи коэффитсиэнтлар 10-иловага, кўчмас мулкка бўлган ҳуқуқларни Давлат рўйхатидан ўтказувчи органларда рўйхатдан ўтказилиши керак бўлган бино ва иншоотларнинг 1 кв. метри учун Абсолют (қатъий) миқдорда белгиланган минимал баҳосига солиштирганда киритилаётган камайтирувчи коэффицент миқдори 11-иловага мувофиқ тасдиқлансин.

7. Туман ҳокимининг биринчи ўринбосари (З. Исмаилов), туман Иқтисодиёт ва молия бўлими (И. Баққаев), туман Солиқ инспекцияси (Ж. Аннаев) билан биргаликда 2026 йил маҳаллий бюджети учун белгиланган кўрсаткичларни ўз вақтида ва самарали бажарилишини таъминлаш чораларини кўрсин.

8. Ҳудудий бюджет маблағларини тақсимловчилар ҳар чорак якуни билан бюджет маблағларининг самарали ва мақсадли сарфланганлиги, харажатларнинг амалий натижалари юзасидан халқ депутатлари туман Кенгашига ҳисобот бериб борсинлар.

Бунда, ҳудудий бюджет маблағларини тақсимловчилар:

бюджетдан ажратилган маблағлардан мақсадли ва самарали фойдаланиш, хусусан иш ҳақи ва унга тенглаштирилган тўловлар, озиқ-овқат, дори-дармон, коммунал хизматлар ва давлат дастурлари учун белгиланган харажатларни тўлиқ режалаштирилиши ва ўз вақтида тўланиши;

ўзларининг ва тасарруфидаги ташкилотларнинг харажатлар сметаси ва штат жадваллари ҳамда даромадлар ва харажатлар сметаларининг тўғри тузилиши;

бюджетдан ажратилган маблағларнинг мақсадли сарфланиши ва мақсадли индикаторларнинг тўлиқ бажарилиши;

тасарруфидаги тизим ташкилотларига бюджетдан ажратиладиган маблағларнинг тўғри тақсимланиши;

ўз тасарруфидаги тизимда бюджет интизомига амал қилиниши устидан назорат қилинишини;

бюджет жараёнининг очиқлигини таъминлаш мақсадида расмий веб-сайтларда маълумотларни жойлаштириб борилишини таъминласинлар.

9. Туман ҳокимлигининг Ахборот хизмати раҳбари (М. Бекчанова)га мазкур қарорни туман ҳокимлигининг расмий веб-сайтига жойлаштириш ва оммавий ахборот воситаларида эълон қилиш вазифаси юклансин.

10. Мазкур қарор бажарилишини назорат қилиш халқ депутатлари Тўрткўл тумани Кенгашининг маҳаллий бюджет, тадбиркорликни ривожлантириш ва иқтисодий ислоҳотлар масалалари бўйича доимий комиссияси (А. Мадраймов) ҳамда туман ҳокимининг биринчи ўринбосари З. Исмаилов зиммасига юклатилсин.

11. Ушбу қарор расмий эълон қилинган кундан кучга киради.