Маълумки, Ўзбекистон Республикаси Президенти Шавкат Мирзиёев раислигида жорий йилнинг 9 июль куни «Йўл ҳаракати хавфсизлигини таъминлаш, инфратузилмасини яхшилаш ва тирбандликларни камайтириш чора-тадбирлари» юзасидан видеоселектор йиғилиши бўлиб ўтган.

Мазкур йиғилишда автомобиль йўлларида тирбандликларнинг олдини олиш мақсадида белгиланган юқори чекланган тезликни ўзгартириш юзасидан топшириқлар бериб ўтилган.

Шунингдек, Ўзбекистон Республикаси Президентининг 2025 йил 4-сентябрдаги 38-сонли топшириқлар баёни 19-бандида «Тезлик чекловларини қайта кўриб чиқиш мумкин бўлган йўл участкалари рўйхати шакллантириб, Халқ депутатлари маҳаллий кенгашларига киритиш» белгиланган.

Бундан ташқари, Ўзбекистон Республикаси Вазирлар Маҳкамасининг 2022 йил 12 апрелдаги «Йўл ҳаракати қоидаларини тасдиқлаш тўғрисида»ги 172-сон қарори билан тасдиқланган «Йўл ҳаракати қоидалари»нинг 80-банди 6-хат бошисида «Маҳаллий ижро этувчи ҳокимият органлари ДЙҲХХ билан келишилган ҳолда, йўл шароитлари юқори ва кичик тезликда хавфсиз ҳаракатланишни таъминлайдиган ҳолларда, йўлларнинг айрим қисмлари ёки ҳаракатланиш тасмаларида ҳаракатланиш тезлигини оширишга ёки камайтиришга (тегишли йўл белгилари ўрнатиб) рухсат бериш масаласини тасдиқлаш учун Қорақалпоғистон Республикаси Жўқорғи Кенгеси, халқ депутатлари вилоятлар ва Тошкент шаҳар Кенгашларига киритади» деб белгиланган.

Шунга кўра, вилоят ҳокимлиги 2025 йил 16 декабрдаги 03-7/14377-сонли хат билан халқ депутатлари вилоят Кенгашига мурожаат қилиб, вилоят ҳудудларининг (аҳоли яшаш пунктидан ташқари жойларда) айрим йўл участкаларидаги мавжуд тезлик чекловларини қайта кўриб чиқишни сўраган.

Хусусан, вилоятдаги соха мутахассислари экспертлари ҳамкорлигида ўтказилган ўрганиш ва таҳлилларга кўра, бугунги кунда вилоят ҳудудидан ўтган халқаро ва давлат аҳамиятидаги автомобиль йўлларининг аҳоли яшаш пунктларидан ташқари қисмларида тирбандликнинг олдини олиш мақсадида, йўналишларидаги юқори чекланган ҳаракат тезлигини 70 км/соат, шунингдек, айрим йўналишларида эса 120 км/соат этиб белгилаш ҳамда 3.24 «Юқори тезлик чекланган» (70 км/соат, 120 км/соат) йўл белгиларини ўрнатиш зарурияти юзага келган.

Шунга кўра, вилоят ҳудудидаги (аҳоли яшаш пунктидан ташқари жойларда) тезлик чекловлари қайта кўриб чиқиладиган йўл участкалари рўйхати шакллантирилиб, мутасадди ва манфаатдор ташкилотлар томонидан келишилди (тасдиқланди).

Мазкур масала халқ депутатлари вилоят Кенгашининг «Коррупцияга қарши курашиш ва хавфсизлик масалалари бўйича» доимий комиссияси томонидан муҳокама қилиниб, вилоят Кенгаши сессияси кун тартибига киритиш тўғрисидаги қарор қабул қилинган.

Вилоят ҳудудларида йўл-транспорт ҳодисаларининг олдини олиш, йўл ҳаракати хавфсизлигини назорат қилиш ва самарадорлигини ошириш мақсадида «Маҳаллий давлат ҳокимияти тўғрисида»ги Ўзбекистон Республикаси Қонунининг 6 ва 24-моддаларига мувофиқ халқ депутатлари вилоят Кенгаши қарор қилади:

1. Ўзбекистон Республикаси Президентининг 2025 йил 4-сентябрдаги 38-сонли топшириқлар баёни 19-банди ҳамда Ўзбекистон Республикаси Вазирлар Маҳкамасининг 2022 йил 12 апрелдаги «Йўл ҳаракати қоидаларини тасдиқлаш тўғрисида»ги 172-сон қарори раҳбарлик ва ижро учун қабул қилинсин.

2. Вилоят ҳокимлигининг вилоят ҳудудларининг (аҳоли яшаш пунктидан ташқари жойларда) айрим йўл участкаларидаги мавжуд тезлик чекловларини йўл шароитларини инобатга олиб, қайта кўриб чиқиш юзасидан таклифи маъқуллансин.

3. Вилоят ҳудудидаги (аҳоли яшаш пунктидан ташқари жойларда) тезлик чекловлари қайта кўриб чиқиладиган йўл участкалари рўйхати мутасадди ва манфаатдор ташкилотлар томонидан келишилганлиги инобатга олинсин.

4. Мазкур масала халқ депутатлари вилоят Кенгашининг «Коррупцияга қарши курашиш ва хавфсизлик масалалари бўйича» доимий комиссияси томонидан ўрганиб чиқилганлиги ва доимий комиссия мажлисида муҳокама қилиниб, вилоят Кенгаши сессияси кун тартибига киритиш тўғрисидаги қарори асос учун қабул қилинсин.

5. Вилоят ҳудудларининг (аҳоли яшаш пунктидан ташқари жойларда) айрим йўл участкаларидаги мавжуд тезлик чекловларини (тегишли йўл белгилари ўрнатган ҳолда) қайта белгилашга руҳсат берилсин.

6. Шунга кора, вилоят ҳудудидаги (аҳоли яшаш пунктидан ташқари жойларда) йўл участкалари ва уларда қайта белгиланаётган тезлик чекловлари иловага мувофиқ тасдиқлансин.

7. Ҳаракат тезлигини оширилаётган ҳудудлардаги автомобиль йўлларида йўл ҳаракати ҳодисаларини олдини олиш мақсадида кўча чироқлари ва ёритгичлар ўрнатиш, йўл чизиқларини янгилаш ҳамда пиёдалар ўтиш йўлаклари (белгилари билан бирга) белгиланган талаблар асосида ташкил этилсин.

8. Вилоят ИИБ ЙҲХБ (Ф. Шайзоков), Автомобиль йўллари ҳудудий бош бошқармаси (Х. Кетмонов) ҳамда тегишли туман (шаҳар) ҳокимликлари билан биргаликда мазкур қарор билан тасдиқланган (белгиланган) йўл участкалари ва уларда қайта белгиланаётган тезлик чекловларини акс эттирувчи (билдирувчи) тегишли йўл белгиларини амалдаги тартиб асосида ўрнатилишини таъминласин ҳамда натижаси юзасидан вилоят Кенгашига ахборот киритсин.

9. Вилоят Ички ишлар бошқармаси бошлиғи А. Икрамовга мазкур қарор билан тасдиқланган (белгиланган) йўл участкалари ва уларда қайта белгиланаётган тезлик чекловларини кўрсатувчи (билдирувчи) тегишли йўл белгиларини ўз вақтида ва белгиланган тартиб асосида ўрнатилишини назоратга олиш тавсия этилсин.

10. Вилоят ИИБ ЙҲХБ (Ф. Шайзоков) Адлия бошқармаси (А. Омонов) йўл участкалари ва уларда қайта белгиланаётган тезлик чекловлари юзасидан аҳоли ўртасида тарғибот ишларини олиб борсин.

11. Вилоят ИИБ ЙҲХБ (Ф. Шайзоков) мазкур қарор билан тасдиқланган (белгиланган) йўл участкалари ва уларда қайта белгиланаётган тезлик чекловлари юзасидан аҳолини хабардор қилиш мақсадида, тезлик чекловларига киритилган ўзгаришларнинг сабаб ва омиллари ҳамда бу борада кутилаётган натижаларни оммавий ахборот воситалари, ижтимоий тармоқлар ва расмий веб-сайтларда кенг ёритилишини ташкил этсин.

12. Вилоят ҳокимлиги Ахборот хизмати (М. Сулаймонов), вилоят ИИБ ЙҲХБ (Ф. Шайзоков) билан биргаликда вилоят телерадиокомпанияси ҳамда вилоятдаги бошқа оммавий ахборот воситаларида, ҳокимлик муассислигидаги газеталарда қайта белгиланаётган тезлик чекловларини эълон қилиниши ҳамда ҳокимликларнинг расмий веб-сайтларига жойлаштирилишини ташкил этсин.

13. Ушбу Қарор 2026 йилнинг 1 февраль кунидан кучга киради.

14. Мазкур Кенгаш қарори ижросини назорат қилиш халқ депутатлари вилоят Кенгашининг «Коррупцияга қарши курашиш ва хавфсизлик масалалари бўйича» доимий комиссияси (Ш. Ғаниева) ҳамда вилоят Ички ишлар бошқармаси бошлиғи А. Икрамов зиммасига юклансин.