Ўзбекистон Республикаси Солиқ кодексининг 429, 437, 445 ва 452-моддаларига мувофиқ, Шеробод туманида юридик ва жисмоний шахсларнинг қишлоқ хўжалигига мўлжалланмаган ерларига 2026 йил учун ер солиғи ставкаларини тасдиқлаш, шунингдек сув ресурсларидан фойдаланганлик учун солиқ ва ер қаъридан фойдаланганлик учун базавий солиқ ставкаларига қўлланиладиган камайтирувчи ҳамда оширувчи коэффициентларни белгилаш масаласи юзасидан туман солиқ инспекцияси (Б. Акрамов)нинг ҳисоботи тингланиб, билдирилган фикр-мулоҳазалардан келиб чиқиб, халқ депутатлари Сурхондарё вилояти Кенгашининг 2026 йил 6 январдаги VII-17-2-8-0-K/26-сон қарорини инобатга олиб ҳамда Ўзбекистон Республикасининг «Маҳаллий давлат ҳокимияти тўғрисида»ги Қонунининг 6 ва 24-моддаларига асосан, халқ депутатлари Шеробод туман Кенгаши қарор қилади:

1. Туман солиқ инспекцияси (Б. Акрамов)нинг Ўзбекистон Республикаси Солиқ кодексининг 429,437,445 ва 452-моддаларига асосан Шеробод туманида юридик ва жисмоний шахсларнинг қишлоқ хўжалигига мўлжалланмаган ерларига 2026 йил учун ер солиғи ставкаларини тасдиқлаш ҳамда сув ресурсларидан фойдаланганлик учун солиқ ва ер қаъридан фойдаланганлик учун базавий солиқ ставкаларига қўлланиладиган камайтирувчи ва оширувчи коэффициентларни қўллаш юзасидан берган ҳисоботи маълумот учун қабул қилинсин.

2. Қуйидагилар:

Ўзбекистон Республикаси Солиқ кодекси билан белгиланадиган солиқ ставкалари асосида (юридик) қишлоқ хўжалигига мўлжалланмаган ерлар учун шаҳар ва туманлар кесимида, уларнинг иқтисодий ривожланишига қараб, камайтирувчи ва оширувчи коэффициентлари 1-иловага;

Ўзбекистон Республикаси Солиқ кодексининг 445-моддасига мувофиқ 2026 йилда сув ресурсларидан фойдаланганлик учун солиқ ставкаларига қўлланиладиган коэффициентлар миқдори 2-иловага;

Ўзбекистон Республикаси Солиқ кодексининг 452-моддасига мувофиқ 2026 йилда Ер қаъридан фойдаланганлик норуда қурилиш материаллари учун (цемент ишлаб чиқариш учун мўлжалланган оҳактошдан ташқари) қатъий солиқ ставкаларига қўлланиладиган коэффициентлар миқдори 3-иловага мувофиқ тасдиқлансин.

3. Шеробод туман ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари — туман Иқтисодиёт ва молия бўлими бошлиғи (У. Хамраев), туман Солиқ инспекцияси (Б. Акрамов)ларга:

Сурхондарё вилояти бўйича қишлоқ хўжалигига мўлжалланмаган юридик шахсларнинг 1 гектар ери учун 37,7 млн.сўм ҳамда жисмоний шахсларнинг 1 квадрат метр ери учун 353,00 сўм базавий солиқ ставкалари бўйича таклиф киритилганлиги (юридик ва жисмоний шахсларнинг) қишлоқ хўжалигига мўлжалланмаган ерлар учун шаҳар ва туманлар кесимида, уларнинг иқтисодий ривожланишига қараб ер солиғи ставкасига 0,5 дан 2,0 гача камайтирувчи ва оширувчи коэффициентларни қўллаган ҳолда ер солиғи ставкаларини белгилаши мумкинлиги юзасидан оммавий ахборот воситалари билан ҳамкорликда пресс клублар ва чиқишларни амалга ошириш орқали оммага тақдим этиш;

белгиланган ер солиғи ставкаларига (юридик ва жисмоний шахсларнинг) қишлоқ хўжалигига мўлжалланмаган ерлар учун, уларнинг ҳудудларида жойлашган даҳа, мавзе, маҳалла, кўча кесимида 0,7 дан 3,0 гача камайтирувчи ва оширувчи коэффициентларни қўллашлари юзасидан маълумотларни таъминлаб бериш;

Шунингдек, Сурхондарё вилоятида юридик ва жисмоний шахсларнинг 2026 йил учун мол-мулк ҳамда ер солиғи ставкаларини белгилаш ҳақидаги Халқ депутатлари Сурхондарё вилояти кенгашининг қарори лойиҳасида Сурхондарё вилояти Шеробод тумани бўйича қишлоқ хўжалигига мўлжалланмаган юридик шахсларнинг 1 гектар ери учун 49010,0 минг.сўм ҳамда жисмоний шахсларнинг 1 квадрат метр ери учун 402,53 сўм базавий солиқ ставкалари белгиланиши назарда тутилганлигини маълум қилган.

Халқ депутатлари туман Кенгаши томонидан қишлоқ хўжалигига мўлжалланмаган ер участкалари учун кейинги солиқ даврига тасдиқланган солиқ ставкалари, шунингдек сув ресурсларидан фойдаланганлик учун солиқ ва ер қаъридан фойдаланганлик учун базавий солиқ ставкаларига қўлланиладиган камайтирувчи ва оширувчи коэффициентлар тўғрисидаги маълумотларни оммавий ахборот воситалари, солиқ органларининг расмий ахборот ресурслари ҳамда электрон солиқ тизимлари орқали қарор кучга кирган кундан бошлаб беш кун ичида солиқ тўловчиларга маълумот учун етказилишини таъминлаш;

юридик ва жисмоний шахслар томонидан мавжуд ер майдонлари учун ҳисобланган ер солиқларини ўз вақтида ва тўлиқ тўлаб боришларини назоратга олиш;

юридик ва жисмоний шахсларга ҳисобланган ер солиғи ва ундирилган солиқлари тўғрисида халқ депутатлари туман Кенгашига чорак якуни билан ахборот бериб бориш вазифаси юклатилсин.

юридик ва жисмоний шахслар томонидан мавжуд ер майдонлари учун ҳисобланган ер солиқларини ўз вақтида ва тўлиқ тўлаб боришларини назоратга олсин. ҳар чорак якунида юридик ва жисмоний шахсларга ҳисобланган ер солиғи ва ундирилган солиқлар тўғрисида ҳамда юридик шахсларга ҳисобланган мол-мулк солиғи ва ундирилган бошқа солиқлари тўғрисида халқ депутатлари туман Кенгашига ахборот бериб борсин.

4. Халқ депутатлари Шеробод туман Кенгаши депутатлари, туман ҳокимлиги ахборот хизмати (А. Тоштемиров) ва «Шеробод ҳаёти» газетаси таҳририяти (П. Муҳаммадиев) мазкур лойиҳаларни амалга оширишдан мақсад ва унинг туман иқтисодиётини юксалтиришдаги афзалликлари тўғрисида оммавий ахборот воситалари ва интернет тармоқларида кенг ёритиб бориш тавсия этилсин.

5. Жамоатчилик муҳокамасига қўйилган қарор лойиҳасига сессияда депутатлар томонидан билдирилган таклифлар инобатга олиниб, мазкур қарорга тузатишлар, қўшимча ўзгартиришлар киритилсин.

6. Халқ депутатлари Шеробод тумани Кенгашининг 2025 йил 12 февралдаги «Шеробод туманида 2025 йилда юридик шахсларнинг мол-мулкига солинадиган солиқнинг минимал қийматига нисбатан коэффициент қўллаш тўғрисида» ва «Шеробод туманида юридик ва жисмоний шахсларнинг қишлоқ хўжалигига мўлжалланмаган ерларига 2025 йил учун ер солиғи ставкаларини белгилаш ҳақида» VII-6-14-8-119-K/25-сонли қарори ўз кучини йўқотган деб ҳисоблансин.

7. Ушбу қарорнинг ижросини назорат қилиш халқ депутатлари Шеробод тумани Кенгашининг Маҳаллий бюджет, тадбиркорликни ривожлантириш ва иқтисодий ислоҳотлар масалалари бўйича доимий комиссияси (А. Чориев) зиммасига юклатилсин.

8. Мазкур қарор расман эълон қилинган кундан кучга киради.