Ўзбекистон Республикаси Солиқ кодексининг 429 ва 437-моддаларига мувофиқ қишлоқ хўжалиги учун мўлжалланмаган ерлар бўйича базавий солиқ ставкаси республика ҳудудлари кесимида 1 кв.метр ва 1 гектар учун мутлақ ўлчамда белгиланган.

Қорақалпоғистон Республикаси Жўқорғи Кенгеси ва вилоятлар халқ депутатлари Кенгашлари Солиқ кодекси билан белгиланадиган солиқ ставкалари асосида (юридик ва жисмоний шахсларнинг) қишлоқ хўжалигига мўлжалланмаган ерлар учун шаҳар ва шаҳарлар кесимида, уларнинг иқтисодий ривожланишига қараб, ер солиғи ставкасига 0,5 дан 2,0 гача камайтирувчи ва оширувчи коэффициентларни қўллаган ҳолда ер солиғи ставкаларини белгилаши кўзда тутилган.

Юқоридагилардан келиб чиқиб, туман иқтисодиёт ва молия бўлими ҳамда солиқ инспекцияси томонидан жисмоний ва юридик шахсларнинг 2026 йил учун қишлоқ хўжалигига мўлжалланмаган ер солиғи ставкалари, учун камайтирувчи ва оширувчи коэффициентлар юзасидан таклифлар ишлаб чиқилганлиги инобатга олиниб, Халқ депутатлари туман Кенгаши қарор қилади:

1. Ўзбекистон Республикаси Солиқ кодексининг 429 ва 437-моддаларига асосан 2026 йилда туман бўйича юридик шахсларнинг қишлоқ хўжалигида мўлжалланмаган ерларини базавий солиқ ставкаси мутлоқ миқдори 1 гектар учун 55 120 000 сўм, жисмоний шахслар ерларининг 1 кв.м учун базавий солиқ ставкаси мутлоқ миқдори 377,0 сўм қиймати маъқулланганлиги инобатга олинсин.

2. Туман иқтисодиёт ва молия бўлими (У. Рустамов), туман солиқ инспекцияси (А. Ахмедов)нинг:

ҳудудларнинг иқтисодий ривожланганлик даражаси ҳамда туманнинг келгуси йил учун белгиланган маҳаллий бюджет прогнозидан келиб чиқиб туман бўйича 2026 йилда юридик ва жисмоний шахсларнинг базавий ер солиғи ставкаларининг мутлоқ миқдорларига ҳамда юридик шахсларнинг мол-мулки ва жисмоний шахсларга тегишли бўлган, яшашга мўлжалланмаган кўчмас мулк объектлари учун мол-мулк солиғини ҳисоблашда белгиланган энг кам қийматга нисбаттан камайтирилувчи коэффициентларни қўллаш бўйича таклифлари инобатга олинсин.

3. Туманнинг иқтисодий ривожланишидан келиб чиқиб, Кармана тумандаги қишлоқ хўжалигига мўлжалланмаган ерлар бўйича ер солиғи ставкалари учун 2026 йилда белгиланган коэффициентлар 1-иловага, 2026 йил учун сув ресурсларидан фойдаланганлик учун солиқ бўйича Солиқ кодекси билан ўрнатиладиган солиқ ставкаларига нисбатан қўлланиладиган коэффициентлар миқдори 2-иловага, 2026 йил учун ер қаъридан фойдаланганлик учун солиқ бўйича Солиқ кодекси билан ўрнатиладиган солиқ ставкаларига нисбатан қўлланиладиган коэффициентлар миқдори 3-иловага мувофиқ тасдиқлансин.

4. «Кармана овози» газетаси таҳририяти газетаси (А. Джураев), туман ҳокимлиги ахборот хизмати раҳбари-матбуот котиби (Ж. Мусаев)га:

туман бўйича 2026 йил учун юридик ва жисмоний шахсларнинг ер солиғи ставкаларини ҳамда мол-мулк солиғини ҳисоблашда қўлланиладиган энг кам қиймат бўйича маълумотларни «Кармана овози» газетасида ҳамда туман ҳокимлигининг расмий веб сайтида эълон қилиш тавсия этилсин.

5. Халқ депутатлари туман Кенгашининг 2025 йил 17 январь 2025 йил VII-17-3-2-5-71-К/25-сонли ва 2025 йил 10 февраль VII-5-14-5-71-К/25-сонли қарорлари ўз кучини йўқотган деб ҳисоблансин.

6. Мазкур қарор бажарилишини назорат қилиш туман ҳокимининг ўринбосарлари ва халқ депутатлари туман Кенгашининг доимий комиссиялари зиммасига юклатилсин.

7. Ушбу қарор расман эълон қилинган кундан бошлаб кучга киради.