Xususiy tadbirkorlikni yanada rivojlantirish, kichik korxonalar, ayniqsa qishloq joylarda shunday korxonalar barpo etishni ragʻbatlantirish, shuningdek, taqchil xalq isteʼmol mollari ishlab chiqarishni koʻpaytirish va tashkil qilishdan korxonalarning iqtisodiy manfaatdorligini oshirish hamda isteʼmol bozorini shunday mollar bilan toʻldirish maqsadida Vazirlar Mahkamasi qaror qiladi:

1. 1994-yilning 1-yanvaridan shaharchalar, qishloqlar va ovullarning hududida yangi barpo etilayotgan (jumladan, 1994-yilning 1-yanvarigacha tashkil qilingan) va qishloq xoʻjaligi mahsuloti ishlab chiqarish, uni qayta ishlaydigan hamda xalq isteʼmol mollari ishlab chiqaradigan kichik korxonalar, yordamchi ishlab chiqarish va hunarmandchilik korxonalari uchun barcha turdagi soliqlar va budjetga toʻlovlarning amaldagi miqdorlari uch yil muddatga 50 foiz kamaytirilsin.

2. Belgilab qoʻyilsinki, mulkchilik shakllaridan qatʼi nazar, xalq isteʼmol qiladigan gʻoyat taqchil oziq-ovqat va nooziq-ovqat mahsulotlari (spirtli, spirtsiz ichimliklar va tamaki mahsulotidan tashqari) ishlab chiqaruvchi korxonalar va tashkilotlar daromad soligʻini amaldagi miqdorga nisbatan 30 foiz kamaytirilgan miqdor boʻyicha toʻlaydilar.

Z. Korxonalarning:

ilovaga muvofiq kundalik ehtiyoj mahsulotlarining fizik hajmlarini oʻstirishdan olgan daromadlari soliqdan ozod qilinsin;

raqobatga bardoshli mahsulotning yangi turlarini ishlab chiqarishdan olgan daromadlari ikki yil muddatga soliqdan ozod qilinsin.

4. Mulkchilik shakllaridan qatʼi nazar, (spirtli, spirtsiz ichimliklar, zargarlik va tamaki mahsulotlari ishlab chiqaruvchi korxonalar bundan istisno) aksiz soligʻining bir qismi korxonalar ixtiyorida qoldirilib, ana shu mablagʻlar ishlab chiqarishni yanada rivojlantirishga sarflansin.

Oʻzbekiston Respublikasining Moliya vaziriga Oʻzbekiston Respublikasi Davlat soliq qoʻmitasi bilan kelishgan holda aksiz soligʻi miqdorlarini belgilash va qayta koʻrib chiqish hamda korxonalar ixtiyorida qoldiriladigan ulushni belgilash huquqi berilsin.

5. Oʻzbekiston Respublikasi Davlat soliq qoʻmitasi Oʻzbekiston Respublikasining Moliya vazirligi bilan kelishgan holda soliq olishda mazkur qarordan kelib chiqadigan oʻzgarishlar munosabati bilan budjetga toʻlovlar boʻyicha korxonalar va tashkilotlarning hisob-kitoblar tartibini ishlab chiqsin.

6. Ushbu qarorning bajarilishini nazorat qilish Bosh vazir oʻrinbosari — Moliya vaziri oʻrtoq B.S. Hamidov zimmasiga yuklansin

Eng oddiy roʻzgʻor va xoʻjalik mollari

Bogʻ-poliz asboblari va anjomlari

Qulf-xalqa buyumlari

Roʻzgʻor asboblari

Kimyo-boʻyoqchilik mollari

Moʻyqalam-choʻtka buyumlari, jumladan, oʻquvchilar uchun moʻljallanganlari

Idoraviy mollar

Maktab anjomlari va uskunalari

Bolalar oʻyinchoqlari, qoʻgʻirchoqlar va archa bezaklari

Bolalar texnika ijodkorligi buyumlari

Yozuv qogʻozlari

Elektr-isitish asboblari va buyumlari

Elektr uskunalari

Elektr-roʻzgʻor asbobi

Shaxsiy gigiyena uchun va eng zarur attorlik mollari

Attorlik yordamchi ashyolari

Xotin-qizlar buyumlari

Xalq badiiy hunarmandchilik buyumlari

Roʻzgʻor ehtiyojlari uchun santexnika buyumlari

Metall buyumlar, shurup va mixlar, boshqa mahkamlash buyumlari

Roʻzgʻor suv isitkichlari, isitish asboblari va radiatorlar

Mahalliy xomashyo va yogʻochsozlik chiqindilaridan tayyorlanadigan taxta