Ўзбекистон Республикаси «Маҳаллий давлат ҳокимияти тўғрисида»ги Қонунининг 6, 24-моддалари, Бюджет кодексининг 27, 99-моддалари, Ўзбекистон Республикасининг «2026 йил учун Ўзбекистон Республикасининг Давлат бюджети тўғрисида» ЎРҚ-1105-сон Қонунига мувофиқ, Ўзбекистон Республикаси Ҳисоб палатасининг 2025 йил 20-октябрдаги 02-1511-сонли ва Иқтисодиёт ва молия вазирлигининг 2025 йил 25 декабрдаги 01/57-1-29235-сонли хатларини, Халқ депутатлари вилоят Кенгашининг 2025 йил 29 декабрдаги «Фарғона вилоятининг 2026 йилги маҳаллий бюджетини тасдиқлаш тўғрисида»ги VII-15-160-11-0-К/25-сонли қарорини инобатга олиб, Халқ депутатлари туман Кенгаши қарор қилади:

1. Ўзбекистон Республикасининг «2026 йил учун Ўзбекистон Республикасининг Давлат бюджети тўғрисида»ги Қонуни (кейинги ўринларда Қонун деб юритилади) ҳамда Халқ депутатлари вилоят Кенгашининг 2025 йил 29 декабрдаги «Фарғона вилоятининг 2026 йилги маҳаллий бюджетини тасдиқлаш тўғрисида»ги VII-15-160-11-0-К/25-сонли қарори раҳбарлик ва ижро учун қабул қилинсин.

2. Мазкур қарорга мувофиқ, Фарғона тумани маҳаллий бюджетининг 2026 йилги даромадлари 191 652,2 млн. сўм ва харажатлари 191 652,2 млн. сўмга маълумот учун қабул қилинганлиги инобатга олинсин.

3. Қуйидагилар:

Фарғона тумани маҳаллий бюджети даромадларининг 2026 йил учун асосий прогноз кўрсаткичлари 1-иловага;

Туман маҳаллий бюджетидан 2026 йилда ҳудудий бюджет маблағларини тақсимловчиларга ажратиладиган харажатларнинг умумий чекланган миқдорлари 2-иловага;

2026 йил учун туман маҳаллий бюджетига тартибга солувчи даромадлардан ажратмаларнинг нормативлари 3-иловага;

4. Туман бюджетининг 2026 йил даромадлари ва харажатлари 4-иловага мувофиқ маълумот учун қабул қилинсин.

5. Туманнинг бюджети шахсий ғазна ҳисобварағида турган бюджет маблағларининг 2026 йилда йўл қўйиладиган энг кам миқдори 5-иловага мувофиқ белгилансин.

6. Туман бюджети захира жамғармаси ҳажми 2026 йил учун 2 212,5 млн. сўм миқдорида белгилансин.

2026 йил учун туман бюджетининг захира жамғармаси туман бюджет тасдиқланган умумий харажатларининг (бундан туман бюджетининг жамоатчилик фикри асосида шакллантириладиган тадбирларни молиялаштиришга доир маблағлари мустасно) камида 1,0 фоизи миқдорида шакллантирилади.

Бунда туман бюджетининг захира жамғармаси миқдори олдинги йилдаги ҳажмидан кам бўлмаган миқдорда шакллантирилиши инобатга олинсин.

7. Қуйидагилар:

Қишлоқ хўжалиги учун мўлжалланмаган ерлар учун юридик шахслар бўйича мутлақ миқдорда 1 гектар ер учун белгиланган базавий солиқ ставкасига киритилаётган камайтирувчи ва оширувчи коэффитсиэнтлар 6-иловага;

жисмоний шахслар бўйича (деҳқон хўжалигини юритиш учун берилган қишлоқ хўжалигига мўлжаллаган ерлардан ташқари) мутлақ миқдорда 1 м² учун белгиланган базавий солиқ ставкаларига нисбатан киритилаётган камайтирувчи ва оширувчи коэффитсиэнтлар 7-иловага;

кўчмас мулк объектлари бўйича ижара қийматининг 1 м² учун учун ўрнатилаётган минимал миқдорлари 8-иловага;

норуда қурилиш материаллари учун (цемент ишлаб чиқариш учун мўлжалланган оҳактошдан ташқари) қатъий белгиланган солиқ ставкалари миқдорлари 9-иловага;

ер усти ва ер ости манбаларидан олинадиган сув ресурслари учун солиқ ставкалари 1 м³ учун мутлақ ўлчамда белгиланадиган миқдорлари 10-иловага мувофиқ тасдиқлансин.

8. Ўзбекистон Республикаси Президентининг 2025 йил 26 декабрдаги ПҚ-387-сонли қарорига мувофиқ вилоят Иқтисодиёт ва молия бош бошқармаси:

республика бюджетидан Фарғона вилоятининг вилоят бюджетига ўтказиб бериладиган даромад прогнозининг ошириб бажарилган қисмидан 50 фоизини 2025 йил 1 декабрь ҳолатига статистика органларидан олинган туман (шаҳар)лар аҳолисининг жами вилоят аҳолиси улушига мувофиқ туман (шаҳар)лар бюджетларига белгиланган муддатларда ўтказиш;

деҳқон бозорлари, ихтисослаштирилган ва буюм бозорларидан тушган солиқлар бўйича вилоят бюджетига ўтказилган маблағларни ушбу соҳадаги ҳамда маҳаллаларда инфратузулмани яхшилаш учун мазкур бозорлар жойлашган туман (шаҳар)лар бюджетларига тўлиқ ўтказилишини таъминлаши белгиланганлиги маълумот учун қабул қилинсин.

9. Туман ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари О. Абдурахимов, туман иқтисодиёт ва молия бўлими (А. Юсупов), туман солиқ инспекцияси (И. Шаропов) туман ҳокимлиги билан биргаликда 2026 йил маҳаллий бюджети учун белгиланган кўрсаткичларни ўз вақтида ва самарали бажарилишини таъминлаш чораларини кўрсин.

10. Туман ҳокимлиги, ҳудудий бюджет маблағлари тақсимловчилар 2026 йил учун ажратилаётган бюджет маблағларидан мақсадли ва самарали фойдаланиш, бюджет интизомига риоя этилиши устидан назорат ва масъулиятни янада кучайтириш, маҳаллий бюджетга солиқлар ва бошқа мажбурий тўловларнинг тўлиқ тушумини таъминлаш ҳамда бюджет даромадлар базасини ошириш ва қўшимча резервларни аниқлаш зарурлигига алоҳида эътибор қаратсин.

11. Туман солиқ инспекцияси (И. Шаропов) Ўзбекистон Республикаси Солиқ кодексида белгиланган ваколатлардан келиб чиқиб:

солиқларнинг тўлиқ ва тўғри ҳисобланишини ҳамда ушбу солиқларни ўз вақтида бюджетга ундирилиши устидан солиқ назоратини ўрнатиш;

ер солиғи, сув ресурсларидан фойдаланганлик учун солиқ ва мол-мулк солиқлари бўйича доимий таҳлилилар ўтказган ҳолда, солиқларни тўлиқ ҳисобланишини таъминлаш ҳамда ушбу солиқ тўловлари бўйича солиқ қарздорлигига йўл қўймаслик чораларини кўриш;

айланмадан солиқ тури бўйича солиқ тўловчилар томонидан нақд пул айланмаларининг солиқ ҳисоботларида тўлиқ акс эттирилиши устидан доимий солиқ назоратини ўрнатиш ҳамда зарур ҳолларда хронометраж ва камерал солиқ назорати тадбирларини ўтказиш;

ер ва мол-мулк солиғининг солиқ базасини ошириш, яъни хатлов ишларини самарали ва мунтазам ташкил этиб бориш вазифалари юклатилсин.

12. Мажбурий ижро бюроси туман бўлими (С. Абдуқодиров), туман солиқ инспекцияси (И. Шаропов) билан ҳамкорликда солиқлар ва бошқа мажбурий тўловлар бўйича мавжуд солиқ қарздорликларини бюджетга ундириш юзасидан тегишли чоралар кўриб борсинлар ҳамда чораклар якуни билан солиқ қарздорликларининг чорак бошига нисбатан камайиб бориши бўйича барча комплекс чора-тадбирлар кўриш вазифаси юклатилсин.

13. Давлат активларини бошқариш агентлиги Фарғона вилоят ҳудудий бошқармаси ва Бўш турган объектларидан самарали фойдаланишни ташкил этиш марказининг Фарғона вилоят ҳудудий бошқармасига:

бўш турган давлат мулки объектларини аниқлаш бўйича доимий равишда хатлов ишларини ташкил этиш;

хатлов натижаларига кўра туманда мавжуд бўш турган давлат мулки объектлари рўйхатини шакллантириш, ижарага бериш ёки сотиш бўйича тегишли таклифлар тайёрлаш вазифаси юклатилганлиги инобатга олинсин.

14. Туман сув етказиб бериш хизмати давлат муассасаси Д. Юлдашев ва туман солиқ инспекцияси (И. Шаропов) туман ҳокимлиги билан биргаликда туманда суғоришга сарфланаётган сув ҳажмлари бўйича аниқ ҳисоб-китоблар юритган ҳолда мазкур истеъмол ҳажмлари бўйича сув ресурсларидан фойдаланганлик учун солиқларни тўлиқ ҳисобланишини ҳамда молия йили якунига қадар маҳаллий бюджетга тўлиқ ундириб олиш вазифаси юклатилсин.

Бунда, қишлоқ хўжалиги корхоналари томонидан истеъмол қилинаётган сув ресурслари ҳажмлари ва ушбу ҳажмлар бўйича ҳисобланаётган сув солиқлари бўйича доимий таҳлиллар ўтказишга алоҳида эътибор қаратилсин.

15. Туман ички ишлар бўлими (М. Қундузов), Адлия бўлими С. Маҳкамов туманда бюджетга ҳисобланган бож, жарима ва йиғимларни ўз вақтида тўлиқ бюджетга ундириш чораларини кўриб борсинлар.

16. Халқ депутатлари туман Кенгаши ҳамда туман ҳокимлиги Ўзбекистон Республикаси Бюджет кодексининг 27 ва 28-моддаларида белгиланган бюджет соҳасидаги ваколатларидан келиб чиқиб, бюджетга ва давлат мақсадли жамғармаларига тушумлар тўлиқ ва ўз вақтида тушиши ҳамда бюджет маблағларининг мақсадли сарфланиши устидан назорат ўрнатсин.

17. Ҳудудий бюджет маблағларини тақсимловчилар ҳар чорак якуни билан бюджет маблағларининг самарали ва мақсадли сарфланганлиги, харажатларнинг амалий натижалари юзасидан халқ депутатлари Фарғона туман Кенгашига ҳисобот бериб борсинлар.

Бунда, ҳудудий бюджет маблағларини тақсимловчилар:

бюджетдан ажратилган маблағлардан мақсадли ва самарали фойдаланиш, хусусан иш ҳақи ва унга тенглаштирилган тўловлар, озиқ-овқат, дори-дармон, коммунал хизматлар ва давлат дастурлари учун белгиланган харажатларни тўлиқ режалаштирилиши ва ўз вақтида тўланиши;

ўзларининг ва тасарруфидаги ташкилотларнинг харажатлар сметаси ва штат жадваллари ҳамда даромадлар ва харажатлар сметаларининг тўғри тузилиши;

бюджетдан ажратилган маблағларнинг мақсадли сарфланиши ва мақсадли индикаторларнинг тўлиқ бажарилиши;

тасарруфидаги тизим ташкилотларига бюджетдан ажратиладиган маблағларнинг тўғри тақсимланиши;

ўз тасарруфидаги тизимда бюджет интизомига амал қилиниши устидан назорат қилинишини;

бюджет жараёнининг очиқлигини таъминлаш мақсадида расмий веб-сайтларда маълумотларни жойлаштириб борилишини таъминласинлар.

18. Туман ҳокимлиги ахборот хизмати А. Эргашев, туман солиқ инспекцияси (И. Шаропов), иқтисодиёт ва молия бўлими (А. Юсупов) билан биргаликда тумандаги оммавий ахборот воситаларида, ҳокимлик муассислигидаги «Водил ёғдуси» газетасида Қонунда белгиланган айрим солиқлар ва тўлов ставкалари, солиқ солиш тартиблари ҳамда бошқа маълумотларни эълон қилиниши ҳамда ҳокимликнинг расмий веб-сайтига жойлаштирилишини ташкил этсин.

19. Мазкур қарор бажарилишини назорат қилиш халқ депутатлари туман Кенгашининг Маҳаллий бюджет, тадбиркорликни ривожлантириш ва иқтисодий ислоҳотлар бўйича доимий комиссияси М. Йўлдашев ҳамда туман ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари О. Абдурахимов зиммасига юклатилсин.