Ўзбекистон Республикаси Шаҳарсозлик кодексининг 44, 45, 46-моддаларига асосан Урганч тумани Қумравот маҳалласида, Шовот тумани Оқ олтин маҳалласида, Ҳазорасп тумани Зиёлилар маҳалласида ҳамда Урганч тумани Оқ ариклар маҳалласида «Ал-Хоразмий» мажмуаси ҳамда «Янги Ўзбекистон» массивлари барпо этилмоқда.

«Ўзшаҳарсозлик ЛИТИ» бош лойиҳа институти давлат муассасаси томонидан ушбу массивларнинг бош режа лойиҳа ҳужжатлари ишлаб чиқилган.

Юқоридагиларни инобатга олиб «Маҳаллий давлат ҳокимияти тўғрисида»ги Ўзбекистон Республикаси қонунининг 24-моддасига асосан халқ депутатлари вилоят Кенгаши қарор қилади:

1. Вилоят ҳокимлигининг 2025 йил 9 декабрдаги 03-5-09/13243-сонли хати, вилоят қурилиш ва уй-жой коммунал хўжалиги бошқармаси ҳузуридаги ҳудудий Архитектура-шаҳарсозлик кенгашининг 2025 йил 15 ноябрдаги Б-186/2-сонли баёни ва вилоят қурилиш ва уй-жой коммунал хўжалиги бошқармасининг 2025 йил 15 ноябрдаги Б-1026-сонли хати маълумот учун қабул қилинсин.

2. Қуйидагилар:

Ҳазорасп тумани Зиёлилар маҳалласи ҳудудидан барпо этилаётган «Янги Ўзбекистон» массивининг бош режа лойиҳаси 1-иловага;

Шовот тумани Оқ олтин маҳалласи ҳудудида барпо этилаётган «Янги Ўзбекистон» массивининг бош режа лойиҳаси 2-иловага;

Урганч тумани Қумравот маҳалласи ҳудудида барпо этилаётган «Янги Ўзбекистон» массивининг бош режа лойиҳаси 3-иловага;

Урганч тумани Оқ ариклар маҳалласи ҳудудида барпо этилаётган «Ал-Хоразмий» мажмуасининг бош режа лойиҳаси 4-иловага мувофиқ тасдиқлансин.

3. Ҳазорасп, Шовот ва Урганч туманлари ҳокимликлари вилоят қурилиш ва уй-жой коммунал хўжалиги бошқармаси (М.Каландаров) билан биргаликда ўз ваколатлари доирасида:

тегишли мутасадди ташкилот ва идораларни жалб этган ҳолда бош режа лойиҳалари ишлаб чиқилиши билан бир вақтда ҳудудларни ижтимоий-иқтисодий ривожлантириш юзасидан комплекс чора-тадбирлар дастурини ишлаб чиқиб, тасдиқлаш;

массивлар ҳудуди ерларидан мақсадсиз фойдаланишга ва ноқонуний қурилишларни амалга оширишга йўл қўймаслик юзасидан қатъий назорат ўрнатиш йўли билан улардан самарали фойдаланиш;

энергияни тежайдиган замонавий технологияларни жорий этиш орқали муҳандислик коммуникация тузилмасини (сув, электр, газ, иссиқлик таъминоти, телекоммуникация объектлари, канализация, ирригация) қуриш ва реконструкция қилиш йўли билан модернизация қилиш;

кўп қаватли уй-жойлар, таълим, соғлиқни сақлаш, спорт, маданият, санъат ва дам олиш обектларини оқилона жойлаштириш ҳамда бош режага мувофиқ, инфратузилмани ривожлантириш чорасини кўрсин.

4. Вилоят қурилиш ва уй-жой коммунал хўжалиги соҳасида ҳудудий назорат инспекцияси (Ш.Отаев) ҳудудларнинг тасдиқланган шаҳарсозлик ҳужжатлари асосида қурилиш объектлари жойлаштирилишини назоратга олсин.

5. «Ўзшаҳарсозлик ЛИТИ» бош лойиҳа институти давлат муассасаси тасдиқланган шаҳарсозлик ҳужжатларини қонунчиликда белгиланган тартибда амалга оширсин.

6. Ушбу қарор «Хоразм ҳақиқати» газетасида расман эълон қилсин ҳамда вилоят ҳокимлигининг расмий веб-сайтига жойлаштирилсин.

7. Ушбу қарор тасдиқланган кундан эътиборан кучга киради.

8. Ушбу қарорнинг ижросини назорат қилиш халқ депутатлари вилоят Кенгашининг маҳаллий бюджет, тадбиркорликни ривожлантириш ва иқтисодий ислоҳотлар бўйича доимий комиссияси раиси К.Игамбергенов зиммасига юклансин.