«Аҳоли бандлиги тўғрисида»ги Ўзбекистон Республикаси Қонунининг 9-боби ҳамда Вазирлар Маҳкамасининг 2017 йил 5 декабрдаги 965-сонли қарори билан тасдиқланган «Ижтимоий муҳофазага муҳтож, иш топишда қийналаётган ва меҳнат бозорида тенг шартларда рақобатлаша олмайдиган шахсларни ишга жойлаштириш учуниш ўринларининг энг кам сонини белгилаш ва захирага қўйиш тартиби тўғрисида»ги Низомга асосан 2026 йил учун иш ўринларини банд қилиб қўйиш мақсадида, Ўзбекистон Республикаси «Маҳаллий давлат ҳокимияти тўғрисида»ги қонунининг 6, 21¹-моддаларига асосан, қарор қиламан:

1. Ўзбекистон Республикаси Президентининг 2025 йил 4 августдаги ПФ-126-сонли фармонига мувофиқ:

хўжалик юритувчи субъектларда ногиронлиги бўлган шахслар, оилавий (маиший) зўравонликдан жабрланган шахслар, камбағал оилалар реестридаги оилалар аъзолари, муқобил жойлаштириш шаклларида тарбияланган етим шахслар ва ота-она қарамоғидан маҳрум бўлган шахслар учун иш ўринларининг мажбурий захиралари шакллантирилади. Бунда мажбурий захиралаш ходимлар умумий сонининг 3 фоизидан ошмаслиги, шунингдек ходимлари сони 100 нафардан ортиқ бўлган ташкилотларга нисбатан татбиқ этилиши белгиланганлиги;

бюджет ташкилотлари ҳамда давлат улуши 50 фоиздан юқори бўлган корхоналарда эса юқорида кўрсатилган тоифалардан ташқари, жазони ижро этиш муассасаларидан озод қилинган ҳамда одам савдосидан жабрланган шахслар учун ҳам иш ўринларининг мажбурий захиралари шакллантирилади. Бунда мажбурий захиралаш ходимлар умумий сонининг 7 фоизидан ошмаслиги ҳамда ходимлари сони 20 нафардан ортиқ бўлган ташкилотларга нисбатан татбиқ этилиши белгиланганлиги раҳбарлик ва ижро учун қабул қилинсин.

2. Нурафшон шаҳри Камбағалликни қисқартириш ва бандликка кўмаклашиш бўлими ҳамда «Инсон» ижтимоий хизматлар маркази шаҳар ҳудудидаги ташкилотлар бўйича 2026 йилда аҳолининг ижтимоий эҳтиёжманд тоифалари учун иш ўринларини белгилаш тўғрисидаги таклифлари маъқуллансин.

Бунда, ходимлар сони 20 нафардан ортиқ бўлган давлат ташкилотларида мажбурий захираланадиган иш ўринлари сони ходимлар умумий сонининг етти фоизидан ошмаган миқдорда ҳамда ходимлар сони 100 нафардан ортиқ бўлган хўжалик юритувчи субъектларда (давлат улуши 50 фоиздан юқори бўлган корхоналар бундан мустасно) мажбурий захираланадиган иш ўринлари сони ходимлар умумий сонининг уч фоизидан ошмаган миқдорида келгуси йил учун 103 та иш ўринларини захирага қўйиш, жумладан:

ногиронлиги бўлган шахслар учун 8,73 фоиз (9 киши);

оилавий (маиший) зўравонликдан жабрланган шахслар учун 2,91 фоиз ( 3 киши);

камбағал оилалар реестридаги оилаларнинг аъзолари учун 78,64 фоиз ( 81 киши);

муқобил жойлаштириш шаклларида тарбияланган етим ва ота-она қарамоғидан маҳрум бўлган шахслар учун 4,85 фоиз (5 киши);

жазони ижро этиш муассасаларидан озод қилинган шахслар учун 4,87 фоиз (5 киши);

ходимлар сони 20 нафардан ортиқ бўлган давлат ташкилотларида мажбурий захираланадиган иш ўринлари сони ходимлар умумий сонининг 7 фоизигача миқдорда иш ўринларининг мажбурий захиралари шакллантирилади.

3. 2026 йилда аҳолининг ижтимоий эҳтиёжманд тоифаларини ишга жойлаштириш мақсадида қуйидагилар:

давлат ташкилотлари (бюджет ташкилотлари ва давлат улуши 50 фоиздан юқори бўлган корхоналар) томонидан мажбурий захира қўйиладиган иш ўринларининг манзилли рўйхати 1-иловага мувофиқ;

ходимларининг ўртача йиллик сони 100 нафардан ортиқ бўлган хўжалик юритувчи субъектлар (давлат улуши 50 фоиздан юқори бўлган корхоналар бундан мустасно) томонидан мажбурий захира қўйиладиган иш ўринларининг манзилли рўйхати 2-иловага мувофиқ тасдиқлансин.

4. Корхоналар, ташкилотлар ва муассасалар раҳбарлари:

захирага қўйиладиган иш ўринлари умумий сонининг камида 25 фоизи миқдорида иш ўринларини йил бошланишидан олдин, ўн кундан кечиктирмай тайёр ҳолатга келтирсин ва бу ҳақда шаҳар Камбағалликни қисқартириш ва бандликка кўмаклашиш бўлимини хабардор қилсин;

иш ўринларининг қолган қисмини биринчи чорак давомида тўлиқ захирага қўйсин ҳамда бу ҳақда чорак якунидан сўнг 10 кун ичида юқоридаги бўлимни хабардор қилсин;

ишга жойлаштириш жараёнлари тўғрисида ҳар ойда, ҳисобот ойидан кейинги ойнинг 5-санасига қадар маълумот тақдим этиб борсин.

Захирага қўйиладиган иш ўринларини сақлаш шартлари Ўзбекистон Республикасининг «Аҳоли бандлиги тўғрисида»ги қонунининг 40-моддасига мувофиқ амалга оширилади.

5. Ўзбекистон Республикаси Президентининг 2025 йил 14 февралдаги ПҚ-64-сон қарорига мувофиқ, аҳолининг ижтимоий эҳтиёжманд тоифаларидан бўлган шахсларни белгиланган энг кам миқдордан ортиқ миқдорда ишга қабул қилган иш берувчиларга ҳар бир ходим учун 12 ой давомида ҳар ой базавий ҳисоблаш миқдорининг 2 баравари миқдорида субсидия маблағлари тўлаб берилсин.

6. Ўзбекистон Республикасининг «Аҳоли бандлиги тўғрисида»ги қонунининг 3, 13, 34, 38, 39, 40, 41-моддаларига асосан аҳолининг ижтимоий эҳтиёжманд тоифаларига энг кам миқдордаги иш жойларини яратиш юзасидан қабул қилинган мазкур қарорни бажармаганлик учун иш берувчилар қонунчиликда белгиланган тартибда жавобгарликка тортилади.

7. Ўзбекистон Республикаси Вазирлар Маҳкамасининг 2017 йил 5 декабрдаги 965-сонли қарори билан тасдиқланган «Ижтимоий муҳофазага муҳтож, иш топишда қийналаётган ва меҳнат бозорида тенг шартларда рақобатлаша олмайдиган шахсларни ишга жойлаштириш учун иш ўринларининг энг кам сонини белгилаш ва захирага қўйиш тартибини янада такомиллаштириш чора-тадбирлари тўғрисида»ги низомнинг 21-банди, 2-қисмига асосан, муҳтожлар учун иш ўринларини захирага қўйиш бўйича шаҳар ҳокимининг қарори бажарилмаганлиги учун жарима тўлаш ташкилотни захирага қўйиладиган иш ўринларининг белгиланган сонини яратиш бўйича мажбуриятдан озод қилмайди.

8. Нурафшон шаҳри Камбағалликни қисқартириш ва бандликка кўмаклашиш бўлими (М. Худайкулов):

беш кун муддатда ушбу қарор нусхасини 1- ва 2-иловаларда кўрсатилган ташкилотлар раҳбарларига етказсин;

ушбу қарор ижросини таъминласин ва унинг бажарилиши устидан мунтазам назорат олиб борсин;

қарор талабларини бажармаган ёки ижтимоий эҳтиёжманд тоифаларни асоссиз равишда ишга қабул қилишдан бош тортган мансабдор шахсларни маъмурий жавобгарликка тортиш чораларини кўрсин.

9. Мазкур қарор оммавий ахборот воситаларида эълон қилинсин ҳамда ҳокимликнинг расмий веб-сайтига жойлаштирилсин.

10. Мазкур қарор қабул қилинган кундан кучга киради.

11. Ушбу қарорнинг бажарилишини назорат қилиш шаҳар ҳокимининг биринчи ўринбосари А. Эшбаев зиммасига юклансин.