1. Oʻzbekiston Respublikasi Ichki ishlar idoralari shon-shuhrat, jasorat va eʼtiqod ramzi — Jangovar Bayrogʻining yagona nusxasi belgilansin.

2. Oʻzbekiston Respublikasi Ichki ishlar idoralarining Jangovar Bayrogʻi toʻgʻrisidagi Nizom, uning tavsifi va Yorliq ilovaga muvofiq tasdiqlansin.

1. Oʻzbekiston Respublikasi Ichki ishlar idoralarining Jangovar Bayrogʻi shon-shuhrat, jasorat va eʼtiqod ramzidir. U Oʻzbekiston Respublikasi Ichki ishlar idoralarining har bir xodimini xalqiga va jonajon Vataniga sadoqat bilan xizmat qilish, pok vijdonli boʻlish, Oʻzbekiston Respublikasining manfaatlarini, fuqarolarining shaxsini, huquqlarini jinoiy tajovuzlardan muhofaza qilishdek oʻz zimmasiga yuklatilgan xizmat burchlarini bor kuchi va bilimini, zarur boʻlsa hayotini ham ayamasdan mardlik va matonat bilan ado etishga daʼvat etadi.

2. Oʻzbekiston Respublikasi Ichki ishlar vazirligiga Jangovar Bayroq Oʻzbekiston Respublikasi Prezidenti vakili tomonidan, Ichki ishlar idorasiga va oʻquv yurtiga esa Oʻzbekiston Respublikasi Prezidenti nomidan Oʻzbekiston Respublikasi Ichki ishlar vaziri yoki uning vakili tomonidan yorliq bilan birgalikda tantanali raviщda topshiriladi.

3. Jangovar Bayroq doimiy ravishda ichki ishlar idorasida belgilangan maxsus joyda saqlanadi.

4. Jangovar Bayroq ichki ishlar idoralarining nomi oʻzgarishidan qatʼiy nazar, doimiy saqlanadi. Basharti idora nomi oʻzgarsa, bu haqda Oʻzbekiston Respublikasi Prezidenti tomonidan Bayroq topshirilayotganda beriladigan Yorliqqa shu haqda tegishli oʻzgartirishlar yozib qoʻyiladi.

5. Bayroqni tantanali marosimlarga olib chiqish, joyiga oʻrnatish va uni asrash tartibi Ichki ishlar vazirligining harakatdagi Nizomlari asosida amalga oshiriladi.

6. Ichki ishlar idoralarining shaxsiy tarkibi Jangovar Bayroqni doimo koʻz qorachigʻidek asrashi zarur. Jangovar Bayroq yoʻqolgan taqdirda, bu sharmandalikda aybdor xodimlar va idora boshligʻi qonun asosida jazolanadilar.

Oʻzbekiston Respublikasi ichki ishlar idorasi Jangovar Bayrogʻi ikki tomonlama mato, dasta va shokilali popugdan iborat boʻlib, uning uch tomoni 9 santimetrli gajm bilan tikib chiqiladi.

Oʻzbekiston Respublikasining Davlat bayrogʻi Oʻzbekiston Respublikasi Ichki ishlar vazirligi idoralari Jangovar Bayrogʻining asosi hisoblanadi.

Jangovar Bayroq butun uzunligi boʻylab oʻtgan toʻq moviy rang, oq rang va toʻq yashil rangli uchta endan tarkib topgan toʻgʻri toʻrtburchak shakldagi matodir.

Jangovar Bayroqning uzunligi 160 santimetrga, kengligi 103 santimetrga teng. Moviy, oq va yashil rangli enlar kengligi bir xil. Har bir enning kengligi 33 santimetr. Bayroqning oʻrtasida joylashtirilgan oq rangli enning chetlaridan kengligi 2 santimetrga teng qizil hoshiyalar oʻtkazilgan.

Jangovar Bayroqning yuqori qismidagi moviy rangli enning oldi va orqa tomonida, dastaga yaqin joyida oq rangli yarim oy va uning yonida oʻn ikkita oq rangli besh qirrali yulduz tasvirlangan.

Yarim oy va yulduzlarning tasviri moviy rangli yuqori enning oʻrtasidan 45 x 20 santimetrga teng toʻgʻri toʻrtburchakka sigʻadigan qilib joylashtirilgan.

Yarim oy vertikal holatda doʻng tomoni dastaga qaratilgan, dastadan 10 santimetr masofada joylashtirilgan boʻlib, diametri 20 santimetrli doiraga sigʻadi.

Yulduzlar diametri 4 santimetrli doiraga sigʻadi. Doiralar orasidagi masofa 2 santimetr. Yulduzlar uzunasiga va tikkasiga quyidagi tartibda joylashadi: yuqori qatorda uchta, oʻrta qatorda toʻrtta va quyi qatorda beshta yulduz. Quyi qatordagi yulduzlar yarim oyning pastki uchidan 2 santimetr masofada joylashadi.

Jangovar Bayroqning yuz tomonidagi oq rangli yoʻliga lotin yozuvi asosidagi oʻzbek alifbosida “VATAN VA XALQ MANFAATINI HIMOYA QILISH MUQADDAS BURCHDIR” shiori hamda bayroqning orqa tomoniga “OZBEKISTON RESPUBLIKASI ICHKI ISHLAR VAZIRLIGI” degan yozuvlar oltin hoshiyali ipak bilan tikiladi.

Jangovar Bayroqning orqa tomonidagi oq rangli yoʻliga topshirilayotgan ichki ishlar idorasining nomi tikib yoziladi. Harflar kattaligi 9 santimetr, ichki ishlar idorasi nomidagi soʻzlarga qarab 5 santimetrgacha qisqartirilishi mumkin.

Jangovar Bayroqning dastasi yogʻochdan yasalgan boʻlib diametri 4 santimetr, uzunligi 2,2 metr, yogʻoch dasta laklangan va pastki qismi 10 santimetrli temir gardishga mahkamlanadi, yuqori uchli qismiga nikellangan uchburchak oysimon shakldagi tugʻ kiydiriladi. Bayroqni tepa qismidan eshilgan ipakli popug pastga qarab osilib turadi, uning uzunligi 246 santimetrdan iborat boʻladi.