Oʻzbekiston Respublikasi Oliy Majlisi Qonunchilik palatasi Ekologiya va atrof-muhitni muhofaza qilish masalalari qoʻmitasining (bundan buyon matnda Qoʻmita deb yuritiladi) 2025-yildagi faoliyati toʻgʻrisidagi axborotini koʻrib chiqib, Oʻzbekiston Respublikasi Oliy Majlisi Qonunchilik palatasining Kengashi taʼkidlaydiki, hisobot davrida Qoʻmita tomonidan qonun ijodkorligi faoliyati samaradorligini oshirishga hamda qonun hujjatlarini takomillashtirish boʻyicha takliflar tayyorlashga alohida eʼtibor qaratilgan. Shuningdek, qonunlarning ijrosi ustidan taʼsirchan parlament nazorati olib borilgan.

Hisobot davrida qoʻmita 10 ta qonun loyihasiga, shu jumladan 2 ta birlashgan qonun loyihasiga masʼul boʻlib, ularning 8 tasi Oʻzbekiston Respublikasi Oliy Majlisining Qonunchilik palatasi (bundan buyon matnda Qonunchilik palatasi deb yuritiladi) tomonidan qabul qilingan va Oʻzbekiston Respublikasi Oliy Majlisining Senatiga yuborilgan.

Qonun hujjatlarini xatlovdan oʻtkazish va nazorat-tahlil tadbirlari yakunlaridan, saylovchilar bilan uchrashuvlarda koʻtarilgan dolzarb masalalardan hamda Oʻzbekiston Respublikasi Prezidentining qarorlari va farmonlarida belgilangan vazifalardan kelib chiqib, Qoʻmita aʼzolari tomonidan jami 9 ta qonun loyihasi ishlab chiqilgan.

Qonunlarning ijro etilish holatini oʻrganish, davlat organlari rahbarlarining axborotini eshitish, Qonunchilik palatasining va Qoʻmitaning qarorlari ijrosini monitoring qilish yuzasidan jami 16 ta nazorat-tahlil tadbiri oʻtkazilgan.

Nazorat-tahlil tadbirlarida Oʻzbekiston Respublikasi Prezidenti raisligida oʻtkazilgan videoselektor yigʻilishlarida hamda Oʻzbekiston Respublikasi Prezidentining hududlarga tashriflari davomida deputatlar korpusiga tavsiya etilgan masalalarga, shu jumladan korrupsiyaga qarshi kurashish va korrupsiya omillarini bartaraf etish borasida amalga oshirilgan ishlar holatini oʻrganishga alohida eʼtibor qaratilgan.

Hisobot davrida Oʻzbekiston Ekologik partiyasi fraksiyasining hamda Qoʻmitaning taklifi asosida Oʻzbekiston Respublikasi qurilish va uy-joy kommunal xoʻjaligi vaziri Sh. Xidoyatovning “Oqova suvlarni chiqarib yuborish tizimlarini modernizatsiya qilish va yangilarini qurish boʻyicha amalga oshirilayotgan ishlar haqida”gi axboroti Qonunchilik palatasi majlisida eshitildi.

Shuningdek Qoʻmita tashabbusi bilan davlat organlarining mansabdor shaxslariga 3 ta parlament soʻrovi, Qoʻmita aʼzolari tomonidan 21 ta deputat soʻrovi yuborilgan.

Qoʻmita aʼzolari jismoniy va yuridik shaxslardan kelib tushgan 197 ta murojaatni belgilangan tartibda koʻrib chiqqan.

Oʻtgan davrda Qoʻmita faoliyatiga doir jami 25 ta tadbir, shu jumladan 11 ta davra suhbati, 10 ta seminar, 3 ta konferensiya hamda 1 ta brifing oʻtkazilgan.

Qoʻmita huzurida Jamoatchilik kengashi shakllantirilib, mazkur jamoatchilik kengashi aʼzolarining Qoʻmita masʼul boʻlgan qonun loyihalari muhokamasiga bagʻishlangan ishchi guruh yigʻilishlarida muntazam ishtirok etishi taʼminlangan.

Hisobot davrida Qoʻmita aʼzolari tomonidan ommaviy axborot vositalarida jami 2 952 marotaba chiqish qilingan hamda qonun ijodkorligiga va Qoʻmita faoliyatiga oid materiallarning muntazam yoritib borilishi taʼminlangan.

Shu bilan birga Qoʻmita tomonidan amalga oshirilgan ishlar tahlili uning faoliyatida oʻz yechimini kutayotgan ayrim masalalar ham mavjudligini koʻrsatmoqda.

Xususan, qonun tashabbuskorligi borasidagi takliflarni koʻpaytirish, qabul qilingan qonunlar ijrosi boʻyicha nazorat-tahlil tartibida oʻtkaziladigan oʻrganishlarga doir ishlarni yanada kengaytirish talab etilmoqda.

Qoʻmita tashabbusi bilan oʻtkazilgan parlament nazorati tadbirlari yakunlari boʻyicha qabul qilingan qarorlar ijrosini doimiy ravishda monitoring qilib borish muhim ahamiyat kasb etadi.

Qoʻmita huzuridagi ekspertlar guruhi aʼzolarini qonun loyihalarini ishlab chiqishga va nazorat-tahlil tadbirlariga kengroq jalb qilish lozim.

Shuningdek fuqarolar tomonidan qonun loyihalari boʻyicha berilayotgan takliflarni bevosita ular ishtirokida Qoʻmita majlislarida muhokama qilish, joylarda fuqarolar tomonidan koʻtarilayotgan muammolarni masʼul vazirlik va idoralar bilan birgalikda koʻrib chiqish borasidagi ishlarni yanada kuchaytirish zarur.

Yuqorida bayon etilganlardan kelib chiqib, Oʻzbekiston Respublikasi Oliy Majlisi Qonunchilik palatasining Kengashi qaror qiladi:

1. Oʻzbekiston Respublikasi Oliy Majlisi Qonunchilik palatasi Ekologiya va atrof-muhitni muhofaza qilish masalalari qoʻmitasining 2025-yildagi faoliyati toʻgʻrisidagi axboroti maʼlumot uchun qabul qilinsin.

2. Oʻzbekiston Respublikasi Oliy Majlisi Qonunchilik palatasining Ekologiya va atrof-muhitni muhofaza qilish masalalari qoʻmitasi:

qonun loyihalarini ishlab chiqishda va Qoʻmita masʼul boʻlgan qonun loyihalarini maromiga yetkazishda jamoatchilikning, shu jumladan qoʻmita huzuridagi jamoatchilik kengashi aʼzolarining takliflarini, fikr-mulohazalarini inobatga olish, nazorat-tahlil tadbirlariga ekspertlarni kengroq jalb etish;

davlat organlari mansabdor shaxslarining ekologiya, atrof-muhitni muhofaza qilish va iqlim oʻzgarishiga qarshi kurashish sohasidagi faoliyati yuzasidan axborotini eshitib borish amaliyotini davom ettirish;

qonunchilik tashabbusi huquqi subyektlari vakillari bilan hamkorlikda qonun loyihalari boʻyicha tizimli ravishda davra suhbatlari va seminarlar oʻtkazib borish amaliyotini davom ettirish;

jismoniy va yuridik shaxslarning Qoʻmita nomiga yuborilgan murojaatlarida koʻtarilayotgan dolzarb muammolarni har tomonlama tahlil qilish, ularning yuzaga kelish sabablarini oʻrganish, koʻtarilgan masalalarga toʻliq yechim topish borasida mutasaddi vazirlik va idoralar tomonidan amalga oshirilayotgan ishlar ustidan taʼsirchan parlament nazoratini amalga oshirish choralarini koʻrsin.

3. Ushbu Qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi Spikerining oʻrinbosari R. Xakimov zimmasiga yuklatilsin.

4. Ushbu Qaror qabul qilingan kundan eʼtiboran kuchga kiradi.