Ўзбекистон Республикаси «Маҳаллий давлат ҳокимияти тўғрисида»ги Қонунининг 6, 24-моддалари, Бюджет кодексининг 99-моддаси, Ўзбекистон Республиканинг 2025 йил 25 декабрдаги «2026 йил учун Ўзбекистон Республикасининг Давлат бюджети тўғрисида»ги ЎРҚ-1105-сонли Қонунига, халқ депутатлари Навоий вилояти Кенгашининг 2025 йил 29 декабрдаги «Навоий вилоятининг 2026 йилги маҳаллий бюджетини тасдиқлаш тўғрисида»ги VII-22-165-5-0-К/25-сонли қарори, Навоий вилояти Иқтисодиёт ва молия бош бошқармасининг 2025 йил 29 декабрдаги 01-12/20-01-38/3536-сонли хати, туман Иқтисодиёт ва молия бўлими бошлиғининг биринчи ўринбосари Ж. Ҳожиевнинг ахбороти ҳамда билдирилган фикр ва мулоҳазаларни инобатга олиб, халқ депутатлари Қизилтепа туман Кенгаши қарор қилади:

1. Ўзбекистон Республикасининг 2025 йил 25 декабрдаги «2026 йил учун Ўзбекистон Республикасининг Давлат бюджети тўғрисида»ги ЎРҚ-1105-сонли Қонуни ҳамда халқ депутатлари Навоий вилоят Кенгашининг 2025 йил 29 декабрдаги «Навоий вилоятининг 2026 йилги маҳаллий бюджетини тасдиқлаш тўғрисида»ги VII-22-165-5-0-К/25-сонли қарори (кейинги ўринларда — қарор деб юритилади) раҳбарлик ва ижро учун қабул қилинсин.

2. Ўзбекистон Республикасининг «2026 йил учун Ўзбекистон Республикасининг Давлат бюджети тўғрисида» ЎРҚ-1105-сонли Қонунига (кейинги ўринларда — Қонун деб аталади) мувофиқ, Қизилтепа тумани маҳаллий бюджетининг 2026 йил учун бюджет даромадлари 151,4 млрд. сўм, харажатлари ҳам 151,4 млрд. сўм этиб белгиланганлиги маълумот учун қабул қилинсин.

3. 2026 йил учун Қизилтепа туманини ривожлантиришнинг асосий макроиқтисодий кўрсаткичлари прогнози ва 2027-2028 йилларга мақсадли мўлжаллар 1-иловага мувофиқ маълумот учун қабул қилинсин.

4. Қуйидагилар:

Қизилтепа туман маҳаллий бюджети даромадларининг солиқ турлари кесимида 2026 йилдаги асосий прогноз кўрсаткичлари 2-иловага мувофиқ;

2026 йилги туман маҳаллий бюджетидан бюджет ташкилотлари ва маблағларини тақсимловчиларга ажратиладиган харажатларнинг умумий чекланган миқдорлари 3-иловага мувофиқ;

2026 йил учун туман маҳаллий бюджетига умумдавлат солиқларидан ажратмалар меъёрлари 4-иловага мувофиқ тасдиқлансин.

5. Туман бюджети захира жамғармаси ҳажми 2026 йил учун 2113,025 млн. сўм миқдорида белгилансин.

Қизилтепа туман бюджетининг шахсий ғазна ҳисоб варағида турган бюджет маблағларининг йўл қўйиладиган энг кам миқдори 1445,544 млн. сўм этиб белгиланганлиги инобатга олинсин.

6. 2025 йил учун туман маҳаллий бюджетининг даромадлари ва харажатларининг прогнозлари 5-иловага мувофиқ маълумот учун қабул қилинсин.

7. Қонун билан 2026 йилда халқ депутатлари туман Кенгашининг маҳаллий бюджетни бошқаришда, хусусан уларнинг Кенгаш олдидаги ҳисобдорлигини белгилаш бўйича ваколатлари кенгайтирилганлиги инобатга олинсин.

8. 2026 йилда қуйидаги солиқ турлари:

а) туман бюджетларига тўлиқ ҳажмда ўтказилади:

жисмоний шахслардан олинадиган мол-мулк солиғи;

жисмоний шахслардан олинадиган ер солиғи;

мол-мулкни ижарага беришдан олинадиган йиллик даромад тўғрисидаги декларацияга асосан жисмоний шахслар томонидан тўланадиган даромад солиғи;

сув ресурсларидан фойдаланганлик учун солиқ;

норуда қурилиш материаллари бўйича ер қаъридан фойдаланганлик учун солиқ;

айланмадан олинадиган солиқ;

юридик шахсларнинг мол-мулкига солинадиган солиқ (бундан йирик солиқ тўловчилар томонидан тўланадиган солиқ мустасно);

юридик шахслардан олинадиган ер солиғи (бундан йирик солиқ тўловчилар томонидан тўланадиган солиқ мустасно);

давлат активларини ижарага беришдан тушумлар:

қўшилган қиймат солиғидан тушган тушумларнинг (Ўзбекистон Республикаси Президентининг қарори билан тасдтқланадиган рўйхатга мувофиқ йирик солиқ тўловчилардан ташқари) Қизилтепа туманида 50 фоизи;

б) қонунчиликда белгиланган миқдорларда қуйидаги даромадлар республика, вилоят маҳаллий бюджети ва туман маҳаллий бюджети ўртасида тақсимланади:

давлат божлари;

жарималар;

йиғимлар;

давлат даромадига ўтказилган мол-мулкни реализация қилишдан тушумлар;

Қонунчиликда белгиланган тартибда давлат активларини сотишдан тушадиган тушумлар тегишли равишда объект жойлашган туман маҳаллий бюджетига ва вилоят бюджетига тенг улушларда тақсимланади.

Жисмоний шахслардан олинадиган даромад солиғи тушумларининг камида 50 фоизи (бундан йирик солиқ тўловчилар томонидан тўланадиган солиқ мустасно) туман маҳаллий бюджетига ўтказилади.

9. Қизилтепа туман халқ депутатлари Кенгаши:

даромадларнинг прогнозини ошириб бажаришдан олинган маблағларнинг бир қисмини туман маҳаллий бюджетига ҳудудни ижтимоий-иқтисодий ривожлантириш дастурларини амалга ошириш учун берилишга;

халқ депутатлари туман Кенгаши туманнинг оммавий дам олишга ва (ёки) туризмга ихтисослаштирилган айрим ҳудудларда мол-мулкни ижарага берувчи жисмоний шахслар учун белгиланган ижара тўловининг энг кам ставкаларига Тошкент шаҳри учун белгиланган миқдорларгача ўсиб борувчи коэффициентларни жорий этишга ҳақлилиги маълумот учун қабул қилинсин.

10. Туман ҳокимининг биринчи ўринбосари (Н. Ҳайитов), туман Иқтисодиёт ва молия бўлими (Ж. Ҳожиев), Солиқ инспекцияси (Д. Муродов) масъул ташкилотлар билан биргаликда:

тегишли бюджетларни биринчи навбатда иш ҳақи ва унга тенглаштирилган тўловлар, озиқ-овқат ва дори-дармон ва коммунал хизматлар харажатларини режалаштирилишини назарда тутган ҳолда шакллантириш;

маҳаллий бюджетининг прогноз кўрсаткичларни ўз вақтида ва самарали бажариш;

бюджет маблағларидан мақсадли ва самарали фойдаланиш;

бюджет интизомига риоя этилиши устидан назорат ва масъулиятни янада кучайтириш;

тегишли маҳаллий бюджетларга солиқлар ва бошқа мажбурий тўловларнинг тўлиқ тушумини таъминлаш;

бюджет даромадлар базасини ошириш ва қўшимча резервларни аниқлаш зарурлигига алоҳида эътибор қаратсин.

11. Туман Солиқ инспекцияси (Д. Муродов)га:

солиқларнинг тўлиқ ва тўғри ҳисобланишини ҳамда ушбу солиқларни ўз вақтида бюджетга ундирилиши устидан солиқ назоратини кучайтирилишини;

барча солиқ турларидан доимий таҳлиллар ўтказган ҳолда, солиқларни тўлиқ ҳисобланишини ҳамда ушбу солиқ тўловлари бўйича солиқ қарздорлигига йўл қўймаслик чоралари кўрилишини;

Кадастр агентлигининг туман бўлими билан биргаликда туманда мавжуд солиқ тўловчиларнинг мол-мулклари майдонларини чуқур таҳлил этган ҳолда ушбу мол-мулкларга нисбатан солиқларнинг тўлиқ ҳисобланишини;

айланмадан солиқ тури бўйича солиқ тўловчилар томонидан нақд пул айланмаларининг солиқ ҳисоботларида тўлиқ акс эттирилиши устидан доимий солиқ назорати ўрнатилишини ҳамда камерал солиқ назорати тадбирларини ўтказилишини таъминлаш топширилсин.

Бунда, мазкур йўналишда жамоатчилик назоратини кучайтириш мақсадида фуқароларга харид чекини талаб қилиб олишни тарғиб этувчи ижтимоий роликлар ҳамда видео материаллар тайёрлаб, ижтимоий тармоқлар ва оммавий ахборот воситаларида кенг тарғибот-ташвиқот ишларини олиб боришга алоҳида эътибор қаратсин.

12. Туман Солиқ инспекцияси (Д. Муродов):

норуда қурилиш материалларини қазиб олиш соҳасида ноқонуний фаолият олиб бораётган карерларни аниқлаш бўйича хатловлар ўтказиш;

хатлов натижалари бўйича аниқланган ноқонуний фаолият олиб бораётган карерлар фаолиятини қонунийлаштириш ҳамда уларни солиқ базасига қамраб олиш;

норуда қурилиш материалларини қазиб олиш соҳасида фаолият олиб бораётган карерлар томонидан қазиб олинаётган норуда қурилиш материаллар ҳажмининг солиқ ҳисоботларида тўлиқ акс эттириш устидан доимий назорат ўрнатсин.

Бунда, ушбу соҳада фаолият олиб бораётган карьерларнинг қазиб олиш ҳажмларини доимий таҳлил қилиб бориш ҳамда зарур ҳолларда қазиб олиш ҳажмларини аниқлашда маҳаллий бюджетнинг қўшимча манбалари ҳисобидан «маркшейдерлик» хизматларидан фойдаланиш лозимлиги алоҳида белгилаб қўйилсин.

13. Мажбурий ижро бюроси Қизилтепа тумани бўлими туман Солиқ инспекцияси билан ҳамкорликда солиқлар ва бошқа мажбурий тўловлар бўйича мавжуд солиқ қарздорликларини бюджетга ундириш юзасидан ҳамда чораклар якуни билан солиқ қарздорликларининг чорак бошига нисбатан камайиб бориши бўйича барча комплекс чора-тадбирларни кўриб борсин.

14. Туман ҳокимлиги жисмоний шахсларнинг ер ва мол-мулк солиқлари бўйича жорий ҳисобланган солиқларни ҳамда ушбу солиқлардан мавжуд солиқ қарздорликларини ундириш юзасидан солиқ органларига амалий ёрдам кўрсатсин.

бўш турган давлат мулки объектларини аниқлаш бўйича хатлов ишларини самарали ташкил этиш;

хатлов натижаларига кўра туманда мавжуд бўш турган давлат мулки объектлари рўйхатини шакллантириш;

шакллантирилган рўйхатга асосан бўш турган давлат мулки объектларини ижарага бериш ёки сотиш бўйича тегишли таклифлар тайёрлаш;

бўш турган давлат мулки объектларини ижарага бериш ёки сотиш бўйича ижтимоий тармоқлар ва оммавий ахборот воситаларида роликлар ва видео-материаллар тайёрлаш;

хусусийлаштирилиши мўлжалланган бўш турган давлат мулки объектларини «э-аукцион» электрон савдо платформаси орқали сотиш ишларини ташкиллаштириш чораларини кўрсин.

15. Халқ депутатлари туман Кенгашининг маҳаллий бюджет, иқтисодий ислоҳотларни амалга ошириш, инвестициялар ва тадбиркорликни ривожлантириш масалалари бўйича доимий комиссияси:

маҳаллий бюджетнинг қўшимча манбаларидан фойдаланиш тўғрисидаги ҳокимлик томонидан тақдим этилган таклифлар асосида бюджет қонунчилигига тўлиқ риоя этилган ҳолда Кенгаш қарори лойиҳасини ишлаб чиқилишига;

Кенгаш қарори асосида маҳаллий бюджетнинг қўшимча манбалари ҳисобидан ажратилган маблағларни самарали ва мақсадли фойдаланиши устидан назорат ўрнатишга, натижалари бўйича тавсиялар беришга, мониторинг қилишга;

маҳаллий бюджет харажатларининг қонунчиликда белгиланган қисмининг жамоатчилик фикри асосида шакллантирилган тадбирларни молиялаштиришга йўналтирилишига ҳамда ушбу маблағларнинг мақсадли сарфланиши устидан назоратни амалга оширишга масъул этиб белгилансин.

16. Туман ҳокимининг биринчи ўринбосари (Н. Ҳайитов), халқ депутатлари туман Кенгаши котибияти (У. Бобожонов) ҳамда тегишли ташкилот раҳбарлари:

маҳаллий бюджет даромад ва харажатларининг прогноз кўрсаткичлари бажарилиши ҳамда солиқ базасини кенгайтириш юзасидан кўрилган чора-тадбирлар;

ажратилган бюджет маблағларидан мақсадли ва самарали фойдаланиши юзасидан эришилган натижалар бўйича халқ депутатлари туман Кенгашига бир чоракда камида бир маротаба ҳисобот киритиб борсин.

17. Туман ҳокимлиги Қонунда белгиланган айрим солиқлар ва тўлов ставкалари, солиқ солиш тартиблари ҳамда бошқа маълумотларни оммавий ахборот воситаларида ёритилишини таъминласин.

18. Мазкур қарор «Янги Қизилтепа» газетасида расмий эълон қилинсин ҳамда туман ҳокимлигининг расмий веб-сайтига жойлаштирилсин.

19. Ушбу қарор расмий эълон қилинган кундан бошлаб кучга киради.

20. Мазкур қарор бажарилишини назорат қилиш туман ҳокиминиг биринчи ўринбосари (Н. Ҳайитов) ҳамда халқ депутатлари туман Кенгашининг маҳаллий бюджет, тадбиркорликни ривожлантириш ва иқтисодий ислоҳотлар масалалари бўйича доимий комиссияси (Ш. Исломов) зиммаларига юклансин.