Ўзбекистон Республикасининг 2011 йилдаги «Географик объектларнинг номлари тўғрисида»ги ЎРҚ-303-сонли Қонуни ва Вазирлар Маҳкамасининг 2012 йил 16 октябрдаги «Географик объектларнинг номлари тўғрисида»ги Ўзбекистон Республикаси Қонунига мувофиқ, географик объектларнинг номлари соҳасидаги ишларни тартибга солиш чора-тадбирлари ҳақида»ги 295-сонли қарори ижросини таъминлаш, шунингдек, географик объектларни номлаш ва қайта номлаш соҳасидаги давлат сиёсатини янада такомиллаштириш ҳамда самарали амалга ошириш мақсадида Ўзбекистон Республикаси «Маҳаллий давлат ҳокимияти тўғрисида»ги қонунининг 6- ва 24-моддаларига мувофиқ Халқ депутатлари туман Кенгаши қарор қилади:

1. Ўзбекистон Республикаси Иқтисодиёт ва молия вазирлиги ҳузуридаги Кадастр агентлиги директорининг ўринбосари, Географик объектларга ном бериш ва уларни қайта номлаш тўғрисидаги таклифларни давлат экспертизасидан ўтказиш эксперт комиссияси раиси Т.М. Абдуллаевнинг 2025 йил 12 сентябрдаги 05-19-15747-сонли экспорт хулосаси, комиссия йиғилиш баёни ҳамда туман ҳокимининг маънавий-маърифий ишлар самарадорлигини ошириш, давлат тили тўғрисидаги қонун ҳужжатларига риоя этилишини таъминлаш масалалари бўйича маслаҳатчиси Н. Усмонованинг ахбороти маълумот учун қабул қилинсин.

2. Географик объектларга ном бериш ва уларни қайта номлаш тўғрисидаги таклифларни давлат экспертизасидан ўтказиш эксперт комиссиясининг иловада келтирилган қонун талабларига мувофиқ деб топилган 857 та географик объект номларига берилган эксперт хулосаси маъқуллансин.

3. Туман ички ишлар бошқармаси (Ж. Каримов), тумандаги барча маҳаллалардаги қайта номланган кўчаларга ва тегишли йўл белгиларига ўзгартиришлар киритиш билан боғлиқ ташкилий ишларни амалга оширсин.

4. Ўзбекистон маҳаллалари уюшмаси туман бўлими (Б. Худойбердиев), туман ободонлаштириш бошқармаси (С. Эргашев)га, географик объектларнинг тасдиқланган номлари барча ҳужжатларда бирхиллаштирилсин ва ушбу номлар акс этган пешлавҳалар ва бошқа кўрсаткичлардаги ёзувларни давлат тилида (лотин ёзувига асосланган ўзбек алифбосида) ёзилиши таъминлаш ҳамда айрим кўчаларнинг янгидан номланиши муносабати билан аҳоли ўртасида тарғибот-ташвиқот ишларини ўтказиш тавсия этилсин.

5. Туман кадастр ва туман статистика бўлимларига янги номланган ва номи ўзгарган географик объектларни туман харитасига жойлаштириш, шунингдек, тегишлича туман статистика маълумотларига ўзгартиришлар киритсин.

6. «Географик объектлар тўғрисида»ги ЎРҚ-303-сонли Қонуннинг 16-моддасига кўра географик объектларни номлаш ва қайта номлаш масалалари бўйича туман комиссиясига ушбу географик объектларга ном берилганлиги ва уларнинг номлари ўзгартирилганлиги тўғрисидаги ҳужжатларни Географик объектлар номларининг давлат реэстрига киритиш учун 10 кун муддатда Ўзбекистон Республикаси Ергедезкадастр Давлат қўмитасига тақдим этиш вазифаси топширилсин.

7. «Географик обеклар тўғрисида»ги ЎРҚ-303 сонли Қонуннинг 20-моддасига кўра Аҳоли пунктларининг таркибий қисмларига ном бериш ва уларнинг номларини ўзгартириш тегишли маҳаллий бюджет ҳисобидан амалга оширилиши кўрсатилган. Қонунга кўра, туман иқтисодиёт ва молия бўлими (И. Назаров)га белгиланган тартибда молиялаштириш вазифаси юклатилсин.

8. Туман ҳокимлиги ахборот хизмати Ўзбекистон Республикаси «Географик объектларнинг номлари тўғрисида»ги ҳамда «Давлат тили тўғрисида»ги Қонунлари талаблари асосида ушбу олиб борилган ишларни оммавий-ахборот воситаларида ёритиб бориш тавсия этилсин.

9. Мазкур қарорнинг ижросини назорат қилиш халқ депутатлари тумани Кенгашининг Коррупцияга қарши курашиш ва хавфсизлик масалалари бўйича доимий комиссияси (М. Исаков) ва Маънавий-маърифий ишлар самарадорлигини ошириш, давлат тили тўғрисидаги қонун ҳужжатларига риоя этилишини таъминлаш масалалари бўйича туман ҳокими маслаҳатчи Н. Усмонова зиммасига юклатилсин.