Ўзбекистон Республикаси «Маҳаллий давлат ҳокимияти тўғрисида»ги Қонунининг 6-, 24-моддалари, Бюджет кодексининг 27-, 99-моддалари, Ўзбекистон Республикасининг 2025 йил 25 декабрдаги «2026 йил учун Ўзбекистон Республикасининг Давлат бюджети тўғрисида»ги ЎРҚ-1105-сон Қонунига ва халқ депутатлари Самарқанд вилояти Кенгашининг 2025 йил 30 декабрдаги «Самарқанд вилоятининг 2026 йилги маҳаллий бюджетини тасдиқлаш тўғрисида»ги VII-24-191-7-0-К/25-сон қарорига мувофиқ ҳамда Самарқанд вилояти иқтисодиёт ва молия бош бошқармасининг 2025 йил 29 декабрдаги 01/01.2-38/3947-сонли хатини инобатга олиб, халқ депутатлари шаҳар Кенгаши еттинчи чақириқ, навбатдан ташқари йигирма тўртинчи сессияси қарор қилади:

1. Ўзбекистон Республикасининг 2025 йил 25 декабрдаги «2026 йил учун Ўзбекистон Республикасининг Давлат бюджети тўғрисида»ги ЎРҚ-1105-сон Қонуни ва халқ депутатлари Самарқанд вилояти Кенгашининг 2025 йил 30 декабрдаги «Самарқанд вилоятининг 2026 йилги маҳаллий бюджетини тасдиқлаш тўғрисида»ги VII-24-191-7-0-К/25-сон қарори раҳбарлик ва ижро учун қабул қилинсин.

2. Қарорга мувофиқ, Самарқанд шаҳар маҳаллий бюджетининг 2026 йилги даромадлари 338 812 244,0 минг сўм ва харажатлари эса 338 812 244,0 минг сўмга тасдиқланганлиги маълумот учун қабул қилинсин. Шунингдек, шаҳар маҳаллий бюджетининг шахсий ғазна ҳисобварағида турган бюджет маблағларининг йўл қўйиладиган энг кам миқдори 2 757 0000,0 минг сўм этиб белгиланганлиги ҳамда шаҳар маҳаллий бюджетига умумдавлат солиқлар ва бошқа солиқсиз тушумлардан ажратмалар меъёрлари тасдиқланганлиги инобатга олинсин.

3. Шаҳар маҳаллий бюджети даромадларининг 2026 йил учун асосий прогноз кўрсаткичлари 1-иловага мувофиқ ҳамда шаҳар маҳаллий бюджетидан 2026 йилда ҳудудий бюджет маблағларини тақсимловчиларга ажратиладиган харажатларнинг умумий чекланган миқдорлари 2-иловага мувофиқ тасдиқлансин.

4. Шаҳар маҳаллий бюджети захира жамғармаси ҳажми 2026 йил учун 5 197 516,0 минг сўм миқдорида белгилансин. Бунда, захира жамғармаси маблағларини амалдаги бюджет қонунчилигига мувофиқ, бюджет тизими бюджетлари шакллантирилаётганда олдиндан назарда тутиб бўлмайдиган харажатларни, шунингдек ижтимоий-иқтисодий беқарорлик юзага келган вазиятларда амалга оширилиши зарур бўлган тадбирларни молиялаштириш учун йўналтирилиши таъминлансин.

5. Қишлоқ хўжалиги учун мўлжалланмаган ерлар учун юридик шахслар бўйича мутлоқ миқдорда 1 гектар ер учун белгиланган базавий солиқ ставкасига киритилаётган камайтирувчи ва оширувчи коэффитсиэнтлар 3-иловага, жисмоний шахслар бўйича (деҳқон хўжалигини юритиш учун берилган қишлоқ хўжалигига мўлжаллаган ерлардан ташқари) мутлоқ миқдорда 1 м2 учун белгиланган базавий солиқ ставкаларига нисбатан киритилаётган камайтирувчи ва оширувчи коэффитсиэнтлар 4-иловага, норуда қурилиш материаллари учун (цементдан ташқари) белгиланган қатъий ставкаларига 2026 йил учун қўлланиладиган коэффитсиэнтлар 5-иловага ҳамда сув ресурсларидан фойдаланганлик учун солиқ ставкаларига 2026 йил учун қўлланиладиган коэффитсиэнтлар (қишлоқ хўжалиги, электр станциялари, коммунал хизмат кўрсатиш корхоналари ва рўйхати Ўзбекистон Республикаси Президенти қарори билан тасдиқланадиган йирик солиқ тўловчиларга нисбатан татбиқ этилмайди) 6-иловага мувофиқ тасдиқлансин.

6. Шаҳар ҳокимининг биринчи ўринбосари (Очилов), шаҳар иқтисодиёт ва молия бўлими (Туракулов), шаҳар солиқ инспекцияси (Аминов) билан биргаликда 2026 йил маҳаллий бюджети учун белгиланган кўрсаткичларни ўз вақтида ва самарали бажарилишини таъминлаш чораларини кўрсин. Бунда:

тегишли бюджетларни биринчи навбатда иш ҳақи ва унга тенглаштирилган тўловлар, озиқ-овқат ва дори-дармон ва коммунал хизматлар харажатларнинг режалаштирилишини назарда тутган ҳолда шакллантириш;

бюджет даромадлари ва харажатларининг кўрсаткичларини бажарилишини таъминлаш, солиқ базасини кенгайтириш ҳамда иқтисодий салоҳиятини ошириш юзасидан зарур чора-тадбирлар кўриш, бюджет маблағларидан мақсадли ва самарали фойдаланиши устидан қатъий назоратни ўрнатиш учун шаҳар Кенгашига доимий равишда маълумот киритиб бориш;

Ўзбекистон Республикасининг «2026 йил учун Ўзбекистон Республикасининг Давлат бюджети тўғрисида»ги Қонунида белгиланган айрим солиқлар ва тўлов ставкалари, солиқ солиш тартиблари ҳамда бошқа маълумотларни оммавий ахборот воситаларида ёритилишини таъминлаш.

7. Ҳудудий бюджет маблағларини тақсимловчилар бюджетдан ажратилган маблағлардан мақсадли ва самарали фойдаланиш, хусусан иш ҳақи ва унга тенглаштирилган тўловлар, озиқ-овқат, дори-дармон, коммунал хизматлар ва давлат дастурлари учун белгиланган харажатларни биринчи навбатда тўлиқ режалаштирилиши ва ўз вақтида тўланиши ҳамда даврий жамланма молиявий ҳисоботларни тўғри шакллантирилиши ва ўз вақтида тақдим этилишини таъминласин.

8. Мазкур қарор тегишли таҳририятлар ва оммавий ахборот воситаларида ёритилиши тавсия этилсин ҳамда шаҳар ҳокимлигининг расмий веб-сайтига жойлаштирилсин.

9. Мазкур қарор бажарилишини назорат қилиш халқ депутатлари шаҳар Кенгашининг маҳаллий бюджетни шакллантириш ва ижро этиш, иқтисодий ислоҳотларни амалга ошириш ва тадбиркорликни ривожлантириш масалалари доимий комиссияси (Кабилов) ҳамда шаҳар ҳокимининг биринчи ўринбосари (Очилов) зиммаларига юклатилсин.