Ўзбекистон Республикасининг «2026 йил учун Ўзбекистон Республикасининг Давлат бюджети тўғрисида»ги Қонуни, «Солиқ ва бюджет сиёсатининг 2026 йилга мўлжалланган асосий йўналишлари қабул қилинганлиги муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги Ўзбекистон Республикаси Қонуни, Ўзбекистон Республикаси Солиқ Кодексининг 412, 420, 422, 429 ва 437-моддалари, Ўзбекистон Республикаси Президентининг 2020 йил 3 декабрдаги «Ресурс солиқлари ва мол-мулк солиғини янада такомиллаштириш тўғрисида»ги ПФ-6121-сон, 2024 йил 20 декабрдаги «Ҳудудларда юқори иқтисодий ўсиш ва аҳоли бандлигини таъминлашнинг янги тизимини йўлга қўйиш ҳамда бу борада маҳаллий ҳокимликларнинг роли ва масъулиятини ошириш чора-тадбирлари тўғрисида»ги ПФ-223-сон Фармонларига асосан халқ депутатлари вилоят Кенгаши қарор қилади:

1. Вилоят солиқ бошқармаси бошлиғи Д.Юлдашевнинг Бухоро вилояти бўйича 2026 йилда юридик ва жисмоний шахслардан ундириладиган айрим солиқларга қўлланиладиган коэффициентлар ҳамда мутлақ миқдор суммалари тўғрисидаги ахбороти маълумот учун қабул қилинсин.

2. «Солиқ ва бюджет сиёсатининг 2026 йилга мўлжалланган асосий йўналишлари қабул қилинганлиги муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида»ги Ўзбекистон Республикаси Қонунида 2026 йилда Бухоро вилояти бўйича юридик шахсларнинг қишлоқ хўжалигига мўлжалланмаган ерларининг базавий солиқ ставкаси 1 гектар учун 42,4 млн.сўм, жисмоний шахслар ерларининг 1 кв.м учун базавий солиқ ставкаси 377 сўм ҳамда юридик шахсларнинг мол-мулки ва жисмоний шахсларга тегишли бўлган, яшашга мўлжалланмаган кўчмас мулк объектлари учун мол-мулк солиғини ҳисоблашда 1 кв.метр учун энг кам қиймати туманларда 1 390 000 сўм этиб белгиланганлиги маълумот учун қабул қилинсин.

3. Маҳаллий солиқлар ва бошқа мажбурий тўловларнинг ставкалари қонунчиликда белгиланган миқдорлар доирасида:

қишлоқ хўжалиги учун мўлжалланмаган ерлар учун юридик шахслар бўйича 2026 йилда Бухоро вилояти учун мутлақ миқдорда белгиланган ер солиғининг базавий солиқ ставкаларига қўлланиладиган коэффициентлар миқдори 1-иловага;

жисмоний шахсларга тегишли қишлоқ хўжалигига мўлжалланмаган ерлар бўйича 2026 йилда Бухоро вилояти учун мутлақ миқдорда 1 кв.м. учун белгиланган базавий солиқ ставкаларига қўлланиладиган коэффициентлар миқдори 2- иловага;

юридик шахсларнинг мол-мулки ва жисмоний шахсларга тегишли бўлган, яшашга мўлжалланмаган кўчмас мулк объектлари учун мол-мулк солиғини ҳисоблашда 2026 йилда 1 кв.метр учун белгиланган энг кам қийматга нисбатан қўлланиладиган коэффициентлар миқдори 3-иловага;

2026 йил учун қишлоқ хўжалигига мўлжалланган ерлар учун юридик шахслардан олинадиган ер солиғи бўйича Солиқ кодекси билан ўрнатиладиган солиқ ставкасига нисбатан қўлланиладиган коэффициентлар миқдори 4-иловага;

2026 йил учун мол-мулкни ижарага берувчи жисмоний ва юридик шахслар учун белгиланган ижара тўловининг энг кам ставкаларига нисбатан қўлланиладиган коэффициентлар миқдори 5-иловага;

2026 йил учун жисмоний шахсларнинг мол-мулк солиғи бўйича Солиқ кодекси билан ўрнатиладиган солиқ ставкаларига нисбатан қўлланиладиган коэффициентлар миқдори 6-иловага мувофиқ тасдиқлансин.

4. Халқ депутатлари туман ва шаҳар Кенгашлари маҳаллий бюджет прогнозларини инобатга олиб, мазкур қарорнинг 1 ва 2-иловаларига асосан қўлланиладиган коэффициентларга нисбатан тегишли ҳудудда жойлашган даҳа, мавзе, маҳалла, кўча кесимида 0,7 дан 3,0 миқдорда камайтирувчи ва оширувчи коэффициентларни белгилаш ҳуқуқига эга эканлиги маълумот учун қабул қилинсин.

5. Вилоят солиқ бошқармаси (Д.Юлдашев) ҳудудий солиқ органлари билан биргаликда Ўзбекистон Республикаси Солиқ кодексида белгиланган ваколатлардан келиб чиқиб:

солиқларнинг тўғри ҳисобланиши, тўлиқ ва ўз вақтида бюджетга ундирилиши устидан солиқ назорати ўрнатилишини;

ер солиғи, сув ресурсларидан фойдаланганлик учун солиқ ва мол-мулк солиқлари бўйича доимий таҳлиллар ўтказган ҳолда, солиқ тўловлари бўйича солиқ қарздорлигига йўл қўймаслик чоралари кўрилишини;

солиқ тўловчилар томонидан нақд пул айланмаларининг солиқ ҳисоботларида тўлиқ акс эттирилиши устидан доимий солиқ назорати ўрнатилишини таъминласин ҳамда амалга оширилган ишлар юзасидан ҳар чоракда халқ депутатлари вилоят Кенгашига ҳисобот бериб борсин.

6. Халқ депутатлари туман ва шаҳар Кенгашларига тегишли ҳудудда жойлашган даҳа, мавзе, маҳалла, кўча кесимида юридик ва жисмоний шахслар учун 2026 йилда белгиланган ер солиқ ставкаларини кўриб чиқиб, тегишли қарорларни 2026 йил 10 январга қадар ҳудудлардаги солиқ органларига тақдим этиш тавсия этилсин.

7. Халқ депутатлари вилоят Кенгашининг 2024 йил 26 декабрдаги «Бухоро вилояти бўйича 2025 йилда юридик ва жисмоний шахслардан ундириладиган айрим солиқларга қўлланиладиган коэффициентлар ҳамда мутлақ миқдор суммаларини тасдиқлаш тўғрисида»ги VII-4-025-2-0-К/24-сонли қарори ўз кучини йўқотган деб ҳисоблансин.

8. Вилоят ҳокимлиги ахборот хизмати, «Бухоронома» ва «Бухарский вестник» газеталари таҳририяти (Ш.Сулаймонов) мазкур қарорнинг газета ва вилоят ҳокимлигининг расмий веб-сайтида эълон қилинишини таъминласин.

9. Мазкур қарорнинг бажарилишини назорат қилиш халқ депутатлари вилоят Кенгашининг Маҳаллий бюджет, тадбиркорликни ривожлантириш ва иқтисодий ислоҳотлар масалалари бўйича доимий комиссияси зиммасига юклатилсин.

10. Ушбу қарор 2026 йил 1 январдан эътиборан кучга кириши белгилансин.