2025 йилнинг 25 декабрь куни Ўзбекистон Республикасининг «2026 йил учун Ўзбекистон Республикасининг Давлат бюджети тўғрисида» ЎРҚ-1105-сон Қонуни қабул қилинди.

2025 йил 29 декабрь куни эса Халқ депутатлари Фарғона вилояти Кенгашининг «Фарғона вилоятининг 2026 йилги маҳаллий бюджетини тасдиқлаш тўғрисида»ги VII-15-160-11-0-К/25-сон Қарори қабул қилинди. Мазкур қарорга мувофиқ, шунингдек, Фарғона вилояти Иқтисодиёт ва молия бош бошқармасининг 2025 йил 29 декабрдаги 01/07-17/10008-сон, туман иқтисодиёт ва молия бўлимининг 2025 йил 29 декабрдаги 01/32/20-сон хатларини инобатга олиб, Ўзбекистон Республикасининг Бюджет кодексини 27, 99-моддалари, Ўзбекистон Республикасининг «Маҳаллий давлат ҳокимияти тўғрисида»ги Қонунининг 6, 24-моддаларига асосан халқ депутатлари Қува туман Кенгаши қарор қилади:

1. Ўзбекистон Республикасининг «2026 йил учун Ўзбекистон Республикасининг Давлат бюджети тўғрисида»ги Қонуни ҳамда халқ депутатлари Фарғона вилоят Кенгашининг 2025 йил 29 декабрдаги VII-15-160-11-0-К/25-сон қарори (кейинги ўринларда қарор деб юритилади) раҳбарлик ва ижро учун қабул қилинсин.

2. Қарорга мувофиқ, Қува туман бюджетининг 2026 йилги даромадлари 204.9 миллиард сўм ва харажатлари эса 204.9 миллиард сўмга тенг ҳисобида маълумот учун қабул қилинганлиги, шунингдек Қува туман бюджетининг шахсий ғазна ҳисобварағида турган бюджет маблағларининг йўл қўйиладиган энг кам миқдори 1.018 миллиард сўм этиб белгиланганлиги инобатга олинсин.

3. 2026 йил учун Қува туман маҳаллий бюджети даромадларининг прогноз кўрсаткичлари миқдори 1-иловага мувофиқ;

2026 йил учун Қува туман маҳаллий бюджетидан ҳудудий бюджет маблағлари тақсимловчиларга ажратиладиган маблағларнинг чекланган миқдорлари 2-иловага мувофиқ тасдиқлансин.

4. Туман бюджети захира жамғармаси ҳажми 2026 йил учун 2.655 миллиард сўм миқдорида белгилансин.

Бунда, захира жамғармаси маблағларини амалдаги бюджет қонунчилигига мувофиқ, бюджет тизими бюджетлари шакллантирилаётганда олдиндан назарда тутиб бўлмайдиган харажатларни, шунингдек ижтимоий-иқтисодий беқарорлик юзага келган вазиятларда амалга оширилиши зарур бўлган тадбирларни молиялаштириш учун йўналтирилиши таъминлансин.

5. Қуйидагилар:

Қува тумани ҳудудида қишлоқ хўжалигига мўлжалланмаган ерлар учун юридик шахслар бўйича мутлақ миқдорда белгиланган базавий солиқ ставкасига киритилаётган камайтирувчи ва оширувчи коэффициент миқдорлари 3-иловага мувофи;

Қува тумани ҳудудида жисмоний шахслар бўйича (деҳқон хўжалигини юритиш учун берилган қишлоқ хўжалигига мўлжалланган ерлардан ташқари) мутлақ миқдорда 1 кв.м. учун белгиланган базавий солиқ ставкаларига нисбатан киритилаётган камайтирувчи ва оширувчи коэффициент миқдорлари 4-иловага мувофиқ;

норуда қурилиш материаллари учун (цемент ишлаб чиқариш учун мўлжалланган оҳактошдан ташқари) қатъий белгиланган солиқ ставкалари миқдорлари 5-иловага мувофиқ;

Қува тумани бўйича сув ресурсларидан фойдаланганлик учун белгиланган солиқ ставка миқдорлари 6-иловага;

Мол-мулкни ижарага берувчи жисмоний ва юридик шахслар учун белгиланган ижара тўловининг 1 кв. метри учун энг кам ставка миқдорлари 7-иловага мувофиқ тасдиқлансин.

6. Туман ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари (Ж. Закиров), туман Иқтисодиёт ва молия бўлими бошлиғининг ўринбосари (А. Солиев), туман солиқ инспекцияси (А. Ахунов) билан биргаликда 2026 йил маҳаллий бюджети учун белгиланган кўрсаткичларни ўз вақтида ва самарали бажарилишини таъминлаш чораларини кўрсин.

7. Ҳудудий бюджет маблағларини тақсимловчилар ҳар чорак якуни билан бюджет маблағларининг самарали ва мақсадли сарфланганлиги, харажатларнинг амалий натижалари юзасидан халқ депутатлари туман Кенгашига ҳисобот бериб борсинлар.

Бунда, ҳудудий бюджет маблағларини тақсимловчилар:

бюджетдан ажратилган маблағлардан мақсадли ва самарали фойдаланиш, хусусан иш ҳақи ва унга тенглаштирилган тўловлар, озиқ-овқат, дори-дармон, коммунал хизматлар ва давлат дастурлари учун белгиланган харажатларни тўлиқ режалаштирилиши ва ўз вақтида тўланиши;

ўзларининг ва тасарруфидаги ташкилотларнинг харажатлар сметаси ва штат жадваллари ҳамда даромадлар ва харажатлар сметаларининг тўғри тузилиши;

бюджетдан ажратилган маблағларнинг мақсадли сарфланиши ва мақсадли индикаторларнинг тўлиқ бажарилиши;

тасарруфидаги тизим ташкилотларига бюджетдан ажратиладиган маблағларнинг тўғри тақсимланиши;

ўз тасарруфидаги тизимда бюджет интизомига амал қилиниши устидан назорат қилинишини;

бюджет жараёнининг очиқлигини таъминлаш мақсадида расмий веб-сайтларда маълумотларни жойлаштириб борилишини таъминласинлар.

8. Мазкур қарор тегишли таҳририятлар ва оммавий ахборот воситаларида ёритилиши тавсия этилсин ҳамда туман ҳокимлигининг расмий веб-сайтига жойлаштирилсин.

9. Мазкур қарорини бажарилишини назорат қилиш туман ҳокимининг биринчи ўринбосари Ж. Закиров ҳамда назорат қилиш халқ депутатлари Қува туман Кенгашининг «Маҳаллий бюджет, тадбиркорликни ривожлантириш ва иқтисодий ислоҳотлар масалалари бўйича» доимий комиссияси (А. Дадажонов) зиммасига юклансин.